1. ¿Imatataj ruwayta atinchej Diospa rijchʼayninman jina ruwasqa kasqanchejrayku?

UJ WAWA tatanman mayta rijchʼakojtenqa “tatanpa papa qʼallunpuni” nispa nikun. Chaytaj ajinapuni, imajtinchus uj wawaqa tatanman chayri mamanman rijchʼakun yawarninta apasqanrayku. Jehovapis janaj pachapi Tatanchej, imajtinchus pay kausayta qowarqanchej (Sal. 36:9). Noqanchejtaj, wawasnin kasqanchejrayku Payman rijchʼakunchej. Arí, Jehovaqa payman rijchʼakojta ruwawarqanchej. Chay jawataj tʼukuriyta, imatapis ajllayta, wajkunawanpis sumajta masichakuyta atinchej (Gén. 1:26).

2. ¿Imaraykutaj Jehovawan masichakuyta atinchej?

² Jehovaqa aswan sumaj Amigonchej kanman. ¿Imaraykú Paywan masichakuyta atinchej? Munakuwasqanchejrayku, Paypi, Churinpi ima creesqanchejrayku. Jesús nerqa: “Diosqa chay jinatapuni kay pachapi kaj chhikata munakusqanrayku, uj kʼata Churinta qorqa. Ajinamanta pillapis paypi creejqa mana chinkayman renqachu, astawanqa wiñay kawsayniyoj kanqa”, nispa (Juan 3:16). Jehovawanqa may chhika runas sumajta masichakorqanku. Kunanqa iskaymanta parlarina.

3, 4. ¿Imapitaj mana kikinchu karqanku Abrahamwan mirayninmanta kajkunawan?

³ Jehovaqa israelitaspa jatun tatanku Abrahammanta parlaspa, kausaqen kasqanta nerqa (Isa. 41:8). Kay 2 Crónicas 20:7 versiculopipis, Abraham Diospa kausaqen kasqanta nillantaj. ¿Imaraykutaj Abraham Jehovawan sumajta masichakuyta aterqa? Creeyninrayku (Gén. 15:6; Santiago 2:21-23 leey).

⁴ Jehovaqa Abrahampa mirayninmanta kajkunapaj, nisunman israelitaspaj Tatanku, Amigonku ima karqa. Chaywanpis qhepamanqa niña jinachu karqa. ¿Imaraykú? Manaña Diospa nisqasninpi atienekusqankurayku.

5, 6. 1) ¿Imaynamantá Jehová Amigoykiman tukorqa? 2) ¿Imastataj tapurikuna kanman?

⁵ Jehovata astawan rejsisqaykiman jinaqa creeyniyki astawan sinchʼiyanqa, paytataj astawan munakunki. Dios kasqantapuni, paywantaj masichakuyta atikusqanta yachakusqaykipi tʼukuriy. Chantapis, Adán mana Diosta kasusqanrayku tukuy runas juchasapa kasqanchejta yachakorqanki. Repararqankitaj, runasqa Diosmanta karunchasqa kasqankuta (Col. 1:21). Chantataj repararqanki Tatanchej Jehovaqa qayllaykunapaj jinalla kasqanta, noqanchejmantataj llakikusqanta. Churin Jesusta noqanchejrayku kachamusqanta yachaspataj, wañuyninpi creesqaykita rikucherqanki. Ajinamanta Jehovawan sumajta masichakuyta qallarerqanki.

⁶ Jehovawan masichakuyta qallarisqanchejpi tʼukurishaspa, allin kanman kayta tapurikunanchej: “¿Astawanchu Dioswan masichakushani? ¿Astawanchu sumaj Amigoy Jehovapi atienekushani chantapis astawanchu payta munakushani?”, nispa. Gedeonpis Jehovawan sumajta masichakorqa. Chayrayku imatachus paymanta yachakusqanchejta qhawarina.

7-9. 1) ¿Imatataj Gedeón rikorqa, imataj chayrayku karqa? (21 paginapi dibujota qhawariy.) 2) ¿Imatá ruwananchej tiyan Jehovaj amigosnin kanapaj?

⁷ Juez Gedeonqa israelitas llakiy tiempopi kashajtinku Jehovata sirverqa. Chaytaj karqa israelitas Sumaj Jallpʼaman yaykusqankumanta qhepaman. Jueces 6 capitulopi nisqanman jina, Jehovaj angelnenqa Gedeonta Ofrá llajtapi waturerqa, madianitastaj israelitasta chay tiempopi ñakʼarichisharqanku. Chayrayku, Gedeonqa pakayllamanta trigota chʼuwachasharqa uvasta saroj kanku, chaynejpi, trigota madianitasmanta pakaykunanpaj. Jehovaj angelnintaj chaypi rikhurispa “kallpayoj wapu runa” kasqanta nerqa. Gedeontaj chayta uyarispa tʼukulla qhepakorqa, yachaytataj munarqa sichus Jehová yanapananta, imaynatachus israelitasta Egiptomanta llojsimunankupaj yanaparqa ajinata. Chay angeltaj, Jehovaj sutinpi parlaspa yanapananta nerqa.

⁸ Gedeonqa tapukorqa imaynatachus “israelitasta kacharichi[nanta] madianitaspa makisninkumanta”. Jehovataj kayta kuticherqa: “Noqa qanwan kasaj. Madianitastaqa atipanki uj sapan runallapis kanman jina”, nispa (Jue. 6:11-16). Gedeontaj Jehová yanapanantapuni yachayta munaspa, uj señalta rikuchinanta mañakorqa. Reparanchej jina, Gedeonqa Jehová kasqanmanta mana iskayrayarqachu.

⁹ Imachus chay kutipi kasqanqa Gedeonpa creeyninta sinchʼiyacherqa, Jehovamanpis astawan qayllaykucherqa. Gedeonqa mikhuyta wakichispa angelman jaywarqa. Diospa angelnin tojnunwan chay mikhuyta llankhajtinkamataj, mikhuyta nina larway qʼolaykorqa. Ajinamanta Gedeonqa Tata Diospa angelninpuni kasqanta reparaspa, kayta nerqa: “Ay Señor Tata Dios, kikin Tata Diospa angelninta rikuni uyapura”, nispa  (Jue. 6:17-22). Chaywanpis Gedeonqa mana Diosmanta karunchakorqachu. Astawanqa, Dios allinpaj qhawasqanta repararqa. ¿Imajtintaj chayta ninchej? Imajtinchus Gedeonqa uj altarta jataricherqa, suticharqataj “Jehová-salom, NM” nispa, chaytaj niyta munan “Tata Diosmin Sonqo Tiyaykoyqa” (Jueces 6:23, 24 leey). Noqanchejpis, Jehová sapa pʼunchay imastachus qowasqanchejpi tʼukurispaqa, ¡may sumaj Amigonchej kasqanta reparanchej! Paymanta mana saykʼuspa mañakuspataj aswan sonqo tiyaykusqa kanchej, astawantaj paywan masichakunchej.

10. Salmo 15:3, 5 nisqanman jina, ¿imatá ruwananchej tiyan Jehová Amigonchej kananpaj?

¹⁰ Chaywanpis, Jehová Amigonchej kananpaj, ¿imatá ruwananchej tiyan? Davidqa 15 Salmopi “Tata Dios, pitaj wasiykipi tiyakuyta atinman?” nisqantawan, imatachus ruwananchej kasqanta nerqa (Sal. 15:1). Iskaymanta parlarina: mana sajrata rimanachu kasqanmanta, tukuy imapitaj allinta purina kasqanmanta. Davidqa Diospa wasinpi tiyakojmanta kayta nerqa: “Mana pimantapis sajrata parla[nchu], nitaj llukʼiyta japʼikunchu llimphu sonqoyojpa contrampi”, nispa (Sal. 15:3, 5).

11. ¿Imaraykutaj pillatapis qhasimanta mana juchachanachu?

¹¹ Davidqa waj salmopi kayta nerqa: “Ama ima sajratapis parlarparillaychu”, nispa (Sal. 34:13). Chay yuyaychayta mana kasuspa, pillatapis qhasimanta juchachayman urmasunman chayqa Jehovamanta karunchakusunman. Qhasimanta juchachajqa Kuraj Supay jina ruwan, pichus Diospa enemigon. Griego qallupeqa Kuraj Supay rimay “llullakuspa qhasimanta juchachay” niyta munan. Chayrayku, imatachus wajkunaman nisqanchejta chayri wajkunamanta parlasqanchejta sumajta qhawarikuna. Ajinamanta Jehovaj amigosnillanpuni kasunchej. Astawanpis qotuchakuypi ñaupajman apajkunamanta mana ima sajratapis rimanachu (Hebreos 13:17; 1 Tesalonicenses 5:12 leey).

12, 13. 1) ¿Imaraykutaj tukuy imapi allinta purinanchej tiyan? 2) ¿Imatá waj runas ninku tukuy imapi allinta purisqanchejmanta?

¹² Chantapis, Jehovaj kamachisnenqa tukuy imapi allinta purisqankurayku rejsisqa kanku. Apóstol Pablo qhelqarqa: “Diosmanta mañapuwayku ari. Yachayku mana juchachana sonqo yuyayniyoj kasqaykuta, munallaykutaj tukuy imapi allinta puriyta”, nispa (Heb. 13:18). “Tukuy imapi allinta puriyta” munasqanchejraykutaj, hermanosninchejta mana chʼaukiyanchejchu. Paykuna noqanchejpaj llankʼanku chayqa paykunawan kʼachas kanchej, parlasqanchejman jinataj pagapunchej. Cristianosqa ni hermanostapis, nitaj waj runastapis chʼaukiyanchejchu. Uj hermanopaj llankʼanchej chaytaj, mana suyanchejchu noqallanchejta aswan allinpaj qhawanawanchejtaqa.

¹³ Waj runasqa tukuy imapi allinta purisqanchejrayku sumajpaj qhawawanchej. Sutʼincharinapaj, uj jatun empresata apaykachaj runaqa Jehovaj testigosnin ujllata parlasqankuta reparaspa, kayta nerqa: “Qankunaqa mana iskaytachu parlankichej”, nispa (Sal. 15:4). Chayta ruwasqanchejrayku, Tatanchej Jehovawan sumajta masichakullanchejpuni, wajkunatapis yanapanchej payta jatunchanankupaj.

14, 15. ¿Imaynatataj runasta yanapasunman Jehovaj amigosnin kanankupaj?

¹⁴ Willanchej chay runasmanta ashkhasqa Dios kasqanta creejtinkupis, mana sumaj Amigonkuta jinachu qhawanku. ¿Imaynatá paykunata yanapasunman? Jesús yachachisqasninta iskaymanta iskay willaj kachashajtin kayta nerqa: “Mayqen wasiman  yaykuspapis, ñawpajta paykunata napaykuychej: Kusiy kawsay kachun kay wasipi, nispa. Chaypi tiyakoj runa chay napaykusqaykichejta japʼikunapaj jinachus kanqa chayqa, napaykusqaykichejqa paypi qhepakonqa. Manachayrí, qankunaman kutimponqa”, nispa (Luc. 10:5, 6). Runasta kʼachamanta parlapayajtinchejqa, Diosmanta yachakuyta munankuman. Chantapis chayta ruwaspaqa willayninchejta churanakojkunaj sonqonkuta kuyurichisunman, waj pʼunchaypitaj uyariyta munallawasunman.

¹⁵ Llulla religionpi kajkunawanpis, Bibliaj nisqanwan churanakoj costumbresta ruwajkunawanpis kʼachasllataj kanchej, nitaj juchachanchejchu. Tantakuyman jamojkunatapis kʼachamanta napaykunchej. Astawanraj kay pachaj imasninrayku saykʼusqa jina kashanku, Bibliamantataj yachakuyta munanku chaykunata. Ajinapuni kasqanta sutʼita reparanchej “Bibliamanta yachakusqankoqa kausayninkuta tijracherqa” nisqa yachaqanasta leespa.

16. ¿Pikunataj Dioswan masichakuyta, paywan “khuska” trabajayta ima atinku?

¹⁶ Yachanchej jina, khuska trabajanku chaykunaqa sumajta masichakunku. Jehovaman qokojkunapis paywan masichakuyta, paywan “khuska” trabajayta ima atinchej (1 Corintios 3:9 leey). Runasman willaspa, yachachispa imaqa Tatanchej Jehová may kʼacha kasqanta sutʼita reparanchej. Chantapis, espíritu santonwan willayninchejpi yanapawasqanchejta rikunchej.

17. ¿Imaynatá jatun tantakuypi yachachiykunata japʼisqanchej Jehová Amigonchej kasqanta rikuchin?

¹⁷ Astawan willaspaqa Jehovaman astawan qayllaykunchej. Imajtinchus, enemigosninchej willayninchejta mana sayachinankupaj Jehová yanapawasqanchejta rikunchej. Kay qhepa pʼunchaykunapi imaynatachus yuyaychawasqanchejpi tʼukurinallataj. Jehovaqa ashkha yachachiykunata mana pisichispa qowanchej. Chantapis, jatun tantakuykunapaj yachachiykunata wakichisqanqa munakuwasqanchejta, llakiykunasninchejta sumajta rejsisqanta ima rikuchin. Uj jatun tantakuymanta agradecekuspa uj familia kayta qhelqarqa: “Yachachikusqanqa sonqoykumanpuni chayarqa. Jehová sapa ujniykuta munakuwasqaykuta, allintaj rinawaykuta munasqanta rikorqayku”, nispa. Alemaniamanta uj qhariwarmi, Irlanda suyupi jatun tantakuyman rispa hermanos paykunawan may kʼachas kasqankumanta mayta agradecekorqanku, nerqankutaj: “Jehovaman, Rey Jesucristoman ima astawanpis agradecekuyku. Paykunaqa ujchasqa llajtanman yaykunaykuta saqewayku. Ujchasqa kasqankutaj mana simillamantachu, manaqa ruwasqankupi sutʼi rikukun. Dublín llajtapi jatun tantakuyman risqaykurayku, qankunawan  khuska Diosta yupaychay may sumaj kasqanta yuyarikusqaykupuni”, nispa.

18. ¿Imatá tapurikunanchej kanman?

¹⁸ Amigos kajkuna sumajta parlarikojtinkoqa aswan ujchasqa kanku. Kay tiempopeqa Internetnejta chayri celularnejta mensajesta apachinakuspa wajkunawan masichakuyta atinchej. Chaywanpis, ¿aswan sumaj Amigonchej Jehovawan parlarikunchejpunichu? Jehovaqa mañakusqanchejta uyarinpuni (Sal. 65:2). Chaywanpis, ¿tiempochakunchejchu kʼiskimanta Paywan parlarinapaj?

19. ¿Imatataj ruwasunman Jehovaman sonqonchejpi imachus kasqanta willanapaj?

¹⁹ Wakin cristianosqa sonqonkupi imachus kasqanta mana Jehovaman willayta atillankuchu. Jehovatajrí paymanta mañakushaspa chayta ruwananchejta munan (Sal. 119:145; Lam. 3:41). Imachus sonqonchejpi kasqanta mana niyta atinchejchu chayqa yanapa kapuwanchej. Pablo Romapi cristianosman kayta nerqa: “Noqanchejqa imatachus maychus kasqanman jina mañakunanchejtaqa mana yachanchejchu. Chay Espiritullataj mana niy atina palabraswan ayqospa, noqanchejpaj mañapuwanchej. Sonqonchejta rejsej Diosqa yachan imachus Espíritoj yuyaynin kasqanta, imaraykuchus Espíritu Santoqa Diospa munayninman jina ajllakusqasnimpaj mañapun”, nispa (Rom. 8:26, 27). Chantapis Bibliaj librosninta nisunman Job, Salmos, Proverbios librosta leerispaqa, imachus sonqonchejpi kasqanta Jehovaman willanapaj yanapawasun.

20, 21. ¿Imaynatataj Filipenses 4:6, 7 versiculospi nisqan sonqochawanchej?

²⁰ Ima llakiypi rikukuspapis, Filiposmanta cristianosman Pablo yuyaychasqanman jina ruwana. Pay nerqa: “Ama imamantapis phutikuychejchu, astawanqa Diosmanta mañakuspaqa, imatachus munasqaykichejta mañakuychej, tukuy imamanta graciasta qospallapuni”, nispa. Ajinata Amigonchej Jehovawan parlarikusun chayqa kallpachasqa, sonqochasqa ima kasun. Pablo nillarqataj: “Chantá Diosqa chay mana unanchay atina sonqo tiyaykuyninta sonqosniykichejman churanqa, chaytaj sonqoykichejta, yuyayniykichejtawan waqaychanqa Cristo Jesuspi”, nispa (Fili. 4:6, 7). Jehová “sonqo tiyaykuyninta” qowasqanchejqa may sumaj, chaytaj sonqonchejta, yuyayninchejtawan waqaychanqa.

²¹ Jehovamanta mañakusun chayqa, payman astawan qayllaykusun. Chayrayku, “mana saykʼuspa” Diosmanta mañakunallapuni (1 Tes. 5:17). Dioswan aswan sumajta masichakunapaj, kamachisqasninta kasukunapaj ima kallpachakunallapuni. ¡May sumajpuni Jehová Tatanchej, Diosninchej, Amigonchej ima kasqanqa!