BEZALEELWAN, Aholiabwanqa wasista ruwaymanta yachaj kanku. Egiptopi wata runas kashaspa paykunaqa ladrillosta saykʼunankukama ruwaj kanku. Egiptomanta llojsipuytawantaj niña chayta ruwarqankuchu. Astawanpis, Dioswan tinkukuna toldoj imasninta ruwanankupaj Jehová churarqa. Ajinamantataj may sumaj herrerosman tukunanku karqa (Éxo. 31:1-11). Ruwasqankutataj mana tukuychu rikunanku karqa. Chaymanta, ¿llakikorqankuchu? Ruwasqankuta wajkuna, ¿rikunankupunichu karqa? Ruwasqaykita wajkuna, ¿rikunankupunichu tiyan?

Toldoj wakin imasnin may kʼachituspuni karqanku. Sutʼincharinapaj, arcaj patanpeqa karqa qorimanta iskay querubín nisqa ángeles (Heb. 9:5). Imayna kʼachitustapunichus toldoj imasninta ruwasqankutaqa mana yachayta atillanchejchu (Éxo. 37:7-9).

Kay tiempopi pillapis chay imata tarinman chayqa, sumachaj museospi tukuy runas rikunankupaj churankuman. Chaywanpis toldoj imasninta ruwarqanku chay tiempopeqa, pisi runaslla rikorqanku may sumajpuni toldoj imasnin ruwasqa kasqanta, imaraykuchus querubín nisqa angelesqa Aswan Santo Cheqa nisqa ukhupi kasharqanku. Chay cheqamanqa watapi uj kutillata Perdonta Tarina pʼunchaypi kuraj sacerdote yaykoj (Heb. 9:6, 7).

Bezaleel, Aholiab kawaj karqa chay, ¿imaynataj sientekuwaj karqa chay kʼachitu imasta ruwanaykipaj mayta kallpachakojtiykipis mana tukuychu chayta rikojtinku? Kay tiempomanta runasqa, ruwasqankuta wajkuna allinpaj qhawanankuta necesitanku, kallpachakusqanku mana qhasichu kasqanta yachanankupaj. Chaywanpis noqanchejqa mana chay runas jinachu kanchej. Bezaleel, Aholiab jinataj, ruwasqanchejta Jehová allinpaj qhawananta necesitanchej.

Jesuspa tiemponpi fariseosqa runaswan rikuchikunallankupaj “sinagogaspi, plaza esquinaspi” mañakoj kanku. Chaywanpis Jesusqa nerqa Dios uyarinanpaj mañakunankuta, manataj runaswan qhawachikunankupajchu. Chayrayku  nerqa: “Pakaypi mañakusqaykita rikusoj Tataykitaj tʼinkaykita qosonqa”, nispa (Mat. 6:5, 6). Rikunchej jina, mañakuyninchejmanta imatachus Jehová yuyasqan aswan sumaj, runas imatachus yuyasqankumanta nisqaqa. Kikillantataj nisunman waj imasta Diospaj ruwasqanchejmantapis. Imaraykuchus Dios imaynatachus chay ruwasqanchejta qhawasqan aswan sumaj, runas imaynatachus qhawasqankumantaqa.

Bezaleelwan, Aholiabwan toldoj imasninta tukusqankutawan “phuyuykamorqa, Tata Diospa jatun kaynintaj chay toldoman juntʼaykorqa” (Éxo. 40:34). Chaytaj rikucherqa Jehová ruwasqankuta allinpaj qhawasqanta. Chayta rikuspa, ¿imayná kashankuman karqa? Chay toldoj imasninpi sutisninku mana kajtinpis, may sonqo juntʼasqachá kasharqanku Jehová chay ruwasqankuta allinpaj qhawasqanmanta (Pro. 10:22). Tiempo pasasqanman jina astawan kusisqachá kasharqanku, ruwasqanku imasta Jehovata yupaychanallankupajpuni apaykachashasqankumanta. Chantapis kausarimuspa astawanrajchá kusikonqanku ruwasqanku imasta 500 watasta jinapuni, Jehovata yupaychanankupaj apaykachasqankumanta.

Kunanpis Diospa llajtanpeqa kallankutaj dibujajkuna, pintajkuna, takiykunata wakichejkuna, fotosta orqhojkuna, qhelqajkuna, waj qallusman tijrachejkuna ima. Paykunaj ruwasqankutaqa ni pi rikunchu, nitaj ruwasqanku imaspi sutisninku rikhurinchu. Kikillantataj nisunman pachantinpi 110.000 kuraj qotuchakuykunapi imatachus ruwakusqanmantapis. Qotuchakuypa qolqenta apaykachaj hermano sapa killa tukukuyta, imaynatachus qolqe apaykachakusqanmanta informeta ruwasqanta ni pi rikunchu. Nillataj ni pipis rikunchu qotuchakuymanta secretario, hermanos willamusqankumanta informesta imaynatachus wakichisqantapis. Nillataj pipis rikunchu imaynatachus hermanos Tantakuna Wasista allinchasqankuta.

Bezaleelwan Aholiabwanqa may sumaj imasta ruwasqankurayku mana trofeosta, medallasta japʼerqankuchu. Chaywanpis chay ruwasqankuta Jehová allinpaj qhawasqan may sumaj paykunapaj karqa. Jehovaqa toldoj imasninta ruwanankupaj kallpachakusqankuta rikorqa. Chayrayku paykuna jina llampʼu sonqos, sumaj llankʼajkunataj kana.