1. Wasanchaj Israel llajtaj cuentanmanta, ¿ima mosoj llajtatataj Dios ajllakorqa? (Patapi kaj dibujota qhawariy.)

JEHOVAQA, kay tiempopi jina Jesuspa tiemponpi cheqa qotuchakuyta sayaricherqa. Ñaupaj yachaqanapi yachakorqanchej jina, Jehovaqa Israel llajta Payta wasanchasqanrayku, Jesuspa yachachisqasninta uj mosoj llajta kanankupaj ajllakorqa. Chay mosoj llajtataj, Jerusalén 70 watapi thuñikushajtin mana chinkachisqachu karqa Dios allinpaj qhawasqanrayku (Luc. 21:20-22). Chay tiempopi imaschus kasqanqa, kunan tiempopi Jehovaj llajtanpi imaschus kananta rikucherqa. Satanaspa pachan wiñaypaj chinkachisqa kajtin, Diospa llajtanqa mana chinkachisqachu kanqa (2 Tim. 3:1). ¿Imaraykutaj chayta nisunman?

2. ¿Imatá Jesús ‘manchay ñakʼariy’ tiempomanta nerqa, imaynatataj chay qallarenqa?

² Jesusqa, kutimuyninmanta, kay pachaj tukukuyninmanta ima parlaspa nerqa: “Chaypacha manchay ñakʼariy kanqa; kay pacha qallarikusqanmantapacha manaraj chay jina karqachu, nitaj jaykʼajpis kanqachu”, nispa (Mat. 24:3, 21). Chay manchay ñakʼariy tiempo qallarenqa, Jehová ‘Jatun Babiloniata’ nisunman tukuy llulla religionesta chinkachishajtin. Chaytataj  kamachejkunanejta ruwanqa (Apo. 17:3-5, 16). Chaymanta qhepaman, ¿imataj kanqa?

3. Llulla religión chinkasqantawan, ¿imatataj Satanás ruwanqa Diospa llajtanwan?

³ Llulla religión chinkasqantawanqa, Satanás, paywan kajkuna ima, Diospa kamachisninpa contranpi oqharikonqanku. Magog jallpʼamanta Gogmanta parlaspa Biblia nin: “Qantaj chay jallpʼaman chayaspa, phuyu jina juntʼaykunki, ashkha tropa soldadosniyki ashkha nacionesmanta qanwan tantakorqanku, chaykunawan khuska”, nispa. Satanasqa, Jehovaj llajtan mana wañuchinaku maqanakupaj wakichisqa llajta kasqanrayku chinkachinapaj jinalla kasqankuta yuyanqa. Ajinata yuyaspataj, ¡mayta pantanqa! (Eze. 38:1, 2, 9-12.)

4, 5. Satanás, Diospa llajtanta chinkachiyta munashajtin, ¿imatá Jehová ruwanqa?

⁴ Satanás, Diospa llajtanta chinkachiyta munashajtin, ¿imatá Jehová ruwanqa? Tukuyta Kamachej Diosqa kamachisninta jarkʼanqa. Imaraykuchus kamachisninpa contranpi Satanás, pachan ima sayaykojtinku, Paypa contranpipis sayaykushankuman jina kanqa (Zacarías 2:8 leey). Chayrayku Jehovaqa chay rato jarkʼawasunchej, imaraykuchus “Tukuy Atiyniyoj Diospa chay jatun pʼunchayni[npi]” Satanaspa pachanta chinkachenqa (Apo. 16:14, 16).

⁵ Chay maqanakuymanta Biblia nin: “Chay chʼajwaqa kay pachaj kʼuchusninkama chayanqa, imaraykuchus Tata Diosqa nacionespa contrankupi juiciota oqharenqa. Payqa tukuy runasta wajyanqa paykunata juzganampaj, chay juchayojkunatataj wañuyman wijchʼuykunampaj. Tata Diosmin chaytaqa nin. Tukuy Atiyniyoj Tata Diosqa nillantaj: Ñakʼariykunaqa nacionmanta nacionman chayanqa. Uj manchay sinchʼi loco para jina oqharikamonqa kay pachaj tukuy kʼuchusninmantapacha. Pikunatachus Tata Dios chay pʼunchaypi wañuchenqa, chaykunaqa kay pachaj ujnin kantumanta ujnin kantukama mastʼalla kanqanku. Mana pipis paykunamantaqa waqanqachu, nitaj pipis ayasninkuta pʼampaykamunankupaj oqharenqachu; pampallapi wanu jina wijchʼusqa kanqanku”, nispa (Jer. 25:31-33). Armagedón maqanakuypi Supaypa pachan chinkanqa. Diospa llajtanrí mana chinkanqachu.

6, 7. 1) Chay may chhika runas, ¿maymantá jamunku? 2) ¿Imaynatá yachanchej Diospa llajtan kay qhepa wataspi mayta yapakushasqanta?

⁶ Diospa llajtan astawan yapakushan imaraykuchus chaypi kajkunata Jehová allinpaj qhawan. Biblia nin: “Señorpa ñawisnenqa cheqan kawsayniyoj runasta qhawashan”, nispa (1 Ped. 3:12). Chantapis chay cheqan runasmanta “may chhika” runas “jatun ñakʼariy tiempomanta llojsimojkuna” kanqanku (Apo. 7:9, 14). Chay “may chhika” runaswan khuska “jatun ñakʼariy tiempomanta” llojsishaspa, ¡imayna kusisqachus kanaykipi tʼukuriy!

⁷ Chay may chhika runastaqa, Jesuspa nisqanman jina tukuy nacionesmanta tantakushan. Pay nerqa: “Janaj pacha reinomanta evangelio tukuynejpi willasqa kanqa, tukuy runas yachanankupaj; chaypachamá tukukoyqa jamonqa”, nispa (Mat. 24:14). Kay qhepa pʼunchaykunapi Diospa llajtanqa chayta juntʼananpaj mayta kallpachakushan. Chayraykutaj ashkha runas “tukuy sonqowan, cheqa kajman jinataj” Diosta yupaychayta yachakushanku (Juan 4:23, 24). Sutʼincharinapaj 2003 watamanta 2012 watakama, 2.707.000 runas  Diosman qokuspa bautizakorqanku. Jallpʼantinpitaj Jehovaj testigosnin 7.900.000 kuraj kanku, paykunawan khuskataj may chhika runas tantakunku, astawanraj Jesuspa Wañuyninta Yuyarinapaj. Tukuy chaytaj Diospa yanapayninwan ruwakushan, imaraykuchus tukuy chaykunata ‘Dioslla wiñachin’ (1 Cor. 3:5-7). May chhika runas watamanta wata yapakusqanqa, ¡mayta kusichiwanchej!

8. ¿Imaraykutaj Diospa llajtan kunan tiempopi wiñashallanpuni?

⁸ Jehová Diosqa kay Jallpʼapi uj llajtata ajllakorqa, chay llajta wiñananpajtaj yanapashan (Isaías 43:10-12 leey). Ñaupajmantaña kayta nikorqa: “Kay pisi puchoj runasqa waranqasta miranqanku; aswan mana kasuy runaspis uj jatun nacionman tukonqanku. Noqa Tata Diosmin chaytaqa nini. Chay imasqa usqhayta juntʼakonqapuni”, nispa (Isa. 60:22). Qallariypeqa ajllasqa cristianos pisilla karqanku. Jehová willayninkuta bendecisqanraykutaj paykunapis ashkhayallarqankutaj (Gál. 6:16). May chhika runasta tantakusqanman jinataj Diospa llajtanqa astawan wiñashallanpuni.

9. Bibliaj nisqasninta juntʼakojta rikunapaj, ¿imatá ruwananchej tiyan?

⁹ Jehová Diosqa, ajllasqa cristianospaj, may chhika runasmanta kajkunapaj ima sumaj kausayta apamunanta nin. Chayta japʼinapajtaj kamachiykunasninta juntʼananchej tiyan (Isa. 48:17, 18). Jehovaqa, kamachiykunasninta israelitas kasukunankuta munarqa. Imaraykuchus chay kamachiykunaqa paykunata llakiykunamanta jarkʼaj, yanapajtaj familia jina kusisqa kausakunankupaj, sumaj amigosniyoj kanankupaj, negociosninkupi maychus kajta ruwanankupaj, wajkunawanpis sumajta kausakunankupaj ima (Éxo. 20:14; Lev. 19:18, 35-37; Deu. 6:6-9). Kunanpis Jehovaj kamachiykunasnenqa, jarkʼawanchej, allinninchejpajtaj kanku, chay kamachiykunasninta juntʼaytaj atinapaj jinalla (1 Juan 5:3 leey). Diospa kamachiykunasninta kasukusunchej chayqa, ‘creeypipis allin kasunchej’ (Tito 1:13, 14).

10. ¿Imaraykutaj tiempochakunanchej tiyan Bibliamanta yachakunapaj, Familiapi Diosta Yupaychanapaj ima?

¹⁰ Diospa llajtanqa tukuy imapi ñaupajllamanpuni rishan. Sutʼincharinapaj kay qhepa pʼunchaykunapi Bibliaj cheqa yachachiyninta astawan sutʼita entiendenchej. Chaytataj ñaupajmantaña Bibliapi nikorqa: “Cheqan runaspa ñanninkoqa sutʼiyamuyta inti llojsimushaj jina, pʼunchayamusqanman jinari astawan kʼancharin”, nispa (Pro. 4:18). Chayrayku kayta tapurikuna: “¿Yachanichu imastachus Jehová llajtannejta kunallanraj publicacionespi sutʼinchasqanta? ¿Bibliata sapa pʼunchaychu leeni? ¿Mosoj publicacionesta llojsimojtinkamachu leeni? ¿Semanapi uj pʼunchayta tʼaqanichu familia jina Diosta yupaychanaypaj?”, nispa. Chay imasta ruwayqa atinapaj jinalla, tiemponchejta sumajta tʼaqajtinchejqa. Manchay ñakʼariy tiempo qayllaykamushasqanrayku, Bibliamanta yachakunallanchejpuni tiyan, yachakusqanchejman jinataj kausakunallanchejpuni tiyan. Diospa llajtanwan khuskataj ñaupajllamanpuni rinanchej tiyan.

11. ¿Imaraykutaj Dios llajtanpaj tantakuykunata, jatuchaj tantakuykunata ima wakichin?

¹¹ Diospa llajtanqa allinninchejrayku sapa kuti yuyarichiwanchej apóstol Pabloj nisqanta kasukunanchejta. Pablo nerqa: “Purajmanta kallpachanakuspa yanaparinakunachej, munanakuypi kawsananchejpaj, allin ruwaykunata ruwananchejpajtaj.  Chaypajqa Diosta yupaychana tantakuytaqa ama saqeychejchu, imaynatachus wakin saqenku, ajinata. Astawanqa kallpachanakuspa ujkuna ujkunata sonqosninchejta oqharinakuna, astawampis Señorpa jamunan pʼunchay qayllapiña kasqanta reparaspa”, nispa (Heb. 10:24, 25). Israelitasqa, Jehovata yupaychanankupaj tantakuspa mayta kallpachanakoj kanku. Chantapis chay tantakuykunapeqa kusirikoj kanku. Sutʼincharinapaj, Nehemiaspa tiemponpi Chʼujllas fiestapi mayta kusikorqanku (Éxo. 23:15, 16; Neh. 8:9-18). Kay tiempopipis tantakuykuna, jatuchaj tantakuykuna ima tiyapuwanchej. Chayrayku chay tantakuykunamanqa rinanchejpuni tiyan, imaraykuchus Diosman qayllaykunapaj, payta yupaychaypi kusiyta tarinapaj ima yanapawanchej (Tito 2:2).

12. Diospa Reinonmanta willayta, ¿imaynatá qhawananchej tiyan?

¹² Diospa llajtanpi kasqanchejrayku “Diospa evangelionta” willayta atinchej, chayta ruwayta atisqanchejtaj, ¡ni imawanpis kikinchakunchu! (Rom. 15:16.) “Diospa evangelionta” willaspataj, ‘Santo’ kaj “Dioswan khuska trabaja[nchej]” (1 Ped. 1:15; 1 Cor. 3:9). Chantapis runasman willamuspaqa, Diospa sutin jatunchasqa kananpaj yanapanchej. ¡May sumajpuni “kusikuyniyoj Dios[pa]” evangelionmanta willayqa! (1 Tim. 1:11, NM.)

13. ¿Imatá ruwananchej tiyan Diospa ñaupaqenpi allinpi kanapaj, kusisqa kanapaj ima?

¹³ Diosqa creeypi sinchʼi sayasqa kanapaj, payman, llajtanman ima qayllaykunanchejta munan. Moisés israelitasman nerqa: “Kunanqa noqa janaj pachaj ñawpaqempi, kay pachaj ñawpaqempipis kayta niykichej: Ñawpaqeykichejman churani kawsayta, wañuytawan chantá bendicionta, maldiciontawan, chaykunamanta ajllakunaykichejpaj. Kawsayta ajllakuychej ari, jinamanta qankuna, wawasniykichej ima kawsanaykichejpaj. Señorniykichej Tata Diosta munakuychej, kasuychejtaj; payllata qhatiychej, imaraykuchus paymin kawsayniykichejqa, unayta tiyakunaykichejpaj chay jallpʼapi, Señorniykichej Tata Dios juraspa qonanta nerqa ñawpa tatasniykichej Abrahamman, Isaacman, Jacobman ima, chaypi”, nispa (Deu. 30:19, 20). Kausayninchejqa Jehovata munakunamanta, payta kasukunamanta, payman qayllaykunamanta ima kashan.

14. ¿Imatá uj hermano Diospa llajtanmanta nerqa?

¹⁴ Hermano Pryce Hughesqa, Diosman, llajtanman ima cheqa sonqo karqa. Pay qhelqarqa: “Diosman mayta agradecekuni, 1914 wata ñaupajmantapacha munayninman jina kausakusqaymanta [...]. Llajtallanpipuni kanaypaj mayta kallpachakusqayqa ni imawanpis kikinchakunchu. Bibliamanta yachakuyta qallarisqaymantapachataj, sutʼita yachani Diosllapi atienekuna kasqanta. Chayraykutaj llajtallanpipuni kayta ajllarqani. Dios allinpaj qhawanawanchejpaj, bendecinawanchejpaj imaqa, llajtan imatachus yuyaychawasqanchejman jinapuni ruwana”, nispa.

15. ¿Imataj rikuchin cheqa yachachiy sutʼinchakusqanta tukuy sonqo japʼikuna kasqanta?

¹⁵ Jehová bendecinawanchejpajqa, llajtanwan khuska llankʼananchej tiyan, cheqa yachachiykunata sutʼinchasqantapis tukuy sonqo japʼikunanchej tiyan. Sutʼincharinapaj, Jesús wañupusqanmanta qhepaman ashkha judío cristianos Moisesman qosqa leyman jinallapuni kausayta munarqanku (Hech. 21:17-20). Chayrayku Pablo paykunata yanaparqa, juchasninkumanta  Jesús kausayninta qosqanrayku perdonasqa kayta atisqankuta reparanankupaj, manataj leyman jina uywa wañuchisqa qʼolachinasraykuchu (Heb. 10:5-10). Ashkha judiostaj Pabloj yuyaychasqanman jina, yuyayninkuta tijracherqanku. ¿Imatataj paykunamanta yachakunchej? Diospa Palabranta, publicacionesta ima, sumajta ukhunchananchej kasqanta, Diospa llajtan imallatapis waj jinamanta ruwananchejta niwajtinchejtaj tukuy sonqo japʼikunanchej kasqanta.

16. 1) ¿Imaraykutaj mosoj pachapi kausay may sumaj kanqa? 2) ¿Imatataj mosoj pachamanta astawan suyakushanki?

¹⁶ Jehovaman, llajtanman ima cheqa sonqo kajkunaqa, bendicionesta japʼenqanku. Sutʼincharinapaj, ajllasqa cristianosqa, Jesuswan khuska janaj pachamanta reyes jina kamachimonqanku (Rom. 8:16, 17). Kay Jallpʼapi kausakuyta suyakojkunarí paraisopi wiñaypaj kausakonqanku. Chay mosoj pachamanta runasman willayta atisqanchejqa, ¡may sumajpuni! (2 Ped. 3:13.) Paraisopeqa “llampʼu sonqoyojkuna[...] kay pachata herenciata jina japʼenqanku, allin kawsaypitaj kusisqa kanqanku” (Sal. 37:11). “Wasista ruwakuspa, tiyakonqanku”, “makisninkoj tarpusqanta[pis] mikhurikonqanku” (Isa. 65:21, 22). Niñataj ñakʼariy, wajchayay, yarqhay ima kanqañachu (Sal. 72:13-16). Jatun Babiloniataj niña runata chʼaukiyanqañachu, imaraykuchus chinkachisqa kanqa (Apo. 18:8, 21). Wañusqaspis kausarimonqanku, wiñaypajtaj kausakuyta atenqanku (Isa. 25:8; Hech. 24:15). Jehovawan allinpi kasqanchejta kallpachasunchej, llajtanwan khuskataj ñaupajllamanpuni risunchej chayqa, Jehovaj nisqasninta juntʼakojta rikusunchej.

17. ¿Imaynatataj Jehovaman, llajtanman ima, agradecekusqanchejta rikuchisunman?

¹⁷ Satanaspa pachanqa tukukonqaña. Chayrayku Satanaspa pachanwan mana chinkachisqa kanapaj creeypi sinchʼita sayanapaj kallpachakuna, agradecekunataj Jehovaman tukuy imata Payta yupaychananchejpaj qowasqanchejmanta. Salmista David jinataj ruwana. Pay nerqa: “Ujllata Tata Diosmanta mañakuni, chayllatataj maskʼasaj; Tata Diospa wasimpi kakuyllatapuni munani tukuy kawsayniypi, may kʼacha kasqanta tʼukuspa qhawanaypaj”, nispa (Sal. 27:4). Sapa ujninchej Jehovaman, llajtanman ima qayllaykunallapuni, llajtanwan khuskataj ñaupajman rinallapuni.