1, 2. ¿Imatataj Diospa Reinon ruwanqa, chantá imaraykutaj chay Reino jamunantapuni nisunman?

 JESUSQA yachachisqasninman “Reinoyki jamuchun” nispa mañakunankuta yachacherqa, chaytaj karqa Capernaum llajta qaylla orqopi, 31 watapi (Mat. 6:10). Kay tiempopeqa ashkha runas mana creenkuchu chay Reino jamunanta. Noqanchejtajrí, chay mañakuyta Dios kutichinantapuni yachanchej.

² Jehovaqa janaj pachapitaj kay Jallpʼapitaj kamachisninta, chay Reinonejta ujchanqa. Chayta ruwayta munasqantaj juntʼakonqapuni (Isa. 55:10, 11). Imaschus pasaj 100 wataspi ruwakusqanqa Jehová kay tiempopipis Rey jinallapuni kamachishasqanta sutʼita rikuchin, jinallataj ancha jatuchaj, tʼukunapaj imasta kamachisninrayku ruwashasqantapis (Zac. 14:9; Apo. 15:3). Chaywanpis, Jehová kay tiempopi Rey jina kamachishasqanqa, Jesús Diospa Reinon jamunanmanta parlasqanwan mana kikinchu. ¿Imapitaj mana kikinchu, imaraykutaj chaymanta yachakunanchej tiyan?

3. 1) ¿Maykʼajtaj chantá maypitaj Jesús Rey jina kamachiyta qallarerqa? 2) ¿Imaynatá sutʼinchawaj Diospa Reinon 1914 watapi kamachiyta qallarisqanta? (Sutʼinchayninta leeriy.)

³ Kay 1880 watas chaynejpi, imatachus profeta Daniel 2.500 watas ñaupajta nisqanta entiendekuyta qallarerqa. Pay ­nerqa:  “Chay reykuna kamachishajtinku, janaj pachapi kaj Dios uj reinota sayarichenqa, chaytaj mana jaykʼajpis chinkachisqachu kanqa”, nispa (Dan. 2:44). Bibliamanta Yachaqajkunaqa 1914 jatun wata kananta ashkha watas ñaupajmantaña nerqanku. Chay tiempo runastaj, sumaj kausay jamunanta suyarqanku. Uj qhelqaj runa nin: “1914 watamanta runasqa sumaj kausay kananta ­suyarqanku”, nispa. Chaywanpis, chay watapi Ñaupaj kaj Guerra Mundial qallarerqa. Ajinamanta Bibliaj profeciasnin juntʼakorqa. Chay watamantapachataj yarqhaykuna, jallpʼa ikhakuykuna, wañuchej onqoykuna ima karqa. Chaykunataj, Jesucristo 1914 watapi Diospa Reinonpi janaj pachapi kamachiyta qallarisqanta rikucherqa. a Jehovaqa wawan Jesucristota Reyta jina churaspa, Rey jinallapuni kamachishasqanta rikucherqa.

4. ¿Imatataj Jesús kamachiyta qallarisqantawan ruwarqa, chantá imatataj Jallpʼapi kamachisninwan ruwayta qallarerqa?

⁴ Jesusqa kamachiyta qallarisqantawan, Tatanpa enemigon Satanaswan maqanakorqa. Jesuswan angelesninwanqa Kuraj Supayta, supaykunasnintawan atipaspa, janaj pachamanta wijchʼumorqanku. Chayraykutaj janaj pachapi jatun kusiy karqa, Jallpʼapitajrí ni jaykʼaj jina ñakʼariykuna ­rikhurerqa (Apocalipsis 12:7-9, 12 leey). Chaymantataj, Jesusqa Jallpʼapi kamachisninta yachachiyta, llimphuchayta, wakichiyta ima qallarerqa. ¿Imapaj? Diospa munayninta ruwanankupaj. Kunanqa Rey Jesusta kamachisnin kasukusqankumanta imatachus yachakusqanchejta qhawarina.

5. ¿Imatataj Jesús ruwarqa 1914 watamantapacha 1919 wata qallariykama?

⁵ Satanás, supaykunasnin ima janaj pachamanta wijchʼumusqa kasqankutawan, Jehovaqa Jesusta kamacherqa Jallpʼapi kamachisninta qhawarispa llimphuchananta. Profeta Malaquiastaj chaymanta parlarqa (Mal. 3:1-3). Chay llimphuchaytaj, 1914 watamantapacha 1919 wata qallariykama ­karqa. b Chayrayku noqanchejpis, Diospa kamachisninmanta kanapajqa juchaman­ta tʼaqasqa, llimphustaj kananchej tiyan (1 Ped. 1:15, 16). Llulla religionman, politicamanpis ni imarayku chhapukunanchejchu tiyan.

6. ¿Pitaj yachachiykunata mikhunata jina qoshawanchej, imaspitaj chay yachachiykuna yanapawanchej?

⁶ Jesusqa Rey kasqanrayku “allin kamachi, yuyayniyoj[ta]” churarqa. Chay kamachitaj, yachachiykunata mikhunata jina mana pisichispa jaywanan karqa. ¿Piku­naman? Jallpʼapi Jesuspa tukuy kamachisninman, pikunachus “uj tropalla” kanku (Mat. 24:45-47; Juan 10:16). Kay 1919 watamantapacha, uj qotu ajllasqa cristianos Jesuspa kamachisninman yachachiykunata mikhunata jina qoshanku. Chay yachachiykunata qowasqanchejtaj creeyninchejta sinchʼiyachin. Chantapis yanapawanchej Diosta yupaychayninchejpi, kausayninchejpi, yuyayninchejpi, cuerponchejpi ima llimphus kanapaj. Astawanpis Jallpʼantinpi willanapaj yachachiwanchej, wakichiwanchej ima. ¿Yanapachikushanchejchu chay yachachiykunawan?

7. ¿Ima sumaj llankʼaytataj Jesús kay Jallpʼapi kashaspa qallarerqa, maykʼajkamataj chayta ruwakunman karqa?

⁷ Jesús Jallpʼapi willayninta qallarishaspa, nerqa: “Wajkunamampis Diospa reinonmanta evangeliota willamunallaytaj tiyan, imaraykuchus chaypaj kachamusqa kani”, nispa (Luc. 4:43). Arí, payqa kinsa  wata khuskanniyojta chaytapuni astawanpis ruwarqa. Yachachisqasninmanpis, kay jinata kamacherqa: “Rispataj, willaramuychej: Diospa janaj pacha reinon qayllamunña”, nispa (Mat. 10:7). Kausarimusqantawantaj, Jesusqa nerqa yachachisqasnin “tukuy kay pachaj kʼuchusninkama” willanankuta (Hech. 1:8). Chay llankʼaypitaj paykunawan tuta pʼunchay kananta nerqa, kay pacha tukukunankama (Mat. 28:19, 20).

8. ¿Imaynatataj Jesús Jallpʼapi kamachisninta willamunankupaj kallpacharqa?

⁸ Kay 1919 watamantapacha, “Janaj pacha reinomanta evangelio” astawan willakuyta qallarerqa (Mat. 24:14). Jesusqa janaj pachapi Rey jina kamachisharqa, Jallpʼapitaj llimphuchasqaña karqanku chay qotu kamachisninta tantarqa. Payqa Reinomanta Jallpʼantinpi willakunanta kamacherqa. Chay qotu kamachisnintaj tukuy sonqo chayta kasukorqanku (Hech. 10:42). Chaytaj sutʼi rikukorqa kay 1922 watapi septiembre killapi. Chay watapeqa Estados Unidospi Cedar Point (Ohio) llajtapi ashkha suyuspaj jatun tantakuy ruwakusqanman, 20.000 runas rerqanku. Chay tantakuypitaj, hermano Joseph F. Rutherford “Reino” nisqa umallirichiypi kayta nerqa: “¡Qhawariychej, Reyqa kamachishan! Qankunataj willajkunasnin kankichej. ­Chayrayku Reymanta, reinonmantawan, willamuychej, willamuychej, willamuychejpuni”, nispa. Chayrayku, chay tantakuypi kajkunamanta 2.000 hermanos jina, tantakusharqanku chay lugarpa muyuyninpi willamorqanku, 72 kilometroskamataj willaspa chayarqanku. Chaytaj “Willamuna Pʼunchay” sutiwan rejsikorqa. Uj hermano nerqa: “Ni jaykʼaj qonqasajchu Diospa Reinonmanta willamunapaj kachasqa kasqaykuta, chaypi kajkunataj kusiywan chayta japʼikorqanku”, nispa. Ashkha hermanospis jinallatataj yuyarqanku.

9, 10. 1) ¿Imastataj ruwakun Reinomanta willajkunata yachachikunanpaj? 2) ¿Imaynatataj qan chay yachachiywan yanapachikunki?

⁹ Kay 1922 watapajqa 58 suyuspi 17.000 willajkunamanta astawanña karqa. Chaywanpis ashkhataraj yachakunanku karqa. Jesusqa Jallpʼapi kashaspa, yachachisqasninman nerqa imamantachus, maypichus chantá imaynatachus willanankuta (Mat. 10:5-7; Luc. 9:1-6; 10:1-11). Kunanpis, Jesusqa imaynatachus chay tiempopi ruwarqa, ajinallatataj kamachisninta yachachishan, willa­munankupajtaj tukuy imawan yanapashan (2 Tim. 3:17). Chaytataj qotuchakuynejta ruwashan. Jallpʼantinpi 111.000 qotuchakuykunapi kajkunaqa, Diosmanta Parlayta Yachanapaj Tantakuywan mayta yanapachikushanku. Chay tantakuy kasqanrayku, qanchis millonesmanta astawan hermanosña Jallpʼantinpi sumajta yachakushanku, imaynatachus tukuy laya runasman willanankuta, yachachinankuta ima (1 Corintios 9:20-23 leey).

¹⁰ Chantapis Diospa llajtanpi escuelasta wakichikun: qotuchakuymanta ancianospaj, precursorespaj, soltero cristianospaj, casarasqa cristianospaj, Sucursalespi Kamachejkunapaj warmisninkupajwan, qotuchakuykunata waturejkunapaj warmisninkupajwan, misionerospaj ima. c Casarasqa Cristianospaj Escuelaman rej hermanos, agradecekuspa kayta nerqanku: “Chay escuelapi yachakusqaykoqa Jehovata astawan munakunaykupaj, wajkunatapis aswan sumajta yanapanaykupaj wakichiwarqayku”, nispa.

11. ¿Imaraykutaj Satanás churanakojtinpis Diospa Reinonmanta willakushallanpuni?

¹¹ Satanasqa Diospa Reinonmanta willaypi, yachachiypi ima mayta kallpachakushasqanchejta rikushan. Chay llankʼayta sayachiyta munaspataj, mana reparayllata chayri sutʼi reparayta imatapis ruwan. Chaywanpis qhasilla. Jehovaqa “Cristota churarqa tukuy kurajkunaj, atiyniyojkunaj, kallpayojkunaj, kamachejkunaj patankuman” (Efe. 1:20-22). Arí, Jesusqa atiyninwan yachachisqasninta jarkʼan, yuyaychantaj; ajinamanta Tatanpa munaynin juntʼakunanpaj. d Chayrayku, sumaj willaykunaqa willakushallanpuni, may chhika llampʼu sonqoyoj runastaj Jehovamanta yachakushanku. Chaypi yanapakuytaj, ¡may sumaj!

12. ¿Imastataj waj jinamanta ruwakun Jesús janaj pachapi kamachiyta qallarisqanmantapacha?

¹² Jesús 1914 watapi kamachiyta qallarisqanmantapacha, Jallpʼapi kamachisninta aswan sumajta wakichishan, Tatanpa munayninta ruwanankupaj (Isaías 60:17 leey). Kay 1919 watapeqa sapa qotuchakuypi uj hermano willayta ñaupajman apananta nikorqa. Kay 1927 watamantapachataj, sapa domingo wasimanta wasi willayta qallarikorqa. Kay 1931 watataj Diospa llajtanpaj sumaj karqa, imajtinchus Biblia nisqanman jina Jehovaj testigosnin sutiwan rejsisqa kanankuta nikorqa (Isa. 43:10-12). Kay 1938 watapitaj, ancianosta manaña qotuchakuymanta hermanoschu ajllanankuta nikorqa, manaqa Bibliaj nisqanta juntʼananku karqa. Kay 1972 watapitaj, manaña uj ancianollachu qotuchakuyta ñaupajman apananta nikorqa, manaqa tukuy ancianos. Pikunachus ancianos, siervos ministeriales ima kanankupaj jina kajkunatataj, qotuchakuyta michinankuta chayri qhawanankuta nikorqa (1 Ped. 5:2). Kay 1976 watapitaj, Diospa Llajtanta Kamachejkuna sojta comisionespi llankʼayta qallarerqanku, Jallpʼantinpi Reinomanta willayta umachanankupaj.  Reparanchej jina, Jehovaj sutichasqan Reyqa pisimanta pisi Jallpʼapi kamachisninta sumajta wakichin, Dios nisqanman jina imatapis ruwanankupaj.

13. ¿Imaynatá yanapasunki Jesucristo 100 watastaña kamachisqanpi imastachus ruwasqan?

¹³ Jesús Diospa Reinonpi 100 watastaña kamachisqanpi imastañachus ruwasqanpi tʼukuriy. Uj qotu runasta Diospa sutinta apanankupaj llimphucharqa. Chantapis, sumaj willaykunata 239 suyuspi willachishan, may chhika runastataj yanapashan Jehovata rejsinankupaj. Jallpʼapi kamachisnenqa qanchis millonesmanta astawanña kanku, paykunataj tukuy sonqo Jehovaj munayninta ruwashanku (Sal. 110:3). Arí, Jehovaqa Jesucristonejta ancha jatuchaj tʼukunapaj imasta ruwashan. ¡Astawanrajtaj ruwanqapis!

14. 1) ¿Imatataj mañakushanchej “Reinoyki jamuchun” nispa? 2) ¿Imataj 2014 watapaj texto, chantá imaraykutaj may sumaj?

¹⁴ Jehová 1914 watapiña Churinta Reinonpi kamachinanpaj churajtinpis, “Reinoyki jamuchun” nisqa mañakuyta mana tukuynintarajchu kutichiwanchej (Mat. 6:10). Bibliaqa Jesusmanta kayta nin: “Enemigosniyki ukhupi kamachinki”, nispa (Sal. 110:2). Kay tiempo gobiernostaj, Satanaspa atiyninpi kasqankurayku Diospa Reinonpa contranpi oqharikushankuraj. “Reinoyki jamuchun” nispa mañakuspaqa Cristowan 144.000 ajllasqa cristianoswan kamachinankuta mañakushanchej. Paykunataj tukuy gobiernosta, Jallpʼapi Reinoj contranpi oqharikojkunata ima chinkachenqanku. Chaypachamá Daniel 2:44 nisqan juntʼakonqa. Chay versiculopi Diospa Reinonmanta nin: “Tukuynin [kay] reinosta tukuchenqa”, nispa. Arí, contranpi oqharikoj tukuy gobiernosta chinkachenqa (Apo. 6:1, 2; 13:1-18; 19:11-21). Chay kananpajtaj pisi tiempollaña kashan. Kay 2014 watapeqa Diospa Reinon sayarichisqa kasqanmanta pachaj watastaña juntʼan. Chayrayku, may sumaj kay 2014 watapaj Mateo 6:10 versiculomanta orqhosqa textoqa: “Reinoyki jamuchun”.

15, 16. 1) ¿Imastaj kanqa Jesucristo Waranqa Watata Kamachisqanpi? 2) ¿Imatá Jesucristo ruwanqa waranqa watas juntʼakojtin? 3) ¿Imaynatá ajinamanta Diospa munaynin juntʼakonqa?

¹⁵ Rey Jesucristoqa Diospa enemigosninta chinkachisqantawan Satanasta, supaykunasnintawan waranqa wataspaj chinkay chinkay ukhuman wijchʼuykonqa (Apo. 20:1-3). Chayta ruwajtintaj, Jesusqa wañuyninrayku ima bendicioneschus kasqanta Reinonejta runasman qonqa, jinallataj Adanpa juchanrayku imaschus kasqantapis chinkachenqa. Chantapis, may chhika runasta wañuymanta kausarichenqa, pikunachus puñuypi jinalla kashanku. Kausarimojkuna Jehovata rejsinankupajtaj yachachiykunata wakichenqa (Apo. 20:12, 13). Jallpʼaqa Edén huerta jina uj Paraisoman tukonqa, kasukoj runastaj mana juchayoj runasman tukonqanku.

¹⁶ Jesucristo Waranqa Watata Kamachisqantawan Diospa munaynin juntʼakonqa, chantataj “reinota Dios Tataman jaywaponqa” (1 Corintios 15:24-28 leey). Runasqa Diosman qayllaykunankupaj niña Jesuspa yanapayninta necesitanqankuchu. Ajinamanta, Diospa tukuy wawasnin Jallpʼapitaj janaj pachapitaj, uj familia jinalla ujchasqa kanqanku.

17. ¿Imatataj ruwanallanchejpuni tiyan?

¹⁷ Jesucristo 100 watastaña kamachisqanqa sutʼita rikuchin Jehová Rey jinallapuni kamachishasqanta, Jallpʼapaj imatachus munasqantapis juntʼanantapuni. Chayrayku, cheqa sonqollapuni kana, chantapis Reymanta, Reinomantawan willanallapuni. Tumpamantawanqa “Reinoyki jamuchun” nisqa mañakuyman Jehová tukuyninta kutichiwasun.