1. 1) ¿Imatá ruwanapajtaj 1 Juan 3:1 versículo yanapawanchej? 2) ¿Imaraykutaj Jehová mayta munakuwasqanchejpi yuyana?

APÓSTOL Juan nerqa: “Reparaychej may jinatapunichus Dios [...] munakuwasqanchejta”, nispa (1 Juan 3:1). Kaywantaj Juanqa Jehová mayta munakuwasqanchejpi, imaynatachus chay munakuyninta rikuchiwasqanchejpi ima yuyanapaj yanapawarqanchej. Chaypi yuyasunchej chayqa, Jehovawan may sumaj amigos kasunchej, astawantaj payta munakusunchej.

2. ¿Imaraykutaj wakin runas Dios munakuwasqanchejta mana creeyta atillankuchu?

² Llakikunapaj jina wakin runasqa mana creenkuchu Dios munakuwasqanchejta. Yuyankutaj noqanchejmanta mana dakusqanta, kamachiykunallata churasqanta, mana kasukojkunatataj castigasqanta ima. Wakin religionesqa Diosninchej sajra kasqanta yachachinku. Chayraykutaj ashkha runas Diosta mana munakuyta atisqankuta yuyanku. Wakin runastajrí allin kajta, mana allin kajta ruwajtinchejpis Dios munakunallawanchejtapuni yuyanku. Noqanchejtajrí Bibliata ukhunchaspa  Diospa kʼacha kaykunasninmanta munakuynin aswan ñaupajpi kashasqanta, Jehová mayta munakuwasqanchejrayku wawanta noqanchejrayku wañunanpaj kachamusqanmanta ima yachakunchej (Juan 3:16; 1 Juan 4:8). Chayta yachaspapis imayna uywasqaschus kasqanchej chayri kausayninchejpi llakiykunapi rikukusqanchej Jehová munakuwasqanchejmanta iskayrayachiwasunman.

3. ¿Imaraykutaj Jehová mayta munakuwasqanchejta ninchej?

³ ¿Imaraykutaj Jehová mayta munakuwasqanchejta ninchej? Imaraykuchus pay ruwawarqanchej, kausayta ima qowarqanchej (Salmo 100:3-5 leey). Chayrayku Bibliaqa Adán “Diospa churin” kasqanta nin (Luc. 3:38). Chantapis Jesús yachachiwarqanchej Jehová tatanchej kasqanta (Mat. 6:9). Chayrayku imaynatachus uj kʼacha tata wawasninta munakun ajinallatataj Jehovapis munakuwanchej.

4. 1) ¿Imayna tatataj Jehová? 2) ¿Imatataj kay yachaqanapi, qhepan yachaqanapi ima yachakusunchej?

⁴ Wakin runastaqa wawas kashajtinku tatasninku mayta ñakʼaricherqanku. Chayrayku ichapis mana yuyayta atillankuchu uj tata munakuyniyoj kasqanta. Chaywanpis Jehovaqa mana ni jaykʼaj ñakʼarichiwasunmanchu. Nitaj pipis pay jina sumaj tataqa kanchu (Sal. 27:10). Payqa mayta munakuwanchej, tukuy imaymanamantataj jarkʼawanchej. Munakuyninta astawan rikusunchej chayqa, astawan payta munakusunchej (Sant. 4:8). Kay yachaqanapeqa imaynatachus Jehová munakuyninta tawanejmanta rikuchiwasqanchejta yachakusunchej. Qhepan yachaqanapitaj imaynatachus munakuyninchejta tawanejmanta rikuchiyta atisqanchejta yachakusunchej.

5. ¿Imatataj Jehová tukuyman qowanchej?

⁵ Apóstol Pabloqa Atenas llajtapi kashaspa, chay llajta lantismanta juntʼa kashasqanta rikorqa. Rikullarqataj runaspis diosesninku paykunaman kausayta qosqanpi creesqankuta. Chayrayku Pabloqa Jehová “kay pachata, tukuy imasnintawan” ruwasqanta nerqa. Chantapis nillarqataj: “Tukuyman kawsayta qon, samayta, tukuy imastawan [...] Diospi kawsanchej, kuyurinchej, kanchejtaj”, nispa (Hech. 17:24, 25, 28). Jehovaqa munakuwasqanchejrayku tukuy ima necesitasqanchejta kusisqa kausakunanchejpaj qowanchej. Kunantaj imastachus munakuwasqanchejrayku qowasqanchejta qhawarina.

6. ¿Imayna ruwasqataj kay Jallpʼanchej kashan? (18 paginapi dibujota qhawariy.)

⁶ Sutʼincharinapaj Jehovaqa kay Jallpʼata uj kʼachitu wasita jina tiyakunanchejpaj ruwapuwarqanchej (Sal. 115:15, 16). Tukuy planetasta ruwasqanmantataj Jallpʼallanchej kausakunanchejpaj jina. Yachayniyoj runasqa ashkha planetasta tarinku, chaywanpis mana tarinkuchu kausay kananpaj jina uj planetata. Jehovaqa kay Jallpʼata ruwarqa kausakunapaj jina tukuy imayojta, chantapis kʼachitu kananpaj, kusisqa kausakunanchejpaj ima (Isa. 45:18). Kay Jallpʼanchejta imaynatachus Jehová ruwasqanpi tʼukurispaqa, cheqamantapuni mayta munakuwasqanchejta rikunchej (Job 38:4, 7; Salmo 8:3-5 leey).

7. ¿Imaynamanta Jehová munakuwasqanchejta rikuchillawanchejtaj?

⁷ Jehovaqa pay jina kʼacha kaykunata rikuchinapaj ruwawarqanchej, ajinamantataj munakuwasqanchejta rikuchillawanchejtaj (Gén. 1:27). Chayrayku munakuwasqanchejta rikunchej, noqanchejpis payta  munakuyta atinchej. Jehovaqa yachan munakuwasqanchej kusichiwasqanchejta, imaraykuchus wawasqa kusisqa kanku tatasninku munakojtinku. Chantapis Jesús yachachiwarqanchej Jehovaj qayllanpi kaspalla kusisqa kananchejta (Mat. 5:3). Biblia nin: “[Jehová] tukuy imata qowanchej mana michʼakuspa chay imaswan kusisqa kawsananchejpaj”, nispa (1 Tim. 6:17). Sutʼita rikunchej Jehová khuyakuyniyoj, munakuyniyoj ima kasqanta (Sal. 145:16).

8. ¿Imaraykutaj Jehová yachachinawanchejta munanchej?

⁸ Tatasqa wawasninkuta munakunku, kusisqas kausakunankupajtaj yanapayta munanku. Chaywanpis wakin tatasqa chayta mana ruwayta atinkuchu, Jehovaj kamachiykunasninta pʼakisqankurayku. Chayraykutaj wawasninkuman mana yachachiyta atillankuchu imachus allin, imatajchus mana allin kasqanta reparayta. Chaytaj wawasta ñakʼarichinman (Pro. 14:12). Jehová Diostajrí, cheqa Dios kasqanrayku wawasninta kusisqas kausakunankupaj imaynatachus yanapayta yachan (Sal. 31:5). Chayrayku kausayninchejpi yanapayta munawanchej, imaynatachus yupaychananchejtapis yachachiwanchej (Salmo 43:3 leey). ¿Imastataj yachachiwanchej? ¿Imaraykutaj chay yachachiwasqanchej munakuwasqanchejta rikuchillantaj? Chayta qhawarinachej.

9, 10. 1) ¿Imatataj Jehová munakuwasqanchejrayku paymanta willawanchej? 2) ¿Imatataj Jehová munakuwasqanchejrayku noqanchejmanta willawanchej?

⁹ Jehovaqa pichus pay kasqanta yachachiwanchej. Sutʼincharinapaj, imachus sutin kasqanta willawanchej. Arí, sutenqa Bibliapi ni mayqen suti jina ashkha kutista rikhurin. Chantapis kʼacha kaykunasninta rejsichiwanchej. Tukuy imata ruwasqantaj may atiyniyoj, may yachayniyoj kasqanta ima rikuchiwanchej, Bibliataj cheqan kayniyoj, munakuyniyoj kasqanta rikuchillawanchejtaj (Rom. 1:20). Jehovaqa may yachayniyoj, may atiyniyoj kaspapis, cheqan Dios, munakuyniyojtaj, chaytaj payman qayllaykunapaj yanapawanchej (Sant. 4:8).

¹⁰ Chantapis Jehovaqa familianmanta kasqanchejta willawanchej. Munantaj familianwan khuska ujchasqa payta sirvinanchejta. Biblianejtataj mana sapallanchejmanta imachus allin, imatajchus mana allin kasqanta ajllanapajchu ruwasqa kasqanchejta sutʼinchawanchej (Jer. 10:23). Diosninchej Jehovaqa imachus noqanchejpaj allin kasqanta yachan. Chayrayku payta kasukojtillanchej, payta jatunpaj qhawajtillanchej, kusisqa, sonqo tiyasqas ima kausakusunchej. Tukuy kaytataj mayta munakuwasqanchejrayku willawanchej.

11. ¿Imatataj Jehová qhepaman qonawanchejta niwanchej?

¹¹ Uj kʼacha tataqa, wawasninpa kausaynin imaynachus qhepaman kananmanta llakikun, munantaj kusisqas kausakunankuta. Chaywanpis kay tiempopi ashkha runasqa mana yachankuchu imaynachus kausayninku qhepaman kananta. Qhasillata kallpankuta tukuchinku kapuyniyoj kanankupaj llankʼaspa, imajtinchus chay kapuyninkoqa mana wiñaypajchu kanqa (Sal. 90:10). Chaywanpis noqanchejqa Jehovaman mayta agradecekunchej kay tiempopi kusisqa kausakunapaj yachachiwasqanchejmanta, qhepaman sumaj kausayta qonawanchejmanta ima.

12. ¿Imaynatá Jehová rikucherqa Cainta, Baructa ima yanapayta munasqanta?

¹² Jehovaqa Caín sajra imasta ruwayta munashajtin, yanapayta munarqa. Chayrayku  phiñakuyninwan mana atipachikunanta, yuyayninta cheqanchananta, kasukojtintaj bendecinanta ima nerqa (Gén. 4:6, 7). Chaywanpis Cainqa Diosta mana kasukusqanrayku mayta ñakʼarerqa (Gén. 4:11-13). Waj kutipitaj Jehovaqa Baructa repararqa waj imaspi yuyasqanrayku may llakisqa, may saykʼusqa ima kashasqanta. Chayrayku Barucman yuyayninta cheqanchananta nerqa. Baructaj Jehovaj yuyaychasqanta kasukorqa, chaytaj kausayninta salvananpaj yanaparqa (Jer. 45:1-5).

13. ¿Imastataj ñaupa tiempomanta Jehovaj kamachisnin yachakorqanku llakiykunapi rikukuspa?

¹³ Apóstol Pabloqa Jehová “pitachá munakun, chayta castigan wanachinampaj. Pitachá wawampaj rejsikapun, chayta seqʼon”, nispa nerqa (Heb. 12:5, 6). Arí, Diosninchejqa necesitashajtinchejpuni kʼamiwanchej, wakin kutistaj sumaj runas kananchejpaj yachachiwanchej. Bibliaqa, Diospa kamachisnin José, Moisés, David ima llakiykunapi rikukusqankuta nin. Chantapis imaynatachus Jehová yanapasqanta nillantaj. Jehová paykunaman jatuchaj ruwaykunata qojtin, llakiykunapi sumaj imasta yachakusqanku yanaparqa chay ruwayta juntʼanankupaj. Paykunaj kausayninkumanta, Diospa waj kamachisninpa kausayninkumanta ima yachakusqanchejqa, cheqamantapuni Jehová munakuwasqanchejta reparanapaj yanapawanchej (Proverbios 3:11, 12 leey).

14. ¿Imaynatataj Jehová pantajtinchej munakuyninta rikuchiwanchej?

¹⁴ Jehovaqa imapi pantajtinchejpis munakuyninta rikuchillawanchejpuni. Payqa kʼamiwasqanchejta japʼikojtinchej, pantasqanchejmanta pesachikojtinchej ima juchanchejta “kantumanta pampachan[anta]” niwanchej (Isa. 55:7). Rey Davidpis Jehovamanta nerqa: “Paymin tukuy sajra  ruwasqasniymanta perdonawan, tukuy onqoymantapis pay sanoyachiwan. Payqa librawan wañuyman yaykunaymanta; payqa pilluwan jina pilluchiwan munakuyninwan, khuyakuyninwan ima”, nispa (Sal. 103:3, 4, 12). Rikunchej jina Jehovaqa perdonanawanchejpaj wakichisqa kashan. Chaywanpis noqanchejqa yachachiwasqanchejta, kʼamiwasqanchejta ima japʼikunanchej tiyan, kausayninchejtapis chayman jina allinchananchej tiyan. Yuyarinataj Jehovaqa kʼamiwanchej munakuwasqanchejrayku (Sal. 30:5).

15. ¿Imatataj Jehová munakuwasqanchejta rikuchinawanchejpaj ruwan? Sutʼinchay.

¹⁵ Uj kʼacha tataqa ima llakiymantapis wawasninta jarkʼan. Jehovapis ajinallatataj noqanchejta jarkʼawanchej. Uj salmista Jehovamanta kayta nin: “Tata Diosqa paypaj tʼaqasqa kajkunaj kawsayninkuta waqaychan; sajra runaspa makisninman urmanankumantapis waqaychan”, nispa (Sal. 97:10). Kaypi tʼukuriy. Ñawisninchejtaqa imallamantapis usqhayllata jarkʼanchej, ¿icharí? Ajinallatataj Jehovapis imallamantapis usqhayllata jarkʼawanchej. Chaytataj munakuwasqanchejrayku ruwan (Zacarías 2:8 leey).

16, 17. ¿Imaynatataj Jehová kamachisninta jarkʼan?

¹⁶ Jehovaqa angelesnejta kamachisninta jarkʼan (Sal. 91:11). Sutʼincharinapaj, uj angellla Diospa llajtanta salvananpaj uj chʼisillapi 185.000 soldadosta wañucherqa (2 Rey. 19:35). Ñaupa cristianospa tiemponkupipis Pedrota, Pablota, wajkunata ima carcelmanta orqhomorqanku (Hech. 5:18-20; 12:6-11). Kunallanraj Africaj ujnin suyunpi uj guerra karqa. Chay suyoqa wañuchinakuymanta, violacionesmanta, suwasmanta ima juntʼa kasharqa. Chay suyupi ni mayqen hermanosninchej wañojtinkupis paykunamanta ashkhas ni imayoj qhepakorqanku. Repararqankutaj chay kutispi Jehová paykunata jarkʼashasqanta. Mayta ñakʼarispapis chay hermanosqa kusisqas kasharqanku. Chantá Jehovaj testigosninpa centralninkumanta uj hermano waturej rerqa, imaynachus kashasqankuta tapurejtintaj, chay hermanosqa Jehovaj yanapayninwan tukuy imapis allillan kashasqanta nerqanku.

¹⁷ Jehovaqa Estebanta jina, wakin cheqa sonqo kamachisninta enemigosninku wañuchinankuta saqen. Jinapis llajtanta Satanaspa tojllasninmanta jarkʼan, chayrayku llajtanman willan Satanás imaymana tojllasta churasqanta (Efe. 6:10-12). Sutʼincharinapaj, Jehovaqa Biblianejta, publicacionesnejta ima willawanchej, qolqeta munapayay, sonqota kusirichinapaj khuchichakuykunata, maqanakuykunata qhaway, Internetpi sajra imasta qhaway ima, mana allinchu kasqanta. Sutʼita rikunchej Jehová uj kʼacha Tata jina munakuwasqanchejta, jarkʼayta munawasqanchejta ima.

18. ¿Imaynataj sientekunki Jehová munakususqanta yachaspa?

¹⁸ Moisesqa mashkha watatachus Jehovata sirvisqanpi tʼukurispa, Jehová mayta munakusqanta rikorqa. Chayrayku nerqa: “Tutamanta munakuyniykiwan sajsachiwayku, noqaykutaj kusisqa takisqayku tukuy kawsayniykupi”, nispa (Sal. 90:14). Imatachus apóstol Juan nisqanta yuyarina, pay nerqa: “Reparaychej may jinatapunichus Dios [...] munakuwasqanchejta”, nispa (1 Juan 3:1). Jehová munakuwasqanchejta yachaspa mayta kusikunchej, ¿icharí?