PEDROQA Jesusta mana rejsisqanta nisqanrayku sonqo nanayta waqarikorqa. Watejmanta Dioswan allinpi kananpajtaj mayta kallpachakunan karqa, jinapis Jesusqa paynejta waj yachachisqasninta yanaparqa. Chayrayku nerqa: “Qantaj kutirikuspa, kallpachay hermanosniykita”, nispa (Luc. 22:32, 54-62). Pedroqa ñaupa tiempomanta qotuchakuyta mayta yanaparqa (Gál. 2:9). Kunanpis manaña anciano kajkunaqa, watejmanta anciano kayta atinkuman. Hermanosninkuta kallpachaspataj kusiyta tarinkuman.

Manaña anciano kajkuna, ichá yuyankuman ancianos kashaspa mana allintachu llankʼasqankuta. Julioqa, * Boliviapi 20 watas kurajta anciano karqa. Pay nin: “Umallirichiykunata wakichispa, hermanosta waturispa ima, may kusisqa karqani. Jinallapi manaña ancianochu karqani. Chaytaj mayta llakichiwarqa”, nispa. Kunantaj payqa watejmanta anciano jina llankʼashan.

Santiago nerqa: “Hermanosníy, imaymana mana allin imas jamusojtiykichej, qankunaqa mayta kusikuychej”, nispa (Sant. 1:2, 3). Santiagoqa pantaj runas kasqanchejrayku, qhatiykachasqas kasqanchejrayku chʼampaykunata atipananchej kasqanmanta parlasharqa. Sutʼincharinapaj, noqallanchejpaj imatapis munapayaymanta, wakillanta allinpaj qhawaymanta ima parlarqa (Sant. 1:14; 2:1; 4:1, 2, 11). Jehová kʼamiwasqanchejqa mana chay rato kusikunapaj jinachu kajtinpis, mana saqenanchejchu tiyan kusiyninchejta chinkachinanta (Heb. 12:11).

Qotuchakuypi ima ruwayllatapis niña ruwashanchejchu chayqa, imaynachus creeyninchej kashasqanta qhawarikusunman, Jehovamantaj  munakuyninchejta rikuchisunman. Imaraykuchus Diosta sirvisqanchejpi tʼukurinapaj tapurikusunman: “¿Munaynillayta maskʼasqayraykuchu chayri Jehovata munakusqayraykuchu sirverqani? Chayri, ¿qotuchakuy Jehovajpata kasqanta, hermanos yanapata necesitasqankuta yachasqayraykuchu?”, nispa (Hech. 20:28-30). Unaytaña ancianos kajkunaqa, tukuyman, Satanasman ima rikuchinku Jehovata munakusqankuta.

Rey Davidqa juchanmanta Jehová kʼamejtin, llampʼu sonqowan japʼikorqa, Jehovataj perdonarqa. David nerqa: “Kusiyniyojmin runaqa, sajra ruwasqasnin pampachasqa kajtin, tukuy juchasnin pakaykusqa kajtin. Kusikuyniyojmin runaqa, juchanmanta Tata Dios mana juchachajtin, pipichus mana llullakuy kanchu, chayqa”, nispa (Sal. 32:1, 2). Jehovaj kʼamisqanqa Davidta mayta yanaparqa llajtanta sumajta michinanpaj.

Watejmanta anciano kajkuna ñaupajmanta nisqaqa sumaj michejkuna kanku. Uj anciano nerqa: “Kunanqa pantajkunata astawan yanapani”, nispa. Waj ancianotaj nerqa: “Kunanqa, hermanosta sirviyta aswan jatunpaj qhawani”, nispa.

Uj salmista nerqa: “[Jehovaqa] mana tukuy kutichu kʼamiwanchej”, nispa (Sal. 103:9). Chayrayku mana yuyanachu tiyan pantasqanchejrayku Jehová niña noqanchejpi atienekunanta. Ricardoqa, ashkha watasta anciano karqa, pay nin: “Mayta llakikoj kani pantaykusqaymanta. Ashkha watasta ni imapaj valesqayta yuyasqayraykutaj manaña anciano kayta munarqanichu. Manchikorqanitaj hermanos noqapi niña atienekunankuta. Wajkunata yanapayta mayta munasqayraykutaj, runasman Bibliamanta yachacherqani, hermanosta kallpacharerqani, paykunawantaj willayman llojserqani. Chaytaj manchachikuyniyta atipanaypaj yanapawarqa, kunantaj watejmanta anciano jina llankʼashani”, nispa.

Uj hermano phiñasqallapuni kan chayqa, mana watejmanta anciano kayta atillanmanchu.  Chayrayku allin kanman Davidmanta yachakunanku, Davidqa, rey Saulmanta ayqerqa. Saulta ashkha kutispi wañuchiyta atispapis mana wañucherqachu (1 Sam. 24:4-7; 26:8-12). Saúl uj maqanakupi wañojtintaj, mayta waqarqa. “Saulwan, Jonatanwanqa munasqas, kʼachastaj” kasqankuta nerqa (2 Sam. 1:21-23). Arí, Davidqa Saulpaj mana phiñasqallapunichu karqa.

Pillapis contraykipi imatapis ruwasqanta yuyanki chayqa, ama paypaj phiñasqallapuni kaychu. Williammanta parlarina, payqa 30 watasta jina Gran Bretañapi anciano karqa, niña anciano kaspataj waj ancianospaj phiñakorqa. ¿Imataj yanaparqa phiñakuyninta atipananpaj? Pay nin: “Job librota leey mayta yanapawarqa. Chayta leespataj nerqani: ‘Jehová, Jobta yanaparqa kinsantin kausaqesninwan allinyakunanpaj, noqatapis yanapallawanqataj’”, nispa (Job 42:7-9).

Anciano kayta saqeporqanki chay, allin kanman imaraykuchus saqepusqaykipi tʼukurinayki. Ichá saqerqanki chʼampaykunasniykirayku, waj imasta ruwayta munasqaykirayku chayri hermanospa pantasqasninta qhawasqaykirayku. Imayna kajtinpis, anciano kashaspaqa hermanosta mayta yanapayta atej kanki. Umallirichiykunasniyki hermanosta kallpachaj, qan jina ruwanankupajtaj kallpachaj kanki, waturej rispapis chʼampaykunasninkuta atipanankupaj yanapaj kanki. Anciano jina llankʼasqaykitaj Jehovata kusichej, qantapis (Pro. 27:11).

Jehovaqa ashkha hermanosta yanapan watejmanta kusisqa kanankupaj, qotuchakuyta yanapayta munanankupaj ima. Manaña anciano kanaykita nisusqankurayku chayri qan anciano kayta saqeporqanki chayqa, ¿watejmanta anciano kanaykipaj kallpachakuwajchu? (1 Tim. 3:1.) Pabloqa Colosaspi kaj cristianos Diospa munayninta rejsinankupaj Diosmanta mayta mañaporqa. Jehovaj munayninman jina purinankupaj, “tukuy imapi Diosta kusichispa” (Col. 1:9, 10). Watejmanta anciano kanki chayqa, Diosmanta kallpata, pacienciata, kusiyta ima mañakuy. Imaraykuchus Diospa llajtanqa, kʼacha michejkunata necesitan. ¿Hermanosta yanapayta, kallpachayta ima atiwajchu?