JEHOVAQA, israelitas Babiloniamanta 537 watapi Jesús niraj jamushajtin llojsimushajtinku Jerusalenman chayanankupaj allin ñanninta rinankuta munarqa. Chayrayku nerqa: “Llajtaspaj ñanta kicharipuychej. Chay ñan tʼoqosta khuskachaychej; ñanmanta rumista oqhariychej”, nispa (Isa. 62:10). Jehovaj nisqanta kasukuspataj wakin judiosqa, ñan tʼoqosta khuskachanankupaj, ñanmanta rumista oqharinankupaj ima ñauparerqanku. Ajinamanta tukuyninku chay ñanninta kutipunankupaj.

Israelitas purerqanku chay ñantaqa, Diospaj astawan llankʼananchejpaj kallpachakusqanchejwan kikinchasunman. Jehovaqa chay ñanninta rinanchejta munan. Chayrayku Palabranpi kayta yuyaychawanchej: “Maymanchus chakiyki sarushan, chaytaqa allinta qhawakuy; ni pi kuyurichisonqachu”, nispa (Pro. 4:26). Kay yuyaychayqa waynasta, machu runasta ima yanapan.

Runasqa uj waynamanta chayri uj sipasmanta parlaspa ninku: “Payqa, pʼesqota phawashajta japʼinanpaj jina, may kallpasapa, tukuy imata ruwayta atenqa”, nispa. Chayta ninku, imaraykuchus waynaspata mana imankupis machu runajta jinachu nanan, astawanpis rato japʼeqayta atinku, ñaupajllamanpunitaj riyta munanku. Chayraykuchá Biblia nin: “Waynakunaqa kallpankurayku jatumpaj qhawasqa kanku”, nispa (Pro. 20:29). Uj wayna yachasqanta, ruwayta atisqanta, kallpanta ima Diosta yupaychananpaj apaykachanqa chayqa, Diospaj astawan llankʼanqa, kusiytataj tarenqa.

Kay tiempo runasqa waynas imatachus ruwayta atisqallankuta qhawanku. Uj cristiano waynata yachaywasipi allin notasniyoj kajtin, profesoresnin, compañerosnin, waj runas ima kay pachapi astawan ñauparinanpaj tanqanku. Sumajta  pujllajtintaj uj equipoman yaykunankupaj tanqanku. Ichá qanpis ajinapi rikukorqanki chayri ajinapi rikukojta pillatapis rejsinki. ¿Imataj uj cristianota yanapanman sumajta ajllananpaj?

Bibliaj yachachiykunasnenqa waynasta, sipaskunata cheqa ñanpi purinankupaj yanapan. Eclesiastés 12:1 nin: “Wayna kashaspa, pichus Ruwasoj Diosmanta yuyarikuy”, nispa. ¿Imaynatá waynas Ruwasojniykichejmanta yuyarikuwajchej?

Africamanta hermano Ericpa * kausayninpi tʼukurina. Paymanqa pelota jaytʼay mayta gustaj. Chayrayku 15 watasniyoj kashajtin suyunmanta may rejsisqa equipopi pujllananpaj wajyarerqanku. Chayman pujllaj rejtenqa, pisi tiemponman Europapi astawan sumajta pujllananpaj wakichinkuman karqa, ajinamantataj may rejsisqa pujllajman tukunman karqa. Chayta ruwaspa, ¿Ruwajnin Diosmanta yuyarikunmanchu karqa? Imatachus Eric ruwasqanta, imatachus paymanta yachakuyta atisqanchejta ima qhawarina.

Ericqa yachaywasillapiraj kashaspa Jehovaj testigosninwan Bibliamanta yachakuyta qallarerqa, Ruwawajninchej Dioslla runaspa chʼampaykunasninta allinchanantataj yachakorqa. Repararqataj Diospa munayninta ruwananpaj tukuy tiemponta, kallpanta ima churanan kasqanta. Chayrayku may rejsisqa pujllaj kananmantaqa, bautizakuspa Diosta yupaychaypi ñauparillarqapuni. Tiemponmantaj siervo ministerial jina llankʼarqa, aswan qhepamantaj Soltero Cristianospaj Escuelaman rerqa.

Pelota jaytʼayman qokunman karqa chayqa. Ichá may rejsisqa, ashkha qolqeyoj ima kanman karqa. Ericqa, yacharqa Proverbios 18:11 nisqan cheqapuni kasqanta. Chaypi nin: “Qhapaj runapaj kapuynenqa jarkʼachasqa llajta jina, yuyantaj uj alto perqa jina kasqanta”, nispa. Arí, qolqe tukuy imamanta jarkʼanawanchejta yuyayqa qhasilla. Kapuyniyoj kayta maskʼajkunaqa imaymana llakiykunallapi rikukunku (1 Tim. 6:9, 10).

Ashkha waynas, sipaskuna ima precursores jina llankʼaspa may kusisqas kausakunku. Eric nin: “Ashkha hermanoswan khuska precursores jina llankʼayqa may sumaj, uj equipopipis kayman jina, chaytaj ni imawan kikinchakunchu. Jehovaman mayta agradecekuni Payta yupaychaspa kusisqa kanaypaj, allin rinawanpaj ima yanapawasqanmanta”, nispa.

¿Qanrí? Kay pachapi ñaupajman rinaykimanta, ¿manachu cheqan ñanpi kanaykipaj precursor jina llankʼawaj? (“ ¿Universidadpi kusiyta tariwajchu?”, nisqa recuadrota qhawariy.)

Uj qhariwarmi Estados Unidospi, sucursalman rerqanku, chaypi hermanos may kusisqas Diosta sirvishasqankutaj mayta tʼukucherqa. Hermana nin: “Tukuy ima patapi kausakuyman yachaykukusqaykuta repararqayku”, nispa. Paykunaqa Diospaj astawan llankʼanankupaj kallpachakorqanku.

Qallariypi kausayninkuta mana tijrachiyta atillarqankuchu. Uj kuti sapa pʼunchay ukhunchana folletoj nisqanpi tʼukurerqanku. Chay pʼunchaypaj ajllasqa textoqa Juan 8:31 karqa. Chaypi nin: “Nisqayman jinachus sayankichej chayqa, cheqatapuni yachachisqasniy kankichej”, nispa. Chaypi tʼukurispataj nerqanku: “Kapusqallanchejwan kausakunapaj kallpachakoyqa may sumaj”, nispa. Paykunaqa wasinkuta venderparqanku, waj imasninkutapis pisiyacherqanku, uj juchʼuy qotuchakuymantaj riporqanku. Kunantaj precursores jina llankʼashanku, Tantakuna Wasista allinchaspa yanapakushanku, jatun tantakuykunapipis yanapakunku. Chayraykutaj ninku: “Kapusqallaykuwan kausakuspa, Diospa llajtan kamachiwasqaykuta ruwaspa ima astawan kusisqa kashayku”, nispa.

Salomón nerqa: “Ñawiykeqa cheqanta qhawachun; imachus ñawpaqeykipi kajta sumajta qhawakuy”, nispa (Pro. 4:25). Autota apaykachajqa, manejashaspa ñaupajta qhawan, noqanchejpis Diospaj astawan llankʼananchejpaj ñaupajllatapuni qhawananchej tiyan, nitaj imapis pantachinawanchejta saqenanchejchu tiyan.

¿Imasta ruwanaykipajtaj kallpachakuwaj? Sutʼincharinapaj, precursor jina llankʼayta atiwaj, manachayri wasiyki qayllapi pisi willajkunasniyoj qotuchakuyman ripuyta atiwaj, chayri mayqenpichus  pisi ancianoslla tiyan chayman ripuyta atiwaj. ¿Astawan Diospaj llankʼanaykipaj kallpachakuwajchu? Chaypajqa qotuchakuykunata waturej hermanowan parlariy. Wasiykimanta astawan karupi kaj qotuchakuypi yanapakuyta munaspataj, ima qotuchakuychus yanapata necesitasqanta tapuriy. *

Watejmanta Isaías 62:10 nisqanpi tʼukurinachej. Wakin judíos ñan tʼoqosta khuskachaspa, ñanmanta rumista oqharispa ima maytachá llankʼarqanku. Chay llankʼasqankutaj mana qhasipajchu karqa, imaraykuchus llajta masisninku allillanta llajtankuman chayaporqanku. Qanpis Diospaj astawan llankʼanaykipaj kallpachakushanki chayqa, kallpachakullaypuni. Jehovaj yanapayninwan astawan paypaj llankʼayta atinki. Ama saqeychu imapis jarkʼasunanta, astawanpis Diosmanta yachayta mañakullaypuni. Ajinata ruwanki chayqa Jehová mayta yanapasonqa (Pro. 4:26).