1, 2. ¿Imaraykutaj mana animales jinachu kanchej?

RUNASQA mana animales jinachu kanchej. Imaraykuchus parlayta, qhelqayta, leeyta, wajkuna imatachus niwasqanchejtapis entiendeyta atinchej. Chantapis Diosmanta mañakuyta, payta takispa jatunchayta ima atillanchejtaj. Cientificosqa mana entiendenkurajchu imaynatachus ñojtunchej chay imasta ruwasqanta.

² Runasqa animalesmanta nisqa, waj imastawan ruwayta atinchej (Sal. 139:14; Apo. 4:11). Jehová payman rijchʼakojta ruwawasqanchejrayku imatapis munasqanchejman jina ajllajta saqewanchej (Gén. 1:27). Chayrayku parlayninchejwan Jehovata jatunchayta, sirviyta ima ajllayta atinchej.

3. ¿Imatataj Jehová qowanchej allinta ajllayta yachanapaj?

³ Jehovaqa, payta imaynatachus jatunchayta, sirviyta ima yachananchejpaj Bibliata qowanchej. Kay tiempopi Bibliaqa 2.800 parlaykunamanta astawanña tiyan tukuynin chayri wakin librosnillan. Bibliata leespa, leesqanchejpi tʼukurispa imaqa, Jehová Diosninchej jina yuyayta  yachakunchej (Sal. 40:5; 92:5; 139:17). Jehová jina yuyasunchej chayqa, allinta ajllayta yachasun, wiñaypajtaj kausakusun (2 Timoteo 3:14-17 leey).

4. 1) ¿Ima niyta munan tʼukuriy? 2) ¿Ima tapuykunamantaj kay yachaqanapi kutichisun?

⁴ Tʼukureyqa imatachus ruwashanchej chaypi yuyayninchejta churay niyta munan (Sal. 77:12; Pro. 24:1, 2). Chantapis Jehovamanta, Jesusmanta yachakusqanchejpi tʼukurinapaj tiempochakunanchejpuni tiyan (Juan 17:3). Kay yachaqanapitaj kay tapuykunaman kutichisun: ¿Imataj tʼukurinapaj yanapawasunman? ¿Imaspitaj tʼukurisunman? ¿Imatataj ruwasunman sapa kuti tʼukurinapaj, chaywantaj kusisqa kanapaj?

5, 6. ¿Imataj leesqanchejta yuyarinapaj, astawan entiendenapajtaj yanapawasun?

⁵ Runasqa samashaspa, chakipi chayri bicicletapi purishaspa waj imaspi tʼukuriyta yachanchej. Llakikunapaj jinataj wakin kuti imata leeshaspapis jinallataj kanman. Mana ajina kananpaj, ¿imatataj ruwasunman? Leeshaspaqa mana waj imaspi yuyanachu, manaqa leeshasqanchej imatachus niyta munashasqanpi tʼukurinanchej tiyan. Uj parrafota chayri uj subtitulota leeyta tukuytawan tapurikusunman: “¿Imatá kay leesqaymanta yachakuni? ¿Allintachu entiendeni?”, nispa.

⁶ Ñawillanchejwan leenamantaqa, chhichispa jina leenanchej tiyan. Científicos nisqankuman jina, ajinata leeyqa imatachus leesqanchejta astawan yuyarikunapaj yanapawanchej. Chaytataj Jehová Diosqa ruwawasqanchejrayku yachan. Chayrayku Josueman, Leymanta librota “unancha[nanta]” chayri chhichispa jina leenanta kamacherqa (Josué 1:8 leey). Bibliata ajinata leeyqa, mana waj imaspi yuyanapaj, leesqanchejtataj yuyarikunapaj yanapawasun.

7. ¿Maykʼajtaj tʼukurinanchej allin kanman? (23 paginapi dibujota qhawariy.)

⁷ Wakin kutisqa imatachus ukhunchashasqanchejpi tʼukuriyta mana atillanchejchu saykʼusqa chayri ancha chʼajwa kasqanrayku. Chayrayku allin kanman tʼukurinanchej samarishaspa, chʼinnejpi kashaspa ima. Rey Davidpis chʼisisnin camanpi kashaspa tʼukurerqa (Sal. 63:6). Jesuspis tʼukurinanpaj, Jehová Diosmanta mañakunanpaj ima chʼin lugaresman rerqa (Luc. 6:12).

8. 1) ¿Imaspitaj tʼukurisunman? 2) ¿Imaynataj Jehová sientekun paymanta wajkunaman willarejtinchej?

⁸ Bibliaj nisqanpi tʼukurispapis, waj imaspipis tʼukurillasunmantaj. Sutʼincharinapaj, Jehová Diospa ruwasqasninta qhawarispa tapurikusunman: “¿Imatataj Jehovamanta kay yachachiwan?”, nispa. Chayta ruwayqa, Jehovaman mañakuynejta agradecekunapaj tanqawasun. Waj runaswan kashaspataj imaynachus kashasqanchejmanta willarisunman (Sal. 104:24; Hech. 14:17). Jehovaqa qhawamushawanchej, paypi tʼukurejtinchej, paymanta mañakojtinchej, waj runasman paymanta willarejtinchejtaj mayta kusikun. Biblia nin: “Tata Diospa ñawpaqempi uj libro qhelqakorqa, payta manchachikojkuna, paypa sutinta jatunchajkunataj chay libroman jina yuyarisqa kanankupaj”, nispa (Mal. 3:16).

9. 1) ¿Imatataj Pablo Timoteoman nerqa? 2) Willayman rinapaj chayri Bibliamanta yachachinapaj wakichikushaspa, ¿imaspitaj tʼukurisunman?

 ⁹ Apóstol Pabloqa Timoteoman nerqa, imatachus nisqan, ruwasqan, yachachisqan ima, imaynatachus wajkunata yanapasqanpi tʼukurinanta (1 Timoteo 4:12-16 leey). Noqanchejpis chaykunapi tʼukurillasunmantaj. Sutʼincharinapaj Bibliamanta yachachinapaj wakichikushaspaqa, tiempochakunanchej tiyan tʼukurinapaj. Ichá uj tapuypi chayri Bibliamanta yachakoj Diospa amigon kananpaj imachus yanapananpi ima tʼukurisunman. Chaypi tʼukureyqa creeyninchej aswan sinchʼi kananpaj, sonqo kʼajaywan yachachinapajtaj yanapawasun. Chantapis tʼukurillasunmantaj niraj willayman rishaspa (Esdras 7:10 leey). Ichá Hechos libroj mayqen capitulollantapis leerisunman chayri runaspaj ima versiculostachus leerinanchejpi chayri ima publicacionestachus saqenanchejpi tʼukurisunman. Chayta ruwayqa astawan sonqo kʼajaywan willamunapaj yanapallawasuntaj (2 Tim. 1:6). Chantapis maypichus willanchej chaypi tiyakoj runas, imamantachus yachakuyta munasqankupi, yachakunankupaj jinataj imastachus niyta atisqanchejpi ima tʼukurisunman. Ajinamantataj Bibliawan aswan sumajta willayta yachakusun (1 Cor. 2:4, 5).

10. ¿Imaspiwantaj tʼukurisunman?

¹⁰ ¿Imaspitaj tʼukurillasunmantaj? Tantakuykunapi chayri jatun tantakuykunapi qhelqakuyta yachanchej chayqa, chay qhelqakusqanchejta qhawaykurinapaj tiempochakusunman. Tapurikunataj:  “¿Imatataj Bibliapi leesqaymanta, Diospa llajtanmanta ima yachakuni?”, nispa. Chantapis Torremanta Qhawaj, ¡Despertad! revistasta, jatun tantakuykunapi llojsej publicacionesta ima leesqanchejpi tʼukurisunman. Chayri Anuario nisqa libropi uj hermanoj kausayninmanta leerispa tiempochakuna chay leesqanchejpi tʼukurinapaj, ajinamanta chay leesqanchej sonqonchejman chayanqa. Chantapis publicacionesta leeshaspaqa wakin palabrasta rayasunman chayri kantitusninpi qhelqasunman. Chaytaj yanapawasunman umallirichiykunata wakichikunapaj chayri uj hermanota kallpacharej rinapaj chayri Bibliamanta yachakojman kutinapaj. Imatachus leesqanchejpi tʼukurinapaj tiempochakusunchej chayqa, leesqanchej sonqonchejman chayanqa, chantapis Jehová Diosman mañakuynejta agradecekusun allin imasta yachakusqanchejmanta.

11. ¿Imapitaj astawan tʼukurinanchej tiyan, imaraykutaj? (Sutʼinchayninta qhawariy.)

¹¹ Diospa Palabranpi tʼukureyqa imamantapis aswan sumaj. Jinapis uj pʼunchay, ¿manaña Bibliayoj kajtinchejrí? * Bibliata qhechuwajtinchejpis, Bibliaj textosninta chayri Jehovaman takiykunata yuyayninchejpi japʼisqanchejtaqa, ni pi qhechuwasunchu (Hech. 16:25). Jehovaqa espíritu santonwan yanapawasunchej imatachus yachakusqanchejta yuyarinapaj, payman cheqa sonqollapuni kanapaj ima (Juan 14:26).

12. ¿Imatataj sapa pʼunchay Bibliata leenapaj ruwasunman?

¹² ¿Imatataj sapa pʼunchay Bibliata leenapaj ruwasunman? Ichá wakin pʼunchaykunaqa sapa semana Diosmanta Parlayta Yachanapaj tantakuypi Bibliata leenapaj wakichikusqanta leerisunman. Chay leesqanchejpi tʼukurinapajtaj tiempochakusunman. Waj pʼunchaytaj Mateo, Marcos, Lucas, Juan evangeliosta leerisunman, chantá imatachus Jesús ruwasqanpi, yachachisqanpitaj tʼukurisunman (Rom. 10:17; Heb. 12:2; 1 Ped. 2:21). Leesqanchejta sumajta japʼeqanapajtaj Jesús imatachus Jallpʼapi kashaspa ruwasqanmanta sutʼinchaj publicacioneswan yanapachikusunman (Juan 14:6).

13, 14. 1) ¿Imaraykutaj Jehová Diospi, Jesuspi ima tʼukurinanchejpuni tiyan? 2) Jehovapi, Jesuspi ima tʼukuriy, ¿imata ruwanapajtaj yanapawasun?

¹³ Jehová Diospi, Jesuspi ima tʼukureyqa wiñay tukusqa cristianos kanapaj, sinchʼi creeyniyoj kanapaj ima yanapawasun (Heb. 5:14; 6:1, 2). Pisillata Jehovapi tʼukurejtinchejtaj, pisimanta pisi paymanta karunchakuyta qallarisunman, ichá niña amigosninpis kasunmanchu (Heb. 2:1; 3:12). Jesusqa Bibliapi leesqanchejta mana tukuy sonqochu japʼikojtinchej, ‘kay pachaj imasnin, qhapaj kaykunasnin, aychaj munaynin imaʼ Jehovamanta karunchanawanchejta nerqa (Luc. 8:14, 15).

¹⁴ Chayrayku Diospa Palabranpi tʼukurinanchej, sapa pʼunchaytaj Jehovata astawan rejsinanchejqa may sumaj. Chaytaj pay jina ruwanapaj, kʼacha kaykunasninta  rikuchinapaj ima yanapawasun (2 Cor. 3:18). Chayrayku Jehovamanta yachakunapaj, pay jina ruwanapajtaj kallpachakunallapuni. Chayta ruwayqa may sumaj (Ecl. 3:11).

15, 16. 1) ¿Imaynatá Jehovapi, Jesuspi ima tʼukuriy yanapawanchej? 2) ¿Imaraykutaj wakin kutis tʼukurinapaj mana tiempochakuyta atillasunmanchu? 3) ¿Imaraykutaj tʼukurinapaj kallpachakuna?

¹⁵ Jehovapi, Jesuspi ima tʼukureyqa sonqo kʼajaywan Jehovata sirvinanchejpaj yanapallawanchejtaj. Chayta ruwaytaj hermanosta, waj runastapis yanapanqa. Chantapis Jehová, Jesusta noqanchejrayku wañunanpaj kachamusqanpi tʼukurispaqa, Diospa amigosnin kay may sumaj kasqanta reparanchej (Rom. 3:24; Sant. 4:8). Sudafricamanta Mark sutiyoj hermanoqa, Jehovaman cheqa sonqo kasqanrayku kinsa watata carcelpi wisqʼasqa karqa. Pay nin: “Tʼukureyqa may sumajpuni. Imaraykuchus astawan tʼukurispaqa Jehovata astawan rejsinchej. Chantapis llakisqa, sonqo pʼakisqa kaspa Bibliata leerina, leerisqanchejpi tʼukurinapajtaj tiempochakuna. Chayta ruway noqatapis mana anchata llakikunaypaj yanapawarqa”, nispa.

¹⁶ Wakin kuteqa Bibliaj nisqanpi tʼukurinapaj tiempochakuyta mana atillasunmanchu. ¿Imaraykú? Imaraykuchus kay pachaqa waj imaspi yuyanapaj tanqawasunman. Africamanta Patrick sutiyoj hermano nin: “Sapa pʼunchay ashkha ruwanasniyoj kani, sonqoy ukhupitaj ashkha llakiyniyoj. Chayraykutaj Jehovamanta yanapata mañakuni chay llakiyniyta qonqanaypaj. Chaymantataj tʼukuriyta atillani. Tukuy chayta ruwanaypaj tiempochakunay kajtinpis, Jehovaman astawan qayllaykunaypaj yanapawan. Chantá sonqoyta wakichini, Bibliaj yachachiyninta astawan entiendenaypaj”, nispa (Sal. 94:19). Rikunchej jina Bibliata leey, leesqanchejpi tʼukuriy imaqa tukuy imapi yanapawanchej. Chayta ruwaytaj mana qhasipajchu (Hech. 17:11).

17. ¿Ima horastataj tiempochakunki tʼukurinaykipaj?

¹⁷ Wakinkunaqa sutʼiyamushajtin Bibliata leerinku, tʼukurinku, Jehová Diosmanta mañakunku ima. Wakinkunataj khuskan pʼunchaypi chayta ruwanku. Wakintajrí tardenpi chayri niraj puñukapushaspa chayta ruwanku. Wakintajrí ichá paqarinpi uj chhikata leerinku, tardenpitaj uj chhikantawan leerillankutaj (Jos. 1:8). Imayna kajtinpis sapa pʼunchay tiempochakunanchej tiyan Diospa Palabranta leerinapaj, leesqanchejpi tʼukurinapaj ima (Efe. 5:15, 16).

18. Bibliata leesqankupi tʼukurejkunaman, yachakusqankuman jina kausakojkunaman ima, ¿imatataj Jehová nin?

¹⁸ Jehovaqa Bibliata leesqankupi tʼukurejkunata, yachakusqankuman jina kausakojkunata ima bendecinanta nin (Salmo 1:1-3 leey). Jesús nerqa: “Diospa Palabranta uyarispa kasojkunamari kusikuyniyojqa kanku”, nispa (Luc. 11:28). Bibliaj nisqanpi sapa pʼunchay tʼukureyqa may sumaj, imaraykuchus Jehovata jatunchanapaj jina kausakunanchejpaj yanapawasunchej. Jehovataj kay tiempopi kusisqa kausakunapaj yanapawasun, paraisopitaj wiñay kausayta qowasun (Sant. 1:25; Apo. 1:3).