WAQAYCHAKUSQANMANTA
¿Imatá 100 watas ñaupajta ruwakorqa?
“Kikin hermano Rusellpuneqa.” (“Foto-Drama” nisqata 1914 watapi qhawaj chayta nerqa.)
KAY “Foto-Drama de la Creación” nisqata rikuchiyta qallarikusqanmantaqa 100 watasña kashan. Chaytaj peliculata jina qhawachinapaj, uyarinapaj ima karqa, wakichikorqataj runas Bibliapi atienekunankupaj. Chay tiempopeqa imapis jinallamanta rikhurisqanpi creejkuna, tukuy imata sutʼinchayta munajkuna, tukuy imamanta iskayrayajkuna ima rikhurisharqanku, runaspa yuyayninkutataj kuyuchisharqanku. “Foto-Drama” nisqatajrí, Jehová Ruwawajninchej kasqanta sutʼincharqa.
Hermano Charles T. Russellqa pichus chay tiempopi Bibliamanta Yachaqajkunata umacharqa, tukuy imawan Bibliamanta yachachikunanta munaj. Bibliamanta Yachaqajkunaqa 30 watasmanta astawanña, imprimisqa publicacionesllawan willasharqanku. Chaywanpis, cinenejtañataj Bibliamanta yachachiyta qallarerqanku.
SUMAJ WILLAYKUNA CINEPI JINA QHAWACHIKUN
Peliculastaqa 1890 watas chaynejmantapacha qhawachikuyta qallarerqa, chaywanpis qhawanallapaj karqa, nitaj ima parlaypis uyarikojchu. Kay 1903 watapitaj, Nueva York llajtapi ujnin iglesiapi religión peliculata qhawachikorqa. Chayrayku, hermano Russell “Foto-Drama” nisqata 1912 watapi wakichiyta qallarishajtenqa, chay kutillaraj peliculastapis ruwayta qallarikusharqa. Hermano Russelltaj cinenejta Bibliamanta astawan yachachiyta atikusqanta repararqa.
“Foto-Drama” nisqaqa pusaj horaspi qhawachinapaj karqa, tawamantaj tʼaqakoj. Chantapis 96 sutʼinchaykunayoj karqa, mayqenkunatachus chay tiempo sumajta leej hermanos grabarqanku. Wakin dibujosninta qhawachikushajtintaj, musicatawan uyarichikoj. Aparatosta apaykachayman amañasqa kajkunataj, parlakusqanmanta, tocakusqanmanta ima discospi grabasqasta ujllapi churaj kanku, coloresniyoj dibujosta, Bibliaj yachachisqanmanta may rejsisqa imasta grabakusqantawan peliculata jina qhawachinankupaj.
“Tukuy imamanta qhawachikorqa, chʼaskas ruwasqa kasqankumantapacha Cristo Waranqa Watasta kamachinankama.” (Chaytaqa F. Stuart Barnes nerqa, pichus 1914 watapaj 14 watayoj kasharqa)
Qhawachinapaj grabasqasta, vidriopi dibujosta imaqa yaqha tukuyninta Filadelfia, Nueva York, Paris chantá Londres llajtasmanta rantikorqa, maykunapichus sapa ujta makiwan dibujaj, pintaj ima kanku. Chantapis Betelpi Estudio de Arte nisqapi dibujakullajtaj, maukʼa chayri imanarpakoj dibujostataj allinchakoj. Chantá qhawachikullajtaj, Yonkers chantá Nueva York llajtaspi Betelpi llankʼajkuna Abraham jina, Isaac jina, jarkʼaj ángel jina ruwasqankuta grabakusqantapis (Gén. 22:9-12).
Aparatosta apaykachayman amañasqa kajkunaqa, grabasqasta mayqenchus maytʼuraspa 3 kilómetros jina karqa, 26 discosta, 500 dibujosta ima ujllapi qhawachej kanku
Hermano Russellpa yanapajnin “Foto-Drama” nisqamanta, periodicopi chayri radiopi willaykunata orqhojkunaman kayta nerqa: “Kaywanqa astawanpuni runasta yanapakonqa Bibliamanta yachakuyta munanankupaj”, nispa. Religionta kamachejkunarí, ¿kusikunkumanchu karqa runasta chaywan Diosmanta yachachikushasqanta yachaspa? Mana. Astawanqa mayta churanakorqanku. Wakenqa “Foto-Dramata” mana qhawachikunanpaj, sutʼimantataj pakaymantataj tukuy imata ruwarqanku. Uj kuteqa yachachinakuspa corrienteta ima kʼutucherqanku.
Chay lugarmanta yanapaj hermanas, Escenario nisqa librota runaman ashkhata jaywarqanku, maypichus “Foto-Drama” nisqaj dibujosnin rikhurerqa
Qhawaj rejkunaqa Jesuspa uyan dibujasqa “Pax” rimaywan qhelqasqa tʼipanata japʼej kanku. Chaytaj allin kausayta maskʼaj runa kananta yuyarichinapaj karqa
Jinapis, ashkha runas “Foto-Drama” nisqata mana pagaspalla qhawarqanku. Estados Unidospeqa 80 llajtaspi kikin pʼunchaykunapi qhawachikorqa. Runastaj tʼukulla qhepakoj kanku, imajtinchus ni jaykʼaj uyarinapajwan chay jina peliculata qhawarqankuchu. Fotosta allinta wakichispa, uj chillwisitu imaynatachus runtu qaritanmanta llojsimojta, tʼikita imaynatachus phancharisqanta ima qhawachikoj. Chay tiempo yachayniyoj runaspa nisqankuwantaj, Jehová may yachayniyoj kasqanta sutʼinchakorqa. Qallariypi nerqanchej jina, “Foto-Drama” nisqapi hermano Russellta rikuspa uj runa kayta nerqa: “Kikin hermano Rusellpuneqa”, nispa.
BIBLIAMANTA YACHACHINAPAJ KARQA
“Foto-Drama” nisqataqa 11 enero 1914 watapi Nueva York llajtapi kay wasipi qhawachikuyta qallarerqa. Chaytaj Bibliamanta Yachaqajkunajta karqa, paykuna kikintaj atiendej kanku
Peliculasmanta yachaj uj runa nisqanman jinaqa, “Foto-Drama” nisqallapi “parlakusqanta uyarikoj, imatachus ruwashasqankutapis qhawayta atikoj, color dibujosniyojtaj karqa”, chaytataj uj aparatowan qhawachikoj. Aswan ñaupajta orqhokoj peliculastaqa mana “Foto-Drama” nisqata jinachu qhawachikoj, nitaj Bibliamantachu karqa. Chantapis ni mayqen peliculata jina, may chhika runas qhawarqanku. Uj watallapi jisqʼon millones jina Norteamericapi, Europapi, Australiapi, Nueva Zelandapi ima qhawarqanku.
“Foto-Drama” nisqataqa 11 enero 1914 watapi Nueva York llajtapi qhawachikuyta qallarerqa. Qanchis killanmantaj, Ñaupaj kaj Guerra Mundial qallarerqa. Chaywanpis, may chhika runas “Foto-Drama” nisqata Jallpʼantinpi qhawarqanku, Diospa Reinon imatachus ruwananta yachaspataj sonqochakorqanku. Arí, “Foto-Drama” nisqaqa may sumajpuni 1914 watapaj karqa.
“Foto-Drama” nisqamantaqa Norteamericapi qhawachikunanpaj 20 karqa
Kaykunatapis qhawaykurillawajtaj
TORREMANTA QHAWAJ (CONGREGACIONPAJ)
Portugalpi predicayta qallarikun
Kayta leerispa yachakuy Portugalpi predicayta qallarejkuna ima problemastachus atipasqankuta.
TORREMANTA QHAWAJ (CONGREGACIONPAJ)
Irlandapi Diosmanta yachakunku discursosnejta
Russellqa Irlandapi ashkha runas Bibliamanta yachakuyta munasqankuta repararqa.
TORREMANTA QHAWAJ (CONGREGACIONPAJ)
“¿Maykʼajtaj waj jatun tantakuy kallanqataj?”
Kay 1932 watapi, México llajtapi, uj jatun tantakuy ruwakorqa. Kayta leeriy, chay jatun tantakuymanta astawan yachakunaykipaj
TORREMANTA QHAWAJ (CONGREGACIONPAJ)
“Aswan kusiywan, munakuywantaj predicamorqayku”
Kay 1922 watapi, Bibliamanta Yachaqajkunaj uj jatun tantakuyninkupi, tukuyman nikorqa Jesusmanta, reinonmantawan willamunankuta. Chayta, ¿kasukorqankuchu?
TORREMANTA QHAWAJ (CONGREGACIONPAJ)
“Ni mayqen ñanpis mana puriy atinachu, nitaj mana tukukuyniyojchu”
Kay 1930 wata chaynejpi, ashkha precursores sonqo kʼajaywan Australiaj camposninman Diospa Gobiernonmanta predicaj rerqanku.
DOCUMENTARIES
Diospa Gobiernon: 100 watastaña kamachishan
Ashkha kuraj hermanosninchej willariwanchej watastaña Jehová Diosta sirvisqankupi ima bendicionestachus jap’isqankuta. Paykunapajqa Diospa Gobiernon kanpuni, ¿jinallatajchu qanpajpis?
