UJ MASHKHA jóvenes uj peliculata qhawaj rinankuta ninku. Compañerosninkutaj chay película may sumaj kasqanta nisqanku. Cineman chayaytawantaj jatuchaj letrerospi maqanakunapaj armasta, millay pʼachallisqa warmista ima rikunku. ¿Imatá ruwanqanku? ¿Chay peliculata qhawanqankuchu?

Sapa pʼunchay imatapis ajllananchej tiyan, chaytaj Diosta yupaychayninchejpi yanapawasunman chayri mana. Wakin kutisqa ichá imallatapis ruwayta ajllanchej, allinta tʼukurispataj waj imatañataj ruwayta munanchej. ¿Chay ninayanchu iskayrayashasqanchejta? Chayri, ¿allinta ruwashasqanchejtachu ninayan?

Diosta munakusqanchejrayku payman qokorqanchej, bautizakorqanchej ima. Nerqanchejtaj Diosman cheqa sonqo kananchejta, chaytataj ruwayta munanchej. Kuraj Supaytajrí, Diosta wasanchanata munan (Apo. 12:17). Noqanchejqa Diosta kasukuyta, sirviyta ima ajllarqanchej. Chayrayku yuyayninchejta tijrachispaqa wañuyta tarisunman.

Kay 2.600 watasmanta aswan ñaupajta, Babiloniamanta rey Nabucodonosor uj jatun qori lantita ruwacherqa, kamacherqataj tukuy runas chay lantita yupaychanankuta. Mana yupaychajtaj laurashaj hornoman wijchʼuykusqa kanan karqa. Sadrac, Mesac, Abed-nego imataj, Jehovata yupaychaj kanku, payllatataj kasukuyta ajllarqanku. Chay lantita mana yupaychasqankurayku, laurashaj hornoman wijchʼuykorqanku. Jehovatajrí uj milagronejta paykunata salvarqa, imaraykuchus Jehová Diosta wasanchanankumantaqa wañuyta munarqanku (Dan. 3:1-27).

Danielpis Jehovaman cheqa sonqollapuni kayta munarqa. Sumajtataj yacharqa  Diosmanta mañakushajta taripachikuspa, “leonespa tʼoqonkuman” wijchʼuykuchikunanta. Jinapis yachasqa kasqanman jina kinsa kutita sapa pʼunchay Diosmanta mañakullarqapuni. Jehovaman cheqa sonqo kasqanraykutaj, Jehová “leonespa siminkumanta” kacharicherqa (Dan. 6:1-27).

Kay tiempomanta Diospa kamachisninpis, Diosman qokushaspa imatachus nisqankuta juntʼanku. Sutʼincharinapaj, Africamanta uj escuelapi, uj qotu hermanitusta banderata mana yupaychayta munasqankurayku, escuelamanta qharqonankuta nerqanku. Pisi tiemponmantaj, ministro de educación chay hermanituswan parlarqa. Paykunataj mana manchachikuspa, kʼachallamanta, imaraykuchus banderata mana yupaychasqankuta sutʼincharqanku. Chay kutimantapacha paykunaqa niña ima chʼampaypipis rikukunkuchu, nitaj pipis Jehovata wasanchanankupaj tanqanchu.

José sutiyoj hermanomanta parlarina. Paypa warmenqa cancerniyoj kasqanrayku, kaymanta jinalla wañuporqa. Josej familianqa warminta pʼampananpaj imastachus ruwayta munasqanta jatunpaj qhawarqanku. Warminpa familiaresnintaj mana Jehovaj testigosninchu kasqankurayku Diospa chejnisqan costumbresta ruwayta munarqanku. José nin: “Costumbresninkuman jina ruwajta mana saqesqayrayku, wawasniyta chayta ruwachinawankupaj tanqarqanku. Wawasniytaj, mana saqekorqankuchu. Chantapis familiaresneyqa, costumbresninkuman jina wasiypi warmiyta velayta munarqanku. Chayta ruwaytapuni munajtinkutaj, waj ladopi ruwanankuta nerqani. Paykunaqa sumajta yacharqanku noqa mana chayta ruwasqayta, nitaj warmiypis. Chaymanta unayta parlasqaykutawan waj ladoman ruwaj rerqanku.

”Chay jina llakiypi kashaspa, Jehovamanta yanapata mañakorqani noqa, familiay ima kamachiykunasninta kasukunaykupaj. Jehovataj mañakuyniyta uyariwarqa, sinchʼita sayanaykupajtaj yanapawarqayku”, nispa. José, wawasnin ima nipuni yuyayninkuta tijracherqankuchu, Jehovatataj kasukorqanku.

Kay 32 watapi, pascua pasasqanmanta pisi tiemponman, uj cananea warmi Sidón llajtapi Jesusman qayllaykorqa, kutin kutitataj wawanmanta supaykunata qharqonanta mañakorqa. Qallariypeqa Jesús ni imatapis nerqachu, chantá yachachisqasninman nerqa: “Diosqa kachamuwan Israel ayllumanta chinkasqa ovejasllaman”, nispa. Chay warmi mañakullajtinpunitaj nerqa: “Mana allinchu, wawaspa tʼantankuta qhechuspa, alqetusman qaranaqa”, nispa. Chay warmitajrí creesqanrayku nerqa: “Arí, Señor; chaywampis alqetusqa mikhullankutaj dueñosninkoj mesanmanta tʼanta tʼunas tʼakakojta”, nispa. Jesustaj mañakusqanta uyarerqa, wawantataj sanoyacherqa (Mat. 15: 21-28).

Jesusqa chayta ruwaspa Jehová jina ruwasharqa. Imaraykuchus Jehovaqa imapis allin kajtin yuyayninta tijrachin. Uj kuti israelitasqa qori lantita ruwakorqanku, Diostajrí chay lantita yupaychasqankurayku wañuchiyta munarqa, yuyaynintataj tijracherqa Moisés llajtarayku mañakojtin (Éxo. 32:7-14).

Apóstol Pablopis Jehová, Jesús jinallataj ruwarqa. Payqa uj tiempota yuyarqa misionero jina rishaspa Juan Marcosta pusay mana allinchu kasqanta. Imaraykuchus Juan Marcosqa, Pablota, Bernabetawan ñaupaj kutirayku misionero jina viajashajtinku saqerparerqa. Aswan qhepamantaj Juan Marcos manaña ñaupajta jinachu kasqanta, Jehovapaj mayta llankʼashasqanta ima rikorqa. Chayraykutaj Timoteoman nerqa: “Jamuspaqa, Marcosta pusampuway, imaraykuchus payqa noqapaj sumaj yanapa”, nispa (2 Tim. 4:11).

 ¿Imatá yachakunchej? Jehová mana pantaj kaspapis yuyayninta tijrachin, imaraykuchus Payqa khuyakuyniyoj, pacienciayoj, munakuyniyoj ima. Pantaj runas kasqanchejraykutaj mana cheqan kajman jinapunichu imatapis qhawanchej. Chayrayku wakin kutis yuyayninchejta tijrachina tiyan. Sutʼincharinapaj, imatachus uj runamanta yuyasqanchejta tijrachiyta atisunman, imaynatachus kausakusqanta yachaspa.

Wakin kutisqa ichá yuyayninchejta tijrachina kanqa imatachus Jehovapaj ruwananchejta nisqanchejpi. Bibliamanta yachakojkunamanta wakenqa unaytaña tantakuykunaman rispapis mana bautizakunkuchu. Wakin willajkunataj atishaspapis mana precursoreschu kanku. Wakin hermanostaj mana kallpachakunkuchu qotuchakuypi ruwaykunasta japʼinankupaj (1 Tim. 3:1). ¿Qanpis ajinallatatajchu yuyanki? ¿Yuyayniykita tijrachiyta atiwajchu? Jehovaqa munan, ruwaykunasniykita ruwaspa, Payta yupaychaspa, wajkunata yanapaspa ima kusiyta tarinaykita.

Ella sutiyoj hermanaqa África betelpi llankʼashan, pay nin: “Betelman chayaspa, mana yacharqanichu unaytachus manachus qhepakunayta. Jehovata tukuy almaywan sirviyta munaspapis, familiayta mana saqeyta atillarqanichu. Qallariypeqa familiayta mayta faltacharqani. Cuartoymanta compañeraytaj mayta kallpachawarqa, chayraykutaj Betelpi qhepakuyta ajllarqani. Betelpi 10 watastaña kaspapis, tukuy atisqayta hermanosniyta yanapanaypaj qhepakuyta munallanipuni”, nispa.

¿Yuyarikunkichu imachus Cainwan kasqanta hermanonmanta envidiakusqanrayku,  hermanonpaj phiñakusqanrayku ima? Jehovaqa yacharqa phiñakuyninwan atipachikuspa sajra imasta ruwananta, chayrayku Paywan allinpi kanallanpajpuni phiñakuyninwan mana atipachikunanta yuyaycharqa. Nerqataj: “Juchaqa atipasuytaña munashan”, nispa. Cainqa yuyayninta tijrachiyta atishaspapis, Jehovata mana uyarerqachu. Chayraykutaj hermanonta wañucherqa, ajinamantataj tukuy runasmanta ñaupaj kaj runa wañuchinman tukorqa (Gén. 4:2-8).

Rey Uzías imatachus ruwasqanmantapis mayta yachakullasunmantaj. Payqa Diospa ñaupaqenpi cheqan kajta ruwaspapis, Dioswan allinpi kaspapis, jatunchakuyta qallarerqa. Biblia nisqanman jina, jatunchakusqanrayku temploman inciensota qʼolachej yaykorqa, chaytataj sacerdoteslla ruwaj kanku. Sacerdotes mana qʼolachinanta nejtinkupis, mana yuyayninta tijracherqachu. Astawanpis phiñakorqa, nitaj kasorqachu imatachus nisqankuta. Chayraykutaj Jehovaqa lepra onqoywan castigarqa (2 Cró. 26:3-5, 16-20).

Kaytaj wakin kutis yuyayninchejta tijrachinapuni kasqanta rikuchiwanchej. Joachim sutiyoj hermanomanta parlarina, payqa 1955 watapi bautizakorqa, 1978 watapitaj qotuchakuymanta qharqochikorqa. Payqa 20 watasmanta pesachikuytawan qotuchakuyman kutinporqa. Uj anciano imaraykuchus chay jina unaymanta kutimusqanta tapurejtin, pay nerqa: “Phiñasqa kasharqani, jatunchakojtaj kani. May llakiy unaypi yuyayniyta tijrachisqayqa. Jinapis tukuy chay tiempopi yacharqani Jehovaj testigosnin cheqa kajtapuni yachachisqankuta”, nispa. Payqa sonqomantapacha pesachikunan kasqanta reparasqa, kausaynintataj tijrachisqa.

Noqanchejpis wakin kutisqa ichá yuyayninchejta, imatachus ruwayta munasqanchejta ima tijrachina kanqa. Chayta ruwaspataj Jehovata kusichisunchej (Sal. 34:8).