1, 2. 1) ¿Ima casamientoraykutaj janaj pachapi jatun kusiy kanqa? 2) ¿Ima tapuykunamantaj kutichisunchej?

YACHANCHEJ JINA uj casamientotaqa unaypi wakichikun. Kunanqa, uj jatun casamientomanta parlarisun, uj Reypa casamientonmanta. Chaypajtaj 2.000 watasta jinaña wakichikushan. Kunantaj, pisi tiempollaña kashan novia novionwan casarakunanpaj. Tumpitamantawanqa Reypa kamachina wasinpi kʼacha takiykuna uyarikonqa, janaj pachapi kajkunataj kay jinata takirenqanku: “Aleluya, imaraykuchus Tukuy Atiyniyoj Señor Diosninchej kamachishan. Kusikuna jatun kusiywan, sutinta jatunchaspa. Corderoj casamienton chayamunña, noviantaj wakichisqaña”, nispa (Apo. 19:6, 7).

² Chay jatun kuseyqa “Diospa Corderon” Jesucristo casarakojtin kanqa (Juan 1:29). ¿Imayna pʼachallisqataj Jesucristo casamientonpaj kanqa? ¿Pitaj novian? ¿Maykʼajtaj chay casamiento ruwakonqa? Chay casamiento ruwakojtin, janaj pachapeqa jatun kusiy kanqa. Jallpʼapi kausakuyta suyakojkunarí, ¿kusikullanqankutajchu? Chaykunata yachanapajqa 45 Salmota ukhuncharinallapuni.

3, 4. 1) ¿Imayna pʼachallisqataj Novio casamientonman yaykun, imaraykutaj astawanraj kusikun? 2)  ¿Pikunataj “reyespa ususisninku”, “reina” ima kanku Noviowan kusikojkuna?

³ (Salmo 45:8, 9 leey.) Novioqa nisunman Jesucristoqa, rey jina sumaj pʼachallisqa yaykun. Pʼachanqa “sumajta qʼapashaj” mirra, acacia nisqa jawinaswan jina. Israelitasqa Diospaj tʼaqanapaj jawina aceiteta, chay jawinaswan ruwaj kanku (Éxo. 30:22-25).

⁴ Casamiento pʼunchay astawan qayllaykamusqanman jina, Novioqa kamachina wasinpi takiykunata uyarispa astawanraj kusikun. Jinallataj “reina” nisunman Diospa janaj pachapi llajtanpis kusikullantaj. ¿Pitaj chay reyna? Tukuy cheqa sonqo ángeles, pikunatachus “reyespa ususisninku” nispa sutichakun. Paykunaqa kay jinata takinku: “Kusikuna jatun kusiywan, [...] Corderoj casamienton chayamunña”, nispa.

5. ¿Pitaj Corderoj warmin?

⁵ (Salmo 45:10, 11 leey.) Yachanchejña pichus Novio kasqanta, chaywanpis ¿pitaj novianri? Tukuy ajllasqa cristianos kanku, Cristotaj chay qotuchakuypa Uman (Efesios 5:22-24 leey). Paykunaqa Cristowan khuska kamachenqanku (Luc. 12:32). Chay 144.000 ajllasqa cristianosqa “Corderoj qhepanta rinku mayllamampis rejtin” (Apo. 14:1-4). “Corderoj warmin[man]” tukunku, jinamanta paywan janaj pachapi tiyakunku (Apo. 21:9; Juan 14:2, 3).

6. ¿Imaraykutaj ajllasqa cristianos “reypa ususin” nisqa kanku, imaraykú llajtankuta qonqapunanku tiyan?

⁶ Noviaqa mana “ususitay” nisqallachu, manaqa “reypa ususin” nisqa (Sal. 45:13). ¿Pitaj chay rey? Jehová. Ajllasqa cristianostaj “wawasnin” kanku, imajtinchus Jehovaqa paykunata wawasninpaj rejsikapun (Rom. 8:15-17). Chay cristianosqa janaj pachapi novia jina kanqanku, chayrayku paykunaman kayta nikun: “Qonqapuy [Jallpʼapi] familiaykita, llajtaykitawan”, nispa. Chay jawa, “janaj pacha imaspi yuya[nanku tiyan], ama kay pacha imaspeqa” (Col. 3:1-4).

7. 1) ¿Imaynatataj Jesucristo novianta wakichin? 2) ¿Imaynatataj novia Novionta qhawan?

⁷ Cristoqa watas pasasqanman jina, novianta janaj pachapi casamientopaj wakichin. Apóstol Pablo kayta sutʼincharqa: “Cristoqa [qotuchakuyta] munakorqa, [qotuchakuyraykutaj] kawsayninta churarqa. Chayta Cristo ruwarqa [qotuchakoyqa] juchamanta tʼaqasqa santo kanampaj, palabranwan mayllaspataj llimphucharqa yakuwan jina, pay kikinman pusaykunampaj uj sumaj kʼancharishaj [qotuchakuyta], mana chʼichiyojta, mana kʼusuyojta, ni iman imanasqata, manachayqa juchamanta tʼaqasqata, mana kʼaminatataj”, nispa (Efe. 5:25-27). Corintomanta cristianosmanpis, kayta nillarqataj: “Noqaqa qankunamanta celosakuni Diospa celosninwan, imaraykuchus ujllatawan parlacherqaykichej casarakunaykichejpaj, Cristoman qankunata pusanaypaj qharejpa mana chayasqan sipasta jina”, nispa (2 Cor. 11:2). Novioqa nisunman Rey Jesucristoqa, novian “kʼachita” kasqanta nin. ¿Imaraykú? Diosta yupaychaypi llimphu kasqanrayku. Noviataj, payta ‘wiraqochiy’ nispa nin, qosan kananraykutaj ‘payta kasukun’.

8. ¿Imaraykutaj novia “may kʼachitapuni” yaykusqanta nikun?

⁸ (Salmo 45:13, 14a leey.) Noviaqa “may kʼachitapuni” casamientonman yaykun. Apocalipsis 21:2 versiculopeqa noviata Mosoj Jerusalén nisqa llajtawan kikinchakun, chantapis “noviompaj” sumaj kʼachanchasqa kasqanta nin. Chay llajtaqa  janaj pachapi kasqanrayku, “Diospa jatun kaynimpa kʼanchayninwan” lliphipin. Lliphipiynintaj rijchʼakun “uj sumaj kʼachitu valorniyoj rumiman, jaspe nisqa rumiman. Chaytaj cristal jina chʼuwa” (Apo. 21:10, 11). Apocalipsis libropeqa Mosoj Jerusalén maytapuni lliphipishasqanta nin (Apo. 21:18-21). Chayraykuchá salmistaqa novia “may kʼachitapuni” yaykusqanta nerqa. Imajtinchus chay casamientoqa janaj pachapi ruwakun.

9. ¿Pi reymantaj noviata pusaykukun, imayna pʼachallisqatataj?

⁹ Noviataqa Novionman nisunman Rey Jesucristoman pusaykukun. Novioqa novianta wakichin, “palabranwan mayllaspataj llimphucha[n] yakuwan jina”, “juchamanta tʼaqasqata, mana kʼaminatataj” (Efe. 5:26, 27). Noviaqa chay casamientopaj sumaj pʼachallisqa kanan tiyan. Ajinapunitaj, imajtinchus “pʼachanqa qoriwan awakipasqa”, chantapis “may sumaj pʼachallisqata reyman” pusaykukonqa. Corderoj casamientonpajqa noviaman “Dios atiyta qorqa, yuraj lliphipej sumaj awasqa linowan pʼachallikunampaj. Chay sumaj awasqa linoqa ninakun Diospa ajllakusqasnimpa cheqan ruwasqasninkuwan” (Apo. 19:8).

10. ¿Maykʼajtaj corderoj casamienton ruwakun?

¹⁰ (Apocalipsis 19:7 leey.) ¿Maykʼajtaj corderoj casamienton ruwakun? Apocalipsis libropi “noviantaj wakichisqaña” kasqanta nejtinpis, qhepan versiculospi imatachus nisqanqa mana chay casamientomantachu parlan, manaqa manchay ñakʼariy tiempoj tukukuyninmanta (Apo. 19:11-21). ¿Chay niytachu munan Rey Jesucristoj casamienton manaraj atipaspa llojsishajtin ruwakunanta? Mana. Apocalipsis libroqa mana qhepan qhepitanta imapis kananmantachu parlan. Kay 45 Salmo nisqanman jinaqa Rey Jesucristo espadanta chumpinman churaykukun, “ñawpajman” rispataj enemigosninta atipan, chaymantaraj corderoj casamientonqa ruwakun (Sal. 45:3, 4).

11. ¿Imastataj Rey Jesucristo ruwanqa manaraj casamienton ruwakushajtin?

¹¹ Chayrayku ñaupajtaqa “phisu” warmita nisunman Jatun Babiloniata chinkachikonqa, mayqenchus tukuy llulla religioneswan ninakun (Apo. 17:1, 5, 16, 17; 19:1, 2). Chantataj, Cristoqa Satanaspa pachanmanta puchojkunata Armagedón nisqa maqanakuypi chinkachenqa, mayqenchus “Tukuy Atiyniyoj Diospa chay jatun” pʼunchaynin (Apo. 16:14-16; 19:19-21). Chaymantataj, Rey Jesucristoqa Satanasta, supaykunasnintawan chinkay chinkay ukhuman wijchʼuykonqa, maypichus wañusqas jina kaspa ni imata ruwayta atenqankuchu. Ajinamanta Cristoqa maqanakuyninpi atipaspa llojsenqa (Apo. 20:1-3).

12, 13. 1) ¿Maykʼajtaj Corderoj casamienton ruwakonqa? 2) ¿Pikunataj janaj pachapi kusikonqanku Corderoj casamientonmanta?

¹² Ajllasqa cristianosqa, Jallpʼapi wañupojtinku janaj pachapi kausanankupaj kausarichisqa kanku, chaytaj kay qhepa pʼunchaykunapi kashan. Jatun Babilonia chinkachisqa kasqanmantawantaj, Jesucristoqa Jallpʼapiraj kaj ajllasqa cristianosta janaj pachapi tantanqa (1 Tes. 4:16, 17). Chayrayku, noviawan ninakoj tukuy ajllasqa cristianosqa, niraj Armagedón maqanakuy qallarishajtin, janaj pachapiña kanqanku. Armagedón tukukojtintaj, Corderoj casamienton ruwakonqa. Chay kutitaj, ¡may jatun kusiy kanqa! Apocalipsis 19:9 versiculopi nin: “Kusikuyniyojmin kanku Corderoj casamiento mikhuyninman wajyasqa kajkunaqa”, nispa. Arí, noviawan ninakoj 144.000 ajllasqa cristianosqa may kusisqa kashanqanku. Noviotaj nisunman Rey Jesucristo mayta kusikullanqataj, imajtinchus paywan khuska kamachejkuna  janaj pachapiña kashanqanku. Chaytaj, Reinonpi paywan khuska mikhushankumanpis, ujyashankumanpis jina kanqa (Luc. 22:18, 28-30). Chaywanpis, mana Noviowan noviallawanchu Corderoj casamientonmanta kusikonqanku.

¹³ Rikorqanchej jina, janaj pachapi kajkunaqa kay jinata takirenqanku: “Kusikuna jatun kusiywan, sutinta jatunchaspa. Corderoj casamienton chayamunña, noviantaj wakichisqaña”, nispa (Apo. 19:6, 7). Kay Jallpʼapi Diospa kamachisninrí, ¿kusirikullanqankutajchu?

14. Salmo 45 capítulo nisqanman jina, ¿pikunataj noviaj “sipas” masisnin kanku?

¹⁴ (Salmo 45:12, 14b, 15 leey.) Profeta Zacariasqa qhepa pʼunchaykunapi tukuy nacionesmanta may chhika runas, mayta agradecekunankuta nerqa. ¿Imamantá? Jallpʼapiraj kashaj ajllasqa cristianoswan khuska Jehovata sirvisqankumanta. Zacarías qhelqarqa: “Jaqay tiempopeqa waj llajtasmanta chunka runas uj judío runaj pʼachanmanta japʼiykukuspa, nenqanku: Qankunawan riyta munayku, imaraykuchus uyariyku qankunawan Dios kasqanta”, nispa (Zac. 8:23). Salmo 45:12 versiculopeqa chay “chunka runas”, “Tiromanta sipaskuna” kasqankuta nin, jinallataj “llajtamanta aswan qhapajkunapis”. Paykunataj, allin ñawiwan qhawasqa, yanapasqa ima kayta munaspa Jallpʼapiraj kaj ajllasqa cristianosman kʼacha imasta regalosta jina apanku. Ajllasqa cristianostaj kay 1935 watamantapacha, may chhika runasman “cheqa kajta” yachachinku (Dan. 12:3). “Chunka runaswan” ninakoj cristianosqa kausayninkuta  llimphuchanku, ajllasqa cristianoswan khuskataj llankʼanku. Chay jawa, qharej mana chayasqan sipas jina kanku, noviaj “sipas” masisnin nisqataj. Chantapis Jehovaman qokunku, Rey Jesucristomantaj cheqa sonqo kanku.

15. ¿Imaynatataj “sipas” masismanta kajkuna Jallpʼapiraj kaj ajllasqa cristianosta yanapashanku?

¹⁵ Noviawan ninakojkunamanta Jallpʼapiraj kaj ajllasqa cristianosqa “sipas” masisninkuta mayta agradecekunku, “janaj pacha reinomanta evangelio” tukuynejpi willasqa kananpaj yanapakusqankumanta (Mat. 24:14). “Espirituwan, noviawan ninku: Jamuy”, nispa. Chayta uyarejkunapis nillankutaj: “Jamuy”, nispa (Apo. 22:17). Arí, “waj ovejas” kajkunaqa novia “Jamuy” nispa nisqanta uyarispa, tukuy runasta wajyarillankutaj (Juan 10:16).

16. ¿Imata ruwanankutataj Jehová “waj ovejas” kajkunata saqen?

¹⁶ Jallpʼapiraj kaj ajllasqa cristianosqa “waj ovejas” kajkunata munakunku, maytataj kusikunku Novioj Tatan Jehová, Corderoj casamientonmanta kusirikunankuta saqesqanrayku. Noviaj “sipas” masisnenqa “sumaj kusiywan” pusasqa kanqanku. Arí, “waj ovejas[manta]” kajkunaqa, pikunachus Jallpʼapi wiñaypaj kausakuyta suyakunku, Corderoj casamienton janaj pachapi ruwakojtin, mayta kusikullanqankutaj. Chayraykuchá Apocalipsis libroqa “may chhika” runasmanta kajkuna “kamachina tiyanaj ñawpaqempi, Corderoj ñawpaqempiwan” kashasqankuta nin. Paykunaqa Diospa mana rikukoj templonpa pationpi Jehovata sirvinku (Apo. 7:9, 15).

17, 18. ¿Imastaj kanqa Corderoj casamientonrayku, chantá pikunaj tatantaj Jesucristo kanqa Waranqa Watasta Kamachishajtin?

¹⁷ (Salmo 45:16 leey.) Cristoj novianpa “sipas” masisnenqa janaj pachapi casamiento kasqanrayku, ima bendicioneschus mosoj pachapi kasqanmanta astawanraj kusikonqanku. Rey Jesucristoqa Jallpʼapi “ñawpa” tatasninta kausarichenqa, paykunataj churisninman tukonqanku (Juan 5:25-29; Heb. 11:35). Paykunamanta wakintataj, “tukuy kay pachapi kamachinankupaj” churanqa. Chantapis, kay tiempomanta wakin cheqa sonqo ancianosta mosoj pachapi kamachinankupaj churallanqataj (Isa. 32:1).

¹⁸ Jesucristoqa Waranqa Watasta Kamachishajtin, waj runaspatapis tatallankutaj kanqa. ¿Imaraykú chayta ninchej? Imaraykuchus Jallpʼapi tukuy kausajkunaqa Jesuspa wañuyninpi creesqankurayku wiñaypaj kausanqanku (Juan 3:16). Ajinamanta, Cristoqa “wiñaypaj Tata” kanqa (Isa. 9:6, 7).

19, 20. ¿Imaynataj sonqonchej kashan 45 Salmota ukhunchaspa?

¹⁹ (Salmo 45:1, 17 leey.) Rikunchej jina, 45 Salmopi qhelqakusqanqa tukuy cristianospaj may sumaj. Jallpʼapiraj kaj ajllasqa cristianosqa mayta suyashanku janaj pachapi hermanosninkuwan, Noviowan ima tumpitamantawan tantakuyta. Waj ovejas kajkunataj, Diospa churasqan Reyta kasukuyta munanku. Maytataj agradecekunku Jallpʼapiraj kaj ajllasqa cristianosta yanapayta atisqankumanta. Cristowan novianwanqa, casarakusqankutawan may chhika tʼukuna bendicionesta Jallpʼapi tiyakojkunaman qonqanku (Apo. 7:17; 21:1-4).

²⁰ Rey Jesucristo imastachus qhepaman ruwananta yachaspa, ¿maytacharí sutinta “yuyarichi[yta]” nisunman rejsichiyta munanchej? Chayrayku, Rey Jesucristota “wiñaypaj” jatunchana.