1. ¿Imaraykutaj Cristo “Diospa atiynin” kasqanta Pablo nerqa?

JESÚS kay Jallpʼapi kashaspa, tʼukunapaj jina ashkha milagrosta ruwarqa. Bibliapi chay milagrosmanta leesunchej chayqa, creeyninchej astawan sinchʼiyanqa (Mat. 9:35; Luc. 9:11). Jesusqa chay milagrosta ruwarqa, Jehová atiyta qosqanrayku. Chayrayku apóstol Pablo nerqa: “Cristoqa Diospa atiynin”, nispa (1 Cor. 1:24). ¿Imatataj Jesús milagrosta ruwasqanmanta yachakusunman?

2. ¿Imatataj Jesuspa milagrosninmanta yachakusunman?

² Jesuspa milagrosninmantaqa ashkha imasta yachakusunman (Hech. 2:22). Sutʼincharinapaj, kay Jallpʼapi kashaspa milagrosta ruwasqanqa waranqa watas kamachiyninpi tukuy runaspaj milagrosta ruwananta rikuchiwanchej. Chantapis chay milagrosqa imaynachus Jesús kasqanta, imaynachus Jehová kasqanta ima, astawan yachanapaj yanapawanchej. Kay yachaqanapi yachakusunchej Jesuspa kinsa milagrosninmanta. Chantapis yachakullasuntaj imaynatachus chay milagros kunan, aswan qhepamanpis yanapanawanchejta.

3. 1) Caná llajtapi uj casarakupi kashaspa, ¿imatataj Jesús ruwarqa? 2) ¿Imaraykutaj chay milagrota Jesús ruwarqa?

³ Jesusqa Galileamanta Caná llajtapi uj casarakupi kashaspa, ñaupaj kaj milagronta ruwarqa. Chay casarakupi ashkha runas kasqanrayku, ichá vinoqa tukukorqa. Vino tukukusqantaj casarakojkunapajqa may pʼenqay karqa, imaraykuchus paykunaqa chay casarakuman jamojkunata ni imamanta pisichinankuchu karqa. Mariaqa, Jesusta casarakojkunata yanaparinanta nerqa. ¿Imaraykú chayta María nerqa? Imaraykuchus Jesusmanta parlaj profeciasta, Jesús “Patapi Kaj Diospa Churin” kasqanta ima yacharqa (Luc. 1:30-32; 2:52). Ichapis chayrayku Mariaqa, casarakojkunata Jesús yanapayta atisqanta yacharqa. Chaywanpis María, Jesús ima, casarakojkunamanta khuyakusqanku, yanapayta munasqanku imaqa sutʼi rikukun. Chayrayku Jesusqa sojta pʼuñu yakuta (380 litrosta) sumaj vinoman tukucherqa (Juan 2:3, 6-11 leey). ¿Jesús chay milagrota ruwananpunichu karqa? Mana. Astawanpis chay milagrota ruwarqa, runasmanta llakikusqanrayku, Tatan jina khuyakuyta rikuchiyta munasqanrayku ima.

4, 5. 1) ¿Imatataj yakuta vinoman Jesús tukuchisqanmanta yachakunchej? 2) ¿Imatataj chay milagro rikuchiwanchej aswan qhepaman kananmanta?

⁴ Jesusqa, Jehovaj atiyninwan ashkha runaspaj yakuta sumaj vinoman tukucherqa. Chay milagrota ruwasqanqa yachachiwanchej Jehová, Jesús ima, may khuyakuyniyoj kasqankuta, imaynachus kashasqanchejmanta llakikusqankuta ima. Chantapis yachakunchej Jehová paraisopi tukuyman mikhunata qonawanchejta (Isaías 25:6 leey).

⁵ Paraisopi kausakushajtinchejqa Jehová tukuy ima necesitasqanchejta qowasun, nitaj imamantapis pisichiwasunchu. Tukuypis kʼachitu wasisniyoj kasunchej, ashkha mikhunayoj ima. Sumaj imasta Jehová qonawanchejpi tʼukurispaqa, Payman mayta agradecekunchej.

6. 1) ¿Imapajtaj Jesús atiyninta apaykacharqa? 2) ¿Imaynatataj Jesús jina ruwasunman?

⁶ Jesusqa ni jaykʼaj atiyninta apaykacharqachu munaynillanta ruwananpaj. Sutʼincharinapaj, Kuraj Supay rumista tʼantaman tukuchinanta nejtin, mana kasorqachu (Mat. 4:2-4). Jesusqa atiyninta apaykacharqa runasta yanapananpaj. ¿Imaynatataj pay jina ruwasunman? Pay nerqa: “Qoriychej wajkunaman”, nispa (Luc. 6:38). Chaypajqa, hermanosninchejta wasinchejman mikhurinapaj wajyarisunman. Chantapis tantakuy tukukusqantawan paykunawan parlarinapaj tiempochakusunman. Ichapis mayqen hermanollapis umallirichiyninta wakichikusqanta uyarinata munanman, chayri aswan allinta willananpaj yanaparinata munanman. Wajkunata yanapaspa, paykunamanta  khuyakuspa imaqa, Jesús jina ruwashanchej.

7. ¿Imataj Satanaspa sajra pachanpi kallanqapuni?

⁷ Kay tiempopeqa, ñaupa tiempopi jina wajcha runas kallankutaj. Chayrayku Jehová israelitasman nerqa: “Kay pachapeqa wajchasqa kallanqapuni”, nispa (Deu. 15:11). Chaymanta unayninmantaj Jesuspis nillarqataj: “Wajchasqa qankunawampuni kanqanku”, nispa (Mat. 26:11). Jesús kayta nispaqa, mana nisharqachu wajchayay ni jaykʼaj tukukunanta. Manaqa Satanaspa pachanpi wajchayay kanallantapuni nisharqa. Chaywanpis paraisopeqa manaña wajchayay kanqachu, imaraykuchus tukuypaj mikhuna kanqa.

8, 9. 1) ¿Imaraykutaj Jesús ashkha runasman mikhucherqa? 2) ¿Imaynataj sientekunki Jesús ashkha runasman mikhuchisqanta yachaspa?

⁸ Salmista Jehovamanta nerqa: “Makiykita kicharispa, tukuy kawsajkunata sajsachinki ashkhata qospa”, nispa (Sal. 145:16). Jesús kay Jallpʼapi kashaspa Tatan jina ruwarqa, ashkha runasmantaj imatachus necesitasqankuta qorqa. Chaytataj mana atiyniyoj kasqanta rikuchinallanpajchu ruwarqa, manaqa runasta khuyakusqanrayku. Sutʼincharinapaj, imatachus Mateo 14:14-21 (leey) versículos nisqanta qhawarina. Tukuy llajtasmanta ashkha runas Jesuspa qhepanta chakipi rerqanku (Mat. 14:13). Chʼisiyaykuytataj Jesuspa yachachisqasnenqa, chay runasta saykʼusqasta, yarqhasqasta ima rikorqanku. Chayrayku Jesusman nerqanku: “Kachapullayña runasta [...] mikhunata rantikamunankupaj”, nispa. ¿Imatataj Jesús ruwarqa?

⁹ Chantá Jesús uj milagrota ruwarqa phishqa tʼantaswan iskay challwaswan ashkha runasman mikhuchinanpaj. Chay mikhojkunamanta qharistaj phishqa waranqa jina karqanku, chantá warmis, wawitas ima kallarqankutaj. Biblia nisqanman jina tukuyninku mikhorqanku sajsanankukama. Puchoj tʼantastataj oqharerqanku chunka iskayniyoj canastastapuni. Rikunchej jina Jesusqa kallpachananpaj jina mikhuyta chay runasman qorqa, ajinamanta wasisninkuman chayapuyta atinankupaj (Luc. 9:10-17). Chayta ruwasqantaj runasmanta llakikusqanta, munakusqanta ima rikucherqa.

10. ¿Imataj tumpamantawan wajchayaywan kanqa?

¹⁰ Ashkha runasqa sajra kamachejkunaj juchankurayku wajchas kanku. Hermanosninchejmanta wakinpis pisi mikhunayojlla kanku. Chaywanpis tumpamantawan Jehovata kasukojkunaqa, mosoj pachapi kausakonqanku, maypichus sajra kamachejkuna, wajchayay ima manaña kanqachu. Jehová Diosqa imatachus necesitasqanchejta qoyta munawanchej, atiyniyojtaj chayta ruwananpaj. Niwanchejtaj tumpamantawan tukuy ima ñakʼariyta chinkachinanta (Salmo 72:16 leey).

11. 1) ¿Imaynatá yachanchej Jesús tumpamantawan Jallpʼantinpi runasta yanapananta? 2) Imatachus Cristo ruwananpi tʼukurispa, ¿imatataj ruwayta munanchej?

¹¹ Jesusqa kay Jallpʼapi kashaspa, kinsa wata khuskanniyojta pisi lugaresllapi willarqa (Mat. 15:24). Kunantaj payqa reyña, waranqa watas kamachiyninpitaj Jallpʼantinpi tukuy runasta yanapanqa (Sal. 72:8). Jesusqa milagrosta ruwasqanwan, yanapanawanchejpaj atiyninta apaykachayta munasqanta rikuchiwanchej. Chaypi tʼukurispataj wajkunata yanapanapaj tiemponchejta, kallpanchejta ima churayta munanchej (Sal. 45:1; 49:3). Milagrosta  ruwayta mana atispapis, imatachus Biblia nisqanmanta runasman willayta atinchej. Imaraykuchus chaypaj kamachisqas kanchej (Rom. 1:14, 15).

12. ¿Imaraykú nisunman Jesús allinta yachasqanta imayna ruwasqachus Jallpʼa kasqanta?

¹² Bibliaqa niwanchej Jehová kay Jallpʼata ruwashajtin, Jesús uj Yanapaj Maestro jina yanapasqanta (Pro. 8:22, 30, 31; Col. 1:15-17). Chayrayku Jesusqa yachan imayna ruwasqachus Jallpʼa kasqanta. Yachallantaj imaynatachus sinchʼi wayrata, phiñarikoj qochatapis thañichiyta.

13, 14. ¿Imatataj Jesús Diospa atiyninwan ruwarqa? Sutʼinchay.

¹³ Jesusqa kay Jallpʼapi kashaspa, manchay sinchʼi wayrata sayachiyta atisqanta rikucherqa. Sutʼincharinapaj, uj kuti Diospa atiyninwan manchay sinchʼi wayrata thañicherqa (Marcos 4:37-39 leey). Uj yachayniyoj runa nisqanman jina, chay sinchʼi wayraqa mana mayqen wayra jinallachu karqa, manaqa phuyus yanayaykorqa, may sinchʼita wayramorqa, may sinchʼita paramorqa, qhon qhonkunas ima karqa. Chay jina sinchʼi wayraqa, tukuy imatapuni apakapun.

¹⁴ Yaku qhollchoqeyaspa boteta mayta wajtaykachashasqanpi, yaku boteman juntʼaykushasqanpi ima tʼukuriy. Sinchʼi wayraqa manchaytapuni sonarisharqa, botetapis kayman jaqayman apaykachasharqa. Jinapis Jesusqa may saykʼusqa kasqanrayku puñusharqa. Yachachisqasnintaj may mancharisqas kashasqankurayku, Jesusta rijchʼarichispa, nerqanku: “Señor, salvawayku, chinkaykushanchejña”, nispa (Mat. 8:25). Jesustaj jatarimuytawan, ‘wayrata kʼamerqa, qochatapis chʼin kay’ nispa nerqa (Mar. 4:39). Wayrataj thañerqa, may chʼintaj karqa. Sutʼita rikuchej Jesús sinchʼi wayrata sayachiyta atisqanta.

15. ¿Imaraykutaj yachanchej Jehová sinchʼi wayrata, waj llakichej imastawan chinkachiyta atisqanta?

¹⁵ Jehová, Jesusman atiyta qorqa sinchʼi wayrata thañichinanpaj. Chayrayku yachanchej Jehovapis chayta ruwananpaj atiyniyoj kasqanta. Niraj Jatun Para kashajtin, Jehová nerqa: “Qanchis pʼunchaymantawan parachimusaj tawa chunka pʼunchayta, tawa chunka tutatawan”, nispa (Gén. 7:4). Chantapis Éxodo 14:21 versículo nillantaj: “Diostaj tukuy chay tuta inti llojsimuynejmanta sumajta wayrachimuspa, yakuta iskayman khallarparerqa”, nispa. Jonás 1:4 versiculopi nin: “Diosqa sinchʼita wayrachimorqa. Jatun Qocha chawpitaña rishajtinku, maytapuni para wayraqa yakuta qhollchoqeyachispa, barcotaqa qʼopata jina kayman jaqayman apaykacharqa, phirinampaj jina”, nispa. Chay jina atiyniyoj Jehová kasqanqa, paypi atienekunanchejpaj yanapawanchej. Cheqamantapuni paraisopeqa sinchʼi wayra, waj llakichej imas manaña kanqachu.

16. ¿Imaraykutaj sonqochawanchej Jehová, Jesús ima tukuy imata allinchanankupaj atiyniyoj kasqankuta yachay?

¹⁶ Jehovawan, Jesuswan atiyniyoj kasqankuta yachayqa mayta sonqochawanchej. Imaraykuchus Jesuspa waranqa watas kamachiyninpi Jallpʼa ikhakuykuna, phataspa nina lawata ajtoj orqos, sinchʼi wayras, pʼampaj yakus (tsunamis), loco wayras ima manaña kanqachu. Paraisopeqa chay llakiykuna kananmanta manaña manchachikusunchu, imaraykuchus Jehová tukuy runasta yanapanqa (Apo. 21:3, 4). Cheqamantapuni nisunman Jesucristoqa, Jehovaj atiyninwan tukuy imata allinchananta.

17. ¿Imaynatataj Jehová jina, Jesús jina ruwasunman?

¹⁷ ¿Imaynatataj Jehová jina, Jesús jina ruwasunman? Noqanchejqa mana milagrosta ruwayta atinchejchu. Chaywanpis imatachus Proverbios 3:27 (leey) versículo nisqanta ruwayta atinchej. Hermanosninchej llakiypi kashajtinku, sonqochasunman, Dioswan masichakunankupaj yanapasunman, imatachus necesitasqankutapis qoriyta atisunman (Pro. 17:17). Sutʼincharinapaj, jatuchaj llakiykuna kajtin hermanosninchejta yanapasunman. Uj viuda hermanaj wasinta uj sinchʼi wayra thuñirparerqa. Chay hermanaqa, hermanos wasinta allinchaypi yanapasqankurayku, Jehovaj testigon kasqanmanta may agradecesqa kasharqa. Chantapis hermanos necesitasqanta qosqankurayku, Diosta yupaychanallanpajpuni kallpachasqankuyrayku ima agradecesqa kashallarqataj. Uj soltera hermanapis uj sinchʼi wayra wasinta thuñirparisqanrayku ajinallapitaj rikukorqa. Hermanos yanapasqankumanta imayna agradecesqachus kashasqanta mana niyta atispapis, “¡gracias, Jehová Diosníy!”, nispa nerqa. Tukuypis mayta agradecekunchej hermanosninchej ajinata yanapawajtinchej. Astawanpis Jehovata, Jesusta ima agradecekunchej, mana saqerpariwasqanchejmanta.

18. ¿Imaraykutaj Jesús milagrosta ruwarqa?

¹⁸ Jesusqa kay Jallpʼapi kashaspa Diospa atiyninta japʼisqanta rikucherqa. Chantapis mana allinpaj qhawachikuyta munaspachu, nitaj munayninta maskʼaspachu milagrosta ruwarqa. Astawanpis runasta munakusqanrayku, yanapayta munasqanrayku ima ruwarqa. Qhepan yachaqanapitaj chaykunamanta astawan yachakusunchej.