1, 2. ¿Imatataj qotuchakuykunata waturej hermanos ashkha qotuchakuykunapi reparanku?

QOTUCHAKUYKUNATA waturej hermano, ancianoswan tantakuyninta tukuchananpaj jinaña kashasqanpi tʼukurinachej. Payqa chay ancianosta sumajta llankʼashasqankurayku may sumajpaj qhawan. Chay ancianosmanta wakin ancianostaj, paymanta aswan kuraj hermanos kanku. Ñaupajpi qotuchakuyta waturishaspataj ancianosta yuyaycharqa hermanosta wakichinankupaj astawan tiempochakunankuta. Chayrayku paykunata tapurin: “¿Imatataj ruwarqankichej hermanosta wakichinaykichejpaj qotuchakuypi astawan llankʼanankupaj?”, nispa. Chantá ujnin anciano nin: “Pisillata ruwarqayku”, nispa. Chay wakin ancianospis kikillantataj ninku.

² Qanpis ancianollataj kanki chayqa, ichá kikillantataj kutichiwaj. Qotuchakuykunata waturej hermanosqa, ashkha qotuchakuykunapi ancianos waj hermanosta wakichinankupaj  pisillata tiempochakushasqankuta reparanku. ¿Imaraykutaj mana tiempochakuyta atillankuchu?

3. 1) ¿Bibliaj mayqen versiculosnintaj rikuchin wajkunata wakichiy may allin kasqanta? 2) ¿Imaraykutaj chaymanta tukuypis yachakunanchej tiyan? (Sutʼinchayninta qhawariy.) 3) ¿Imaraykutaj wakin ancianos waj hermanosta wakichinankupaj mana tiempochakuyta atillankuchu?

³ Anciano jinaqa yachanki waj hermanosta wakichiy may allin kasqanta. * Chantapis yachallankitaj qotuchakuykunapi, mosoj qotuchakuykunapi ima astawan wakichisqa hermanos necesitakusqanta (Isaías 60:22 leey). Bibliaqa ancianos wajkunaman yachachinanku kasqanta nin (2 Timoteo 2:2 leey). Jinapis ichá chayta ruwanaykipaj mana tiempochakuyta atillankichu, familiaykita uywanaykipaj llankʼanaykirayku, qotuchakuypi ima ruwaytapis juntʼanaykirayku, chayri waj imasta ruwanaykirayku. Chaywanpis may allin waj hermanosta wakichinaykipaj tiempochakunayki. Imaraykuchus chayta ruwanayki kasqanta qhawarina.

4. ¿Imatataj ichá wakin ancianos yuyankuman?

⁴ ¿Imaraykutaj wakin ancianos mana anchata tiempochakunkuchu wajkunata wakichinankupaj? Ichá yuyanku qotuchakuypi waj imas, aswan allin kasqanta chaykunatataj usqhayllata allinchana kasqanta. Chayri ichapis yuyanku wajkunata mana wakichejtinku qotuchakuy allillan kananta. Chay yuyasqanku, ¿cheqachu? Cheqamanta nisunman wakin imas usqhayllata allinchana kasqanta. Chaywanpis waj hermanosta mana wakichinkichu chayqa, mana qotuchakuypa allinninta maskʼashankichu.

5, 6. 1) ¿Imataj kanman uj autowan aceitenta mana cambiajtinchej? 2) ¿Imataj kanman qotuchakuymanta ancianos waj hermanosta mana wakichejtinku?

⁵ Uj autopi tʼukuriy. Uj auto purinanpaj, ¿imataj necesitakun? ¿Gasolinata churananchejchu? Chayrí, ¿aceiteta cambiananchejchu? Ichapis qan yuyanki gasolinata churay aswan allin kasqanta, imaraykuchus chayta mana ruwajtiykeqa auto sayaponqa. Ajinata yuyayqa mana allinchu kanman. Imaraykuchus autoj aceitenta mana cambiankichu chayqa ima ratollapis autoqa fregarparikonqa. Jinamanta autota arreglanaykipaj ashkha tiempota, qolqeta ima churanayki kanqa. ¿Imatá chaymanta yachakunchej?

⁶ ¿Imataj aswan sumaj? ¿Qotuchakuypi ruwanasta ruwaychu? Chayrí, ¿waj hermanosta wakichiychu? Wakin ancianosqa qotuchakuypi wakin ruwanasta ruway aswan allin kasqanta, imaraykuchus chayta mana ruwajtinku qotuchakuy mana yanapasqachu kananta ima yuyanku. Bibliaqa yuyaychan “aswan allin kajta” ñaupajman churana kasqanta (Fili. 1:10). Hermanosta wakichinankupaj ancianos mana tiempochakonqankuchu chayqa, ¿imataj qotuchakuywan kanqa? Ima ratollapis, qotuchakuypi ruwanasta juntʼanankupaj wakichisqa hermanos mana kanqankuchu.

7. ¿Imaynatá qhawananchej tiyan hermanosta wakichinankupaj tiempochakoj ancianosta?

⁷ Ama ni jaykʼaj pisipaj qhawaychu wajkunata wakichiyta. Qotuchakuyta yanapayta munaj ancianosqa wajkunata yanapanankupaj tiempochakunku. Chayta ruwaspaqa yuyayniyoj kasqankuta rikuchinku, qotuchakuypajpis uj sumaj yanapa  kanku (1 Pedro 4:10 leey). ¿Imaynatá chay ruwasqanku qotuchakuyta yanapan?

8. 1) ¿Imaraykutaj ancianos wajkunata wakichinanku tiyan? 2) Maypichus astawan yanapata necesitakun chay lugaresman ripoj ancianos, ¿imatataj ruwananku tiyan? (“Usqhayllata wakichiy”, nisqa recuadrota qhawariy.)

⁸ ¿Imaraykutaj ancianos wajkunata wakichinanku tiyan? Ashkha watastaña ancianos kajkunapis llampʼu sonqos kananku tiyan, entiendenankutaj tiyan machuyapusqankuman jina, manaña ñaupajpi jinachu wakin imasta ruwayta atinankuta (Miq. 6:8). Yachananku tiyan ima ratollapis ima chʼampaypipis rikukuspa qotuchakuypi ruwanasninkuta mana juntʼayta atinankuta (Ecl. 9:11, 12; Sant. 4:13, 14). Chantapis qotuchakuymanta hermanosta munakusqankurayku imatachus yachakusqankumanta wajkunaman yachachinankupaj kallpachakunku (Salmo 71:17, 18 leey).

9. ¿Maykʼajtaj astawan wakichisqa hermanos necesitakonqa?

⁹ Wajkunata wakichej ancianosqa may sumaj yanapa kanku qotuchakuypaj, imaraykuchus qotuchakuyta sumajta sayachinku. Chantapis waj hermanosta wakichinku qotuchakuyta yanapanankupaj, nisunman qotuchakuy ujchasqa, Diosman cheqa sonqo kananpaj. Jinata wakichisqankoqa kay qhepa pʼunchaykunapi may sumaj, astawanraj manchay ñakʼariy tiempopaj (Eze. 38:10-12; Miq. 5:5, 6). Chayraykutaj wajkunata wakichinaykichejpaj mana tiempochakushankichejchu chayqa, wakichiyta qallariychejpacha.

10. ¿Imatataj wakin ancianos ichapis ruwananku kanqa, qotuchakuypi astawan hermanosta wakichinankupaj?

¹⁰ Yachayku qotuchakuypi ruwanasta juntʼanaykichejpaj mayta llankʼashasqaykichejta. Chayrayku ichá allin kanman chayta ruwanaykichejpaj pisillata tiempochakunaykichej, wajkunata wakichinaykichejpajtaj astawan tiempochakunaykichej (Ecl. 3:1). Chayta ruwaspaqa tiempoykichejta mana usuchinkichejchu, qotuchakuypis yanapasqa kanqa.

11. 1) ¿Imaraykutaj tʼukunapaj jina tukuy laya suyusmanta wakin ancianospa nisqanku? 2) Proverbios 15:22 nisqanman jina, ¿imaraykutaj may sumaj waj ancianospa yuyaychasqankumanta yachakuy?

¹¹ Tukuy laya suyusmanta ashkha ancianosta wajkunata wakichisqankupi may allin rerqa. Kunallanraj chay ancianosmanta wakinta tapurerqanku imaynatachus wajkunata wakichisqankuta. * Tʼukunapaj jinataj mana uj suyullamantachu kajtinkupis, tukuyninku kikillanta yuyaycharqanku. Kaytaj sutʼita rikuchin Bibliaj yuyaychaykunasnin may sumaj kasqanta, Jallpʼantinmanta tukuy qotuchakuykunapi kaj hermanosta wakichinapaj (1 Cor. 4:17). Chayrayku kay yachaqanapi, qhepan yachaqanapi ima, chay ancianospa yuyaychasqankumanta yachakusunchej (Pro. 15:22). Yachakusuntaj imaynatachus uj anciano kay yuyaychakusqanman jina waj hermanosta wakichiyta atisqanta.

12. ¿Imatataj anciano ñaupajta ruwanan tiyan, imaraykutaj?

¹² Uj ancianoqa pi hermanotachus wakichenqa chay hermanoj sonqontaraj wakichinan tiyan. ¿Imaraykutaj? Sutʼincharinapaj, uj chajra runa mujuta tarpuyta munan chayqa, ñaupajta jallpʼataraj sumajta wakichinan tiyan. Imajtinchus ajinallamanta imatachus tarpusqan sumajta poqonqa.  Ajinallatataj uj anciano uj hermanota wakichiyta munan chayqa, chay hermanoj sonqontaraj wakichinan tiyan. ¿Imaraykú chayta ruwanan tiyan? Imaraykuchus ajinallamanta chay hermano yachakunanpaj wakichisqa kanqa. ¿Imaynatataj chay hermanoj sonqonta wakichinman? Chayta ruwananpajqa profeta Samuelmanta yachakunman, pichus uj sumaj yachachej karqa.

13-15. 1) ¿Imatataj Jehová Samuelman kamacherqa? 2) ¿Imaynatataj Samuel, Saulta wakicherqa? (3 paginapi dibujota qhawariy.) 3) ¿Imatataj ancianos imaynatachus Samuel, Saulta wakichisqanmanta yachakunkuman?

¹³ Kinsa waranqa watas jinaña kashan Jehová, Samuelman “qʼaya kay horasta Benjamín ayllumanta uj runata kachamusqayki, paytataj aceitewan jawinki, Israel aylluypa reynin kanampaj” nisqanmanta (1 Sam. 9:15, 16). Samuelqa yacharqa manaña paychu Israel llajtata kamachinanta, Jehová waj runata kamachinanpaj ajllakusqanta ima. Chayrayku chay runata wakichinanpaj Samuelqa uj imata ruwananpi tʼukurerqa.

¹⁴ Qʼayantintaj Samuelqa Saulta rejserqa. Jehovataj payman nerqa: “Paymin chay runaqa”, nispa. Samueltaj chay rato imapichus tʼukurisqanman jina ruwarqa. Chantá Saulta mikhunankupaj wajyarerqa, chaypitaj aswan ñaupajpi tiyaykucherqa, sumajnin aychatataj jaywarqa, nerqataj: “Chayqa qanpaj tʼaqasqa kasharqa”, nispa. Mikhuytawantaj wasinman pusarqa, ñanta rishaspataj parlarikorqanku. Wasinman chayaspataj altos wasi pataman wicharerqanku, puñukapunankukamataj parlallarqankupuni. Qʼayantintaj Samuelqa, Saulpa umanman aceiteta jichʼaykorqa, muchʼaykorqa, imastawanchus ruwanan kasqantapis willarqa. Chantá Saulqa riporqa, imatachus ruwananpajtaj wakichisqaña kasharqa (1 Sam. 9:17-27; 10:1).

¹⁵ Samuelqa Saulpa umanman aceiteta jichʼaykorqa uj llajtata kamachinanpaj. Chaytaj mana qotuchakuypi uj hermanota anciano kananpaj chayri siervo ministerial kananpaj wakichiy jinachu karqa. Chaywanpis Samuel, Saulpa sonqonta wakichisqanmanta ancianosqa ashkha imasta yachakunkuman. Chaykunamanta iskayta qhawarina.

16. 1) ¿Imaynataj Samuel kasharqa israelitas uj reyta mañakojtinku? 2) ¿Imatataj Samuel ruwarqa Jehová, Saulta rey kananpaj ajllananta nejtin?

¹⁶ Waj hermanosta tukuy sonqo wakichiy. Samuelqa, israelitas uj reyta mañakojtinku llakikorqa, qhesachasqa ima sientekorqa (1 Sam. 8:4-8). Payqa mana uj reyta ajllapuyta munarqachu. Chayrayku Jehová kinsa kutirayku israelitaspa mañakusqankuta uyarinanta nerqa (1 Sam. 8:7, 9, 22). Ajina kajtinpis Samuelqa, cuentanmanta waj runa kananta yachaspa mana phiñakorqachu, nitaj envidiakorqachu. Jehová, Saulta rey kananpaj ajllananta nejtinpis tukuy sonqo ruwarqa. Jehovata munakusqanrayku tukuy sonqo kasukorqa, manataj tanqasqa jinallachu.

17. 1) ¿Imaynatataj kay tiempomanta ancianos Samuel jina ruwanku? 2) ¿Imaynataj ancianos kanku hermanosta yanapaspa?

¹⁷ Kunanpis ashkha watastaña llankʼaj ancianos Samuel jina ruwanku, munakuywantaj wajkunata wakichinku (1 Ped. 5:2). Kʼacha hermanos kasqankuraykutaj hermanoswan qotuchakuypi ruwanasninkuta ruwaysichikunku. Chay hermanostaqa uj sumaj yanapata jina qhawanku (2 Cor. 1:24; Heb. 13:16). Chantapis mayta kusikunku chay hermanos tukuy yachasqankuta qotuchakuyta yanapanankupaj  apaykachasqankuta rikuspa (Hech. 20:35).

18, 19. 1) ¿Imaynatataj ancianos, hermanospa sonqonkuta wakichinkuman manaraj wakichiyta qallarishaspa? 2) ¿Imaraykutaj chayta ruwananku may allin?

¹⁸ Sumaj yachachej kaspapis, uj sumaj amigo kay. Samuelqa, Saulwan tinkuytawanpacha rey kananpaj umanman aceitewan jichʼaykuyta atinman karqa. Saúl reyña kanman karqa chaypis, Diospa llajtanta yanapananpaj mana wakichisqachu kanman karqa. Chayrayku Samuelqa, ñaupajta Saulpa sonqonta wakicherqa. ¿Imaynatá chayta ruwarqa? Manaraj aceitewan umanman jichʼaykushajtin iskayninku mikhorqanku, purerqanku, parlarikorqanku, samarerqanku ima. Samuelqa, Saúl wakichisqa kanantaraj suyarqa, chaymantaraj rey kananpaj ajllarqa.

¹⁹ Qanpis uj hermanota wakichinaykipajqa, Samuel jina chay hermanoj amigon kanayki tiyan. Ajinata ruwajtiyki chay hermanoqa mana manchachikusonqachu. Chaytataj ruwawaj maypichus tiyakunki chaypi imaynatachus hermanos ruwasqankuman jina. Ashkha ruwanayoj kaspapis, tiempochakuy wakichishanki chay hermanowan masichakunaykipaj. Ajinamanta rikuchinki payta yanapayta munasqaykita (Romanos 12:10 leey). Cheqamantachá chay hermanoqa munakusqaykita, yanapayta munasqaykita ima rikuspa may agradecesqa kanqa.

20, 21. 1) ¿Imatataj uj sumaj anciano ruwan? 2) ¿Imamantataj qhepan yachaqanapi yachakusunchej?

²⁰ Uj sumaj ancianoqa mana hermanosta wakichillanchu, manaqa chay hermanosta munakun (Juan 5:20 kikinchay). ¿Imaraykutaj chayta ruway may allin? Imaraykuchus yanapayta munasqaykita uj hermano reparanqa chayqa astawan yachakuyta munanqa. Chayrayku ancianos, ama hermanosta wakichillaychejchu manaqa paykunawan masichakuychej (Pro. 17:17; Juan 15:15).

²¹ Uj hermanoj sonqonta wakichiytawantaj, ancianoqa chay hermanota wakichiyta qallarinman. ¿Imaynamanta chayta ruwanqa? Qhepan yachaqanapi yachakusunchej imaswanchus ancianos waj hermanosta wakichinankupaj yanapachikunankumanta.