Rey David ujnin takiyninpi Jehovaman nerqa: “Diosníy, tukuy sonqo munayniykita ruwayta munani. Yachachiwasqasniykita sonqoypi waqaychani”, nispa (Sal. 40:8). Payqa, llakiykunapi, chʼampaykunapi rikukuspapis, Diospa munayninta ruwaspa kusikorqa. Diospa waj kamachisninpis, Diosta yupaychaspa mayta kusikullarqankutaj.

Apóstol Pabloqa, Salmo 40:8 nisqanta, Cristomanta parlananpaj oqharerqa. Nerqataj: “Mana uywa wañuchisqata, nitaj jaywanasta munarqankichu. Manachayri noqapaj aycha cuerpota wakichipuwarqanki. Uywa wañuchisqa qʼolachinasta, jucharayku jaywanastapis mana munarqankichu. Chantá nerqani: Kaypi kashani, imaynachus noqamanta qhelqasqa kashan libropi: Diosníy, munayniykita ruwaj jamuni”, nispa (Heb. 10:5-7).

Jesusqa kay Jallpʼapi Diospa ruwasqasninta qhawarispa, amigosninwan kaspa, mikhunata paykunawan mikhurikuspa ima kusirikorqa (Mat. 6:26-29; Juan 2:1, 2; 12:1, 2). Chaywanpis Diospa munayninta ruwaspa astawan kusikorqa. Chayraykutaj nerqa: “Mikhuyneyqa Kachamuwajniypa munayninta juntʼanay, ruwanantataj tukuychanay”, nispa (Juan 4:34; 6:38). Yachachisqasninpis imachus cheqamanta kusiyta apamusqanta yachakorqanku. Kusiywan, tukuy sonqotaj Reinomanta willamorqanku (Luc. 10:1, 8, 9, 17).

Jesús yachachisqasninman nerqa: “Riychej, [...] yachachisqasniyman tukuchimuychej, bautizaspa Dios Tataj sutimpi, Churej sutimpi, Santo Espíritoj sutimpiwan, yachachispataj qankunaman kamacherqaykichej chayta, paykunapis waqaychanankupaj. Chantá yachaychej, noqa qankunawan tuta pʼunchay kasqayta, kay pacha tukukunankama”, nispa (Mat. 28:19, 20, Qheshwa Biblia). Chay nisqanta juntʼanapajqa tukuy runaswan mayllapipis parlarina. Yachakuyta munajtinkutaj kutina,  Bibliamanta yachachina, chayta ruwaspataj kusiyta tarisunchej.

Willayninchejta runa uyarejtin chayri manapis, kusiyta tarinapajqa imayna sonqowanchus willamusqanchejmanta kashan. ¿Imaraykutaj sumaj willaykunata willamunallanchejpuni tiyan runas mana uyariyta munajtinku, phiñakojtinku ima? Imaraykuchus Reinomanta willaspalla, runasta Jesuspa discipulonman tukuchispalla Diosta, runa masinchejta munakusqanchejta rikuchinchej. Kausayninchej, runaj kausayninpis wañuy patapi kashan (Eze. 3:17-21; 1 Tim. 4:16). Chayrayku qhawarina imaschus wakin hermanosta runa mana uyariyta munankuchu chaynejpi kusiywan willamunankupaj yanapasqanta.

Sumaj tapuykunata ruwayqa runas willayninchejta uyarinankupaj yanapawasunman. Uj paqarin Amalia rikusqa uj runata periodicota leeshajta. Tapurisqataj allin willaykunata tarisqantachus manachus. Chay runataj “mana” nisqa. Chayraykutaj Amaliaqa “noqa sumaj willaykunata apamushani, chaytaj Diospa Reinonmanta parlarishan”, nisqa. Chaytaj chay runata Bibliamanta yachakuyta munananpaj yanaparqa. Ajinata tapurispataj Amaliaqa, parquepi 3 runasman Bibliamanta yachachiyta qallarerqa.

Janice hermananchejpis llankʼayninpi Diosmanta willallarqataj. Uj guardia, uj llankʼaj masin ima, Torremanta Qhawaj revistaj ujnin yachaqananmanta yachakuyta munarqanku, chayraykutaj Janice sapa killa apapunanta nerqa. Chaypi llankʼaj waj runamanpis willallasqataj, chay runataj Torremanta Qhawaj, ¡Despertad! revistaspi tukuy laya yachaqanas llojsisqanmanta kusisqa kasharqa. Chayta rikuspataj waj llankʼajpis revistasta munallasqataj. Janice nin: “Jehová mayta bendeciwan”, nispa. Llankʼayninmanta 11 runasman sapa killa revistasta aparqa.

Qotuchakuykunata waturej hermano uj qotuchakuymanta hermanosman wasimanta wasi willashaspa mana “waj kutikama” ninallankutachu yuyaycharqa. Astawanpis jinata tapurinankuta nerqa: “¿Munawajchu yachayta imaynatachus Bibliamanta yachachisqaykuta? Chayri, ¿maykʼajtaj kutimuyman astawan kaymanta parlarinanchejpaj?”, nispa. Hermanoj yuyaychasqanman jina ruwaspataj chay qotuchakuymanta hermanos uj semanallapi 44 runasman Bibliamanta yachachiyta qallarerqanku.

Pisi pʼunchayninman kutiypis runasta yachakuyta munanankupaj yanapallantaj. Imaraykuchus llampʼu sonqo runasqa Bibliamanta yachachiyta munasqanchejta reparanku. Uj señorata imaraykuchus Jehovaj testigosninwan Bibliamanta yachakuyta qallarisqanta tapurejtinku, nerqa: “Yachakuyta qallarerqani, paykuna yanapayta munawasqankurayku”, nispa.

 Madaiqa Precursorespaj Escuelaman riytawan 15 runasman yachachiyta qallarerqa. Waj hermanosmanpis 5 runasta Bibliamanta yachachinankupaj qorqa. Chay runasmanta wakintaj tantakuykunaman mana saqespa rishankuña. Madaitaqa ashkha runasman yachachinanpaj Precursorespaj Escuelaman risqan yanaparqa. Imaraykuchus chaypi yachakorqa, yachakuyta munajkunaman taripanakamapuni kutina kasqanta. Waj hermanapis ashkha runasta yanaparqa Bibliamanta yachakunankupaj. Pay nin: “Bibliamanta yachakuyta munajkunata yanapanapajqa, mana saykʼuspa kutinapuni kasqanta yachakorqani”, nispa.

Bibliamanta yachakuyta munajkunaman kutinapaj mayta kallpachakuna. Jehovaj bendicionnenqa ni imawanpis kikinchakunchu. Reinomanta willamunapaj mayta kallpachakuspaqa runasta ‘cheqa kajta rejsinankupaj’, salvakunankupaj ima yanapanchej (1 Tim. 2:3, 4). Mana iskaychakuspa nisunman Reinomanta willay, runasta Jesuspa yachachisqasninman tukuchiy imaqa, ¡mayta kusichiwasqanchejta!