1. ¿Imaraykutaj Jehovaj qayllallanpipuni kanapaj kallpachakunanchej tiyan?

JEHOVAJ testigosnenqa Jehovaman qayllaykuyta atisqanchejta jatunpaj qhawanchej. Chayrayku mayta kallpachakuna Jehovaj qayllallanpipuni kanapaj. Imaraykuchus Satanaspa pachan, juchasapa kasqanchej ima Diosmanta karunchayta atiwanchej.

2. 1) Pillawanpis amigos kanapaj, ¿imatá ruwana tiyan? (Sutʼinchayninta qhawariy.) 2) ¿Imaynatá Jehovaman astawan qayllaykusunman?

² ¿Jehovata uj sumaj amigoykita jinachu qhawanki? ¿Munawajchu chayta astawan kallpachayta? Imaynatachus chayta ruwanata Santiago 4:8 niwanchej: “Diosman astawan qayllaykuychej; paypis qayllamusonqachej”, nispa. Rikunchej jina Jehovawan amigos kanaykichejpajqa iskayniykichej uj imata ruwanaykichej tiyan. * Jehovaman qayllaykunki chayqa, paypis qayllamusonqa. Jehovaman astawan qayllaykunki chayqa, paywan astawan masichakunki. Jesús jinataj ninki, pay nerqa:  “Noqata kachamuwajqa cheqapuni [...]. Noqarí payta rejsini”, nispa (Juan 7:28, 29). Jehovaman qayllaykunanchejpaj imatachus ruwananchejta qhawarinachej.

3. ¿Imaynatataj Jehovawan parlarisunman?

³ Jehovaman qayllaykuyta munanchej chayqa, may allin kanqa paywan parlarinanchej. ¿Imaynamantataj paywan parlarisunman? Sutʼincharinapaj, iskay amigos may karupi tiyakuspa parlariyta munanku chay, ¿imatataj ruwankuman? Sapa kuti cartasnejta chayri waj imasnejta qhelqanakunkuman, chantapis telefononejta parlarinkuman. Kikillantataj noqanchejpis Jehovawan parlarinapaj ruwananchej tiyan. Paywan parlarinapajqa mana saykʼuspa mañakunanchej tiyan (Salmo 142:2 leey). Jehová parlarinawanchejpajtaj Bibliata leenanchejpuni tiyan, imatachus leesqanchejpitaj tʼukurinanchej tiyan (Isaías 30:20, 21 leey). Kunantaj qhawarina imaynatachus ajinata ruwasqanchej Jehovaman astawan qayllaykunapaj, paywan sumaj amigos kanapaj ima yanapawasqanchejta.

4, 5. ¿Imaynatá Jehová Biblianejta parlawanchej? Sutʼinchay.

⁴ Bibliaj nisqan tukuypaj kasqanta yachanchej. Chaywanpis Bibliaqa sapa ujninchejta Diosman qayllaykunapaj yanapawanchej. Chayrayku Bibliata leerishaspa, ukhuncharishaspa ima, imayna sonqowanchus leesqanchejta qhawarikunanchej tiyan. Chantapis tʼukurinanchej tiyan imaynatachus yachakusqanchejman jina ruwananchejpi. Tukuy chayta ruwajtinchejqa Jehovapis parlashawasunman jina kanqa. Jehová yanapawasqanchejta rikuspataj, paywan astawan masichakusunchej (Heb. 4:12; Sant. 1:23-25).

⁵ Sutʼincharinapaj, Mateo 6:19, 20 versiculospi Jesús nerqa: “Ama kay pachapeqa [...] kapuyniykichejta tantaychejchu”, nispa. Kayta leespa, ¿imayná sientekunchej? Kausayninchejpi Jehovata yupaychayta ñaupajman churashanchejña chayqa, noqanchejwan Jehová kusisqa kashasqanta reparasunchej. Chaywanpis Diosta sirvinapaj kapuyninchejta pisiyachinanchej kasqanta reparanchej chayqa, Payman qayllaykunapaj imatachus ruwananchej kasqanta entiendenapaj Jehová yanapawasqanchejta reparasun.

6, 7. 1) Bibliata ukhunchay, ¿imapajtaj yanapawasunchej? Sutʼinchay. 2) ¿Imaraykutaj Bibliata astawan ukhunchananchej tiyan?

⁶ Bibliata ukhunchaspaqa Jehovata sumajta  servinapaj imastachus ruwananchej kasqanta yachakunchej. Chantapis yachakullanchejtaj ima kʼacha kaykunasniyojchus Jehová kasqanta, imastachus munakuyninrayku ruwasqanta ima. Kayta yachakuspataj astawan Diosninchejta munakunchej. Diosninchejpis astawan munakuwanchej. Ajinamantataj Payman astawan qayllaykusun (1 Corintios 8:3 leey).

⁷ Diosman qayllaykuyta munanchej chayqa, Bibliata tukuy sonqo ukhunchananchej tiyan. Jesús nerqa: “Kaymin chay wiñay kawsayqa: Qan kʼata cheqa Diosta rejsisunanku, kachamusqayki Jesucristotapis”, nispa (Juan 17:3). Noqanchejqa Bibliata leespa ashkha mosoj sumaj imasta yachakuyta atisunman. Chaywanpis Bibliataqa ukhunchananchej tiyan, Jehová Diosta astawan rejsiyta munaspa (Éxodo 33:13 leey; Sal. 25:4).

8. 1) Rey Azariasta Jehová castigasqanmanta, ¿imatá wakin runas yuyankuman? 2) Jehovata sumajta rejsisqanchejrayku, ¿imatá yachanchej?

⁸ Jehová Diosta uj sumaj amigonchejta jina qhawasunchej chayqa, mana llakikusunchu imaraykuchus imatapis ruwasqanta Biblia mana sutʼinchasqanmanta. Sutʼincharinapaj, Azarías Judá llajtapi kamachishajtin, runasqa llulla diosesta yupaychasharqanku. Paytaj mana paykuna jinachu ruwarqa. Astawanpis “Tata Diospa ñawpaqempi cheqan kajta ruwa[llarqapuni]” (2 Rey. 15:1-5). Jehovaqa Azariasta lepra onqoywan castigarqa. ¿Imaraykutaj? Kausayninmanta parlaspa 2 Reyes libropi mana ninchu imaraykuchus Jehová castigasqanta. Wakin runasqa ichá yuyankuman Jehová qhasimanta castigasqanta. Chaywanpis noqanchejqa Jehovata sumajta rejsinchej, yachanchej imatapis cheqantapuni ruwasqanta (Jer. 30:11). Imaraykuchus Azariasta Jehová lepra onqoywan castigasqanta mana yachaspapis, yachanchej Jehová cheqan kajtapuni ruwasqanta.

9. ¿Imaraykutaj Jehová rey Azariasta castigarqa?

⁹ Bibliaqa rey Azariaspa kausayninmanta astawan parlawanchej, pitachus Uzías sutiwan rejsikullantaj (2 Rey. 15:7, 32). Kay 2 Crónicas 26:3-5, 16-21 versiculospi Azariaspa kausayninmanta parlaspa nin: “Ruwasqasnenqa cheqan karqa Tata Diospa qhawaynimpeqa”, nispa. Chantapis nillantaj: “Sonqompi runaykachayta qallarerqa”, nispa. Chay reyqa uj kuti sacerdotespa ruwanankuta ruwayta munarqa. Chantá 81 sacerdotes chayta mana ruwananta nerqanku. Paytaj runaykachayta qallarisqanrayku paykunawan phiñakorqa, nitaj kasorqachu. Kayqa imaraykuchus Jehová chay reyta lepra onqoywan castigasqanta entiendenapaj yanapawanchej.

10. 1) ¿Imaraykutaj mana necesitanchejchu imaraykuchus imatapis Jehová ruwasqanta yachayta? 2) ¿Imaynatataj Jehová imatapis cheqantapuni ruwasqanpi astawan atienekuyta atisunman?

¹⁰ ¿Imatataj chaymanta yachakunchej? Bibliaqa Azariaspa kausayninmanta ashkha imasta willawanchej, chaytaj yanapawanchej imaraykuchus Jehová castigasqanta yachanapaj. Chaywanpis Bibliaqa mana tukuy imamanta parlaspapunichu ajinata willawanchej. Jina kajtin, ¿Jehová cheqan kajtapuni ruwasqanmanta iskayrayasunchu? Chayrí, ¿cheqan kajta ruwasqanpi atienekullasunpunichu? (Deu. 32:4.) Bibliaqa Jehovata sumajta rejsinapaj, Paypi atienekunapaj ima, tukuy imata willawanchej. Payta rejsisunchej, munakusunchej ima chayqa, mana necesitasunchejchu imaraykuchus imatapis ruwasqanta yachayta. Bibliata ukhunchasqanchejman jina Jehovapi astawan atienekusunchej, paymantaj astawan qayllaykusunchej (Sal. 77:12, 13).

11-13. ¿Imaraykutaj ninchej Jehová mañakuykunasninchejta uyarisqanta? (19 paginapi dibujota qhawariy.)

¹¹ Diosmanta mañakuspaqa, payman qayllaykunchej. Chantapis payta jatunchanchej, graciasta qonchej, yanapayninta ima mañakunchej (Sal. 32:8). Jehovaj sumaj amigosnin kayta munanchej chayqa, pay mañakuyninchejta uyariwasqanchejmanta mana iskayrayanachu tiyan.

¹² Wakin runasqa Dios mañakuykunasninchejta mana uyarisqanta ninku. Astawanpis allin kanallapaj mañakuna kasqanta ninku. Paykunaqa yuyanku mañakuykunasninchej chʼampaykunasninchejpi yuyanapaj, sapallanchejmanta chʼampaykunata allinchanapaj ima yanapawasqanchejta. Arí, Diosmanta mañakoyqa ajinatapis yanapallawasunmantaj. Chaywanpis Dioswan mañakuynejta parlarinchej chayqa, pay uyariwanchej. ¿Imaraykú chayta ninchej?

¹³ Jesuspi tʼukurina. Payqa niraj kay Jallpʼaman jamushaspa imaynatachus Jehová kamachisninpa mañakuyninkuta uyarisqanta rikorqa. Kay Jallpʼaman jamuspañataj, mañakuyninpi imatachus yuyasqanta, imaynachus kashasqanta ima Jehovaman willarqa. Uj kutipi “sutʼiyanankama mañakorqa” (Luc. 6:12; 22:40-46). ¿Ajinata Jesús mañakunmanchu karqa Dios mañakuykunata mana uyarisqanta yachaspa? Chantapis Jesusqa yachachisqasninman imaynatachus Jehovamanta mañakunankuta yachacherqa. ¿Pay yachachinmanchu karqa Dios mañakuykunata mana uyarisqanta yachaspa? Jesusqa sutʼita yacharqa Jehová mañakuykunata uyarisqantapuni. Chayrayku Tatanman nerqa: “Tatáy, graciasta qoyki uyariwasqaykimanta. Noqa yachani uyariwasqaykitapuni”, nispa. Noqanchejpis Jehová mañakuykunasninchejta uyarisqanpi atienekuyta atisunman (Juan 11:41, 42; Sal. 65:2).

14, 15. 1) ¿Imaraykutaj Jehovamanta mañakushaspa imapichus yanapanawanchejta munasqanchejta sutʼita willana tiyan? 2) ¿Imaynatá uj hermanata Diosmanta mañakusqan yanaparqa Payman astawan qayllaykunanpaj?

¹⁴ Wakin kutis ichá mana reparayta atillasunchu Jehová mañakuykunasninchejta uyarisqanta. Chayrayku imapipis yanapanawanchejta munanchej chayqa, sutʼita willana,  ajinamanta Jehová uyariwasqanchej sutʼi reparay kanqa. Ajinamantataj Jehovaqa sumaj amigonchej kanqa. Payman tukuy llakiykunasninchejmanta willajtinchejqa, Pay astawan qayllaykamuwasun.

¹⁵ Sutʼincharinapaj, Kathy sutiyoj hermanaqa willayman llojsispapis mana kusiyta tarejchu. * Pay nin: “Diosmanta runasman willayqa mana gustawajchu. Manapuni gustawajchu”, nispa. Jubilakojtintaj uj anciano precursora regular jina llankʼananta nisqa. Chay hermana nin: “Ancianoqa precursora jina llankʼanaypaj uj solicitudta jaywawarqa. Noqataj precursora kayta ajllarqani. Sapa pʼunchaytaj Jehovamanta yanapata mañakorqani willaypi kusiyta tarinaypaj”, nispa. ¿Jehová mañakuyninta uyarerqachu? Chay hermanaqa kinsa watataña precursora jina llankʼashan. Nintaj: “Willaypi astawan tiempota kasqay, hermanas yanapawasqanku ima, astawan sumajta willanaypaj yanapawan. Kunantaj Diosmanta willay mayta gustawan. Chantapis ñaupajmanta nisqaqa kunan astawan Jehovaman qayllaykuni”, nispa. Cheqamantapuni chay hermanata Jehovamanta mañakusqan, Jehovaman qayllaykunanpaj yanaparqa.

16, 17. 1) ¿Imatataj ruwananchej tiyan Jehovaman astawan qayllaykunapaj? 2) ¿Imatataj qhepan yachaqanapi yachakusunchej?

¹⁶ Jehovaman wiñaypaj qayllaykuyta atillasunpuni. Chayrayku Diosta uyarinallapuni sapa pʼunchay Bibliata ukhunchaspa, mañakuynejtataj paywan parlarinallapuni. Chayta ruwasunchej chayqa sapa pʼunchay Diosman astawan qayllaykusunchej. Yanapayninwantaj chʼampaykunata aguantasunchej.

¹⁷ Diosmanta mañakullasunpuni chaypis, ichá chʼampaykunapi rikukullasunpuni. Ajinapi rikukuspataj ichapis Jehovapi mana atienekusunmanchu, yuyasunmantaj mañakuykunasninchejta Jehová mana uyariwasqanchejta. Tapukusunmantaj Jehovaj amigollanpunichus, manachus kasqanchejta. Ajinata yuyanchej chay, ¿imatá ruwasunman? Qhepan yachaqanapi chaymanta yachakusunchej.