NOQAWAN Gwenwanqa phishqa watayoj kashaspa tusuyta yachakorqayku. Chay kutipajqa niraj rejsinakorqaykuchu. Chaywanpis wiñasqaykuman jina sapa ujniyku balletta yachakuyta ajllarqayku. Balletpi sumaj rishawajtiykutaj, chayta saqeporqayku. ¿Imaraykú chayta ruwarqayku?

David: Noqaqa 1945 watapi Inglaterra suyoj Shropshire llajtanpi nacekorqani. Tatayqa haciendayoj karqa. Yachaywasimanta kutiytawantaj wallpasman mikhuyta qaraj kani, runtusta tantaj kani, wakasta, ovejasta ima qhawaj kani. Vacacionespitaj cosechapi yanapakoj kani, wakin kutistaj tractoresniykuta manejaj kani.

Chaywanpis, waj imapi yuyasharqani. Tatayqa wawallaraj kashajtiy takiykunata uyarispa tusuyta munasqayta repararqa. Chayrayku 5 watayoj kashajtiy, mamayta claqué chayri tap nisqata yachakunaypaj uj escuelaman churanawanta nerqa. Yachachejniytaj balletta yachakuyta atisqayta reparaspa ballettapis yachachillawarqataj. Chunka phishqayoj kashajtiytaj Royal Ballet School nisqapaj becata qowarqanku, Londrespi may rejsisqa escuelapi yachakunaypaj. Chaypi Gwenta rejserqani, iskayniykutataj tusunaykupaj churawarqayku.

Gwen: Noqaqa 1944 watapi Londres jatun llajtapi nacekorqani. Wawallaraj kashajtiy Diospi creej kani. Bibliayta leenaypaj mayta kallpachakuspapis mana entiendejchu kani. Phishqa watayoj kashaspataj tusuyta yachakorqani. Sojta watanmantaj Gran Bretañapi uj concursopi atipasqayrayku Royal Ballet School nisqaman yaykuyta atillarqani. Chay escuelaqa, White Lodge nisqa jatun wasipi kasharqa, chaytaj Londrespa Richmond Park llajtitanpi kasharqa. Chaypi may rejsisqa yachachejkuna tusuyta yachachiwarqanku, jinallataj escuelatapis chaypi tukucharqani. Chunka sojtayoj kashaspataj Londrespi kaj Royal Ballet School nisqaman rerqani, chaypitaj Davidta rejserqani. Pisi killasninmantaj iskayniyku Covent Garden nisqamanta Royal Opera House nisqapi tusuyta yachaj kayku.

David: Arí. Gwen nin jina, Royal Opera House nisqapi tusorqayku, London Festival Ballet nisqapi kajkunawan (kunantaj Ballet Nacional de Inglaterra, nisqa sutikun). Royal Ballet nisqapi tusojkunata yachachejqa, Alemaniaj Wuppertal llajtanpi tusojkunata waj suyuspi tusunankupaj wakicherqa, noqaykutataj ajllawarqayku chaypi tusunaykupaj. Chaypi tusushaspataj, tukuynejman tusoj rerqayku, tusorqayku Dama Margot Fonteynwan, Rudolf Nureievwan ima. Ajinata tususpa kausakoyqa, noqallanchejpi yuyanapaj tanqawanchej, chayraykutaj tusuyllaman qokurqayku.

 Gwen: Yuyayniy, cuerpoy ima tusuyllapi kasharqa. Noqaykoqa may rejsisqas kayta munarqayku. Runas jatunpaj qhawawasqanku, tʼajllarikusqanku ima mayta kusichiwaj. Waj tusojkuna jinataj, tususqaypi allin rinawanpaj amuletosta apaykachaj kani. Chantapis khuchichakoj runaspa, machajkunaj, cigarrota pitajkunaj chaupinkupi kasharqani.

David: Tusuyman ashkha watastaña qokusqayrayku tukuynejman viajaspa saykʼorqani. Campopi wiñakusqayraykutaj campopi kausayta mayta faltacharqani. Kay 1967 watapi tusuyta saqeporqani, tatasniypa llajtan qayllapitaj jatun haciendapi llankʼayta qallarerqani. Chay haciendayojqa uj juchʼuy wasisituta alquilawarqa. Chantá Gwenta wajyarerqani, noqawan casarakunanta ninaypaj. Payta tusuypi may allin risharqa, chaywanpis noqawan casarakuyta munarqa, chayraykutaj campoman jamporqa, chayman mana yachasqa kajtinpis.

Gwen: Arí, campoman mana yachaykukuyta atillarqanichu. Imaraykuchus mana yacharqanichu chiripi, parapi, qʼoñipi ima wakamanta chʼawayta, wallpasman qarayta, khuchista uywayta ima. Davidqa 9 killasta uj Institutopi campopi llankʼaymanta yachakorqa, chay kutipajqa wawitayku Gilly nacekorqaña, qosay yachakamunankamataj wawitallaywan qhepakoj kani. Qosayqa, autota manejayta yachakunayta niwarqa, uj pʼunchaytaj Gaelwan tinkorqani, paytaqa uj tiendapi trabajashajtin rejserqani.

Gaelqa wasinman teycituta tomarikunaykupaj wajyariwarqa. Casarakusqanmanta fotostataj qhawarqayku, fotosninpitaj uj Tantakuna Wasita rikorqani. Tapurerqanitaj ima iglesiachus kasqanta. Kusikorqanitaj qosanwan khuska Jehovaj testigosnin kasqankuta niwajtin. Yuyarikorqanitaj tiay Jehovaj testigon kasqanta. Chantapis yuyarikullarqanitaj tiaywan tatay mayta phiñakusqanta, librosnintapis qʼopaman wijchʼuykapusqanta. Tapukojtaj kani imaraykuchus tatay tiaypaj phiñakusqanta.

Chay kutipiraj yachakorqani tiay imapichus creesqanwan, waj iglesias imapichus creesqankuwan mana kikinchu kasqanta. Gaelqa, imatapunichus Biblia yachachisqanta sutʼinchawarqa. Mayta tʼukorqani Trinidad, alma mana wañusqanta yachachiy ima, mana Bibliaj nisqanman jinachu kasqanta yachaspa (Ecl. 9:5, 10; Juan 14:28; 17:3). Chantapis ñaupaj kutirayku Bibliapi  Diospa sutin Jehová kasqanta rikorqani (Éxo. 6:3).

David: Gwenqa yachakushasqanta willariwarqa. Yuyarikorqanitaj wawa kashajtiy tatay Bibliata leenayta niwasqanta. Chayraykutaj, Gaelwan qosan Derrickwan ima Bibliamanta yachakorqayku. Sojta killanmantaj Shropshire llajtapi kaj Oswestry nisqaman riporqayku, chaypitaj uj haciendata arriendakorqayku. Chaypitaj hermana Deirdrewan Bibliamanta yachakorqayku. Qallariypeqa mana ñaupariyta atillarqaykuchu, animalesniykuta qhawanaykupaj mayta tiempochakunayku kasqanrayku. Chaywanpis cheqa kajqa pisimanta pisi sonqoykuman chayarqa.

Gwen: Layqeriospi creeyta mana saqeyta atillarqanichu. Isaías 65:11 versiculopitaj, suertesta choqanapaj mesasta churajkunamanta imatachus Jehová yuyasqanta yachakorqani. Layqerioswan chhapusqa imasniyta chinkachinaypajtaj Diosmanta yanapata mayta mañakorqani. Yachakorqanitaj “jatunchakojqa kʼumuykachachisqa kan[anta], kʼumuykukojtaj jatunchasqa kan[anta]”, chaytaj yanapawarqa reparanaypaj imayna runatachus Dios allinpaj qhawasqanta (Mat. 23:12). Diosta sirviyta munarqani, munakuwasqanchejrayku munasqa Churinta qosqanrayku. Chay tiempopajqa iskayña wawasniyku karqa, kusikorqaykutaj paraisopi wiñaypaj kausakunaykuta yachaspa.

David: Bibliaj profeciasnin juntʼakushasqanta yachaytawan, Mateo 24 capituloj profeciasnin, Daniel libroj profeciasnin ima juntʼakushasqanta yachaspa, cheqa kajta tarisqayta repararqani. Chantapis reparallarqanitaj Dioswan allinpi kay, ni imawan kikinchakusqanta. Tiempo pasasqanman jina niña imatapis noqallapajchu munarqani, entienderqanitaj warmiyta, wawasniyta ima jatunpaj qhawanay kasqanta. Filipenses 2:4 versiculopi yachakorqani mana noqallapichu yuyanay kasqanta, nitaj jatun haciendata maskʼanay kasqanta, astawanpis Diosta yupaychayta kausayniypi ñaupajman churanay kasqanta yachakorqani. Cigarro pitaytapis saqeporqani. Sabadosqa tantakuyman mana riyta atillajchu kayku, imaraykuchus tantakuna horaspuni chʼawanayku karqa, 10 kilometrostataj rinayku karqa. Warmiypa yanapayninwantaj tantakuykunaman rillajpuni kayku. Domingo paqarinpipis wawasniykuta willayman pusajpuni kayku, wakamanta chʼawanayku kajtinpis.

Chayta ruwasqaykumanta familiaresniyku mana kusisqachu kasharqanku. Gwenpa tatanqa sojta watatapuni mana parlapayawarqaykuchu. Tatasniypis manallataj munarqankuchu Jehovaj testigosninwan kanaykuta.

Gwen: Chaykunata aguantanaykupajtaj Jehová yanapawarqayku. Tiemponmantaj Oswestry qotuchakuymanta hermanos familiaykupis  kankuman jina karqanku, chʼampayniykuta atipanaykupajpis yanapawarqayku (Luc. 18:29, 30). Jehovaman qokuspataj 1972 watapi bautizakorqayku. Ashkha runasta cheqa kajta rejsinankupaj yanapayta munasqayraykutaj, precursora jina llankʼayta qallarerqani.

David: Haciendaykupi mayta llankʼanayku kajtinpis, wawasniykuman Jehovata yupaychayta yachachinaykupaj kallpachakorqayku. Gobiernomanta kajkuna manaña ñaupajta jinachu chajra runasta yanapasqanraykutaj haciendata kutichiporqayku. Chay kutipajqa sullkʼa kaj imillitayku uj watayojña karqa, mana llankʼayniyoj, mana wasiyoj ima qhepakorqayku, Jehovamantataj yanapata mañakorqayku. Familiaykuta uywanaykupajtaj wajkunaman tusuyta yachachiyta qallarerqayku. Diosta yupaychayta ñaupajman churasqaykupitaj allin riwarqayku. Mayta kusikuyku kinsantin wawasniyku yachaywasimanta llojsiytawan precursoras jina llankʼasqankumanta. Warmiypis precursorallataj kasqanrayku wawasniykuta yanapayta atillarqa.

Gilly, Denise ima casarakojtinku niña wajkunaman tusuyta yachacherqaykuñachu. Sucursalmantaj uj cartata apacherqayku, maypichus yanapa necesitakusqanta yachanaykupaj. Sucursalmantataj Inglaterraj inti llojsimuyninpa ura ladoman rinaykuta niwarqayku. Sullkʼa wawayku Debbiellawan kashasqaykuraykutaj noqapis precursor jina llankʼayta qallarerqani. Phishqa watanmantaj Inglaterraj pata ladonpi kaj qotuchakuykunata yanapanaykuta niwarqayku. Debbie casarakojtintaj, Zimbabue, Moldavia, Hungría, Costa de Marfil nisqapi ima, 10 watasta jina Tantakuna Wasista ruwaysikorqayku. Chantá Inglaterraman kuterqayku Londres Betelta ruwaysikunaykupaj. Campopi llankʼaymanta yachasqayraykutaj Betelpa haciendanpi yanapanayta niwarqanku, chay kutipajqa Betel haciendayojraj karqa. Kunantaj Inglaterraj inti yaykuyninpa pata ladonpi warmiywan precursores jina llankʼashayku.

Gwen: Tusuyllaman qokushajtiyku kusiyniykoqa uj tiempollapaj karqa. Jehová Diosman qokusqaykutaj mayta kusichiwayku, wiñaypajtaj kanqa. Khuska tusunaykumantaqa, Jehovapaj khuska llankʼashayku, runasta Diosta rejsinankupaj yanapaspataj mayta kusikuyku. Kayta ruwayqa aswan sumaj kay pachapi may rejsisqa kanamanta nisqaqa (2 Cor. 3:1, 2). Cheqa kajmanta mana yachakuykumanchu karqa chayqa, tususqaykumanta fotos, wakin imaslla kanman karqa.

David: Jehovata sirveyqa kausayniykuta tijracherqa. Yanapawarqataj uj sumaj tata, sumaj qosa kanaypaj. Bibliaqa Moisespa hermanan María, rey David, wajkuna ima kusiyninkuta tususpa rikuchisqankuta nin. Tukuy noqanchejpis Jehová paraisota apamojtin kusiywan tusuriyta suyakushanchej (Éxo. 15:20; 2 Sam. 6:14).