1, 2. ¿Imaynatá Jehová kamachisninta qhawan?

TATASQA, wakin kutis wawasninkuta pujllashajta rikuspa tʼukushaj qhepakunku, wakin imasta sumajta ruwayta atisqankuta reparasqankurayku. Ichá qanpis chayta wawaspi rikorqanki. Wakin wawasqa sumajta pujllanku, wakintaj sumajta dibujanku, chayri waj imasta sumajta ruwayta atinku. Tatasqa imallatapis wawas sumajta ruwajtinku, munanku yanapayta aswan sumajta ruwanankupaj.

² Jehovapis uj kʼacha tata jina kamachisninta mayta yanapayta munan, cheqa sonqos kasqankuraykutaj “naciones[pa] tiyapusqanta” jina qhawan, nisunman may valorniyojpaj (Hag. 2:7). Ichapis qan Jehovaj cheqa sonqo testigosninta rikorqanki tukuy imata sumajta ruwayta atisqankuta. Sutʼincharinapaj wakinkunaqa sumajta umallirichinku, wakinkunataj sumajta imallatapis wakichinku. Ashkha hermanastaj Diosmanta willamunankupaj waj qallusta yachakunku, wakinkunatajrí wajkunata sonqochaypi chayri onqosqasta qhawaypi yanapakunku (Rom. 16:1, 12). ¿Maytacharí  kusikunchej paykunawan qotuchakuypi kaspa?

3. ¿Ima tapuykunamantaj kutichisun?

³ Wakin waynas, kunallanraj bautizakojkuna imaqa, qotuchakuypi mana yanapakusqankuta yuyanku. ¿Imaynatá paykunata Diosta yupaychaypi ñauparinankupaj yanapasunman? ¿Imaraykutaj Jehová jina kʼacha kaykunasninkuta qhawananchej tiyan?

4, 5. ¿Imaynatá Jehová Gedeonta qhawarqa? ¿Imatá Jehovamanta yachakusunman?

⁴ Biblia nisqanman jina, Jehovaqa kamachisninpa mana kʼacha kaykunasnillantachu qhawan, manaqa imastachus ruwayta atisqankutapis. Kunantaj Gedeonmanta parlarina, paytaqa Jehová ajllarqa israelitasta madianitaspa makisninkumanta kacharichinanpaj. Gedeonqa tʼukushajchá qhepakorqa Jehovaj angelnin “Dios qanwan kashan, kallpayoj wapu runa” nejtin. Paytaj chay kutipi ‘pisi kallpayoj’ kasqanta, israelitasta kacharichiyta mana atisqanta ima yuyarqa. Jehová Diostajrí mana pay jinachu yuyarqa. Astawanpis yacharqa israelitasta kacharichiyta atisqanta (Jueces 6:11-16 leey).

⁵ Jehovaqa Gedeonpa kʼacha kaykunasninta qhawarqa, chayraykutaj paynejta israelitasta kacharichiyta atisqanta yacharqa. Sutʼincharinapaj, Jehovaqa Gedeonta tukuy kallpanwan trigota wajtashajta rikorqa. Chantapis chajra runasqa erapi trigota oqharinku, Gedeontajrí mana erapichu oqharisharqa manaqa, pakayllamanta madianitas mana qhechunankupaj uvasta sarunapaj cheqapi oqharisharqa. Jehovaqa Gedeonta mana uj sumaj tarpoj runata jinallachu qhawarqa, manaqa sumaj yachayniyoj runata jina. Chayraykutaj israelitasta kacharichinanpaj ajllarqa.

6, 7. 1) ¿Imaynatá Jehová profeta Amosta qhawarqa? 2) ¿Imasta Amós yacharqa?

⁶ Jehovaqa, imastachus profeta Amós ruwayta atisqanta qhawallarqataj, wajkuna pisipaj payta qhawajtinkupis. Amosqa ovejasta michej, kʼita higosta pallaj runa karqa. Payta Jehová wasanchaj Israelpa 10 ayllusninman juchachana willaykunata willamunanpaj kamachejtin, wakinkunaqa yuyarqanku mana chaypaj jinachu kasqanta (Amós 7:14, 15 leey).

⁷ Amosqa uj karu llajtitapi tiyakuspapis, llajtaspa ususninkumanta, kamachejkunamanta ima sumajta yacharqa. Ichapis Amosqa ranqheroswan parlaspa yacharqa Israel llajtapi, muyuyninpi kaj llajtaspipis imayna runaschus tiyakusqankuta (Amós 1:6, 9, 11, 13; 2:8; 6:4-6). Chantapis Amosqa, sumaj qhelqaj runa karqa, pisi rimaykunallata oqharejtinpis sonqoman chayanapaj jinapuni parlarqa. Sacerdote Amasiastapis mana manchachikuspa juchacharqa, chaytaj rikuchin Jehová payta willamunanpaj ajllaspa mana pantasqanta. Jehovaqa Amospa kʼacha kaykunasninta qhawarqa (Amós 7:12, 13, 16, 17).

8. 1) ¿Imatá Davidman Jehová nerqa? 2) ¿Imaraykutaj Salmo 32:8 mayta kallpachawanchej?

⁸ Jehovaqa kamachisnin imastachus ruwayta atisqankuta qhawan. Rey Davidmanpis nerqa: “Ñawisneyqa qanllapi kashan [...] yuyaychasqaykitaj”, nispa (Salmo 32:8 leey). Chay nisqanqa mayta kallpachawanchej. Imaraykuchus Jehovaqa, yanapawasunchej mana juntʼayta atina imasta juntʼanapaj. Imaynatachus uj yachachej yachakojman leenanpaj sumajta yachachin, ajinallatataj  Jehovaqa wakin ruwanasta juntʼanapaj qotuchakuymanta hermanosnejtataj yanapawanchej. ¿Imaynasmantataj chayta ruwan?

9. ¿Imaynatá Pabloj yuyaychasqanman jina ruwasunman?

⁹ Pabloqa, tukuy cristianosman creeypi kaj hermanosninkoj allinninkuta maskʼanankuta yuyaycharqa (Filipenses 2:3, 4 leey). ¿Ima niyta munasharqa chaywan? Imallatapis allinta hermanosninchej ruwajtinku paykunata “allinta ruwanki” nispa ninanchejta nisharqa. Pillapis “allinta ruwanki” niwajtinchej kusikunchej, ¿icharí? Ajinata niwasqanchejqa, allinta ruwanallapajpuni yanapawanchej. Ajinallatataj hermanosninchejta “allinta ruwanki” nispa, yanapanchej Diosta yupaychaypi ñaupariyta munanankupaj.

10. ¿Pikunatataj astawan yanaparisunman?

¹⁰ Tukuypis wakin kutis yanapanawanchejta necesitanchej. Waynas, kunallanraj bautizakojkuna imataj astawanraj yanapananchejta necesitanku, chaytaj paykunata yanapanqa qotuchakuypaj uj sumaj yanapa kasqankuta yachanankupaj. Bibliaqa paykunaman qotuchakuypi ruwanasta japʼinankupaj kallpachakunankuta yuyaychan (1 Tim. 3:1). Qotuchakuypi llankʼasqankuta mana jatunpaj qhawajtinchejqa, ichapis chay hermanosqa qotuchakuypi manaña llankʼayta munanqankuchu.

11. 1) ¿Imaynatá uj anciano uj manchali waynata yanaparerqa? 2) ¿Imatá Julienpa kausayninmanta yachakunchej?

¹¹ Qotuchakuymanta uj anciano Ludovic sutiyoj nin: “Uj hermanota tukuy sonqo yanaparejteyqa, Diosta yupaychaypi astawan ñauparin”, nispa. Chantá uj manchali wayna Julienmanta parlaspa, nin: “Qotuchakuypi yanapakuyta munaspa, wakin kutis mana munashaspa imatapis ruwarparillaj. Chaywanpis repararqani kʼacha kasqanta, qotuchakuypi yanapakuyta munasqanta ima. Chayraykutaj paymanta mana allinta yuyanaymantaqa, yanapariyta munarqani”, nispa. Chay hermano yanaparisqanraykutaj Julienqa siervo ministerial jina llankʼayta qallarerqa, kunantaj precursor regular jina llankʼashan.

12. Wajkunata yanaparinapaj, ¿imatataj ruwananchej tiyan? Sutʼinchay.

¹² Wajkunata yanaparinapajqa, imastachus sumajta ruwayta atisqankuta qhawarina tiyan. Julienpa kausayninpi qhawanchej jina, mana pantasqasnillankutachu qhawana tiyan, manaqa kʼacha kaykunasninkuta, imastachus sumajta ruwayta atisqankuta ima. Jesuspis mana apóstol Pedroj pantasqallantachu qhawarqa, manaqa kʼacha kaykunasninta qhawarqa, qotuchakuypi uj rumi jina sumaj sayasqa kanantataj nerqa (Juan 1:42).

13, 14. 1) ¿Imaraykutaj Bernabé, Marcosta yanapallarqapuni? 2) ¿Imaynatá uj wayna Marcos jina yanapachikorqa? (28 paginapi dibujota qhawariy.)

¹³ Bernabepis mana Marcospa pantasqasnillantachu qhawarqa (Hech. 12:25). Pablowan Bernabewan, misioneros jina ñaupaj kutipi rishajtinku, Marcosqa yanapajninku jina rerqa. Panfiliaman chayasqankutawantaj Marcosqa paykunata saqerparerqa, sinchʼi suwas kaj kanku chaynejta viajananku kashajtinpuni (Hech. 13:5, 13). ¿Imatá aswan  qhepaman Bernabé ruwarqa? Marcospa pantasqallanta qhawananmantaqa, kʼacha kaykunasninta qhawarqa, yanapallarqapunitaj (Hech. 15:37-39). Chayraykutaj Marcosqa, wiñay tukusqa cristianoman tukorqa. Pabloqa Colosensesman cartanta qhelqashajtin Romapi wisqʼasqa kasharqa, Marcostaj payta yanapasharqa. Chay cartapitaj Pablo allinta Marcosmanta parlarqa, “Marcospis napaykamullasunkichejtaj” nispataj nerqa (Col. 4:10). Pabloqa, aswan qhepaman Marcosta wajyacherqa yanapananpaj, chayta yachaspa Bernabé ¡maytachá kusikorqa! (2 Tim. 4:11.)

¹⁴ Alexandremanta parlarina, payqa niraj unaytachu anciano jina llankʼashan, yuyarikuntaj uj allin yuyayniyoj hermano yanapasqanmanta. Pay nin: “Waynallaraj kashajtiy, manchachikoj kani hermanospa ñaupaqenpi Diosmanta mañakuyta, uj ancianotaj sumajta wakichikunaypaj, mana manchachikunaypaj ima yanapawarqa. Chantapis sapa kuti niwaj willayman llojsinapaj tantakuypi mañakuyta ruwanayta, chaytaj manchachikuyniyta atipanaypaj yanapawarqa”, nispa.

15. ¿Imaynatá Pablo hermanospa allin ruwasqasninkuta qhawasqanta rikucherqa?

¹⁵ Wajkunata imatapis allinta ruwasqankuta rikuspa, “sumajta ruwanki”, ¿ninchejchu? Apóstol Pabloqa, Romanosman cartanpi 16 capitulonpi iskay chunka kuraj hermanospa allin ruwasqasninkuta oqharerqa (Rom. 16:3-7, 13). Sutʼincharinapaj, Andronicowan Juniaswan paymanta aswan ñaupajmantaña Cristota sirvishasqankuta nerqa. Chantapis Rufoj mamanmanta nerqa: “Payqa noqajtapis mamay jina karqa”, nispa, chayta nerqa ichapis payta ñaupajpi yanapasqanrayku.

16. ¿Imaynatá waynasta “allinta ruwanki” niy yanapanman?

¹⁶ Wajkunata “allinta ruwanki” neyqa mayta yanapanman. Francia suyumanta Rico nisqa lloqallitupi tʼukurina, payqa tatan mana bautizakunanta munajtin mayta llakikorqa, Jehovapaj astawan llankʼananpaj wiñay tukusqaraj kanan kasqantataj yuyarqa. Compañerosnin asipayajtinku mayta llakikullarqataj. Frédéric pitachus Ricoman Bibliamanta yachachinanta nerqanku, pay nin: “Creeyninmanta mana manchachikuspa parlasqanmanta ‘allinta ruwanki’ nerqani”, nispa. Chaytaj Rico nisqata Diosta yupaychaypi ñauparinallanpajpuni, tatanwan allinta kausakunanpaj ima yanaparqa. Bautizakorqataj 12 watayoj kashaspa.

17. 1) ¿Imaynatá hermanosninchejta yanaparisunman Diosta yupaychaypi ñauparinankupaj? 2) ¿Imatá uj misionero ruwarqa waynasta yanaparinanpaj? Sutʼinchay.

¹⁷ Hermanosninchejta “allinta ruwanki” nispa nejtinchej, Diospaj astawan  llankʼanankupaj yanapanchej. Silviaqa * Francia Betelpi ashkha watastaña llankʼashan, pay nin: “Hermanasqa, hermanosmanta nisqaqa waj imastapis reparayta atiyku. Ajinamantataj hermanosta kallpachariyku. Noqaqa hermanosta ‘allinta ruwanki’ niyta yachanipuni”, nispa (Pro. 3:27). Guayana Francesa nisqapi Jérôme sutiyoj misionero, ashkha waynasta misioneros jina llankʼanankupaj yanaparqa, pay nin: “Waynasta willaypi sumajta willasqankumanta, tantakuykunapi sumajta kutichisqankumanta ima ‘allinta ruwanki’ nejtiy, paykunaqa astawan kallpachakunku allinta ruwanankupaj”, nispa.

18. ¿Imaraykutaj waynaswan llankʼay may sumaj?

¹⁸ Chantapis Diosta yupaychaypi ñauparinankupaj yanapasunman paykunawan khuska Diospaj llankʼaspa. Uj wayna sumajta computadorata apaykachayta yachan chayqa, ichapis ancianoqa chay waynata machitu hermanospaj jw.org nisqamanta willaykunata impriminanta ninman. Chayri Tantakuna Wasita llimphuchashajtinchej manachayri allinchashajtinchej ichá noqanchejwan khuska llankʼananpaj wajyarisunman. Ajinamanta imatachus ruwayta atisqanta qhawasun, “allinta ruwanki” nispa niyta atisun, imatachus niyta munawasqanchejtataj uyarisun (Pro. 15:23).

19, 20. ¿Imaraykutaj hermanosta qotuchakuypi sumajta llankʼanankupaj yanapana tiyan?

¹⁹ Jehovaqa, Josueta israelitasta kamachinanpaj churashajtin, Moisesman nerqa: “Sonqochay, kallpachaytaj”, nispa (Deuteronomio 3:28 leey). Diospa llajtanmanqa, ashkha runas yaykushanku. Chayraykutaj waynasta, kunallanraj bautizakojkunata ima, Diospa yupaychaypi ñauparinankupaj yanapananchej tiyan. Ajinamanta ashkha hermanos kanqanku Diospaj astawan llankʼajkuna, pikunachus sumaj wakichisqas kanqanku wajkunaman yachachinankupaj (2 Tim. 2:2).

²⁰ Uj jatun qotuchakuypi kaspapis chayri uj qotitupi kaspapis, hermanosta yanapana qotuchakuypi sumajta llankʼanankupaj. Hermanosta yanaparinapajtaj kʼacha kaykunasninkuta Jehová jina qhawana.