1, 2. 1) ¿Imaraykutaj Jesús Martata munakoj? 2) ¿Imapitaj Marta pantarqa?

¿IMAYNA warmitaj Lazaroj hermanan Marta karqa? Biblia nisqanman jina Jesusqa, payta sumaj amiganta jina qhawaj, munakoj ima. Jesusqa waj warmistapis munakoj, jatunpajtaj qhawaj. Sutʼincharinapaj, Lazaroj ujnin hermanan Mariatapis munakullajtaj. Chantapis maman Mariata mayta munakoj (Juan 11:5; 19:25-27). Chaywanpis, ¿imaraykutaj Jesús Martata munakoj?

² Jesusqa, Martata munakoj wajyarikoj kasqanrayku, llankʼayninpi kʼuchi kasqanrayku, astawanqa creeyniyoj kasqanrayku. Martaqa, Jesús suyasqa Mesías kasqanta yacharqa, Jesuspa yachachisqanpitaj creerqa (Juan 11:21-27). Jinapis, juchasapa kasqanrayku wakin kuti pantajpuni. Sutʼincharinapaj, uj pʼunchay Jesusqa Martaj wasinman rerqa. Chaywanpis Martaqa, Mariawan phiñasqa kasharqa Jesusmantaj nerqa: “Señor, manachu rikunki ñañay mana ruwaysiwasqanta? Niy ari yanapanawanta”,  nispa (Lucas 10:38-42 leey). ¿Imaraykutaj Marta phiñasqa kasharqa? ¿Imatataj yachakunchej Jesús kutichisqanmanta?

3, 4. 1) ¿Imaraykutaj Jesús, Mariata allinta ruwasqanta nerqa? 2) ¿Imatataj Marta yachakorqa? (18 paginapi dibujota qhawariy.)

³ Jesusqa Martawan Mariawan wasinman wajyarisqankumanta agradecesqa kasharqa, chayrayku Diosmanta yachachiyta qallarerqa. Mariaqa Sumaj Yachachej Jesuspa yachachisqanta uyariyta munarqa, chayrayku Jesuspa ñaupaqenman tiyaykukuspa yachachisqanta uyarisharqa. Martarí, ¿imatá ruwarqa? Paypis ruwanasninta saqespa, Jesuspa yachachisqanta uyariyta atinman karqa. Jesustaj allinta ruwasqanta ninman karqa.

⁴ Martaqa, Jesuspa yachachisqanta uyarinanmantaqa, mikhunata wakichiypi musphasharqa Jesús wasinpi jina karikunanta yuyaspa. Hermanan mana yanapajtintaj phiñakorqa, chaytataj Jesusman willarqa. Jesustajrí yacharqa Marta waj ruwanaspi musphashasqanta. Chayraykutaj kʼachallamanta nerqa: “Marta, Marta, ancha phutisqa kashanki, musphashankitaj chay chhika ruwanaswan”, nispa. Chantapis nillarqataj mana ashkha imasta wakichinanta. Mariatatajrí yachachisqanta uyarisqanrayku allinta ruwasqanta nerqa. Chayrayku “Mariaqa ajllakun chay aswan walej kajta. Chaytaqa mana pipis qhechonqachu”, nispa nerqa. Tiempo pasasqanman jina, Mariaqa imatachus chay pʼunchay mikhusqanta ichapis qonqaporqa, chaywanpis Jesuspa yachachisqantaqa nichá qonqarqachu. Sojta chunka watasmanta aswan qhepamantaj apóstol Juan, “Jesusqa mayta munakoj Martata, ñañanta” ima nispa nerqa (Juan 11:5). Kaytaj rikuchin Marta Jesuspa yuyaychasqanta japʼikusqanta. Payqa tukuy kausayninpi Jehovata cheqa sonqollapuni sirverqa.

5. 1) ¿Imaraykutaj kay tiempopi Jehovata sirviy mana atikullanchu? 2) ¿Ima tapuymantaj kay yachaqanapi kutichisunchej?

⁵ Rikunchej jina ñaupa tiempopipis ashkha imas karqa, Diospa kamachisnin waj imaspi yuyanankupaj. Kunantajrí astawanraj tiyan. Chayrayku kay 1 de abril de 1959 watamanta La Atalaya revistapi tukuy cristianosman yuyaychakorqa, runas mosoj imasta rikhurichisqanku imasllapi mana yuyanankupaj. Chay wataspiña sapa pʼunchay tukuy imas rikhurisharqa. Nisunman revistas, radio, películas, televisión, waj imaspiwan. Chantapis chay revistapi nikullarqataj tukukuy pʼunchaypi astawan waj imas rikhurimunanta. Chaytataj kay tiempopi rikushanchej. ¿Imatataj ruwasunman María jina ruwanapaj, chantá Jehovapaj llankʼashaspa waj imaspi mana yuyanapaj?

6. ¿Imaynatá yanapachikunchej runas rikhurichisqanku imaswan?

⁶ Noqanchejqa runas rikhurichisqanku imasta Diospa Reinonmanta willamunapaj apaykachanchej. Sutʼincharinapaj, niraj Ñaupaj kaj Guerra Mundial kashajtin chayri chay guerra kashajtin coloresniyoj dibujoswan, grabacioneswan, videoswan ima runasman willakoj. Chaytaj karqa “Foto-Drama de la Creación” nisqa. Chaywan yachachikusqanrayku, kay Jallpʼaman Jesús allin kausayta apamunanmanta ashkha runas yachakorqanku. Chaymantaqa radionejta ashkha runasman Diospa Reinonmanta willakullarqataj. Kunantaj Internetnejta runasman willashanchej may karuspi tiyakojtinkupis.

7. 1) ¿Imaraykutaj kay pachaj imasninwan mana anchata kusikunachu? 2) ¿Imastaj tiemponchejta qhechuwasunman? (Sutʼinchayninta qhawariy.)

 ⁷ Apóstol Pablo nerqa kay pachaj imasninwan mana anchata kusikunata (1 Corintios 7:29-31 leey). Chayrayku sumajta qhawarikunanchej tiyan mana kay pachaj imasninpi tiemponchejta usuchinanchejpaj. Chaywanpis wakin imasqa yanapawasunman. Apóstol Pabloj yuyaychasqanta kasukusunchej chayqa, mana kay pachaj imasninpi tiemponchejta usuchisunchu. Ajinamanta Jehovapaj mayta llankʼallasunpuni (Efesios 5:15-17 leey). ¿Imastaj tiemponchejta qhechuwasunman? Librosta leey, televisionta qhaway, wakin lugaresta rejsej riy, mana necesitasqanchej imasta rantej riy, mensajesta apachinakuy, noticiasta anchata qhaway, deportespi mayqenchus ganasqanta qhawayta munay chayri mosoj celulares, computadoras, waj imas rikhurimushasqanmanta yachayta munay. Wakenqa chay imasllaman anchata qokunku (Ecl. 3:1, 6). *

8. ¿Imaraykutaj kay pachaj imasninta munakuy mana allinchu?

⁸ Satanasqa Jehovata manaña sirvinanchejpaj, kay pachaj imasninpi astawan yuyananchejta munan. Chayta ruwarqa ñaupa tiempomanta cristianoswan, kunanpis ajinallatataj ruwashan (2 Tim. 4:10). Chaywanpis Biblia niwanchej Jehovata munakunata, manataj kay pachaj imasnintachu. ¿Imaraykú? Imaraykuchus ajinallamanta Jehovaj amigosnin kasunchej, paytataj kasukusunchej (1 Juan 2:15-17). Chayrayku sapa kuti qhawarikunanchej tiyan kay pachaj imasninta munapayashasqanchejtachus manachus. Kay pachaj imasninta munapayashanchej chayqa, usqhayllata chaykunamanta karunchakunanchej tiyan.

9. 1) ¿Imapitaj Jesuspa yachachisqasnin yuyayninkuta churananku karqa? 2) ¿Imatataj Jesús kausayninwan yachacherqa?

⁹ Rikunchej jina Jesusqa, Martaman yachacherqa mana waj imaspi musphananta. Yachachisqasninmanpis chayman rijchʼakojllatataj yachacherqa. Nerqataj Jehovata sirviypi, Reinonta ñaupajman churaypi ima yuyayninku kananta (Mateo 6:22, 33 leey). Chantapis Jesusqa kausayninwan rikucherqa, pisi imasllawan kausakuyta atisqankuta. Imaraykuchus paypataqa mana wasin, nitaj jallpʼallanpis kaporqachu (Luc. 9:58; 19:33-35).

10. ¿Imatataj Jesusmanta yachakusunman?

 ¹⁰ Jesusqa willayninta ni ima jarkʼananta saqerqachu. Sutʼincharinapaj, uj kuti Capernaum llajtapi willasharqa. Willayta tukusqantawantaj runas mana ripunanpaj jarkʼayta munarqanku. Chaywanpis, ¿imatá Jesús ruwarqa? “Wajkunamampis Diospa reinonmanta evangeliota willamunallaytaj tiyan, imaraykuchus chaypaj kachamusqa kani”, nispa nerqa (Luc. 4:42-44). Jesusqa may karusta purerqa runasman yachachinanpaj. Juntʼa runa kaspapis purisqanpi saykʼukoj, samarikuytataj munaj (Luc. 8:23; Juan 4:6).

11. 1) ¿Imatataj Jesús ruwarqa uj runa chʼampayninta allinchananpaj yanapata mañakojtin? 2) ¿Imatataj Jesús yachachisqasninman yachacherqa?

¹¹ Uj pʼunchay Jesús yachachisqasninman yachachishajtin, uj runa qayllaykorqa, yanapatataj mañakorqa chʼampayninta allinchananpaj. Nerqataj: “Yachachej Señor, niripuway wawqeyman herenciata rakʼinakunaykuta”, nispa. Chaywanpis Jesusqa chay runata mana yanaparqachu. ¿Imaraykú? Imaraykuchus yachachisqasninman yachachisharqa, nitaj ni ima pantachinanta munarqachu. Astawanpis yachachisqasninman yachacherqa tukuy imasniyoj kaypi anchata yuyajtinku, ichapis Diosta manaña sirviyta atinankuta (Luc. 12:13-15).

12, 13. 1) ¿Imaraykutaj wakin griegos Jesusta rejsiyta munarqanku? 2) ¿Imatataj Jesús nerqa paywan runas parlayta munasqankuta Felipe nejtin?

¹² Jesusqa wañupunanpaj pisi pʼunchaykunalla kashajtin llakisqa kasharqa (Mat. 26:38; Juan 12:27). Yacharqataj ñakʼarinanta, wañuchisqa kananta ima. Chantapis yachallarqataj niraj wañuchishajtinku ashkha imastaraj ruwananta. Sutʼincharinapaj, wañuchinankupaj phishqa pʼunchay faltashajtin uj burritopi lloqʼaykuspa Jerusalenman yaykorqa. Chaypitaj ashkha runas reyninkuta jina qhawarqanku (Luc. 19:37, 38). Qʼayantintaj Jesusqa mana manchachikuspa templomanta vendejkunata qharqorqa runasta chʼaukiyasqankurayku (Luc. 19:45, 46).

¹³ Wakin griegospis Jerusalenman rerqanku Pascuata judioswan khuska ruwaj. Paykunaqa, imatachus Jesús templopi ruwasqanta rikuspa tʼukushaj qhepakorqanku. Chayraykutaj Felipeta nerqanku Jesuswan parlariyta munasqankuta. Jesustaj mana munarqachu imaraykuchus mana may rejsisqa kaytachu maskʼasharqa. Astawanpis Jehová imatachus kamachisqanta juntʼayta munarqa, nisunman noqanchejrayku kausayninta qoyta. Chantá yachachisqasninman nerqa tumpamantawan wañuchisqa kananta, kausayninkuta qonankupajtaj wakichisqa kanankuta ima. Pay nerqa: “Kawsayninta munakojqa chay kawsayninta chinkachenqa; kay pachapi kawsayninta qhesachajtajrí, chay kawsayninta wiñay kawsaypaj waqaychanqa”, nispa. Chaywanpis chayta ruwajkunata Tatan “jatumpaj” qhawananta, wiñay kausayta qonanta ima nillarqataj. Felipeqa chay sumaj willayta kallpachananpaj jina griegosman willarqa (Juan 12:20-26).

14. Jesús kausayninpi willayta ñaupajman churaspapis, ¿imastawan ruwarqa?

¹⁴ Jesusqa kay Jallpʼapi kashaspa Diospa Reinonmanta willaykunata ñaupajman churarqa, chaywanpis mana chayllatachu ruwarqa. Sutʼincharinapaj, uj kuti uj casarakuman rerqa, chaypitaj yakuta uj sumaj vinoman tukucherqa (Juan 2:2, 6-10). Chantapis amigosnin, waj runas ima wasinkuman wajyarejtinku payqa rerqa, chay runas yachachisqanta uyariyta munasqankurayku (Luc. 5:29; Juan 12:2). Chayta ruwaspapis pay tiempochakoj samarinanpaj, sapallan  kananpaj, Diosmanta mañakunanpaj ima (Mat. 14:23; Mar. 1:35; 6:31, 32).

15. 1) Apóstol Pablo nisqanman jina, ¿imatataj cristianos ruwananchej tiyan? 2) ¿Imatá Pablomanta yachakunchej?

¹⁵ Apóstol Pabloqa, cristianos atipanakupi correjkuna jina kasqanchejta nerqa. Maymanchus chayananchejman chayayta munanchej chayqa, imachus llasaykuwanchej chayri jarkʼawanchej chayta wijchʼunanchej tiyan (Hebreos 12:1 leey). Pablo kikin kausayninwan yachachiwarqanchej imaynatachus chayta ruwanata. Payqa may qhapaj, may rejsisqa religionmanta kamachej ima kayta atinman karqa. Chaywanpis chayta saqespa, “aswan allin” kajta maskʼarqa. Diospa Reinonta ñaupajman churasqanraykutaj, Siriaman, Asia Menorman, Macedoniaman, Judeaman ima viajarqa. Payqa mayta munasharqa janaj pachapi tʼinkanta japʼiyta. Chayrayku nerqa: “Chayta qonqayman churaspa, atisqayta kallpakuni ñawpajpi kajta taripanaypaj. Ñawpajman rishallanipuni, maymanchus chayana kashan, chayman chayanaykama, tʼinkata japʼinaypaj”, nispa (Fili. 1:10; 3:8, 13, 14). Pabloqa soltero kasqanrayku, “ni imaj jarkʼasqan” Jehovata tukuy sonqo sirviyta aterqa (1 Cor. 7:32-35).

16, 17. 1) Solteros chayri casados kaspapis, ¿imaynatá Pablo jina ruwasunman? 2) Gales suyupi tiyakoj qhariwarmi, ¿imaynatá Pablo jina ruwarqanku?

¹⁶ Kay tiempopipis wakin hermanosqa, Jehovata astawan sirviyta munasqankurayku soltero kakuyta ajllanku (Mat. 19:11, 12). Imaraykuchus solterosqa casadosmanta nisqa aswan pisi ruwanasniyoj kanku. Solteros chayri casados kaspapis tukuyninchej ni imaj jarkʼasqan Jehovata tukuy sonqo sirvinapaj kallpachakuna. Sutʼincharinapaj, ichá wakenqa imaschus tiemponchejta qhechuwanchej chayta saqenanchej kanqa Jehovata astawan sirvinapaj.

¹⁷ Mark, Claire ima nisqa qhariwarmimanta parlarina. Paykunaqa Gales (Reino Unido) suyupi tiyakunku. Solterosllaraj kashaspa colegiota tukuytawan precursores jina llankʼayta qallarerqanku. Casarakuspapis precursoresllapuni karqanku. Jehovapaj astawan llankʼayta munaspataj pisillawan kausakuyta ajllarqanku. Mark nin: “Kinsa cuartoyoj wasiykuta saqerqayku, pisillatañataj llankʼarqayku. Ajinata ruwasqaykutaj Tantakuna Wasista ruwaypi yanapakunaykupaj yanapawarqayku”, nispa. Paykunaqa kay pasaj 20 wataspi Africaj ashkha suyusninpi Tantakuna Wasista ruwaypi yanapakorqanku. Wakin kuti mana qolqeyoj kajtinkupis, Jehová mana saqerparerqachu. Claire nin: “Jehovata sirveyqa mayta kusichiwayku, chaytaj ni imawan kikinchakunchu. Tantakuna Wasita ruwaypi yanapakusqaykurayku ashkha amigosta tarerqayku, nitaj ni ima pisiwarqaykuchu. Imatachus saqesqaykoqa, Jehovata sirvispa kusikusqaykuwan mana kikinchakunchu”, nispa. Jehovapaj astawan llankʼaj wakin hermanospis chay qhariwarmi jinallataj ninku. *

18. ¿Imastá tapurikunanchej tiyan?

¹⁸ Tukuyninchej kayta tapurikuna: “¿Aswan sonqo kʼajaywanchu Jehovata sirvinay tiyan? ¿Kay pachaj imasninpi yuyasqayraykuchu mana aswan allin kajpi yuyashani? Jina kajtin, ¿imatá ruwanay tiyan?”, nispa. Ichá Bibliata aswan sumajta leenapaj, ukhunchanapaj ima kallpachakunallapuni tiyan. Qhepan yachaqanapeqa imaynatachus chayta ruwayta atisqanchejta qhawarisun.