ISKAY pachaj pasaj wataspi runasqa periodicospi willakusqanta mana tukuynintachu japʼikoj kanku. Kunanpis kikillantaj, chayrayku mana tukuy imata Internetpi willakusqanta japʼikunchejchu. Kay tiempopi mosoj imasta runas rikhurichisqankupeqa tukuy imata leeyta atinchej. Nisunman cheqa willaykunata, mana cheqa willaykunata ima, chayrayku sumajta qhawarikuna. Astawanraj kunallanraj Internetta apaykachayta yachakushanchej chayqa, imaraykuchus yuyasunman ima willaypis cheqapuni kasqanta, amigonchej apachimuwasqanchejrayku chayri Internetpi rikhurisqanrayku. Ichapis imaschus mana cheqachu kanku chaykunatapis cheqapis kanman jina japʼikusunman. Chayrayku Biblia nin: “Uj wampu runaqa pejpa nisqantapis japʼikullan; yuyayniyoj runarí allintaraj qhawakun maynintachus rinanta”, nispa (Pro. 14:15).

Uj wampu runaqa tukuy ima nisqankuta japʼikun, yuyayniyoj runarí imatachus nisqanku cheqa kajtillan japʼikun. Internetpi willaykunaqa mana tukuyninpunichu cheqa kanku. Chayrayku mana chʼaukiyachikunapaj tapurikuna: “¿Maypitaj chayta leerqani? ¿Atienekunapaj jina paginapichu leerqani? Chayrí, ¿pipis munasqankuta qhelqanku chay paginaspichu? ¿Yachakunchu pikunachus chay willayta qhelqasqankuta? Atienekunapaj jina página, ¿chay willay mana cheqachu kasqanta rikuchinchu?”, nispa. * Sumaj ‘yuyayniyoj kananchejʼ tiyan (Pro. 22:3). Ima leesqanchejpis mana creeyta atinapaj jina chayqa, ichapis chay willay mana cheqachu kashan. Uj willaypi wajpa contranpi parlakun chayqa kayta tapurikuna: “¿Pikunataj kay willayta tukuy yachanankuta munashankuman? ¿Imaraykutaj chayta munankuman?”, nispa.

Wakin runasqa ima willaytapis apachimojtinku, chay rato amigosninkuman apachillankutaj. Chaytataj ruwanku chay willay cheqachus manachus kasqanta mana yachaspa, ima llakiytachus apamunanta mana yachaspa ima. Ichapis chayta  ruwanku wajkunawan allinpaj qhawachikuyta munaspalla (2 Sam. 13:28-33). Chaywanpis sumaj yuyayniyoj runas kananchej tiyan. Imaraykuchus mana pitapis, nitaj ima organizaciontapis sajrapaj qhawachiyta munanchejchu.

¿Imaraykutaj wakin runas apachimusqanku mensajesta apachillankutaj cheqachus manachus kasqanta mana yachaspalla? Imaraykuchus tiemponkuta mana churayta munankuchu cheqachus manachus kasqanta qhawanankupaj. Ichapis ninku: “Kay mensajeta leeyta munaspaqa amigosniy chayta qhawallanqanku”, nispa. Chaywanpis ichapis amigosninkoqa manallataj tiempoyojchu kankuman chayta ruwanankupaj (Efe. 5:15, 16). Apachimususqanku mensajeta wajkunaman apachiytachus manachus mana yachankichu chayqa, aswan allin kanman mana apachinayki.

Allin kanman tapurikuna: “¿Apachimuwasqanku mensajesta wajkunaman apachiyman yachasqachu kani? ¿Maykʼajllapis perdonta mañakorqaniñachu pillamantapis pantasqa mensajeta apachisqaymanta? ¿Pillapis niwarqañachu apachimuwasqanku mensajeta manaña apachinayta?”, nispa. Amigosninchej Internetman yaykuyta atinku chayqa, paykuna munasqanku imasta maskʼayta atinku. Mana necesitankuchu asikunapaj jina cuentosta, videosta, fotosta apachinata. Nillataj allinchu umallirichiykunamanta grabacionesta, qhelqasqasta ima apachinanchej. * Imaraykuchus Bibliamanta astawan yachakunapajqa, aswan sumaj sapa ujninchej Bibliata ukhunchana, Bibliaj versiculosninta maskʼana, tantakuykunapi kutichinapaj wakichikuna ima.

Jehovaj testigosninmanta Internetpi llulla imasta willakojtin, ¿imatá ruwana tiyan? Ama leenachu, nitaj chay willayta japʼikunachu. Nillataj wajkunaman apachinachu, imaraykuchus chayta ruwaspaqa llulla imasta wajkunaman willashasunman. Imatachus Internetpi leesqanchej llakichishawanchej chayqa, Jehovamanta yachayta mañakuna, wiñay tukusqa hermanowantaj parlarina (Sant. 1:5, 6; Judas 22, 23). Llulla imasta noqanchejmanta parlasqankoqa mana tʼukuchinawanchejchu tiyan, imaraykuchus Jesusmantapis llulla imasta parlaj kanku. Payqa, yachachisqasnin qhatiykachasqas kanankuta, tukuy imatataj llullakuspa contrankupi rimanankuta ima nerqa (Mat. 5:11; 11:19; Juan 10:19-21). Sumaj yuyayniyoj kasun  chayqa, reparasunchej pichus noqanchejmanta llulla imasta parlashasqanta chayri chʼaukiyayta munashawasqanchejta (Pro. 2:10-16).

Sumajta qhawarikunanchej tiyan imatachus hermanosninchejmanta willawasqanchejta niraj wajkunaman willashaspa. Chay willawasqanchej cheqa kajtinpis, mana allinchu kanman wajkunaman willana (Mat. 7:12). Sutʼincharinapaj, uj hermanoj kausayninman satʼikuspa, chaymantataj wajkunaman willayqa, mana munakuyniyoj kasqanchejta rikuchinman, nitaj pitapis kallpachanmanchu (2 Tes. 3:11; 1 Tim. 5:13). Wakin willaykunaqa cheqa kajtinpis, ichá mana wajkunaman willanapajchu. Astawanpis sapa uj ajllayta atinchej kausayninchejmanta maykʼajchus, pikunamanchus ima willayta. Chaytataj jatunpaj qhawana. Ñaupajmantaña wajkunaman willasunchej chayqa, pisipaj qhawasqanchejta rikuchishasunman, sonqontapis nanachisunman.

Kay pʼunchaykunapeqa ima willayllapis usqhayllata yachakun. Chay willaykunamanta wakenqa cheqa kanman, wakintaj mana. Ama qonqaychu uj runallaman mensajeta apachejtiyki, paypis uj ratollapi ashkha runasman chay mensajeta apachiyta atillasqantataj. Chayrayku mana allinchu apachimuwasqanchej mensajesta amigosninchejman apachinanchej. Biblia munakuyniyoj runa tukuy imata creen nejtinpis, sumaj yuyayniyoj kananchej tiyan, nitaj tukuy apachimuwasqanchej mensajes cheqa kasqanta yuyanachu (1 Cor. 13:7). Chantapis mana creenachu Jehovaj testigosninmanta, hermanosninchejmanta ima, llulla imasta wajkuna nejtinku. Yuyarikunachej llulla imasta juntʼachejkunaqa Satanás jina ruwashasqankuta. Satanasqa “llullakuypa” tatan (Juan 8:44). Chayrayku sumajta qhawarikuna, ima mensajestachus sapa pʼunchay japʼisqanchejta. Biblia nin: “Mana yuyayniyojkunaj herenciankoqa wampu kaymin; yuyayniyojkunarí yachaywan pilluchasqa kanqanku”, nispa (Pro. 14:18).