1-3. ¿Imaraykutaj Pablo yacharqa Jehovapi atienekunan kasqanta? (Patapi kaj dibujota qhawariy.)

ÑAUPA tiempomanta cristianosqa Roma suyupi manchay sajra pʼunchaykunapi tiyakorqanku. Romanosqa paykunata mana khuyakuspa qhatiykacharqanku. Llullakuspataj nej kanku runasta chejnikusqankuta, uj llajtata ninawan japʼiykuchisqankuta ima. Ashkha cristianosta presocharqanku, wakinta phiña animales mikhuykunankupaj wijch’uykorqanku, wakintataj warkhuykuspa kausashajta ruphaykucherqanku chʼisinpi llajtata kʼanchananpaj. Cristianosqa sumajta yacharqanku maykʼajllapis ajinapi rikukunankuta.

² Apóstol Pabloqa chay tiempopi presochasqa karqa. Ichapis payqa tapukorqa wakin cristianos yanapanankutachus manachus. ¿Imaraykutaj? Imaraykuchus ñaupaj kutipi mana pipis yanaparqachu. Chaywanpis paytaqa Jesús yanaparqa. Nerqataj: “Señormin noqawan karqa, kallpachawarqataj”, nispa. Arí, Pablota Jesús kallpacharqa. Chantapis Pabloqa “leonpa siminmanta” librasqa kasqanta nerqa (2 Tim. 4:16, 17). *

 ³ Pabloqa yacharqa Jehovapipuni atienekunan kasqanta. Imaraykuchus yuyarikorqa imaynatachus aswan ñaupajta Jehová yanapasqanta. Nitaj iskayrayarqachu chay chʼampayninta allinchananpaj, aswan qhepapi chʼampaykunapi rikukojtin atipananpaj Jehová yanapananmanta ima. Chayrayku nerqa: “Tukuy ima sajramanta Señorqa jarkʼawanqa”, nispa (2 Tim. 4:18, Qheshwa Biblia). Pabloqa yachakorqa, wakin chʼampaykunapi kashajtin hermanos mana yanapajtinkupis, Jehovawan Jesuswan yanapanankupi atienekuyta. Chaymantataj mana iskayrayarqachu.

4, 5. 1) ¿Pitaj yanapawasunpuni? 2) ¿Imaynatá Jehovaman astawan qayllaykullasunmanpuni?

⁴ ¿Maykʼajllapis uj jatun chʼampaypi rikukuspa ni piniyoj kasqaykitachu yuyarqanki? Ichapis mana llankʼayniyoj qhepakorqanki chayri escuelapi uj chʼampayniyoj karqanki. Ichapis onqoykorqanki chayri uj jatun llakiypi rikukorqanki. Ni pi yanapasusqanta rikuspataj, ichapis sonqo pʼakisqa kasharqanki. Arí, wakin chʼampaykunataqa runas mana allinchayta atinkuchu, ¿ajinapi rikukuspa imatá ruwawaj? Bibliaqa Jehovapi atienekunanchejta niwanchej (Pro. 3:5, 6). ¿Cheqamantapunichu Jehovapi atienekuyta atisunman? Arí. Bibliapi ashkha runaspa kausayninkumanta leenchej, chaytaj Jehová llajtanta yanapasqanta rikuchiwanchej.

⁵ Ama llakikuychu yanapata necesitashajtiykipuni wajkuna mana yanapasusqankumanta. Astawanpis Pablo jina yuyay, chay chʼampay Jehovapi tukuy sonqo atienekunaykipaj yanapasusqanta. Chantapis kausayniykipi rikunki imaynatachus Jehová qhawasusqanta. Chaytaj yanapasonqa Jehovapi astawan atienekunaykipaj, payman astawan qayllaykunaykipaj ima.

6. Uj jatun chʼampaypi rikukuspa, ¿imaraykutaj Jehovapi mana atienekuyta atillanchejchu?

⁶ Uj jatun chʼampaypi rikukusqaykipi tʼukuriy. Chay chʼampayniykitaj mayta llakichishasunki. Chayta allinchanaykipajtaj tukuy imataña ruwarqanki, Jehovamantapis yanapata mañakorqanki. Ajina kajtenqa, ama llakikuychu, Jehová yanapasunanpi atienekuy (Salmo 62:8; 1 Pedro 5:7 leey). Jehová sumaj amigoyki kananta munaspaqa, Paypi atienekuyta yachakunayki tiyan. Chayta ruwaytaj mana atikullanchu. ¿Imaraykutaj? Imaraykuchus Jehovaqa mañakuyninchejman mana chay ratopunichu kutichiwanchej (Sal. 13:1, 2; 74:10; 89:46; 90:13; Hab. 1:2).

7. ¿Imaraykutaj Jehová mañakuyninchejman mana chay ratopunichu kutichin?

⁷ ¿Imaraykutaj Jehová mañakuykunasninchejman mana chay ratopunichu kutichiwanchej? Bibliaqa Jehová uj tata jina kasqanta nin (Sal. 103:13). Tatasqa wawasninkuman mana tukuy ima mañakusqankutapunichu qonku. Mañakusqankuta qospapis mana chay ratopunichu qonku. Chantapis wawasqa wakin kutis uj imata mañakunku, uj ratonmantaj manaña chayta munankuchu. Tatasqa yachallankutaj wawasninkoj mañakusqanku mana allinninkupajchu, nitaj wajkunaj allinninkupajchu kasqanta. Wawasninkuman tukuy ima mañakusqankuta chay rato qojtinkoqa, paykunaqa wawasninkoj wata runasninku kankuman. Chaywanpis tatasqa sumajta yachanku imatachus wawasninku necesitasqankuta, maykʼajchus qonanku allin kasqanta ima. Jehovapis uj tata jinallataj munakuwanchej. Yachantaj imatachus necesitasqanchejta, maykʼajchus chayta qonawanchejtapis. Chayrayku pacienciakuna, imaynatachus mañakuyninchejman  kutichisqantataj rikusunchej (Isaías 29:16; 45:9 kikinchay).

8. ¿Imatataj Jehová niwanchej?

⁸ Yuyarikuna sapa ujninchej maykamachus aguantayta atisqanchejta Jehová yachasqanta (Sal. 103:14). Payqa necesitasqanchej kallpata qowasunpuni. Wakin kutisqa ichapis manaña aguantayta atisqanchejta yuyasunman. Chaywanpis Jehovaqa uj chʼampayta mana atipayta atejtinchej pay aguantanapaj yanapanawanchejta niwanchej (1 Corintios 10:13 leey). Maykamachus aguantayta atisqanchejta Jehová yachasqanpi atienekoyqa mayta sonqochawanchej.

9. Jehová mañakuykunasniykiman mana usqhayllata kutichejtin, ¿imatá ruwanayki tiyan?

⁹ Jehová mañakuykunasniykiman mana usqhayllata kutichisunkichu chayqa, pacienciakuy. Yuyarikuytaj yanapayta munawasqanchejta, maykʼajchus yanapanawanchejta sumajta yachasqanta ima. Biblia nin: “Diosqa qankunaman khuyakuyninta, munakuyninta ima rikuchinasuykichejpaj suyashasunkichej, imaraykuchus payqa cheqanta ruwaj Diosmin. Kusikuyniyojmin paypi tukuy suyakojkunaqa”, nispa (Isa. 30:18).

10-12. 1) ¿Imaraykutaj onqosqa familiarta mana qhawayta atikullanchu? 2) Uj llakiypi rikukuspa Jehovapi atienekusqanchej, ¿yanapawanchejchu Jehovaman qayllaykunapaj? Sutʼinchay.

¹⁰ Ichapis uj jatun chʼampaypi rikukushanki, Pablo jinataj “leonpa siminmanta” librasqa kayta necesitashanki. Ajinapi rikukuspa Jehovapi atienekunaykeqa may sumaj. Sutʼincharinapaj, ichapis onqosqa familiarniykita qhawashanki. Jehovamantataj yanapata mañakorqanki imatapis sumajta ajllanaykipaj, aguantanaykipaj kallpata qosunanta ima. * Jehová imaynachus kashasqaykita yachasqanta yuyarikuspa, ichapis manaña anchata llakikunkiñachu. Jehovaqa aguantanaykipaj, cheqa sonqollapuni kanaykipaj ima yanapasonqa (Sal. 32:8).

¹¹ Wakin kutisqa ichapis yuyawaj Jehová mana yanapashasusqanta. Ichapis onqosqa familiarniykita jampej doctores imaynatachus jampinankumanta mana uj yuyayllaman chayayta atinkumanchu. Chayri suyasharqanki familiaresniyki sonqochasunankuta, reparasqaykiman jinataj chʼampayllata astawan rikhurichinku. Ajinapi rikukuspa may allin kanman Diosmanta kallpata mañakunallaykipuni. Paymantaj astawan qayllaykunallaykipuni (1 Samuel 30:3, 6 leey). Imaynatachus Jehová yanapasusqanta rikuspataj, astawan payman qayllaykunki.

¹² Linda sutiyoj hermanamanta parlarina. * Payqa tatasninta niraj wañupushajtinku ashkha watasta qhawarqa. Pay nin: “Ajina chʼampaypi rikukuspa, qosay, hermanoy, noqa ima, ni imata ruwayta aterqaykuchu. Wakin kutisqa mana aguantayta atinapaj jina karqa. Kunantaj chay llakiyniykupi tʼukurispa, imaynatachus Jehová yanapawasqaykuta reparayku. Yanapata necesitashajtiykupuni, ni imata ruwayta atishajtiykupuni Jehová kallpachawarqayku”, nispa.

13. ¿Imaynatataj uj hermanata Jehovapi atienekusqan yanaparqa?

¹³ Jehovapi tukuy sonqo atienekusunchej chayqa, jatuchaj llakiykunata aguantanapaj yanapawasunchej. Sutʼincharinapaj, hermananchej Rosa uj jatun llakiypi rikukorqa. Qosanqa mana Jehovaj testigonchu karqa, qosan paymanta divorciakushajtinpuni, hermanon lupus onqoyniyoj  kashasqanta yacharqa. Pisi killasninmantaj hermanonpa warmin wañuporqa. Tukuy chay llakiykunasninta atipashaspañataj, precursora regular jina llankʼayta qallarerqa. Jinallapitaj mamanñataj wañuporqa. ¿Imataj yanaparqa tukuy chaykunata aguantananpaj? Pay nin: “Sapa pʼunchay Jehovawan parlarej kani, juchʼuy imasta ajllanay kajtinpis. Chaytaj Jehovapi astawan atienekunaypaj yanapawarqa. Chantapis yachachiwarqa paypi atienekunay kasqanta noqapi chayri waj runaspi atienekunaymanta nisqaqa. Jehovaqa mana saqerpariwarqachu, tukuy ima necesitasqaytataj qowarqa. Ajinamantataj Jehová yanapashawasqanta rikorqani”, nispa.

14. ¿Imaynatá Jehová yanapasunkiman familiaykimanta pillapis qotuchakuymanta qharqochikojtin?

¹⁴ Kunanqa, familiaykimanta pillapis qotuchakuymanta qharqochikusqanpi tʼukuriy. Yachankitaj Biblia nisqanman jina qharqochikojkunawan mana parlanachu kasqanta (1 Cor. 5:11; 2 Juan 10). Familiaykita mayta munakusqaykirayku, ichapis yuyanki chay kamachiyta mana kasukuyta atillasqaykita. * Ajinapi rikukojtiyki, Jehová kallpachasonqa cheqa sonqo kanaykipaj, kasukunaykipaj ima. Jehovapi atienekullaypuni, payman astawan qayllaykunaykipaj chay chʼampay yanapasusqantataj ama qonqaychu.

15. ¿Imaraykutaj Diosta, Adán mana kasukorqachu?

¹⁵ ¿Imaynatataj kay chʼampayta Adanpa ruwasqanwan kikinchasunman? ¿Adán yuyarqachu Jehová Diosta mana kasukuspa kausanallantapuni? Mana. Imaraykuchus mana “Adanchu chʼawkiyachikorqa”  (1 Tim. 2:14). Chantá, ¿imaraykutaj Jehovata mana kasukorqachu? Adanqa warmin qorqa chay poqoyta mikhuykorqa, imaraykuchus Jehovamanta nisqaqa warminta astawan munakorqa. Payqa warminta kasukorqa, Jehovaj kamachiyninta kasukunanmanta nisqaqa (Gén. 3:6, 17).

16. ¿Pitataj astawan munakunanchej tiyan, imaraykutaj?

¹⁶ Adanpa ruwasqanqa yachachiwanchej pi runamanta nisqapis Jehovata astawan munakunanchej kasqanta (Mateo 22:37, 38 leey). ¿Imaraykutaj? Imaraykuchus chayta ruwasqanchej familiaresninchejta yanapanqa, paykuna Jehovata yupaychajtinku chayri manapis. Chayrayku Jehovata munakunaykipaj, sapa pʼunchay paypi atienekunaykipaj ima kallpachakullaypuni. Familiaykimanta pillapis qharqochikusqanrayku llakisqa kashanki chayqa, Jehovaman chay llakiyniykimanta willakuy (Rom. 12:12; Fili. 4:6, 7). * Llakiyniyki sinchʼi kajtinpis, Jehovaman astawan qayllaykunaykipaj chay llakiy yanapasusqanpi yuyay. Ajinamanta Jehovapi atienekunki, kasukojtiykitaj tukuy imapis allin risunanmanta ama iskayrayaychu.

17. Runasman willayta ñaupajman churanchej chayqa, ¿imapitaj atienekusunman?

¹⁷ ¿Imaraykutaj Jehová “leonpa siminmanta” Pablota librarqa? Pablo nin: “Evangeliota sutʼita willanaypaj”, nispa (2 Tim. 4:17). Noqanchejmanpis Jehovaqa sumaj willaykunata willananchejta kamachiwanchej. Chantapis paywan “khuska trabaja[sqanchejta]” niwanchej (1 Cor. 3:9; 1 Tes. 2:4). Runasman willayta ñaupajman churasun chayqa, Jehová tukuy ima necesitasqanchejta qonawanchejpi atienekusunman (Mat. 6:33). Chantapis Jehová mañakuykunasninchejman kutichinanta suyakuyta atillasun.

18. ¿Imatataj ruwasunman Jehovaman astawan qayllaykunapaj, paypi astawan atienekunapaj ima?

¹⁸ Jehovaman astawan qayllaykunapajqa sapa pʼunchay kallpachakunallapuni tiyan. Mana atipayta atina jina chʼampaypi kashaspataj, Jehovaman astawan qayllaykunapaj chay chʼampay uj yanapa kasqanpi yuyana. Bibliata leena, ukhunchana, leesqanchejpi tʼukurinapajtaj tiempochakuna. Diosmanta mañakunallapuni, paytapis yupaychanallapuni. Tukuy chaykunata ruwasun chayqa, kunan, aswan qhepaman ima, chʼampaykunapi rikukuspa Jehová yanapanawanchejpi atienekusun.