1. 1) ¿Imaynasmantataj runas kamachiykunata japʼikunku, imaraykú? 2) ¿Imatataj jatunchakojkuna ruwanku pipis yuyaychajtin?

RUNASQA kamachiykunata mana kikintachu japʼikunku. Wakenqa atiyniyoj kajkunaj kamachisqankuta kasukunkupacha, paykuna jinalla kajkunaj yuyaychasqankutataj chay rato qhesachanku. Chantapis, mana chayman jina ruwayta munaspa phiñakunku, llakikunku chayri pʼenqakunku. Chaywanpis wakenqa sumajta japʼikunku, kallpachakunkutaj chayman jina ruwanankupaj. ¿Imaraykutaj wakin runas kamachiykunata mana japʼikullankuchu? Jatunchakusqankurayku. Arí, uj yuyaychay mana paykunapaj jinachu kasqanta yuyasqankurayku, mana yanapachikunkuchu (Pro. 16:18).

2. ¿Imaraykutaj cheqa cristianos Diospa Palabranpi tarikoj yuyaychaykunata sumajpaj qhawanchej?

² Cheqa cristianostajrí, yuyaychaykunata sumajpaj qhawanchej, astawanraj Diospa palabranman jina kajtenqa. Imaraykuchus Jehovaj kamachisqanqa sumajta yuyaychawanchej, yachachiwanchejtaj. Chantapis yanapawanchej qhapajyayta munayman, khuchichakuyman ima mana urmanapaj, chantá drogasta chayri machachej ujyanasta qhesachanapaj (Pro. 20:1; 2 Cor. 7:1; 1 Tes. 4:3-5; 1 Tim. 6:6-11). Astawanpis, Diospa kamachisqanta kasukusqanchejrayku “tukuy sonqowan sumajta” kusirikunchej (Isa. 65:14).

3. ¿Imatá uj salmistamanta yachakusunman?

³ Tatanchej Jehovamanta mana karunchakunapajqa kamachiwasqanchejman jinallapuni kausakuna. Sumaj kanman uj salmista jina yuyananchej, pay kay jinata nerqa: “Kamachisqasniykita herenciaypaj wiñaypaj japʼikapuni; kamachisqasniykeqa sonqoyta kusichinku”, nispa (Sal. 119:111). ¿Salmista jinachu Jehovaj kamachisqanmanta yuyanchej? Chayri, ¿mana juntʼay atina kasqantachu wakin kuti yuyanchej?  Wakin kuti yuyaychawasqanchejman jina ruwayta mana atejtinchejpis, kasukunapaj kallpachakunallapuni. ¿Imaynamantá Dios imatachus kamachiwasqanchej allinninchejpajpuni kasqanpi astawan atienekusunman? Kinsamanta parlarina.

4. ¿Imatataj David ruwarqa imapi rikukuspapis?

⁴ Rey Davidqa llakiypipis kusiypipis Jehovapipuni atienekorqa. Pay nerqa: “Tukuy sonqo, tukuy alma qanman chimpamuyki. Qampi atienekuni”, nispa (Sal. 25:1, 2). ¿Imataj Davidta yanaparqa Jehovapi tukuy sonqo atienekunanpaj?

5, 6. ¿Imatataj Biblia nin David Dioswan masichakusqanmanta?

⁵ Ashkha runasqa chʼampaykunapi rikukuspalla Diosmantaqa mañakunku. ¿Imatá yuyawaj uj amigoyki qolqemanta pisichikojtillan chayri imapi yanapanaykita munajtillan maskʼasojtin? Jina kajtenqa ichapis chayraykulla maskʼasusqanta yuyawaj. Davidqa mana ajinachu karqa. Payqa llakiypi chayri kusiypi rikukuspapis Jehovata munakusqanta, paypi atienekusqanta ima rikucherqa (Sal. 40:8).

⁶ Davidqa Jehovata agradecekuspa, jatunchaspa ima kay jinata nerqa: “Señorniyku Tata Dios, sutiykeqa may jatunmin tukuy kay pachapi. Jatun kayniykita janaj pacha patapi churarqanki”, nispa (Sal. 8:1). Rikunchej jina, Davidqa Jehovawan sumajta masichakorqa. Chayrayku jatun kayninpi tʼukurerqa, “tukuy pʼunchaytaj” jatunchayta munarqa (Sal. 35:28).

7. ¿Imaynatataj Diosmanta mañakuy yanapawanchej?

⁷ Noqanchejpis David jinallataj Jehovawan sapa kuti parlarinanchej tiyan, ajinamanta paypi astawan atienekusun. Biblia nin: “Diosman astawan qayllaykuychej; paypis qayllamusonqachej”, nispa (Sant. 4:8). Diosmanta mañakuspaqa payman astawan qayllaykunchej, chay jinamantataj espíritu santonta japʼinchej (1 Juan 3:22 leey).

8. ¿Imaraykutaj Diosmanta mañakushaspa mana kikin rimaykunata oqharinachu?

⁸ ¿Kikin rimaykunallatapunichu Diosmanta mañakushaspa oqharinchej? Ajinata ruwashanchej chayqa niraj mañakushaspa imatachus ninanchejpi uj chhikanta tʼukurina. Sutʼincharinapaj, ¿imataj kanman uj amigoykiwan chayri familiaykimanta pillawanpis sapa kuti kikin rimaykunallawanpuni parlajtiyki? Ichapis manaña uyariyta munasonqachu. Jehovaqa cheqa sonqo kamachisnin tukuy sonqo mañakusqankuta ni jaykʼaj qhesachanqachu. Chaywanpis Paymanta mañakushaspaqa mana kikin rimaykunallatapunichu oqharinapaj kallpachakuna.

9, 10. 1) ¿Imasmantataj mañakusunman? 2) ¿Imataj yanapawasun Jehová uyarinawanchejpaj jina mañakunapaj?

⁹ Jehovaman qayllaykuyta munaspaqa imachus sonqonchejpi, yuyayninchejpi ima kasqanta willananchej tiyan. Ajinata ruwaspaqa Paypi astawan atienekusun. Chaywanpis, ¿imasmantataj mañakusunman? Biblia nin: “Diosmanta mañakuspaqa, imatachus munasqaykichejta mañakuychej, tukuy imamanta graciasta qospallapuni”, nispa (Fili. 4:6). Arí, kausayninchejpi chayri Diosta yupaychayninchejpi imaspichus rikukusqanchejmanta mañakuyta atinchej.

¹⁰ Ñaupa tiempo cheqa sonqo runaspa mañakuyninkuta ukhunchaypis, yanapallawasunmantaj (1 Sam. 1:10, 11; Hech. 4:24-31). Salmos libropeqa Diosmanta tukuy sonqo mañakusqanku, payman takisqanku ima qhelqasqa kashan.  Chaykunapitaj llakisqa chayri kusisqa tarikusqanku rikukun. Chay nisqankuta ukhunchayqa Jehová uyarinawanchejpaj jina mañakunapaj yanapawasun.

11. ¿Imaraykutaj Bibliaj yuyaychaykunasninpi tʼukurinanchej tiyan?

¹¹ David nerqa: “Tata Diospa kamachisqanqa cheqampuni; yachayniyojman tukuchin mana yachayniyojta”, nispa (Sal. 19:7). Arí, mana yachayniyoj kaspapis, Diospa kamachisqanta kasukuspaqa yachayniyojman tukusunman. Chaywanpis, Bibliaj yuyaychaykunasnin astawan yanapanawanchejpajqa wakin kuti sumajta tʼukurinanchej tiyan. Sutʼincharinapaj, yachay wasipi chayri llankʼaypi mana juchaman urmanapaj, yawarmanta imatachus Biblia nisqanta kasukunapaj, mana kay pachaman chhapukunapaj, Bibliaj yuyaychasqanman jina pʼachallikunapaj chayri kʼachanchakunapaj yanapawanchej. Chaykunamanta imatachus Dios yuyasqanta ñaupajmantaña tʼukureyqa wakichisqa kanapaj yanapawasun. Chaytaj llakiykunapi rikhurinamanta jarkʼawasunman (Pro. 15:28).

12. ¿Ima tapuykunapitaj tʼukurinanchej tiyan Jehovaj kamachiykunasninta kasukunapaj?

¹² Noqanchejqa imastachus Dios nisqanta juntʼananta suyakushanchej. Chaywanpis, ¿rikuchishanchejchu paypi atienekusqanchejta, rijchʼarisqataj kasqanchejta? Kaykunata tapurikuna: “¿Cheqamantachu Jatun Babilonia tumpamantawan chinkachisqa kananpi creeni? Bibliamanta yachakuyta qallarishajtiy Jallpʼapi paraíso kananpipuni creerqani, ¿ajinallatapunichu kunankamapis creeshani? Munaynillayta ñaupajman churanaymanta, ¿tukuy sonqollapunichu willashani? ¿Imatataj yuyani wañusqas kausarimunankumanta, Jehovaj kamachiynin jatunchasqa kananmanta, sutintaj llimphuchasqa kananmanta? ¿Sumajllapajpunichu chaykunata qhawashani?”, nispa. Chay tapuykunapi tʼukureyqa salmista jina yuyanapaj yanapawasun, pay nerqa: “Kamachisqasniykita herenciaypaj wiñaypaj japʼikapuni”, nispa (Sal. 119:111).

13. ¿Imaraykutaj ñaupa cristianos wakin imasta mana entiendeyta aterqankuchu? Sutʼinchariy.

¹³ Bibliaj nisqanmanta wakin imastaqa ichapis manaraj sutʼita entiendenchejchu. Imaraykuchus Jehová manaraj chaykunata sutʼinchanchu. Jesuspis apostolesninman ashkha kutispi nerqa ñakʼarinan, wañunan ima kasqanta (Mateo 12:40; 16:21 leey). Apostolesnintajrí, mana chayta sutʼita entienderqankuchu. Chaytaqa Jesús wañuymanta kausarimojtinraj entienderqanku, maypachachus aychallikuspa wakin yachachisqasninman rikhurerqa, paykunamantaj “Diosmanta Qhelqasqata sutʼincharqa allinta entiendenankupaj”, chaypacha (Luc. 24:44-46; Hech. 1:3). Jinallataj, Diospa Reinon janaj pachapi sayarichisqa kanantaqa Pentecostés 33 watapi espíritu santowan juntʼasqa kasqankutawanraj entienderqanku (Hech. 1:6-8).

14. ¿Imatataj hermanos 1900 watas chaynejpi ruwarqanku suyakusqanku mana juntʼakojtin?

¹⁴ Kay 1900 watas chaynejpipis, cheqa cristianosqa “qhepa” pʼunchaykunamanta pantasqata yuyarqanku (2 Tim. 3:1). Sutʼincharinapaj, wakenqa 1914 watapi janaj pachaman ripunankuta yuyarqanku. Chay suyakusqanku mana juntʼakojtintaj, Bibliata sumajta ukhunchaspa Jallpʼantinpiraj willakunan kasqanta repararqanku (Mar. 13:10). Chayrayku, 1922 watapi hermano Joseph F. Rutherford, pichus chay tiempopi willayta umachasharqa, kayta nerqa: “¡Qhawariychej, Reyqa kamachishan!  Qankunataj willajkunasnin kankichej. Chayrayku Reymanta, reinonmantawan, willamuychej, willamuychej, willamuychejpuni”, nispa. Chaytaj karqa Cedar Point (Ohio, Estados Unidos) llajtapi ashkha suyuspaj jatun tantakuy ruwakusqanpi. Chay kutimantapacha Jehovaj testigosnenqa “Janaj pacha reinomanta evangelio[ta]” willasqankurayku rejsisqa kanku (Mat. 4:23; 24:14).

15. ¿Imaynatataj Jehová llajtanrayku imastachus ruwasqanpi tʼukuriy yanapawanchej?

¹⁵ Jehová ñaupa tiempopi, kay tiempopipis llajtanrayku imastachus ruwasqanpi tʼukureyqa may sumaj. Chaypi tʼukurispaqa qhepamanpis munayninta juntʼananpi astawan atienekusunman. Chantapis, profeciasnin juntʼakunanmanta mana iskayrayanchejchu, nisqasninpitaj astawan atienekunchej.

16. ¿Ima bendicionestataj japʼinchej Diospaj mayta llankʼasqanchejrayku?

¹⁶ Jehová Diosninchejqa may atiyniyoj, maytataj llankʼashan. Uj salmista kay jinata nerqa: “Pitaj qan jina atiyniyojri? Cheqa kaywan muyuykusqa kanki”, nispa (Sal. 89:8, 13). Chayrayku Jehovaqa paypaj mayta llankʼasqanchejta rikuspa kusikun, bendeciwanchejtaj. Payqa kamachisnin qharispis, warmispis, jovenespis chayri machituspis kachunku mayta llankʼashasqankuta rikun. Arí, ni mayqen “jaykʼajpis mikhuykullanchu mana paypa ganakusqantaqa” (Pro. 31:27). Jehovaj kamachisnenqa pay jina ruwanku, payta yupaychanankupajtaj mayta kallpachakunku. Chayta ruwasqankuraykutaj sonqo juntʼasqa kausakunku, Jehovapis kusiywan paykunata bendicen (Salmos 62:12 leey).

17, 18. ¿Imaraykutaj Jehovata kasukusqanchej paypi astawan atienekunapaj yanapawanchej? Sutʼinchariy.

 ¹⁷ ¿Imaynamantataj creeyninchejta rikuchisqanchej, Jehovapi astawan atienekunapaj yanapawanchej? Israelitasmanta parlarina. Paykunaqa Sumaj Jallpʼaman yaykunankupajña kasharqanku, Jehovataj arcanta apaj sacerdotesta kamacherqa Jordán mayunta chimpanankuta. Mayuman qayllaykuspataj, paray tiempo kasqanrayku mayu wasaykusqanta rikorqanku. ¿Imatá israelitas ruwarqanku? ¿Mayu kantupichu semanasta suyankuman karqa yaku pisiyanankama? Mana. Paykunaqa Jehovapi atienekorqanku, kamachisqantataj kasukorqanku. ¿Imataj chayrayku karqa? Biblia nin: “Mayuman sacerdotes chayaspa yaku kantuman saruykusqankutawan chakisninku joqʼochakojtinkama, pata mayumanta jamoj yakoqa kikimpi sayaykorqa qocha jina, [...] sacerdotespis khuskan mayupi chʼaki jallpʼapi sayaykorqanku tukuynin israelitas chaynejta chimpanankukama”, nispa (Jos. 3:12-17). Israelitasqa yaku kikinpi sayaykusqanta rikuspa tʼukullachá qhepakorqanku. Arí, Jehovaj kamachisqanta kasukusqankurayku creeyninku astawanchá sinchʼiyarqa.

¹⁸ Kay tiempopeqa Jehová yanapanawanchejpaj mana chay jina milagrosta ruwanchu. Chaywanpis Paypi atienekusqanchejrayku, kasukusqanchejrayku ima bendeciwanchej. Diosqa atiyninwan Jallpʼantinpi Reinonmanta willananchejpaj sumajta wakichiwanchej. Jesuspis, Jehovaj testigon jina, yachachisqasninman chay jatun llankʼaypi yanapananta nerqa. Chayrayku wañuymanta kausarimuspa kayta nerqa: “Rispa, tukuy laya runasta yachachisqasniyman tukuchimuychej [...]. Chantá yachaychej, noqa qankunawan tuta pʼunchay kasqayta, kay pacha tukukunankama”, nispa (Mat. 28:19, 20). Ashkha hermanosqa runasman willayta manchachikoj kanku. Chaywanpis Diospa espiritun mana manchachikuspa willanankupaj yanapasqanta repararqanku (Salmos 119:46; 2 Corintios 4:7 leey).

19. ¿Imapitaj atienekuyta atinchej imapi rikukuspapis?

¹⁹ Wakin hermanosqa onqoyninkurayku chayri machuyapusqankurayku, niña ñaupajta jinachu imatapis ruwayta atinku. Chaywanpis Jehovaqa “khuyakoj Tata, tukuy imapi sonqochaj Diostaj” kasqanrayku, imaspichus rikukusqankuta yachan (2 Cor. 1:3). Jehovaqa payta yupaychanapaj tukuy imata ruwasqanchejta sumajpaj qhawan. Chantapis, ni jaykʼaj qonqakunachu Cristoj wañuyninpi creespalla salvasqa kayta atisqanchejta (Heb. 10:39).

20, 21. ¿Imaynasmantataj Jehovapi atienekusqanchejta rikuchisunman?

²⁰ Diosta yupaychanapajqa tiemponchejta, kallpanchejta, kapuyninchejta ima churananchej tiyan. Arí, tukuy sonqowan “evangeliota” willarayta munanchej (2 Tim. 4:5). Chayta ruwaspaqa kusisqa kanchej, imaraykuchus runasta yanapanchej cheqa kajta rejsinankupaj (1 Tim. 2:4). Chantapis, Jehovata jatunchay, yupaychay imaqa paypa ñaupaqenpi qhapajyachiwanchej (Pro. 10:22). Jinallataj, Jehovapi sinchʼita atienekunapaj yanapawanchej (Rom. 8:35-39).

²¹ Kay yachaqanapi rikorqanchej jina, Jehová yuyaychawasqanchejpi atienekoyqa mana jinallamantachu rikhurin, manaqa kallpachakunanchej tiyan. Chaypajtaj Jehovamanta yanapata mañakuna, ñaupa tiempopi munayninta juntʼasqanpi tʼukurina, jinallataj qhepaman imaynatachus juntʼananpipis. Chantapis kamachiykunasninta kasukuna. Ajinamanta wiñaypaj kausayta atisunchej.