1. ¿Imatá ruwarqanku llulla religionta kamachejkuna guerra kajtin?

DIOSQA mana munanchu cristianos guerraman rispa runa masinkuta wañuchinankuta. Kay pasaj pachaj wataspitaj, cristiano nichikojkuna chayta ruwarqanku. Curasqa waj suyumanta catolicosta wañuchinankupaj soldadosta, armasninkutawan bendicerqanku. Waj religionespa pastoresninkupis kikillantataj ruwarqanku. Tukuy chaytaj Iskay Kaj Guerra Mundialpi sutʼi rikukorqa.

2, 3. ¿Imatá Jehovaj testigosnin ruwarqanku Iskay Kaj Guerra Mundialpi, aswan qhepa wataspi ima, imaraykutaj?

² ¿Imatá ruwarqanku Jehovaj testigosnin Iskay Kaj Guerra Mundialpi? Paykunaqa chay guerraman mana satʼikorqankuchu. ¿Imaraykú? Jesuspa yachachiyninta kasukuyta, pay jina ruwayta munasqankurayku ima. Jesús nerqa: “Qankunachus munanakunkichej chayqa, tukuy runas yachanqanku yachachisqasniy kasqaykichejta”, nispa (Juan 13:35). Chantapis Pablo Corinto llajtamanta cristianosman yuyaychasqanta kasukorqanku (2 Corintios 10:3, 4 leey).

³ Cheqa cristianosqa, Bibliamanta yachakusqankurayku maqanakuykunaman mana rinkuchu. Nitaj runata  wañuchiytapis yachakunkuchu. Bibliaj nisqanta kasukusqankurayku, imaymana edadniyoj hermanos, hermanas ima qhatiykachasqas karqanku. May ashkha hermanosta sinchʼita llankʼacherqanku, carcelesmantaj wisqʼarqanku. Hitler Alemaniapi kamachishajtin, wakin hermanosninchej wañuchisqas karqanku. Europapi Jehovaj testigosnenqa, presochasqas chayri waj lugaresman apasqas kaspapis, Diospa Reinonmanta sumaj willaykunata willallarqankupuni. * Kay 1994 watapi Ruandapi hutuswan tutsiswan wañuchinakushajtinku, Jehovaj testigosnenqa mana chay chʼajwapi satʼikorqankuchu. Nillataj satʼikorqankuchu, ñaupa Yugoslavia tʼaqakushajtin may chhika runas wañorqanku chay maqanakuymanpis.

4. ¿Imatataj runas ninku maqanakuykunapi mana satʼikusqanchejmanta?

⁴ Jehovaj testigosnin maqanakuykunaman mana satʼikusqanchejrayku, ashkha runas ninku Diosta, runa masinchejta ima munakusqanchejta, cheqa cristianos kasqanchejta ima. Jinapis runasqa, mana chayraykullachu cheqa cristianos kasqanchejta ninku.

5. ¿Imastataj Jesuspa yachachisqasnin ruwananku karqa?

⁵ Jesusqa Diospa Reinonmanta sumaj willaykunata rejsichiy, ni imawan kikinchakusqanta rikucherqa. Chay willayta qallarinankupaj, 12 yachachisqasninta ajllarqa. Chantá 70 yachachisqasnintañataj wakicherqa. Chay willaytaj kay pachaj kʼuchusninkama chayanan karqa (Luc. 6:13; 10:1). Ñaupajtaqa judiosman sumaj willaykunata willanankupaj wakicherqa. Chantataj tukuy llajtasmanta runasman willananku karqa. Chaytaj paykunapaj uj mosoj llankʼay karqa (Hech. 1:8).

6. ¿Imaraykutaj Pedro repararqa Jehová mana wakillantachu allinpaj qhawasqanta?

⁶ Diosqa Pedrota mana judío Cornelioj wasinman kacharqa. Ajinapitaj Pedroqa repararqa, Jehová mana wakillantachu allinpaj qhawasqanta. Chantataj Cornelio, familian ima bautizakorqanku. Cristianosqa willayninkuwan tukuy laya runasman chayasharqanku. Ajinamantataj pachantinmanta runasqa Reinomanta sumaj willaykunata yachakuyta atinkuman karqa (Hech. 10:9-48). Chaymantapachataj tukuy nacionesmanta runasman yachachiyta qallarikorqa.

7, 8. ¿Imatataj Diospa llajtan ruwan sumaj willaykunata ashkha runasman willananpaj? (7 paginapi dibujota qhawariy.)

⁷ Kunanpis Jehovaj llajtanta ñaupajman apajkunaqa, sonqo kʼajaywan wakichinku sumaj willaykuna Jallpʼantinpi willakunanpaj, yachachikunanpaj ima. Kunantaj Jehovaj testigosnenqa Jallpʼantinpi 8 millones jinaña kanku. Sonqo kʼajaywantaj 600 kuraj qalluspi willashanku, sapa kutitaj astawan qalluspi willashanku. Paykunaqa Reinomanta willanku wasimanta wasi, callespi, mesaspi, carritospi publicacionesta churaspa ima. Ajinata willasqankuraykutaj may rejsisqas kanku.

⁸ Diospa llajtanqa, Bibliata, publicacionesta ima tijrachinankupaj 2.900 hermanosta wakichin. Publicacionesninchejqa, pisi runaslla parlanku chay qalluspipis tiyan. Sutʼincharinapaj, Españapi Catalán qalluman publicacionesninchej  tijrachikun. Kay qhepa watasllapi Valencia, Alicante llajtaspi, Baleares churuspi, Andorra suyupi ima, ashkha runas Catalanta astawan parlashanku. Kunanqa ashkha runas Catalanta parlanku. Jehovaj testigosnenqa, Catalanta parlajkunaj sonqonkuman chayanankupaj, publicacionesta Catalanman tijrachinku, tantakuykunatapis chay qallupi ruwanku.

9, 10. ¿Imataj rikuchin Diospa llajtan tukuy runasman cheqa kajta yachachiyta munasqanta?

⁹ Bibliamanta orqhosqa publicacionesqa pachantinpi tijrachikushan, tukuy laya runasman yachachinapaj. Sutʼincharinapaj, México suyupeqa castellanota parlanku. Chaywanpis chay suyupi runasqa waj qallusta parlallankutaj. Mexicopi kaj sucursalqa Maya qalluman tijrachejkunata, maypichus chay qalluta astawan parlanku chay cheqaman kacharqa, chay qalluta astawan parlanankupaj, uyarinankupaj ima. Nepal suyupeqa 120 qallusta parlakun, 29 millonesmanta astawan runastaj chaypi tiyakunku. Chay suyupi 10 millonesmanta astawan runas nepalesllata parlanku. Wajkunataj waj qallutawan parlanku. Chayrayku publicacionesninchej nepalesman tijrachikushan.

¹⁰ Diospa llajtanqa sumaj willaykunata runasman willayta may jatunpaj qhawan. Chaytaj sutʼi rikukun pachantinpi waj qallusman publicacionesta tijrachinankupaj kallpachakusqankupi. Jehovaj testigosnenqa may chhika tratadosta, folletosta, revistasta ima runasman saqenku. Chaywanpis chaykunamanta mana qolqeta mañankuchu. Chay llankʼayqa, Jehovaj testigosnin qolqeta munasqankuman jina qosqankuwan ruwakun. Jesuspa nisqantataj kasukunku. Pay nerqa: “Qankunaqa kayta mana pagaspalla japʼerqankichej, amallataj pagachikuychejchu”, nispa (Mat. 10:8).

11, 12. Jallpʼantinpi runasman willasqanchejrayku, ¿imatataj runas ninku?

¹¹ Jehovaj testigosnenqa cheqa kajta tarisqankumanta mana iskayrayankuchu. Chayrayku sumaj willaykunata tukuy nacionesman, waj ususniyojkunamanwan willamunankupaj mayta kallpachakunku. Ashkhastaj kapuyninkuta pisiyachinku, waj qalluta parlayta, waj llajtapi  tiyakuyta ima yachakunku. Jallpʼantinpi runasman willamusqanchejrayku, yachachisqanchejrayku ima, ashkha runas Jehovaj testigosnin, Jesuspa yachachisqasnin kasqanchejta ninku.

¹² Tukuy chaytataj ruwanchej, cheqata kajta tarisqanchejrayku. ¿Imaraykutaj ashkha runas Jehovaj testigosnin cheqa kajta tarisqankuta ninku? (Romanos 14:17, 18 leey.)

13. ¿Imatataj Diospa kamachisnin ruwanku Diospa llajtan llimphu kananpaj?

¹³ ¿Imaraykutaj hermanosninchej cheqa kajta tarisqankuta ninku? Ashkha watastaña Jehovata sirvej hermano nerqa: “Diospa llajtan llimphu kananpaj tukuy imata ruwakun, wakinta kʼamina kajtinpis”, nispa. ¿Imaynatá Diospa llajtan chayta ruwan? Diospa llajtanpi kajkunamanta sapa uj kallpachakun, Bibliaj yuyaychasqanman jina, Jesús jina, yachachisqasnin jina ima kausakunanpaj. Diospa nisqasninta mana kasukojkunataj qotukuchakuymanta qharqochikunku. Casi tukuy Jehovaj kamachisnintaj llimphu kausayniyoj kanku, niraj Jehovaj testigosnin kashaspa millayta kausajkunapis (1 Corintios 6:9-11 leey).

14. Sajrata ruwajkunata qotuchakuymanta qharqosqanku, ¿qotuchakuyta yanapanchu? Qharqochikoj, ¿imatá ruwanan tiyan kutinpunanpaj?

¹⁴ Bibliaqa Diosta mana kasukojkunata qotuchakuymanta qharqonata kamachin. Ashkhastaj sajra ruwayninkumanta pesachikuspa qotuchakuyman kutinpunku (2 Corintios 2:6-8 leey). Bibliaj nisqanman jina kausakusqanchejrayku, qotuchakuykunaqa llimphu, atienekunapaj jinataj. Waj iglesiasmanta runasqa munayninkuman jinalla kausanku. Jehovaj testigosnintajrí, Bibliaj nisqanman jina kausakunanchejpaj kallpachakunchej. Chayrayku ashkha runas, Jehovaj testigosnin yachachisqankuman jina kausasqankuta ninku.

15. ¿Imaraykutaj uj hermano cheqa kajta tarisqanta nin?

¹⁵ ¿Imaraykutaj Jehovaj testigosnin cheqa kajta tarisqankuta ninku? Uj hermano 54 watasniyoj, pichus waynamantapacha Diosta yupaychan, nin: “Creeyneyqa sayasqa kashan 1) Dios kasqanpi, 2) Biblia Diospa Palabranpuni kasqanpi, 3) Jehovaj testigosnillan Diospa munayninta Jallpʼantinpi ruwashasqankupi ima. Bibliata sapa ukhunchashaspa, kay yachachiykuna cheqachus manachus kasqanta qhawarini. Reparanitaj kayqa cheqapuni kasqanta. Chaytaj creeyniyta mayta kallpachan”, nispa.

16. ¿Imaraykutaj uj hermana cheqa kajpi kasqanta nin?

¹⁶ Nueva York Betelpi llankʼaj hermana Diospa llajtanmanta nin: “Kay llajtalla  Diospa sutin Jehová kasqanta runasman rejsichin. [...] Imaraykuchus Bibliapeqa Diospa sutin casi 7.000 kutista rikhurin”, nispa. Chantapis chay hermanaqa, 2 Crónicas 16:9 versiculomanta parlarqa. Chaypi nin: “Tata Diosqa sumajta qhawamushan tukuy kay pachata, kallpachanampaj tukuy sonqowan payllapi atienekunku, chaykunata”, nispa. Chantá nillarqataj: “Cheqa kajta yachakusqayqa, Jehovata tukuy sonqo yupaychanaypaj yanapawan. Chaytaj mayta kallpachawan. Dioswan allinpi kasqayqa ni imawan kikinchakunchu. Mayta agradecekuni, Diosta rejsinapaj Jesús yanapawasqanchejmanta. Chaytaj creeypi sinchʼita sayanaypaj yanapawan”, nispa.

17. ¿Imamantataj uj hermano mana iskayrayanchu, imaraykutaj?

¹⁷ Uj hermano niraj Jehovaj testigon kashaspa, mana Diospi creejchu. Pay nin: “Diospa ruwasqasninta qhawarispa, reparani Jehová kusisqa kausakunanchejta munasqanta. Chayraykutaj yachani Jehová mana wiñaypajchu ñakʼarinanchejta saqenanta. Kay pacha mayta sajrayajtinpis, Diospa llajtanqa Diospi creeyninta, munakuyninta, kusikuyninta ima astawan rikuchin. Tukuy chaytaj Diospa espiritunpa yanapayninwan ruwakun”, nispa (1 Pedro 4:1-4 leey).

18. ¿Ima ninkitaj chay iskay hermanospa nisqankumanta?

¹⁸ Ashkha watastaña Diospa llajtanpi kaj hermano, imaraykuchus cheqa kajpi creesqanmanta nin: “Ashkha watastaña yachakusqay rikuchiwan, Jehovaj testigosnin ñaupa tiempomanta cristianos jina ruwanankupaj kallpachakusqankuta. Chantapis viajaspa, pachantinpi Jehovaj testigosnin ujchasqas kashasqankuta rikuni. Bibliamanta yachakusqayqa sonqo juntʼasqa, kusisqataj kausakunaypaj yanapawan”, nispa. Uj hermano 60 watas kurajniyoj, Jehovaj testigosnin Jesuspi creesqankumanta parlaspa, nerqa: “Jesuspa kausayninta, willayninta ima ukhunchaspaqa, pay jina astawan ruwayta munanchej. Jesusnejta Diosman astawan qayllaykunapajtaj, kausayninchejta tijrachinchej. Jesuspa wañuyninraykulla salvasqas kayta atisqanchejta reparanchej. Yachanchejtaj wañuymanta kausarimusqanta, imaraykuchus ashkha runas kausarimusqanmanta qhepaman rikorqanku”, nispa (1 Corintios 15:3-8 leey).

19, 20. 1) ¿Imatataj nerqa Pablo Romamanta cristianosman? 2) ¿Imatataj runasman willanchej?

¹⁹ Cheqa cristianosqa runa masisninkuta munakusqankurayku, cheqa kajmanta willanku. Pabloqa Romamanta cristianosman nerqa: “Sichus simiykiwan runaspa uyarinanta ninki Jesusqa Señor kasqanta, creenkitaj sonqoykipi Dios wañusqakunamanta payta kausarichimusqanta chayqa, salvasqa kanki. Runaqa sonqowan creen Diospa ñaupaqempi cheqampaj qhawasqa kanampaj, simiwantajrí sutʼinchan salvasqa kasqanta”, nispa (Rom. 10:9, 10).

²⁰ Jehovaj testigosnenqa, cheqa kajta tarisqanchejmanta mana iskayrayanchejchu. Yachanchejtaj Diospa Reinonmanta sumaj willaykunata runasman willay, may sumaj kasqanta. Bibliamanta yachachishaspaqa, runa yachakuyta munanankupaj jina yachachina. Cheqa kajta tarisqanchejmanta mana iskayrayasqanchejta rikuchina.