GUY HOLLIS PIERCEQA, Diospa Llajtanta Kamachejkunamanta ujnin karqa. Payqa, martes 18 marzo 2014 watapi, 79 watasniyoj wañupuspa Jallpʼapi ruwanasninta tukucharqa. Cristoj hermanon kasqanraykutaj, janaj pachapi kausananpaj kausarichisqa karqa (Heb. 2:10-12; 1 Ped. 3:18).

Guy Pierceqa, Auburn llajtapi (California, Estados Unidos) 6 noviembre 1934 watapi nacekorqa, 1955 watapitaj bautizakorqa. Kay 1977 watapi Pennywan casarakorqa, iskayninkutaj ashkha wawasta uywarqanku. Chayrayku wajkunapajpis uj kʼacha tata jina karqa. Iskayninkutaj 1982 watapi precursores kayta qallarerqanku. Kay 1986 watapitaj, Estados Unidospi qotuchakuykunata waturispa 11 watasta llankʼarqanku.

Kay 1997 watapi Estados Unidos Betelpi llankʼayta qallarerqanku. Hermanoqa Departamento de Servicio nisqapi llankʼarqa, 1998 watapitaj Llankʼajkunapaj Comisionpi Diospa Llajtanta Kamachejkunata yanaparqa. Kay 2 octubre 1999 watapi, Watch Tower Bible and Tract Society of Pennsylvania nisqamanta, watapi uj kutita tantakuy ruwakushajtin Guy Pierce Diospa Llajtanta Kamachejkunamanta ujnin kasqanta willakorqa. Kay qhepa wataspitaj, Llankʼajkunapaj Comisionpi, Qhelqajkunapaj Comisionpi, Publicacionespaj Comisionpi, Umachajkunamanta Comisionpi ima llankʼarqa.

Hermanomanqa kʼacha kasqanrayku, asirikuspapuni parlarisqanrayku, tukuy runas, waj llajtayoj, waj costumbresniyoj kaspapis qayllaykoj kanku. Chantapis paytaqa astawan munakoj kanku, munakuyniyoj, llampʼu sonqo kasqanrayku, Diospa kamachiykunasninta, yuyaychaykunasninta jatunpaj qhawasqanrayku, Diospi tukuy sonqo atienekusqanrayku ima. Hermano Pierceqa niyta yachaj: “Intirajchá mana llojsimunmanchu Jehovaj nisqasnin mana juntʼakunanmantaqa”, nispa. Chaytataj tukuy yachanankuta munarqa.

Hermano Pierceqa Jehovapaj mayta llankʼaj. Tutamanta jatarikoj, ashkha kutispitaj tutakama llankʼaj. Chantapis hermanosta kallpachaj tukuynejman rerqa. Diospaj mayta llankʼaspapis paywan parlariyta munaj hermanospaj, yanapayninta necesitaj betelitaspaj, waj hermanospaj ima tiempochakoj. Payta rejsejkunaqa ni jaykʼaj qonqanqankuchu wajyarikoj kasqanmanta, Bibliaj nisqanman jina yuyaychasqanmanta ima.

Munasqa hermanonchejta warmin, 6 wawasnin, allchhisnin, wawasninpa allchhisnin, paywan Bibliamanta yachakojkuna ima, maytachá faltachanqanku. Kay 22 marzo 2014 watapi, Diospa Llajtanta Kamachejkunamanta Mark Sanderson Brooklyn Betelpi, hermanota pʼampanapaj umalliricherqa. Hermano Sandersonqa, hermanonchej janaj pachaman ripuyta suyakusqanmanta parlarqa, Jesuspa nisqantataj leerqa: “Tatay kashan, chaypi ashkha wasis tiyan [...]. Kunanqa rishani qankunapaj uj cheqata wakichimoj. Ripuspaqa, qankunapaj uj cheqata wakichimusaj; chantá kutimuspa, pusasqaykichej maypichus noqa kasaj, chaypi qankunapis kanaykichejpaj. Yachankichejña maymanchus rishasqayta, ñantapis rejsinkichejña” (Juan 14:2-4).

Hermanota mayta faltachaspapis, mayta kusikunchej ‘ñanta rejsisqanmanta’.