1, 2. ¿Imatá Jehová Moisesman kamacherqa, chantá imatataj nerqa?

UJ ATIYNIYOJ kamachejwan Diospa llajtanpa sutinpi parlaj rinaykipi tʼukuriy. Ichapis paywan parlaj riyta manchachikunki, ni imata niyta atinaykitataj yuyanki. ¿Imaynatá wakichikuwaj chay kamachejwan parlaj rinaykipaj? ¿Imatá ruwawaj chay kamachejwan Diospa llajtanpa sutinpi sumajta parlanaykipaj?

² Moisés ajinapi rikukorqa, pichus “aswan llampʼu sonqoyoj” runa karqa (Núm. 12:3). Chaywanpis Jehovaqa payta kacharqa faraonwan parlananpaj. Faraonqa jatunchakoj runa, may sajrataj karqa. Jehovataj, Moisesta kacharqa faraonman uj kamachiyta qonanpaj. Chay kamachiytaj karqa israelitasta kacharipunan (Éxo. 5:1, 2). Chayraykuchá Moisés Jehovata taporqa: “Pitaj noqa kani Faraonman rispa, israelitasta Egiptomanta orqhomunaypajri?”, nispa. Moisesqa ichapis yuyarqa Diospa nisqanta juntʼananpaj mana wakichisqachu kasqanta. Jehovataj payman nerqa: “Noqamin qanwan kasaj”, nispa (Éxo. 3:9-12).

3, 4. 1) ¿Imaraykutaj Moisés manchachikorqa? 2) Moisés jina, ¿imatá mana ruwayta atillasunmanchu?

³ ¿Imaraykutaj Moisés manchachikorqa faraonman niyta Dios payta kachasqanta? Imaraykuchus yuyarqa faraón mana uyarinanta. Chantapis manchachikullarqataj llajta masisnin mana creenankuta Jehová payta kachasqanta Egiptoj  atiyninmanta kacharichinanpaj. Chayrayku Moisés Jehovaman nerqa: “Imatá paykuna chaytaqa creewanqankuri, nitaj kasuwankumanchu. Paykunaqa niwanqankuchari: Tata Diosqa mana qanman rikhurisunkichu”, nispa (Éxo. 3:15-18; 4:1).

⁴ Noqanchejqa ichá ni jaykʼaj Moisés jina uj atiyniyoj kamachejwan parlaj risunchu. Chaywanpis Diosmanta, Reinonmanta ima willaj rinchej, wakin kutisqa ichá mana willayta atillasunchu. Jinapi rikukojtinchejtaj imatachus Jehová Moisesman nisqanmanta, imaschus qhepaman rikukusqanmanta ima yachakuy mayta yanapawasunman.

5. ¿Imatá Moisesman Jehová qorqa, chantá imaynatá chay Jehovapi atienekusqanta kallpacharqa? (11 paginapi dibujota qhawariy.)

⁵ Moisés Jehovaman, nisqanta mana ni pi creenanta nejtin, ¿imaynatá Jehová kallpacharqa? Biblia nin: “Diostaj nerqa: Imataj makiykipi kashanri?, nispa. Moisestaj nerqa: Kayqa tojnuy, nispa. Chantá Tata Diosqa Moisesta nerqa: Pampaman choqay chay tojnuykita, nispa. Paytaj pampaman choqarqa. Chay ratopacha tojnonqa katariman tukorqa, Moisestaj manchariywan ayqerqa chay katarimanta. Chantá Tata Diosqa Moisesta nerqa: Ama ayqeychu; makiykiwan chupanmanta japʼiykuy, nispa. Paytaj kasuspa, makinwan chupanmanta katarita japʼiykorqa, chay ratopachataj tojnullanmantaj tukuporqa. Tata Diostaj nillarqapuni: Chay kanqa uj señal, Tata Diosqa qanman rikhurisusqanta”, nispa (Éxo. 4:2-5). Diospa atiyninwan uj tojnu katariman tukorqa. Chaytaj rikucherqa Jehová Moisesman atiyta qosqanta, Jehovapuni kachasqanta ima. Chayrayku Jehová Moisesman nerqa: “Chay tojnuykita apakuy; chaywanqa tʼukuna imasta ruwamunki”, nispa (Éxo. 4:17). Chaywanqa Moisés Jehová yanapananpi atienekuspa Faraonwan, llajta masisninwan ima parlaj rerqa (Éxo. 4:29-31; 7:8-13).

6. 1) Willaj rispa, ¿imamantá yachachiyta munanchej, imaraykutaj? 2) ¿Imaraykú Pablo Diospa Palabran kausayniyoj, atiyniyojtaj kasqanta nerqa?

⁶ Diosmanta willaj rispaqa Bibliamantapuni yachachiyta munanchej. Wakin runasqa Biblia mayqen libro jinalla kasqanta yuyanku, chaywanpis Bibliaqa Diospa Palabran, yuyaychaykunasnintaj chaypi kashan (2 Ped. 1:20, 21). Chantapis Diospa Reinon imatachus qhepaman ruwananmanta parlan. Chayraykutaj apóstol Pablo nerqa: “Diospa Palabranqa kawsayniyoj, atiyniyojtaj”, nispa (Hebreos 4:12 leey). ¿Imaraykutaj Diospa Palabran kausayniyoj kasqanta nerqa? Imaraykuchus Diospa tukuy nisqasnenqa juntʼakunpuni, aswan qhepamanpis juntʼakullanqataj (Isa. 46:10; 55:11). Chayta uj runa sumajta entiendespaqa, Bibliata leespa Diospa Palabran ‘atiyniyoj’ kasqanta kausayninpi rikonqa.

7. ¿Imaynatá Diospa Palabranwan maychus kajta yachachisunman?

⁷ Jehová Diosninchejqa Bibliata qowanchej. Chaytaj willayninchej cheqa kasqanta, Diosmantapuni jamusqanta ima rikuchinapaj yanapawanchej. Chayraykuchá Pablo Hebreosman cartanta qhelqaytawan, Timoteoman ‘cheqa kaj palabrawan maychus kajta yachachiy’ nispa yuyaycharqa (2 Tim. 2:15). ¿Imaynatá Pabloj yuyaychasqanman jina ruwasunman? Runaj sonqonman chayananpaj jina Bibliaj versiculosninta sumajta ajllaspa. Chayta ruwanapajtaj 2013 watapi mosoj tratados llojserqa.

8. ¿Imatá uj superintendente de servicio mosoj tratadosmanta nerqa?

⁸ Mosoj tratadosmanta ujllatapis sumajta willaypi apaykachayta yachakusun chayqa,  tukuynin tratadoswan willayta atillasun, imaraykuchus tukuynin tratados kikin wakichisqas kashanku. Hawai (Estados Unidos) llajtamanta uj superintendente de servicio nerqa: “Mana yuyallarqaykupischu kay mosoj tratados wasimanta wasi, ashkha runas tiyan chaypi ima willanaykupaj, mayta yanapanawaykuta”, nispa. ¿Imaraykutaj chay tratadoswan willayta atikullan? Chay superintendente nisqanman jinaqa, chay tratadospi uj tapuy, kutichiynin ima kasqanrayku. Wasiyojtaj chay tapuyman mana manchachikuspa kutichiyta atillan, chay hermano nisqanman jinaqa chay tratados ajina wakichisqa kasqanrayku, ashkha runaswan Bibliamanta parlariyta atikullan.

9, 10. 1) ¿Imaynatá tratados yanapawanchej Bibliawan runaman willanapaj? 2) ¿Mayqen tratadowan willashajtiykitaj allin risorqa, imaraykutaj?

⁹ Sapa uj tratadopi Bibliamanta uj ajllasqa versículo tiyan. Sutʼincharinapaj, ¿Maykʼajllapis ñakʼariy chinkanqachu?, nisqa tratadomanta parlarina. Chay tratadoj tapuyninman “arí”, “mana” chayri “ichapis” nispa kutichejtinku, allin kanman niraj imatapis nishaspa chay tratadoj iskay paginanta rikuchinayki. Niwajtaj: “Kayta Biblia niwanchej”, nispa. Chantá Apocalipsis 21:3, 4 versiculosta leeripuy.

¹⁰ Kikillantataj ruwawaj Bibliamanta ¿imatá creenki?, nisqa tratadowan, chay tratadopi rikhurej kinsa kutichiykunamanta mayqellantapis runas ajllakojtinku, iskay paginanta rikuchiytawan niwaj: “Biblia niwanchej: ‘Diosmanta tukuy Qhelqasqaqa paypa yuyaychasqan’”, nispa. Chantá niwaj: “Mana chayllatachu Biblia nin”, nispa. Chayta niytawantaj Bibliaykipi 2 Timoteo 3:16, 17 versiculosta leeripuy.

11, 12. 1) Wasiyoj sumajta uyariwajtinchej chayri manapis, ¿imatá ruwasun? 2) Wasiyojwan watejmanta parlarinapaj, ¿imaynatá mosoj tratados yanapawasun?

¹¹ Wasiyoj sumajta uyariwajtinchejqa, ichá astawan chay tratadomanta parlarisunman. Wasiyoj sumajta uyariwajtinchej chayri manapis wasiyojman mana uj tratadollatachu saqesun, manaqa Bibliamanta uj chayri iskay versiculosta leeripusun. Waj kutipitaj kutiyta atisun, astawan parlarinapaj.

¹² Sapa tratadoj wasa ladonpi “Ichá tapurikunki” nisqa rikhurin. Uritanpitaj uj tapuy, Bibliamanta wakin versículos ima rikhurin, chaymantataj wasiyojwan waj kutipi  parlariwaj. Kay ¿Imaynataj kausay qhepaman kanqarí?, nisqa tratadopi “¿Imaynatá Dios, kay pachata allinchanqa?”, nisqa tapuy rikhurin, Mateo 6:9, 10; Daniel 2:44 versículos ima. ¿Wañusqas kausarimuyta atinkumanchu?, nisqa tratadopitajrí “¿Imaraykutaj machuyanchej, wañunchej ima?”, nisqa tapuy rikhurin, Génesis 3:17-19; Romanos 5:12 versículos ima.

13. ¿Imaynatá mosoj tratadoswan Bibliamanta yachachiyta qallarisunman?

¹³ Chay tratadosqa, Bibliamanta runaman yachachiyta qallarinapaj wakichisqas kashanku. Chay tratadospa wasanpitaj codigo QR * (código de respuesta rápida) tiyan, chay codigonejtataj Internetpi “¿Imaraykutaj Bibliamanta yachakuna?”, nisqa videota qhawayta atikun, chay videotaj runasta Bibliamanta noqanchejwan yachakunankupaj kallpachashan. Chantapis chay tratadospa wasa ladonpeqa ¡Diosmanta jamoj sumaj willaykuna!, nisqa folletoj wakin yachaqanasninta leenata nishan. Sutʼincharinapaj ¿Pejpa atiyninpitaj kay pacha kashanrí?, nisqa tratadopi chay folletoj 5 yachaqananta leenata nishan. ¿Imataj familiayki kusisqa kananpaj yanapanman?, nisqa tratadopitaj 9 yachaqanata. Tratadoswan willayta yachakusunchej chayqa, runaswan ñaupaj kutirayku parlarishaspa Bibliamanta leeripuyta atisunchej, watejmanta chay runawan parlarej kutispapis. Ajinata ruwaspaqa ashkha runasman Bibliamanta yachachiyta qallarisunchej. ¿Imatawan ruwasunman Diospa Palabranwan sumajta willananchejpaj?

14, 15. ¿Imaynatá Pablo jina ruwasunman willayninchejpi?

¹⁴ Pabloqa tukuy laya runaspa yuyayninkuta entiendeyta munarqa (1 Corintios 9:19-23 leey). ¿Imaraykú? Imaraykuchus tukuy laya runasta, nisunman judiosta, jinallataj waj llajtayojkunatapis, salvakunankupaj cheqa kajta yachachiyta munarqa (Hech. 20:21). ¿Imaynatá Pablo jina ruwasunman “tukuy runas[man]” willaj rishaspa? (1 Tim. 2:3, 4.)

¹⁵ Reinomanta Willayninchej hojitapeqa, sapa killa yuyaychakun imaynatachus runaswan parlarinata. Chayman jina ruwanapajtaj kallpachakusunman. Runas chaykunamanta mana yachakuyta munajtinkutaj, imasmantachus yachakuyta munanku chaykunamanta parlarisunman. Chaypajtaj willanchej chaypi imaschus runasta llakichisqanpi, imapichus rikukushasqankupi ima tʼukurisunman, Bibliamanta ima versiculotachus leeripunanchejpi ima. Qotuchakuykunata waturej uj hermano, warminwan imaynatachus Bibliawan willasqankumanta nin: “Ashkha runasqa pisillata parlarejtiyku uyarillawayku. Chayrayku niraj punkuta takaykushaspa ima versiculotachus leeripunaykuta maskʼayku. Llojsimojtinkutaj chay versiculota leeripuyku”, nispa. Kunantaj qhawarinachej ima tapuykunachus, ima versiculoschus, imamanta parlariychus runaswan sumajta parlarinapaj yanapanawanchejta. Chay yuyaychakusqanman jinataj ruwasunman.

16. ¿Imaynatá Isaías 14:7 versiculowan willawaj?

¹⁶ Tiyakunki chaynejpi maqanakuykuna, suwas ima kan chayqa, ichapis willashaspa kayta niwaj: “‘Jallpʼantinpi maqanakuykuna manaña kanchu, ni suwaspis, runas may kusisqas kausakushanku’, nispa periodicospi willakojtin, ¿kusikuwajchu? Bibliaqa Isaías 14:7 versiculopi tumpamantawan ajina kausay kananta nin. Chantapis Bibliaqa Dios allin kausayta apamunanmanta mayta parlan”, nispa. Chantá imatachus Dios nisqanmanta Bibliapi leeripuwaj.

17. ¿Imaynatá Mateo 4:4 versiculowan willawaj?

 ¹⁷ ¿Willanki chaypi runas kapuyniyoj kayllapichu astawan yuyanku, chayri kausakunankupaj nichu qolqeta ganakuyta atillanku? Jina kajtin ichá kayta tapuriwaj: “¿Kusisqa kausakunapaj qhapajpunichu kana tiyan?”, nispa. Chantá niwaj: “Ashkha runas qhapaj kaspapis mana kusisqaschu kausakunku. Chayrayku, ¿imataj yanapawasunman kusisqa kausakunapaj?”, nispa. Chantá Mateo 4:4 versiculota leeripuytawan, Bibliamanta yachakuyta munasqantachus manachus tapuriwaj.

18. ¿Imaynatá Jeremías 29:11 versiculowan runasta willaypi sonqochawaj?

¹⁸ Willanki chaypi uj llakiy kasqanrayku mayta ñakʼarishanku chayqa, ichapis niwaj: “Uj sumaj willayta apamushani, chaytaj llakiypi kashajtinchej sonqochawanchej”, nispa. Chantá Jeremías 29:11 (leey) versiculota leeripuytawan niwaj: “Kaypi leenchej jina, Diosqa kay tiempopi, jamoj tiempopipis allinta kausakunanchejta munan. ¿Atisunmanchu kusisqa kausakuyta?”, nispa. Chaymanta astawan sutʼinchanaykipajtaj Sumaj willaykuna folletopi chaymanta astawan parlaj yachaqanata rikuchiy.

19. ¿Imaynatá Apocalipsis 14:6, 7 versiculoswan willawaj?

¹⁹ Maypichus willanki chaypi religionmanta yachayta munajtinkoqa, ichá niwaj: “Uj ángel wasiykiman jamojtin, ¿imatachus willayta munasusqanta uyariwajchu?”, nispa. Chantá Apocalipsis 14:6, 7 (leey) versiculota leeytawan, niwaj: “Chay angelqa ‘Diosta manchachikuychej’ nispa niwanchej. ¿Mayqen Diosmantataj parlasharqa? Janaj pachata, kay pachatawan ruwaj Diosmanta. ¿Pitaj chay Dios?”, nispa. Chantá Salmo 124:8 versiculosta leey. Chaypi nin: “Yanapayninchejqa [Jehová] Diosmanta jamuwanchej, pichus cielota, kay pachatawan ruwajmanta”, nispa. Chantá Jehovamanta astawan sutʼincharinaykita niy.

20. 1) ¿Imaynatá Proverbios 30:4 versiculota leeytawan Diospa sutinta runasman willarisunman? 2) ¿Ima versiculotaj sumajta willanaykipaj yanapasorqa?

²⁰ Uj waynawan parlayta qallarinapaj nisunman: “Bibliamanta uj versiculota leeripusuyta munani, chaytaj uj sumaj tapuymanta parlarishan”, nispa. Chantá Proverbios 30:4 (leey) versiculota leeytawan, niwaj: “¿Pimantá kay versículo parlashan? Diosmanta parlashan, imaraykuchus ni pipis kayta ruwayta atinchu. ¿Imaynatá imachus Diospa sutin kasqanta yachakusunman? Munayman Bibliapi Diospa sutinta rikuchisuyta”, nispa.

21, 22. 1) ¿Imaynatá Biblia wasiyojta yanapanman? 2) ¿Imata ruwanaykipaj willaypi kallpachakunki?

²¹ Biblia imaynatachus wasiyojta yanapananta mana yachanchejchu. Sutʼincharinapaj, Australiapi iskay hermanos uj sipaswan parlarisqanku. Tapurisqankutaj: “¿Diospa sutinta yachankichu?”, nispa. Chantá Salmo 83:18 leeripusqanku. Chay sipas nin: “Diospa sutinta rikuytawan tʼukulla qhepakorqani, ripusqankutawantaj uj libreriaman 56 kilometrosta autoypi rerqani, waj Bibliaspi, uj diccionariopi ima Diospa sutinta maskʼanaypaj. Diospa sutin Jehovapuni kasqanta rikuytawantaj, imastawanrajchus yachakunaypi tʼukurerqani”, nispa. Pisi tiemponmantaj pay, novion ima Bibliamanta yachakuyta qallarerqanku, bautizakorqanku ima.

²² Diospa Palabranqa runaspa kausayninkuta tijrachinanpaj atiyniyoj. Wakinkunaqa Bibliata leespa Jehovaj nisqasninpi creeyninkuta kallpachanku, chaytaj yachakusqankuman jina ruwanankupaj yanapan (1 Tesalonicenses 2:13 leey). Bibliaj yachachiynenqa, imata nisqanchejmantapis aswan atiyniyoj runaj sonqonman chayananpaj. Chayrayku, ¡Diospa Palabranwanpuni willamunachej!