1. 1) ¿Imatataj Diospa kamachisnin sumajta yachanku? 2) ¿Imaraykutaj wakichisqas kananchej tiyan? 3) ¿Imamantá kay yachaqanapi yachakusunchej?

DIOSPA kamachisnenqa sumajta yachanku imallapis allinta ruwakunanpaj sumaj wakichisqa runas necesitakusqanta. Sutʼincharinapaj, Abrahamqa sumaj wakichisqa “kamachisninta tanta[ykorqa]”, Lotta enemigosninpa makinmanta kacharichinanpaj, chay kamachisnenqa mayta maqanakuspa atiparqanku (Gén. 14:14-16). Rey Davidpa tiemponpipis, takejkuna Jehovata jatunchanankupaj sumaj wakichisqas karqanku (1 Cró. 25:7). Noqanchejpis, Satanaswan, pachanwan ima maqanakuna tiyan (Efe. 6:11-13). Jehovata yupaychanapaj, willamunapaj imataj mayta kallpachakuna tiyan (Heb. 13:15, 16). Ñaupa tiempomanta Diospa kamachisnin jina, Diosta yupaychaypi allin rinawanchejpaj wakichisqa kana tiyan. Jehovataj ancianosta kamachin hermanosta wakichinankupaj (2 Tim. 2:2). Kay yachaqanapi yachakusun imaschus wakin ancianosta, hermanosta wakichinankupaj yanapasqanta.

2. Uj anciano niraj uj hermanota yachachishaspa, ¿imatataj ruwanman, imaraykutaj?

² Uj ancianoqa, uj chajra runawan kikinchakunman. Uj  chajra runaqa  tarpusqan sumajta wiñananpaj niraj tarpushaspa jallpʼata wanuchan. Ajinallatataj uj ancianopis, qotuchakuypi wakin ruwanasta niraj yachakoj hermanoman yachachishaspa, ichapis Bibliaj wakin versiculosninta leeripuyta munanqa. Chaytaj hermanota yanapanqa, ima ruwaytapis qotuchakuypi japʼispa, yachakusqanman jina ruwananpaj (1 Tim. 4:6).

3. 1) ¿Imaynatataj uj anciano Marcos 12:29, 30 versiculoswan yanapachikunman uj hermanowan parlarishaspa? 2) ¿Imaynatá uj hermanota yanapanman uj anciano payrayku mañakusqanta uyariy?

³ May sumaj kanman yachanayki yanapashanki chay hermanota imaynatachus cheqa yachachiy yanapashasqanta. Chaypajqa allin kanman tapurinayki imaynatachus Jehovaman qokusqan kausayninpi ima ruwaytapis ajllananpaj yanapasqanta. Chaytaj yanapasonqa Jehovata tukuy sonqo imaynatachus sirvinamanta parlarinaykichejpaj (Marcos 12:29, 30 leey). Chantá hermanowan khuska Jehovamanta mañakuwaj, espíritu santonta qonanpaj qotuchakuypi ima ruwaytapis japʼejtin juntʼananpaj. Diosmanta mañapusqaykita uyarispataj, qotuchakuypi yanapakunanpaj chay hermano kallpachakonqa.

4. 1) Bibliapi wakin runasmanta parlakusqan, hermanosta ñaupajman rinankupaj yanapayta atisqanmanta, sutʼinchay. 2) ¿Imapitaj ancianos tʼukurinanku tiyan hermanosta wakichishaspa?

⁴ Uj hermanota wakichiyta qallarishanki chayqa, qotuchakuymanta hermanosta yanapay aswan allin kasqanta reparananpaj, atienekunapaj jina kananpaj, llampʼu sonqo kananpaj ima yanapay. Chaypajtaj Bibliapi parlakusqan runaspa kausayninkumanta mayqenchus yanapayta atisqanmanta parlariwaj (1 Rey. 19:19-21; Neh. 7:2; 13:13; Hech. 18:24-26). Kay kʼacha kaykunaqa wanu jina kanku, mayqentachus chajra runa jallpʼaman churan tarpunanpaj. Chaytaj hermanota qotuchakuypi ñaupajman rinanpaj yanapanqa. Franciamanta Jean-Claude sutiyoj ancianoqa, uj hermanota wakichishaspa Bibliaj yuyaychasqanman jinapuni imatapis ajllananpaj yanapayta munasqanta nin. Chantapis nillantaj Bibliaj versiculosninta maykʼajllapis leeripusqanta, Bibliaj “kʼacha kamachisqasni[n]ta” entiendenanpaj yanapasqanta ima (Sal. 119:18). ¿Imaynasmantawan ancianos hermanosta yanapankuman Jehovata astawan munakunankupaj?

5. 1) ¿Imaraykutaj uj hermanowan Diosta yupaychaypi imastachus ruwayta munasqanmanta parlariy may allin? 2) ¿Imaraykutaj ancianos waynuchitusta wakichinanku may allin? (Sutʼinchayninta qhawariy.)

⁵ Diosta yupaychaypi imastachus ruwayta munasqanta hermanota tapuriy. Niraj ima ruwaytapis ajllajtintaj, juntʼananpaj jina uj ruwayta ajllananpaj yanapariy. Ima ruwaytachus Diosta yupaychaypi ñaupajpi ajllasqaykimanta, chayta juntʼasqaykimanta imayna kusisqachus kasqaykita kusiywan willariy. Kayta ruwayqa atikullan, wajkunatapis yanapan. Africamanta uj anciano precursor Victor sutiyoj, imaraykuchus chayta ruway may allin kasqanta sutʼinchan. Payqa, waynallaraj kashajtin imatachus ruwayta munasqanmanta uj anciano tapurisqanta nin. Chaytaj Diosta yupaychayta jatunpaj qhawananpaj yanaparqa. Unaytaña anciano jina llankʼaj ashkha hermanos, qotuchakuymanta waynuchitusta wakichiy may allin kasqanta ninku. Paykunamanqa mashkha watayojchus kasqankuman jina qotuchakuypi ruwaykunasta qonkuman. ¿Imaraykutaj ancianos waynuchitusta wakichinanku may allin? Imaraykuchus waynuchitusta wiñasqankuman jina waj imasta ruwayta munajtinkupis, Diosta yupaychaypi astawan  llankʼanankupaj yanapanqa (Salmo 71:5, 17 leey). *

6. ¿Imatataj Jesús ruwarqa wajkunata wakichinanpaj?

⁶ Uj hermano Diosta yupaychaypi astawan llankʼayta munananpajqa mana imatachus ruwanallantachu ninayki tiyan. Astawanqa imaraykuchus chayta ruwananta sutʼinchanayki tiyan. Sumaj Yachachej Jesusqa apostolesninman runasman willamunankuta niytawan, ñaupajtaqa imaraykuchus kasukunankuta nerqa. Nerqataj: “Tatayqa kamachina tukuy atiyta qowan janaj pachapi, kay pachapipis. Chayrayku rispa, tukuy laya runasta yachachisqasniyman tukuchimuychej”, nispa (Mat. 28:18-20). ¿Imaynatataj Jesús jina ruwawaj?

7, 8. 1) ¿Imaynatataj ancianos Jesús jina ruwankuman? 2) ¿Imaraykutaj uj hermanota “allinta ruwanki” niy may allin? 3) ¿Imastaj ancianosta yanapanman wajkunata wakichinankupaj? (“Hermanosta wakichinapaj”, nisqa recuadrota leey.)

⁷ Uj hermanota imallatapis ruwananta nispaqa, Bibliawan sutʼinchariy imaraykuchus chayta ruway may allin kasqanta. Ajinamanta yanapanki Biblia yuyaychasqanman jina ruwananpaj, manataj kamachiykunaman jinallachu. Sutʼincharinapaj, uj hermanota Tantakuna Wasej punkunta llimphuta, ni pi imanarpakunanpaj jina japʼinanta nishaspaqa, Tito 2:9, 10 versiculosta leeripuwaj. Sutʼinchariwajtaj Tantakuna Wasej punkunta llimphuta japʼispaqa, Reinomanta willayninchejta allinpaj qhawachisqanta. Chantapis niwaj imaynatachus machitu hermanosta pampa mana joqʼo kajtin yanapananpi tʼukurinanta. Chaytaj yanapanqa wajkunapi yuyananpaj, nitaj kamachiykunata juntʼanallanpichu. Ruwasqanwan hermanos yanapachikusqankuta rikuspataj, hermanosta sirvispa kusikonqa.

⁸ Yuyaychasqaykiman jina ruwajtintaj, “allinta ruwanki” niy. ¿Imaraykutaj chayta ruway may allin? Imaraykuchus ajinata ruwaspa qotuchakuypi ñauparinanpaj yanapanki. Uj hermanota “allinta ruwanki” neyqa, uj plantitata wiñananpaj qarpay jina (Mateo 3:17 kikinchay).

9. 1) ¿Imataj qhapaj suyuspi rikukun? 2) ¿Imaraykutaj wakin jóvenes Diospaj astawan llankʼayta mana ñaupajman churankuchu?

⁹ Wakin qhapaj llajtaspi ancianosqa jovenesta qotuchakuypi astawan llankʼayta  munanankupaj mana yanapayta atillankuchu. Chantá 20 suyusmanta unaytaña anciano jina llankʼaj hermanos, imaraykuchus mana yanapayta atillasqankuta sutʼincharqanku. Chay ancianosmanta ashkhastaj nerqanku chay hermanosmanta wakinta jovenesllaraj kashajtinku Diospaj astawan llankʼanankupaj tatasninku mana yanapasqankuta. Chay hermanosmanta wakintataj Diospaj astawan llankʼayta munajtinku, tatasninku estudianankupaj astawan tanqasqankuta. Chayrayku paykunaqa Diospaj astawan llankʼayta ni jaykʼaj ñaupajman churarqankuchu (Mat. 10:24).

10, 11. 1) ¿Imaynatataj uj anciano, uj hermanota yuyayninta tijrachinanpaj pisimanta pisi yanapanman? 2) ¿Bibliaj mayqen versiculosnintaj chay hermanoj sonqonman chayanman, imaraykutaj? (Sutʼinchayninta qhawariy.)

¹⁰ Uj hermano qotuchakuypi astawan llankʼaypi mana yuyanchu chayqa, yuyayninta tijrananpaj mayta kallpachakuna, pacienciata ima rikuchina. Sutʼincharinapaj, uj chajra runaqa uj plantata cheqanta wiñananpaj pisimanta pisi cheqanchan. Ajinallatataj qanpis uj hermanota pisimanta pisi yanapawaj qotuchakuypi ruwanasta japʼiyta munananpaj yuyayninta tijrananpaj. ¿Imaynamanta chayta ruwawaj?

¹¹ Chay hermanoj amigon kanaykipaj kallpachakuy. Qotuchakuypaj uj sumaj yanapa kasqantataj niy. Chantapis Jehovaman qokusqanpi tʼukurinanpaj jina Bibliaj versiculosninta rikuchiy (Ecl. 5:4; Isa. 6:8; Mat. 6:24, 33; Luc. 9:57-62; 1 Cor. 15:58; 2 Cor. 5:15; 13:5). Sonqonman chayanaykipajtaj tapuriy: “¿Imatataj Jehovaman nerqanki payman qokushaspa? Bautizakushajtiyki, ¿Jehovaj sonqon imaynataj kashanman karqa?” (Pro. 27:11). “¿Imaynataj Satanás kasharqa bautizakushajtiyki?” (1 Ped. 5:8). ¿Imaraykutaj yachakushanku chay hermanospaj Bibliaj versiculosninta leeripuy may allin? Imaraykuchus chay hermanota mayta yanapanman, sonqonmantaj chayanman (Hebreos 4:12 leey). *

12, 13. 1) ¿Imaynataj Eliseo karqa Elías yachachishajtin? 2) ¿Imaynatá Jehová Eliseota bendicerqa?

¹² Joven, qotuchakoyqa yanapaykita necesitan. ¿Imataj yanapasonqa Jehovapaj llankʼayniykipi allin risunanpaj? Chayta yachanapaj Diospa kamachin Eliseomanta parlarina.

¹³ Kinsa waranqa watas jinaña kashan profeta Elías, Eliseota yanapajnin kananpaj wajyarisqanmanta. Eliseotaj wajyarisqantawan Eliaswan rerqa, tukuy sonqotaj Eliaspaj llankʼarqa (2 Rey. 3:11). Sojta watata jinataj Elías wakicherqa. Elías, Israelpi llankʼayninta tukushaspaña, Eliseota niña yanapananta nerqa. Eliseotaj yanapallaytapuni munasqanrayku kinsa kutita nerqa: “Mana [...] saqesqaykichu”, nispa. Chayrayku Jehová payta bendicerqa. ¿Imaynamantá? “Uj muyoj wayrapi” imaynatachus Eliasta wajnejman apasqanta rikojta saqespa (2 Rey. 2:1-12).

14. 1) ¿Imaynatataj waynas Eliseo jina ruwankuman? 2) ¿Imaraykutaj waynas japʼisqanku ruwanasta juntʼananku may allin?

¹⁴ ¿Imaynatá Eliseo jina ruwawaj? Qotuchakuypi ima ruwanatapis qosusqankuta tukuy sonqo japʼikuy, juchʼuy ruwaykuna kajtinpis. Yachachisoj anciano amigoyki kasqanta yuyarikuy. Chantapis yachachisusqanta jatunpaj qhawasqaykita, astawan paymanta yachakuyta munallasqaykitapuni niy. Qosusqanku ruwanastataj tukuy sonqo juntʼay. Chayta ruwanki chayqa, ancianos qotuchakuypi ruwaykunasta Jehová  japʼinaykita munasqanta reparanqanku (Sal. 101:6; 2 Timoteo 2:2 leey).

15, 16. 1) ¿Imaynatataj Eliseo yachachejnin Eliasta jatunpaj qhawasqanta rikucherqa? (9 paginapi dibujota qhawariy.) 2) ¿Imaraykutaj waj profetas Eliseopi atienekorqanku?

¹⁵ Eliseoj kausaynenqa rikuchiwanchej unaytaña anciano jina llankʼajkunata jatunpaj qhawana kasqanta. Eliseowan, Eliaswanqa Jericó llajtapi wakin profetasta waturiytawan, Jordán mayuman rerqanku. Chaypitaj “Eliasqa poncho jina mantonta japʼispa maytʼuykorqa, chaywantaj yakuta wajtarqa, chay mayupi yakutaj iskayman tʼaqakorqa [...]. Jinataj paykunaqa mayuta chimparqanku chʼaki pampata”. Chantá Eliseoqa, Eliaswan rishaspa tukuy ima nisqanta sumajta uyarerqa, tukuy ima nisqanmantataj mayta yachakorqa. Eliseoqa ni jaykʼaj yuyarqachu may yachaysapa kasqanta. Jehová muyoj wayrapi waj ladoman Eliasta apasqantawan, Eliseoqa mayuman kuterqa. Eliaspa pʼachanwantaj yakusta wajtaspa, nerqa: “Maypitaj Eliaspa Señornin Tata Dios kashan?”, nispa. Chantá mayu yakoqa watejmanta iskayman tʼaqakorqa (2 Rey. 2:8-14).

¹⁶ Eliseo milagrota ruwasqanqa, Elías qhepa kaj milagrota ruwasqan jinallataj karqa. ¿Imatataj chaymanta yachakusunman? Eliseoqa mana yuyarqachu atiyniyoj kasqanrayku imatapis uj jinamanta ruwanan kasqanta. Payqa, Elías jinallapuni ruwarqa. Ajinamanta yachachejnin Eliasta jatunpaj qhawasqanta rikucherqa. Chaytaj waj profetasta yanaparqa paypi atienekunankupaj (2 Rey. 2:15). Eliseoqa 60 watasta profeta jina llankʼarqa, Eliasmanta nisqataj astawan milagrosta ruwananpaj Jehová atiyta qorqa. ¿Imatataj kaymanta waynas yachakunkuman?

17. 1) ¿Imaynatá yachakoj hermanos Eliseo jina ruwankuman? 2) Tiempo pasasqanman jina, ¿imastá chay hermanos ruwayta atinkuman?

¹⁷ Qotuchakuypi ima ruwaykunatapis japʼinki chayqa, ama yuyaychu uj jinamanta ruwanayki kasqanta. Astawanpis chayta ruwayta atinki qotuchakuy necesitajtillan chayri Diospa llajtan uj jinamanta ruwanata kamachejtillan, nitaj jaykʼajpis munasqaykiraykullaqa chayta ruwaychu. Yuyarikuytaj Eliseo, Elías jinallapuni ruwasqanta. Ajinamanta Eliseoqa yachachejnin Eliasta jatunpaj qhawasqanta rikucherqa. Chaytaj waj profetasta yanaparqa paypi atienekunankupaj. Ajinallatataj Bibliaj nisqanman jina ancianos yuyaychasusqankuta ruwajtiyki, paykunata jatunpaj qhawasqaykita rikuchinki, qotuchakuymanta hermanostaj qanpi atienekusonqanku (1 Corintios 4:17 leey). Astawan yachakuspañataj, qotuchakuyta yanapayta atinki Diospa llajtan imatapis uj jinamanta ruwanata kamachisqanman jina ruwananpaj, imaraykuchus Diospa llajtanqa ñaupajllamanpuni rishan. Tiempo pasasqanman jinataj, Jehovaqa Eliseota jina yanapasonqa. Ichapis yachachisoj hermanosmanta nisqaqa qotuchakuypaj astawanraj ruwanki (Juan 14:12).

18. ¿Imaraykutaj qotuchakuypi hermanosta usqhayllata wakichina tiyan?

¹⁸ Suyayku kay yachaqana, ñaupaj yachaqana ima, ancianosta yanapananta hermanosta wakichinankupaj astawan tiempochakunankupaj. Suyallaykutaj qotuchakuyta yanapanankupaj jina hermanospis tukuy sonqo ancianospa yanapayninta japʼikunankuta, yachakusqankuwan qotuchakuyta yanapanankuta ima. Ajinata ruwajtinkoqa pachantinmanta qotuchakuykuna sinchʼi sayasqas kanqanku. Chantapis sapa ujninchejta yanapawasunchej aswan qhepaman cheqa sonqosllapuni kanapaj.