Kay 1900 watas qallariypi “Paseo por la calle Market” nisqa peliculata ruwakorqa, maypichus San Francisco (Estados Unidos) llajtapi imaynachus kausay kasqanta rikuchikun. Chay peliculata ruwakunanpajqa trenpa ñaupaqenpi uj camarata churakorqa, calle Market nisqapi imaschus kasqanta grabakunanpaj. Chay peliculapeqa caballoswan aysasqa carretas, chay tiempo autos, periodicota vendejkuna ima rikukun, jinallataj waj runaspis, pikunachus rantishanku chayri ruwanasninkupi kashanku.

Chay peliculata qhawaspaqa llakikunchej, imajtinchus chay llajtapi jallpʼa ikhakuy, nina lauray ima kananpajña kashajtin grabakorqa, ichapis abril 1906 watapi. Chay ñakʼareyqa 18 abril killapi karqa, maypichus may chhika runas wañorqanku, chay grabakusqan calletaj may thuñisqa qhepakorqa. Ichapis chay runasmanta wakenqa pisi pʼunchayllataña kausankuman karqa. Scott Miles, pichus chay peliculata ruwajkunaj familianmanta karqa, nerqa: “Chay runasta qhawaspaqa mayta phutikunchej, imaraykuchus kausayninkuwan imachus kananta mana yacharqankuchu”, nispa.

Noqanchejpis runasta rikuspaqa phutikunchej. Paykunaqa sapa pʼunchay ruwanasninkupi kakushanku, nitaj yachankuchu kay sajra pacha tumpitamantawan chinkachisqa kanantaqa, kausayninkuwanpis imachus kananta. Chay jallpʼa ikhakoyqa kaymanta jinalla karqa, chaywanpis Jehovaj juicio pʼunchaynin chamushasqantaqa willayta atinchej. Tukuyninchej sapa semana wasimanta wasi willamunapaj tiempochakunchej. Chaywanpis, ¿astawan willasunmanchu?

Jesusqa runasman willananpaj wakichisqapuni karqa. Payqa maypipis willajpuni, uj kuteqa impuestota cobraj runaman willarqa. Waj kutipitaj chaupi pʼunchaypi samarikushaspa, uj warmiman pujyu qayllapi willarqa (Luc. 19:1-5; Juan 4:5-10, 21-24). Jesusqa samarikunanpaj tiempochakuspapis, wajkunaman yachachinanraykoqa mana samarikojchu. Payqa runasta khuyakusqanrayku tukuy atisqanta willananpaj kallpachakorqa (Mar. 6:30-34). ¿Imaynatataj ashkha hermanos Jesús jinallataj ruwashanku?

Melika sutiyoj hermanaqa uj edificiopi tiyakun, maypichus ashkha runas tiyakunku, nitaj wajkunataqa chayman yaykojta saqekunchu. Chay  edificiopi tiyakojkunaqa waj suyusmanta yachakoj jamojkuna kanku. Chay runaspa sutisninku, celularninkoj numerosninkupis mana chay edificioj listanpi churasqachu kashan. Chay hermanaqa Diosmanta parlarin punkupi taripakojkunaman, jinallataj wicharishaspa chayri uraqashaspa. Pay nin: “Chaypeqa ashkha runasman willayta atini”, nispa. Ashkha qalluspi publicacionesta apaykachasqanraykutaj tratadosta, revistasta ima ashkhataña saqen. Chantapis Internetpi jw.org nisqata rikuchin. Chaynejtataj, ashkha runasmanña Bibliamanta yachachiyta qallarin.

Soniapis, tukuyman willananpaj kallpachakun. Payqa uj hospitalpi llankʼan, tukuy llankʼaj masisninmantaj willayta munarqa. Chayrayku, sapa ujta rejsinanpaj tiempochakorqa. Chantataj, chaupi pʼunchaypi Diosmanta parlarinanpaj kallpachakorqa. Chayta ruwasqanraykutaj, iskay runasman Bibliamanta yachachiyta qallarerqa. Kunanqa samariy horaspi, doctoresta suyashanku chay runasman willayta munashan.

Kay 1906 watapi jallpʼa ikhakuy kasqanpi mana wañojkunamanta ujnin nerqa: “Ni jaykʼaj chay jinaqa waj llajtaspi rikukorqachu”, nispa. Chaywanpis, tumpamantawanqa Diospa pʼunchaynin chayamonqa, chaytaj ni mayqen ñakʼariywan kikinchakonqachu, maypichus “sonqonkupi Diosta qhesachajkunata” chinkachikonqa (2 Tes. 1:8). Jehovaqa mayta suyashan Testigosninpa willasqankuta uyarispa, runas kausayninkuta tijrachinankuta (2 Ped. 3:9; Apo. 14:6, 7).

Noqanchejtaj chay runasta yanapayta atinchej. ¿Imapaj? Qhepa pʼunchaykunapi kausashasqanchejta reparanankupaj, munaynillankuta ruwanankumantataj Jehovata maskʼanankupaj (Sof. 2:2, 3). Chayrayku llankʼaj masisninchejman, vecinosninchejman, sapa pʼunchay tinkukunchej chay runasmanpis, ¿astawan willasunmanchu?