“MANCHAY sajra pʼunchaykuna” tiempopi kausashanchej (2 Tim. 3:1-5). Chayrayku sapa pʼunchay kallpachakuna tiyan Jehovaj kamachiykunasninman jina kausanapaj, Jehovata munakusqanchejta rikuchinapaj ima. Jesusqa sajra pʼunchaykuna kananta, yachachisqasninta tukukuykama aguantanankupaj yanapananta ima nerqa (Mat. 24:3, 13; 28:19, 20). Chayraykutaj allin kamachi yuyayniyojta churarqa, cheqa yachachiykunata mikhunata jina horanpi qonanpaj (Mat. 24:45, 46).

Kay 1919 watapi chay allin kamachi yuyayniyojta churakusqanmantapacha, tukuy parlayniyojkunamanta Diospa llajtanman yaykumorqanku, paykunataj cheqa yachachiykunata mikhunata jina horanpi japʼishanku (Mat. 24:14; Apo. 22:17). Wakin publicacionesqa mana tukuy qalluspichu tiyan. Chantapis manallataj tukuy runaschu publicacionesninchejta Internetpi jw.org nisqapi leeyta atinku, nillataj chayman churakusqan videosta qhawayta chayri chayman churakusqan waj yachaqanasta leeyta atinkuchu. ¿Chay ninayanchu wakin cristianoslla Diosta yupaychaypi sumaj kallpachasqas kanankupaj cheqa yachachiykunata japʼishasqankuta? Chaymanta astawan yachanapajqa tawa tapuykunaman kutichina.

Kuraj Supayqa Jesusta juchaman urmachiyta munaspa rumista tʼantaman tukuchinanta nerqa, Jesustaj kuticherqa: “Mana tʼantallawanchu runaqa kawsanqa; astawanqa, Diospa siminmanta tukuy llojsimoj palabraswan”, nispa (Mat. 4:3, 4). ¿Maypitaj Diospa siminmanta llojsimoj palabras kashan? Bibliapi (2 Ped. 1:20, 21). Chayrayku nisunman cheqa yachachiykunaqa Bibliallapi kashasqanta (2 Tim. 3:16, 17).

Diospa llajtanqa, Traducción del Nuevo Mundo de las Santas Escrituras nisqa Bibliata orqhoshan, chaytaj tukuynin chayri wakillan 120 kuraj qalluspiña kashan, sapa watataj yapakushallanpuni. Chantapis waj Biblias tiyan tukuynin chayri wakillan tukuy imaymana qalluspi. Chaytaj Diospa munayninman jinapuni, imaraykuchus Diosqa “munan tukuy runas salvasqa kanankuta, cheqa kajtataj rejsinankuta” (1 Tim. 2:3, 4). “Tukuy ruwasqa kajqa Diospa qhawayninmanta mana pakasqa[chu]” kashan. Chayrayku mana iskayrayanachu Jehová, paymanta yachakuyta munajkunata llajtanman pusamunanmanta, cheqa yachachiykunatataj mikhunata jina horanpi qonanmanta (Heb. 4:13; Mat. 5:3, 6; Juan 6:44; 10:14).

Creeyninchej sinchʼi kananpajqa mana Bibliata leenallachu tiyan, manaqa leesqanchejta entiendenanchej tiyan, chayman jinataj kausakunanchej tiyan (Sant. 1:22-25). Ñaupa tiempomanta eunuco runa chayta sutʼita repararqa. Payqa Diosmanta Qhelqasqata leesharqa, chayllapitaj Felipe tapurerqa: “Entiendenkichu imatachus leesqaykita?”, nispa. Paytaj kuticherqa: “Imaynamantataj entiendesaj, mana pipis sutʼinchawajtinri?”, nispa (Hech. 8:26-31). Chantá Felipe yanaparqa Diospa Palabranta sumajta entiendenanpaj, chayraykutaj payqa bautizakorqa (Hech. 8:32-38). Noqanchejtapis publicacionesninchej Bibliaj cheqa yachachiykunasninta entiendenapaj yanapawanchej. Yachakusqanchej sonqonchejman chayasqanraykutaj chayman jina kausakuyta munanchej (Col. 1:9, 10).

Diospa kamachisnenqa ashkha cheqa yachachiykunata mikhunata jina japʼinchej publicacionesnejta (Isa. 65:13). Sutʼincharinapaj, Torremanta Qhawaj revistaqa, 210 qallusmanta astawan orqhokushan, Bibliaj profeciasnintataj sutʼinchan, cheqa yachachiykunata entiendenapaj, yachakusqanchejman jina kausakunapajtaj yanapawanchej. ¡Despertad!, revistataj 100 qalluspi jinaña orqhokushan, sutʼinchantaj imastachus Dios ruwasqanmanta, chantá imaynatachus Bibliaj yuyaychaykunasninman jina kausakunata (Pro. 3:21-23; Rom. 1:20). Allin kamachi yuyayniyojqa, 680 qalluspi publicacionesta orqhoshan. Qanrí, ¿sapa pʼunchay Bibliata leenaykipaj kallpachakushankichu? Parlasqayki qallupi llojsimoj mosoj publicacionesta, ¿leeshankichu?

Jehovaqa mana publicacionesllatachu qowanchej, manaqa llajtannejta tantakuykunapaj, jatuchaj tantakuykunapaj ima, umallirichiykunata wakichin. Chay tantakuykuna umallirichiykunawan, dramaswan, rikuchiykunawan ruwakojtin mayta kusikunchej. Arí, Jehovaqa chaykunata mikhuyta jina, ¡sumajta wakichipuwanchej! (Isa. 25:6.)

Mana. Wakin kutis Diospa kamachisninmanta wakinkunaqa astawan cheqa yachachiykunata japʼinku. Sutʼincharinapaj, apostolesqa Jesuspa waj yachachisqasninmanta nisqaqa astawan cheqa yachachiykunata japʼerqanku (Mar. 4:10; 9:35-37). Jesuspa waj yachachisqasnintajrí, imatachus necesitasqallankuta japʼerqanku (Efe. 4:20-24; 1 Ped. 1:8).

Chantapis imastachus Jesús Jallpʼapi kashaspa nisqanmanta, ruwasqanmanta ima mana tukuyninpunichu Evangeliospi qhelqasqa kashan. Chayrayku apóstol Juan nerqa: “Jesuspa ruwasqasnenqa aswan ashkharaj tiyan. Chaykunachus ujmanta uj qhelqakunman chayqa, yuyani tukuynin kay pacha mana wakinmanchu chay qhelqasqa librosta churanapaj”, nispa (Juan 21:25). Ñaupa tiempomanta cristianosqa noqanchejmanta nisqaqa Jesusmanta astawan yacharqanku. Chaywanpis Jehovaqa, Jesús jina ruwanapaj imastachus Jesusmanta yachayta necesitasqanchejta willawanchej (1 Ped. 2:21).

Tʼukurinallataj apóstoles cartasta qotuchakuykunaman apachisqankupi. Apóstol Pablo cartasta qhelqasqanmanta ujsina mana Bibliapichu qhelqasqa kashan (Col. 4:16). ¿Chay ninayanchu cheqa yachachiykunata pisillata japʼisqanchejta? Mana. Imaraykuchus Jehovaqa creeyninchejta kallpachanapaj imatachus necesitasqanchejta yachan, chaytataj qowanchej (Mat. 6:8).

Wakin hermanospa parlayninkupeqa ashkha cheqa yachachiykuna tiyan. Qan parlanki chay qallupi pisi publicacioneslla kajtenqa ama llakikuychu, imaraykuchus Jehovaqa yachan imatachus necesitasqaykita. Parlayniykipi kaj publicacionesta ukhunchay, parlayniykipi kaj tantakuykunaman rinaykipaj kallpachakuy. Ajinamanta Dioswan allinpi kallankipuni (Sal. 1:2; Heb. 10:24, 25).

Internetpi jw.org nisqapi Bibliata ukhunchananchejpaj revistas, waj publicaciones ima tiyan. Chantapis casarasqaspaj, tataspaj, jovenespaj, wawaspaj yachaqanas tiyan. Chaykunawantaj familias yanapachikunku familia jina Diosta yupaychashaspa. Chantapis jw.org nisqapeqa churakullantaj Galaad Escuelamanta yachakojkuna llojsisqankumanta, watapi uj kutita tantakuy ruwakusqanmanta, sinchʼi llakiykuna kasqanmanta, juiciospi kasqanchejmanta ima (1 Ped. 5:8, 9). Chantapis jw.org nisqaqa willanapaj sumaj yanapa, imaraykuchus willajta mana saqewanchejchu chay lugaresmanpis sumaj willaykunawan chayayta atinchej.

Kay jw.org nisqaman yaykuyta atejtiyki chayri manapis creeypi sinchʼi sayasqa kayta atiwaj. Allin kamachi yuyayniyojqa Diospa tukuy kamachisninpaj imprimisqa publicacionesta orqhon, creeypi sinchʼita sayanankupaj. Chayrayku jw.org nisqaman mana yaykuyta atispaqa mana allinchu kanman chayman yaykunaykipaj imatapis mana atishaspa rantinayki. Qotuchakuymanta uj hermano mana Internetman yaykuyta atej hermanospaj, jw.org nisqamanta yachaqanasta imprimiyta atin, chaytataj mana tukuy qotuchakuykunapichu ruwakun.

Jesús cheqa yachachiykunata mikhunata jina qonawanchejta nisqanta sumajta juntʼashan. Chayraykutaj, ¡mayta agradecekunchej! Kay qhepa pʼunchaykunapi Jehová cheqa yachachiyta horanpi qollawasunpuni.