JATUN tantakuykunapi Jehovamanta yachakuspa, mayta kusikunchej. Jinallataj chay tantakuykunapi hermanoswan khuska mikhurispapis.

Septiembre de 1919 watapi Bibliamanta Yachaqajkuna Cedar Point (Estados Unidos) nisqapi pusaj pʼunchaypaj uj jatun tantakuyta ruwarqanku. Chayman jamojkuna alojakunankupaj, mikhunankupaj imataj, ashkha alojamientosta maskʼarqanku. Ashkhas jamusqankuraykutaj meserosqa mancharikorqanku, riporqankutaj. Chayrayku chay alojamientosmanta uj encargado wakin waynas yanapayta atisqankutachus, manachus tapurerqa. Ashkha hermanostaj yanapakorqanku. Paykunamanta ujnenqa Sadie Green karqa. Pay aswan qhepaman nerqa: “Ni jaykʼajpis mesero karqanichu, meseromanta llankʼaspataj kusikorqani”, nispa.

Chaymantapacha ashkha hermanos, waynas ima kusiywan jatun tantakuykunapaj mikhunata wakichispa llankʼarqanku. Hermanoswan khuska llankʼayqa ashkha waynasta yanaparqa Diospaj astawan llankʼayta munanankupaj. Ajina karqa hermananchej Gladys Boltonwan. Payqa 1937 watapi uj jatun tantakuypi llankʼarqa, nintaj: “Tukuynejmanta hermanosta rejserqani, yachakorqanitaj imaynatachus llakiyninkuta atipasqankuta. Chaypachataj precursora kanayta nikorqani”, nispa.

Beulah Covey sutiyoj hermana, yanapakoj hermanosmanta nerqa: “Sumajta yanapakusqankurayku, tukuy imapis allin karqa”, nispa. Chay tantakuykunapaj mikhunata wakichiy, qaray ima mana atikullajchu. Kay 1969 watapi Angelo Manera sutiyoj hermano, Los Ángelespi (California) kaj Estadionman chayaytawan, Departamento de Alimentos nisqamanta encargado kananpaj churasqankuta yacharqa. Pay nin: “Chayta yachaytawan mancharikorqani”, nispa. Chay tantakuypi gasmanta tuberiata cocinaman apanankupaj 400 metrosta jina uj larqʼata allarqanku.

Sierra Leonapi 1982 watapi uj jatun tantakuy ruwakushajtin, pisi herramientaslla kajtinpis, uj cheqata llimphucharqanku tantakuypi kajkuna mikhunankupaj. Frankfurt (Alemania) nisqapi 1951 watapi uj jatun tantakuy ruwakushajtin, hermanosqa sumajta yuyaychakuspa wausiwan purej trenta alquilakorqanku, chay trenmanta wausitataj tubosnejta cocinaman churarqanku 40 mankaspi  waykʼunankupaj. Uj horapitaj 30.000 runasman mikhunata qaraj kanku. Chay tantakuyman rejkunaqa cucharasninkuta apakorqanku, 576 yanapakojkuna platosta mayllaspa mana saykʼunankupaj. Yangón (Myanmar) nisqapitaj waj suyusmanta hermanospaj mana ancha jayatachu waykʼorqanku.

Kay 1950 watapi uj jatun tantakuy Estados Unidospi ruwakushajtin, Annie Poggensee sutiyoj hermana mikhuyta japʼikunanpaj manchay ruphaypi filakuspa imatachus uyarisqanmanta yuyarikun. Nintaj: “Uj barcopi Europamantapacha jamoj iskay hermanas parlarikusqankuta sumajta uyarerqani”, nispa. Chay hermanasqa Jehová chay jatun tantakuyman chayamunankupaj yanapasqanmanta parlarisharqanku. Pay nillanpuni: “Chay jina ruphaypi mikhuyta japʼikunankupaj filakoyqa ni imapis paykunapaj karqachu, may kusisqapuni kasharqanku”, nispa.

Jatun tantakuyta wakichejkunaqa, jatuchaj carpasta, sayasqalla mikhunankupaj mesasta filapi churarqanku, mikhojkuna usqhayllata ripunankupaj, wajkunañataj mikhoj yaykunankupaj ima. Uj runa nerqa: “Tʼukunapaj jina kay religionqa, sayasqalla mikhunkupis”, nispa.

Estados Unidospi, Estadio de los Yankees nisqapi uj jatun tantakuy ruwakushajtin autoridades, militares ima tʼukulla kasharqanku hermanos wakichisqa kasqankumanta. Soldadosta kamachejkuna, mikhunapaj wakichikorqa chay cheqata qhawaytawan, Departamento de Guerra del gobierno británico nisqamanta comandante Faulknerta llajtanpi kikillantataj ruwananta nerqanku. Chayrayku 1955 watapi pay, warmin ima “Reino Triunfante” nisqa jatun tantakuyman llajtanpi ruwakushajtin rerqanku. Nerqataj munakuyta rikuchisqankurayku sumajta llankʼasqankuta.

Ashkha watasta hermanos sumaj mikhunasta wakicherqanku, hermanos rantikuyta atinankupaj jinallataj karqa. Chay tantakuykunapeqa mikhunata wakichispa mayta llankʼaj kanku, nitaj wakin umallarichiykunata sumajta uyarejchu kanku. Chayrayku 1970 watas tukukuyta uj jinamanta ruwakunanta nikorqa, 1995 watapitaj sapa uj mikhunata apakunankuta nikorqa. Chayta ruwakusqanqa yanaparqa qolqe mana anchata gastakunanpaj, pisi yanapajkunalla necesitakunanpaj, tantakuypi yachachikusqanta tukuy uyarinankupaj, purajmanta kallpachanakunankupaj ima. *

Jehovaqa mayta munakun, hermanosninkuta sirvinankurayku mayta llankʼajkunata. Wakin hermanosqa yuyarikullankupuni, ñaupaj wataspi waj hermanoswan khuska mikhurikuspa kusikusqankumanta. Chaywanpis, kunankama jatuchaj tantakuykunapeqa hermanos munanakusqanku rikukullanpuni (Juan 13:34, 35).