NOQAQA 1955 watapi Australiaj Queensland llajtanpi nacekorqani. Pisi tiemponman mamay Estelle, Jehovaj testigosninwan Bibliamanta yachakuyta qallarerqa, watanmantaj bautizakorqa. Tatay Ronqa 13 watasninmanraj bautizakorqa. Noqataj 1968 watapi Queenslandpi bautizakorqani.

Wawamantapacha librosta leey gustawaj, waj qallusta yachakuypis. Tatasniywan viajaspataj librosta leespa rej kani. Tatasneyqa llakikojsina kanku ñanpi kaj kʼachitu imasta mana qhawaspa risqaymanta. Leey mayta gustawasqanraykutaj colegiopipis allin riwarqa. Ashkha premiostataj japʼerqani, Glenorchy (Tasmania) llajtapi estudiashaspa.

Colegiopi kashajtillayraj, universidadman rinaypaj uj becata qoyta munawarqanku. Leey, yachakuy ima, mayta gustawasqanrayku ajllanay karqa chay becata japʼikuytachus manachus. Mamayman mayta agradecekuni waj imasmanta nisqaqa, Jehovata astawan munakuyta yachachiwasqanmanta (1 Cor. 3:18, 19). Tatasniyman nerqani colegiomanta llojsiytawan, precursor kanayta, paykunataj precursor kajta saqewarqanku. Chayrayku enero de 1971 watapi, 15 watasniyoj kashaspa precursor jina llankʼayta qallarerqani.

 Chaymanta qhepaman Tasmaniapi 8 watasta precursor karqani. Chaypitaj uj kʼachita sipaswan casarakorqani, sutikorqataj Jenny Alcock. Iskayniykutaj Smithton, Queenstown juchʼuy llajtitaspi tawa watata precursores especiales karqayku.

Kay 1978 watapi Port Moresby (Papúa Nueva Guinea) nisqaman viajarqayku ashkha suyuspaj jatun tantakuyman. Yuyarikunitaj chay tantakuypi uj misionero hiri motu qallupi umallirichisqanta. Imatachus nisqanta mana entiendespapis, misionero kayta munarqani. Ajinamanta misionero kaspa, waj qallusta yachakunayta, waj suyusmanta hermanostapis kallpachanayta yuyarqani. Repararqanitaj waj qallusta yachakuspa Jehovata sirviyta atisqayta.

Tasmaniaman kutisqaykutawan, Tuvalupi kaj Funafuti churupi misioneros kanaykupaj wajyariwarqayku. Chaytaqa mana suyasharqaykuchu. Enero de 1979 watapitaj chay churuman chayarqayku. Tuvalupeqa 3 hermanoslla karqa.

Tuvaluanota yachakuyta mana atillarqaykuchu, imaraykuchus chay qallupeqa Mosoj Testamentolla karqa, mana karqachu cursos nitaj diccionariospis. Chayrayku sapallaykumanta 10 chayri 20 palabrasta jina sapa pʼunchay yachakorqayku. Repararqaykutaj yachakushasqayku palabrasta mana allintachu entiendesqaykuta. Runasman layqa imaspi creey mana allinchu kasqanta ninaykumantaqa, balanzasta, tojnusta apaykachay mana allinchu kasqanta nisqayku. Bibliamanta ashkha runasman yachachishasqaykurayku, chay qalluta yachakunaykupaj kallpachakullarqaykupuni. Ashkha watas qhepaman yachakojkunamanta ujnenqa niwarqayku: “Mayta kusikuyku tuvaluanota sutʼita parlasqaykichejmanta, imaraykuchus ñaupajtaqa imatachus niyta munawasqaykuta mana entiendejchu kayku”, nispa.

Chay lugarpeqa alquilakunapaj mana wasis kajchu. Chayraykutaj tuvaluanota parlaj hermanoj wasinpi tiyakorqayku. Chaytaj chay qalluta usqhayllata yachakunaykupaj yanapawarqayku, imaraykuchus chay qallupi tukuy tiempo parlanayku karqa. Inglesta manaña parlasqaykuraykutaj, tuvaluanollataña parlarqayku.

Tuvalupeqa ashkha runas Bibliamanta yachakuyta munarqanku. Nitaj publicaciones chay parlaypi karqachu. ¿Imaynatá chay runas sapallankupi Bibliata ukhunchankuman karqa? ¿Imatataj tantakuykunapi takinkuman karqa? ¿Imaynatá tantakuykunapaj wakichikunkuman karqa? ¿Imaynatá bautismomanpis chayankuman karqa? Chay runasqa Diosmanta yachakunankupaj qallunkupi  publicacionesta necesitarqanku (1 Cor. 14:9). Tuvaluano qalluta 15.000 runas jinalla parlasqankurayku chay parlaypi publicaciones kanantachus manachus tapukoj kayku. Tiempo pasasqanmanqa Jehová tapuyniykuman kuticherqa. Rikucherqataj “mama qochaj karu kantusnimpi” tiyakojkuna paymanta yachakunankuta munasqanta, “llampʼu sonqoyoj runasta, pisi kapuyniyoj runastapis” yanapayta munasqanta ima (Jer. 31:10; Sof. 3:12).

Kay 1980 watapi sucursal niwarqayku tuvaluano qalluman publicacionesta tijrachinaykuta. Chayta ruwanaykupaj mana wakichisqachu kaspapis chay llankʼayta ruwarqayku (1 Cor. 1:28, 29). Qallariypeqa gobiernomanta thanta maquinata ranterqayku, tantakuypi ukhunchanapaj publicacionesta impriminaykupaj. Chay maquinallapitaj La Verdad que lleva a vida eterna nisqa librota tuvaluanopi imprimerqayku. Yuyarikullanipuni tintaj qʼapayninta, manchay qʼoñi kasqanrayku imprimiyta mana atillasqaykuta ima. Chay tiempopeqa luz mana kasqanrayku maquinasta makillawan funcionachina kaj.

Tuvaluanoman publicacionesta tijrachiyta mana atillajchu kayku, imaraykuchus chay qallupi mana kajchu libros, nitaj diccionariospis. Jinapis wakin kutisqa waj jinasmanta yanapata rikoj kayku. Uj paqarin willashaspa mana takanaykuchu karqa chay wasita takaykorqani, llojsimorqataj Jehovaj testigosninmanta ni imata yachayta munaj runa. Payqa profesor kasqa, niwarqataj: “Nerqaykichejña wasiyman mana jamunaykichejta. Uj imallata niyta munayki, tijrachishankichej chaykunaqa mana runas parlasqankuman jinachu kashan”, nispa. Waj runasta tapurejtiykutaj chay runa jinallataj niwarqayku, chayrayku entiendekunanpaj jina astawan allincharqayku. Mayta tʼukorqani Jehová chay runanejta yanapawasqaykumanta. Chay runaqa publicacionesninchejta leeyta yachaj.

Tuvaluano qallupi ñaupaj kaj publicacionqa Jesuspa Wañuyninta Yuyarinapaj tantakuyman  wajyarinapaj uj invitación karqa. Chaymanta qhepatataj ingleswan khuska Reinomanta Willaykuna 30 kaj tratado llojserqa. Runasman publicacionesta parlayninkupi jaywaspa kusisqas kasharqayku. Tiemponmantaj chay parlaypi ashkha folletos, libros ima llojsillarqataj. Kay 1983 watapitaj Australia sucursal Torremanta Qhawaj revistata tuvaluanopi imprimiyta qallarerqa. Chay revistaqa sapa kinsa killa 24 paginasniyoj llojsej. Runastaj chay revistasta leeyta mayta munaj kanku. Sapa kuti uj mosoj publicación llojsejtintaj chay lugarmanta radiopi willakoj, wakin kutistaj diantinta chayllamanta radiopi willakoj. *

¿Imaynatá publicacionesta tijrachej kayku? Ñaupajtaqa uj papelpi qhelqaj kayku. Chantá uj maquinapi qhelqaj kayku, mana pantasqa kananpajtaj qhawaykurej kayku. Imatapis pantasqata tarispataj, watejmanta maquinapi qhelqallajtaj kayku. Chaytataj allin kanankama ruwaj kayku, chaymantataj Australia sucursalman correonejta apachej kayku. Apachisqaykutataj sucursalpi iskay hermanas MEPS programayoj computadoraman qhelqaj kanku. Chay hermanasqa tuvaluanota mana parlaspapis, mana pantanankupaj sapa ujninku uj computadorapi qhelqaj kanku, chaymantataj qhelqasqankuta kikinchaj kanku. Sucursalmanta hermanostaj publicacionesta impriminapaj jina dibujostawan churaykuspa, avionpi apachimuwaj kayku. Noqaykutaj watejmanta qhawaykuytawan apachillajtaj kayku imprimikunanpaj.

Kay tiempopi publicacionesta tijrachej hermanosqa, niña noqayku jinachu uj correonejta tijrachisqankuta apachinanku tiyan. Imaraykuchus computadorapi tijrachinku, allinchanku ima. Chay lugarllapitaj uj hermano tijrachisqankuman imprimikunanpaj jinaña dibujosta churaykun. Chantá tijrachejkunaqa tijrachisqankuta impriminku chay sucursalesman Internetnejta apachinku.

Aswan qhepamantaj Jennyta noqatawan Pacífico nisqaj churusninman kachawarqayku. Kay 1985 watapitaj Samoa sucursalman kachawarqayku. Chaypitaj publicacionesta tuvaluanoman tijrachillarqaykupuni, chantá samoanoman, tonganoman, toquelaoman tijrachejkunata yanaparqayku. * Kay 1996 watapi Fiyi sucursalman kachawarqayku, chaypitaj fiyianoman, kiribatianoman, nauruanoman, rotumanoman, tuvaluanoman ima, publicaciones tijrachikunanpaj yanapakorqayku.

Mayta tʼukuchiwanku publicacionesta tijrachispa yanapakoj hermanos. Imaraykuchus paykunaqa publicacionesta tijrachispa kusikunku, chayta ruway mana atikullajtinpis, mayta saykʼuspapis. Chay cheqa sonqo hermanosqa Jehová jina munanku runas parlayninkupi sumaj willaykunata yachakunankuta (Apo. 14:6). Sutʼincharinapaj, Torremanta Qhawaj revista tonganopi tijrachikuyta qallarikushajtin, Tongapi kaj tukuynin ancianoswan tantakorqani, tapurerqanitaj pichus tijrachiypi  yanapakuyta atisqanta. Uj ancianotaj llankʼayninta saqenanta, qʼayantinpacha chay llankʼaypi yanapakunanta ima nerqa, mecánico kaspa sumajta ganaspapis. Chay hermanoqa mana yacharqachu familianta uywananpaj imaynatachus qolqeta ganakunanta, jinapis Jehovapi tukuy sonqo atienekorqa. Yanapakorqataj ashkha watasta publicacionesta tijrachispa. Jehovataj payta, familianta ima mana saqerparerqachu.

Diospa Llajtanta Kamachejkunapis, publicaciones tukuy qalluspi tijrachisqa kananta munanku, pisi runaslla uj qalluta parlajtinkupis. Uj kuti Diospa Llajtanta Kamachejkunata tapurerqayku, publicacionesta tuvaluanoman tijrachinallaykutapunichus manachus. Paykuna, uj cartanejta kutichimuwasqaykutaj mayta kallpachawarqa. Niwarqaykutaj: “Qhawasqaykuman jinaqa may allin kanman tuvaluano qalluman publicacionesta tijrachinallaykichejpuni. Chay qalluta pisi runaslla parlajtinkupis, chay runasqa Reinomanta willaykunata parlayninkupi yachakuyta necesitanku”, nispa.

Kay 2003 watapi warmiy Jennytawan Fiyi Betelmanta, Patterson (Nueva York) Betelman kachawarqayku. Chaypitaj Servicios de Traducción nisqapi yanapakorqayku. Chaytaj mayta kusichiwarqayku, imaraykuchus Servicios de Traducción nisqaqa ashkha qallusman publicaciones tijrachikunanpaj yanapan. Iskay watasta jina chaypi yanapakushaspataj ashkha suyusman publicacionesta tijrachejkunata yanapaj rerqayku.

Qallariypi uj tantakuypi kashasqaymanta parlarerqaykichej, chaymanta parlarinallapuni. Kay 2000 wata chaynejpi Diospa Llajtanta Kamachejkunaqa publicacionesta tijrachej hermanos sumajta tijrachinankupaj yanapata necesitasqankuta repararqanku. Ashkha tijrachejkuna mana ima cursostapis pasasqankuchu. Chayrayku Qhelqajkunapaj Comisionpi llankʼaj hermanoswan parlarisqaykumanta qhepaman, Diospa Llajtanta Kamachejkunaqa, tukuy tijrachejkuna inglesta astawan entiendenankupaj, imaynatachus uj chʼampayta allinchayta yachakunankupaj, imaynatachus wajkunawan llankʼayta yachakunankupaj ima, cursosta pasanankuta nerqanku.

Ajinata tijrachejkunata yanapakusqanrayku, publicacionesninchejqa sumaj tijrachisqas kashanku, aswan ashkha parlaykunapitaj kashan. Kay 1979 watapi misioneros jina llankʼayta qallarishajtiyku Torremanta Qhawaj revistaqa 82 qallusllapi kasharqa. Ashkha qalluspitaj chay revistaqa inglespi llojsimusqanmanta, ashkha killasninmanraj llojsimoj. Kunantaj chay revistaqa 240 qalluspiña kashan, ashkha qalluspitaj inglés revistawan khuska llojsin. Kunantaj publicacionesninchej 700 kuraj qalluspiña kashan. Chaytaj ñaupaj wataspi mana atikunanpaj jina karqa.

Kay 2004 watapi Diospa Llajtanta Kamachejkunaqa Traducción del Nuevo Mundo nisqa Biblia  ashkha qalluspi llojsinan may sumaj kasqanta nerqanku. Chayraykutaj ashkha runas Bibliata parlayninkupi leeyta atinku. Kay 2014 watapajtaj chay Bibliaqa tukuynin chayri wakillan 128 qalluspiña kasharqa, chay qallusmanta wakintataj Pacífico sur churuspi parlakun.

Kay 2011 watapi tuvaluano qallupi uj jatun tantakuy ruwakusqanmanta yuyarikullanipuni. Chay suyupeqa ashkha killasta mana parasqachu. Chayrayku hermanosqa chay kutipi jatun tantakuy mana ruwakunanta yuyarqanku. Chaywanpis kusikunapaj jina chayarqayku chay tarde maytapuni pararqa. Ajinamanta chay tantakoyqa ruwakullarqa. Noqapajqa may sumajpuni karqa Traducción del Nuevo Mundo de las Escrituras Griegas Cristianas nisqa Bibliata tuvaluano qallupi llojsisqanta willay. Chay jatun tantakuy tukukusqantawantaj watejmanta mayta parallarqataj. Ajinamanta tukuypis yakuta japʼikuyta aterqanku, jinallataj mosoj Bibliatapis.

Llakikunapaj jinataj warmiy Jennyqa mana chay tantakuypichu kasharqa, 2009 watapi wañupusqanrayku. Payqa 10 watatapuni cancerwan onqoykorqa, 35 watasta casarasqa karqayku. Kausarimuspaqa, maytachá kusikonqa tuvaluano qallupi Biblia llojsisqanmanta.

Jehovaqa may kʼachita warmita qollawantaj, sutenqa Loraini. Payqa, Jennywan Fiyi Betelpi llankʼarqa. Lorainiqa fiyiano qalluman publicacionesta tijrachispa llankʼaj. Ajinamanta may kʼacha warmita tarillanitaj, payqa noqawan khuska Jehovata tukuy sonqo sirvin, noqaman jinallataj waj qallusmanta yachay mayta gustan.

Tiempo pasasqanman jina rikuni Jehová runasman qallunkupi cheqa yachachiyta qosqanta, pisi runaslla chay qalluta parlajtinkupis (Sal. 49:1-3). Chantapis rikullanitaj hermanosninchej publicacionesta parlayninkupi japʼispa, parlayninkupi Jehovaman takispa ima kusikusqankuta. Chay kutispitaj Jehová mayta munakuwasqanchejpi tʼukurini (Hech. 2:8, 11). Tuvalumanta machitu hermanonchej Saulo Teasi imatachus niwasqanta yuyarikullanipuni, payqa ñaupaj kutirayku tuvaluanopi Jehovaman takiytawan, niwarqa: “Diospa Llajtanta Kamachejkunaman ninki, kay takiykunaqa tuvaluanopi aswan kʼachitu kasqanta, inglesmanta nisqaqa”, nispa.

Septiembre de 2005 watapi mana suyashajtillay Diospa Llajtanta Kamachejkunamanta ujnin kanayta niwarqanku. Manaña publicacionesta tijrachispapis, Jehovaman mayta agradecekuni publicaciones pachantinpi tijrachikunanpaj yanapakojta saqellawasqanmantapuni. Mayta kusikuni Jehová llajtanman imatachus necesitasqanta qosqanta rikuspa, kamachisninmanta wakin océano Pacífico nisqaj churitusninpi tiyakojtinkupis. Salmo librota qhelqaj nerqa: “Tukuy kay pacha kusikuchun. Mama qocha chawpipi churuspis kusikuchunku. Tata Diosqa Reymin”, nispa (Sal. 97:1).