La Atalaya del 15 de mayo de 1951 revistapi sutʼinchakorqa Bibliapi runasmanta, wakin imasmanta ima parlakusqan, jamoj imaswan ninakusqanta. Sutʼincharinapaj, pasaj wataspi publicacionesninchej sutʼincharqa, Débora, Eliú, Jefté, Job, Rahab, Rebeca ima ajllasqa cristianoswan chayri “may chhika” runaswan ninakusqanta (Apo. 7:9). Sutʼinchakorqataj, Jefté, Job, Rebeca ima ajllasqa cristianoswan ninakusqankuta, Débora, Rahab imataj “may chhika” runasmanta kajkunawan. ¿Imaraykutaj kay qhepa wataspi manaña anchata chaykunasmanta sutʼinchakunchu?

Bibliaqa wakin runasmanta parlaspa, jamoj imaswan ninakusqanta yachachin. Sutʼincharinapaj, apóstol Pabloqa Gálatas 4:21-31 versiculospi Agarmanta, Saramantawan parlarqa. Agarqa Abrahampa kamachin karqa. Pablo nisqanman jinataj Israel llajtawan ninakorqa, Israel llajtaqa Moisesman qosqan leynejta Jehovaman ujchasqa kasharqa. Sarataj Abrahampa warminpuni karqa, Diospa warminwantaj ninakun, nisunman janaj pachapi Diospa llajtanwan. Chantapis Pablo sutʼinchallarqataj rey sacerdote Melquisedec, Jesuswan ninakusqanta (Heb. 6:19, 20; 7:1-3). Chantá nillarqataj profeta Isaías, wawasnin ima, Jesuswan, ajllasqa cristianoswan ima ninakusqankuta (Heb. 2:13, 14). Jehová, Pablota yuyaycharqa kay imasta qhelqananpaj, chayrayku tukuy ima nisqan cheqapuni kasqanpi atienekusunman.

Biblia wakin runaspa kausaynin jamoj imaswan ninakusqanta yachachejtinpis, mana yuyananchejchu tiyan chay runaj tukuy ima ruwasqan, jamoj imaswan ninakusqanta. Sutʼincharinapaj, Pabloqa Melquisedec, Jesuswan ninakusqanta nerqa. Chaywanpis mana imatapis ninchu Abraham tawa reyesta atipaykojtin,  Melquisedec tʼantata, vinota ima payman apasqanmanta. Chayrayku Biblia uj ima, imawanchus ninakusqanta mana sutʼinchajtin, ni imarayku imawanchus ninakusqanta maskʼanachu tiyan (Gén. 14:1, 18).

Jesús wañupusqanmanta ashkha watasninman, wakin qhelqajkuna mayta pantarqanku. Imaraykuchus Bibliapi runasmanta, wakin imasmanta ima parlakusqan, waj imawan ninakusqanta maskʼarqanku. Chaymanta parlaj uj enciclopedia nisqanman jina Orígenes, Ambrosio, Jerónimo ima “Bibliapi uj runamanta, uj imamanta ima parlakusqan piwanchus, chayri imawanchus ninakusqanta maskʼarqanku, tarerqankutaj. Chaytataj tukuy imaspipuni maskʼarqanku. May rejsisqa imaspis uj imawan ninakusqanta nerqanku [...]. Chantapis Jesús kausarimuytawan uj chʼisi yachachisqasninman rikhurerqa, yachachisqasnintaj 153 challwasta japʼerqanku. Chay 153 challwasta japʼisqankumantapis tukuy imata nerqanku”.

Agustín de Hipona nerqa, Bibliapi Jesús 5.000 runasman phishqa cebada tʼantaswan, iskay challwaswan mikhuchisqan, jamoj imawan ninakusqanta. Sutʼincharinapaj, cebada tʼanta, Bibliaj ñaupaj kaj phishqa librosninwan ninakusqanta nerqa. Imaraykuchus nisqanman jina, jaqay tiempopi runas yuyaj kanku cebadamanta nisqa, trigo aswan sumaj kasqanta. Chayrayku Ñaupa Testamentomanta nisqa, Mosoj Testamento aswan sumaj kasqanta nerqa. Chantapis sutʼinchallarqataj chay iskay challwas, uj reywan, uj sacerdotewan ninakusqanta. Waj qhelqajtaj, Jacob wauqen Esaumanta “kuraj churi kaspa japʼinanta” puka mikhunawan rantikusqanta, Jesús yawarninwan runasta janaj pachapi kausanankupaj rantikusqanwan ninakusqanta sutʼincharqa.

Chay nisqanku mana creeyta atinapaj jinallachu, ¿icharí? Runasqa mana yachanchejchu Bibliapi imamantachus parlakusqan, jamoj imaswan ninakusqantachus manachus. Bibliapi runasmanta, waj imasmanta ima parlakusqan, jamoj imaswan ninakusqanta Bibliallataj sutʼinchajtenqa, chayta japʼikunanchej tiyan. Mana ajinachu kajtenqa mana imawanchus ninakusqanta maskʼananchejchu tiyan.

¿Imaynatá Bibliapi runasmanta, waj imasmanta ima parlakusqanwan yanapachikusunman? Pablo nerqa: “Ñaupajta qhelqasqa kajqa yachachinawanchejpaj qhelqasqa karqa, Diosmanta Qhelqasqapi pacienciakuspa, sonqochakuspataj suyakuyniyoj kananchejpaj”, nispa (Rom. 15:4). Pabloqa ñaupa tiempomanta ajllasqa cristianosman qhelqarqa Bibliaj nisqanwan yanapachikunankupaj. Chaymantapachataj tukuy cristianos, ajllasqa kaspapis chayri manapis, Bibliaj yuyaychaykunasninwan yanapachikorqanku (Juan 10:16; 2 Tim. 3:1).

Biblia imamantachus parlasqanqa, mana ajllasqa cristianosllapajchu, nitaj waj ovejasmanta kajkunallapajchu, nillataj uj tiempopi kausaj cristianosllapajchu, manaqa tukuy cristianosta yanaparqa. Sutʼincharinapaj, Job ñakʼarisqanqa mana Ñaupaj kaj Guerra Mundialpi ajllasqa cristianos ñakʼarisqankuwanchu ninakun. Diospa kamachisnenqa ajllasqa cristianos chayri waj ovejasmanta kaspapis Job jina ñakʼarinku. Chayrayku paykunaqa Bibliapi Jobpa kausayninmanta leespa mayta yanapachikunku. Rikunkutaj Jehová “jatun sonqoyoj, may khuyakuyniyojtaj” kasqanta (Sant. 5:11).

Kunanpis ashkha paya hermanas Débora jina cheqa sonqos kanku. Ashkha ancianostaj waynallaraj kaspapis, Eliú jina yachayniyoj kanku. Chantapis ashkha precursores Jefté jina, sonqo kʼajayniyoj kanku. Ashkha cheqa sonqo hermanos Job jina, pacienciayoj kanku. Jehovaman mayta agradecekunchej Bibliapi cheqa sonqo kamachisninpa kausayninkumanta qhelqachisqanmanta, imaraykuchus chayqa sonqochawanchej, suyakuyniyoj kanapaj ima yanapawanchej.

Chayrayku publicacionesninchejpi Bibliapi runasmanta, wakin imasmanta ima parlakusqanta manaña jamoj imaswan ninakusqanta sutʼinchakunchu. Astawanpis Jehová imatachus yachachiyta munawasqanchejmanta astawan sutʼinchan.