1. ¿Imamantataj Jesús astawan parlarerqa? Sutʼinchay.

JESUSMANQA Diospa Reinonmanta parlariy mayta gustaj. Kay Jallpʼapi kashaspa Diospa Reinonmantapuni astawan parlarej. Willayninpitaj Reinomanta pachaj kutismanta astawan parlarqa. Paypajqa Reinomanta parlay may sumaj karqa (Mateo 12:34 leey).

2. ¿Mashkha runastaj Jesús kay Mateo 28:19, 20 versiculospi kamachisqanta uyarerqanku, chantá imaynatá chayta yachanchej?

² Jesusqa kausarimusqanmanta pisi tiemponman, ashkha runasman rikhurerqa, phishqa pachaj kuraj tantasqa kashajtinku (1 Cor. 15:6). Ichapis chay kutipi Jesusqa “tukuy laya runasta” yachachisqasninman tukuchimunankuta kamacherqa. * Chaywanpis Jallpʼantinmanta tukuy runasman willayta mana atikullanmanchu karqa. Jesustaj “kay pacha tukukunankama” willakunan kasqanta nerqa. Kay pʼunchaykunapi sumaj willaykunata  willamuspaqa Jesuspa nisqan juntʼakunanpaj yanapakushanchej (Mat. 28:19, 20).

3. ¿Ima kinsa imastaj sumaj willaykunata willamunapaj yanapawanchej?

³ Jesusqa chay kamachiyta qoytawan yachachisqasninman “noqa qankunawan” kasaj nispa nerqa (Mat. 28:19, 20). Kayta nispataj willayta ñaupajman apananta, tukuy pachantinpi willakunanpaj yanapananta ima nerqa. Jehovapis kay tiempopi willamunapaj yanapashallawanchejtaj. Chayrayku “tukuy imata” qowanchej runasman willamunapaj (Heb. 13:20, 21). Kay yachaqanapitaj yachakusunchej imaswanchus willamusqanchejta, imaymanamanta willamusqanchejta, Diospa llajtan willamunapaj imaynatachus wakichiwasqanchejta ima. Kay pasaj 100 wataspi imaswanchus willamusqanchejta qhawarina.

4. ¿Imaynatá Reyninchej Jesús tukuy laya yanapasta qowasqanchej yanapawanchej?

⁴ Jesusqa Reinomanta sumaj willaykunata kikincharqa tukuy laya jallpʼaman urmaj mujuwan (Mat. 13:18, 19). Chajrapi llankʼaj runaqa jallpʼata wakichinanpaj tukuy laya herramientasta apaykachan. Ajinallatataj noqanchejpis Reyninchej Jesucristo tukuy laya yanapasta qowasqanchejwan yanapachikunchej willayninchejta runas uyarinankupaj. Chay yanapasmanta wakintaj pisi tiempollata yanapawarqanchej, wakintaj kunankama yanapashallawanchejpuni. Chaywanpis chay tukuy yanapasqa sumajta willamunapaj yanapawanchej.

5. ¿Imaynataj willayniyoj papelitos karqa, imaynatá chaywan willakoj?

⁵ Kay 1933 watapi, hermanosqa willayniyoj papelitos nisqawan willayta qallarerqanku, chaytaj may ashkhasta yanaparqa Diosmanta willayta qallarinankupaj. Chay papelitosqa juchʼuysituslla karqa, Bibliamanta uj willaytaj pisi parlayllapi rikhurej. Wakin kutistaj uj mosoj willay llojsej. ¿Imaynatataj chay willayniyoj papelitoswan willaj kanku? Erlenmeyer sutiyoj hermanoqa chunka watayoj jina kashaspa ñaupaj kutirayku chay papelitoswan willarqa, pay nin: “Willaypeqa, ‘¿kay palelitota leeriwajchu?ʼ nispa runasman nej kayku. Wasiyoj leesqantawantaj uj publicacionta saqej kayku, chantá ripoj kayku”, nispa.

6. ¿Imaraykutaj willayniyoj papelitos willamunapaj may sumaj karqa?

⁶ Willayniyoj papelitosqa hermanosta willayninkupi mayta yanaparqa. Imaraykuchus wakin hermanosqa willayta munaspapis manchalis kasqankurayku yachakusqankumanta mana parlayta atejchu kanku. Wakin hermanostaj mana manchachikusqankurayku pisi minutosllapi yachakusqankumanta sutʼincharej kanku. Chaywanpis wakin kutisqa kʼachamanta parlariyta mana atillajchu kanku. Willayniyoj papelitosqa mayta yanaparqa tukuyman sutʼita, entiendenankupaj jina willanankupaj.

7. ¿Imaraykú willayniyoj papelitoswan hermanos willayta mana atillarqankuchu?

⁷ Chay papelitoswan willayqa mana atikullajchu. Grace Estep sutiyoj hermana nin: “Wakin kuteqa: ‘¿Ima nishantaj? ¿Manachu qan imatachus nisqanta niwankiman?’, nispa niwaj kayku”, nispa. Wakin runastaj mana leeyta atejchu kanku. Wakinkunataj chay papelitosta japʼikuytawan punkuta wisqʼarparimoj kanku. Wakintaj willayninchejmanta mana yachayta munaspa japʼiytawan llikʼirparej kanku. Jinapis willayniyoj papelitosqa runasman willamunankupaj, Reinomanta willajkuna jina rejsisqa kanankupaj ima hermanosta mayta yanaparqa.

8. ¿Imaynatataj tocachinapaj aparatoswan willaj kanku? (26 paginapi dibujota qhawariy.)

⁸ Kay 1930 watamantapacha tocachinapaj aparatoswanñataj willayta qallarerqanku.  Wakin hermanosqa chay aparatota Aarón nispa sutichaj kanku, paykunaj cuentankumanta parlasqanrayku (Éxodo 4:14-16 leey). Uj runa willayninkuta uyariyta munajtenqa tocachinapaj aparatopi grabasqa umallirichiyta uyarichej kanku, chaymantataj uj publicacionta saqej kanku. Wakin kutitaj familiantin chay umallirichiymanta grabacionta uyarej kanku. Kay 1934 watapitaj Diospa llajtanqa tocachinapaj aparatosta ruwayta qallarerqa runasman willamunapaj. Tiemponmantaj 92 umallirichiykunata grabarqanku.

9. ¿Imaynatataj hermanosta willayninkupi yanaparqa tocachinapaj aparatos?

⁹ Hillary Goslin sutiyoj uj runa, uj grabasqa umallirichiyta uyarerqa, mayta gustasqanraykutaj vecinosninman uyarichinanpaj, tocachinapaj aparatota uj semanapaj mañakorqa. Ajinata ruwasqanraykutaj ashkha runas Bibliamanta yachakuyta qallarerqanku, chantapis bautizakorqanku. Hillary Goslin sutiyoj runapis bautizakullarqataj. Tiemponmantaj iskay warmi wawasnin Galaad Escuelaman rerqanku, misioneras jinataj llankʼarqanku. Willayniyoj papelitos jinallataj, tocachinapaj aparatopis ashkha hermanosta willayta qallarinankupaj yanaparqa. Chaymanta aswan qhepamantaj rey Jesucristo, yachachisqasninta sumaj willajkuna kanankupaj Diosmanta Parlayta Yachanapaj tantakuynejta yanapayta qallarerqa.

10, 11. 1) ¿Imaynatataj periódicos, radio ima willanapaj yanapawarqanchej? 2) ¿Imaraykutaj chaykunanejta willay may sumaj karqa?

¹⁰ Reyninchej Jesucristoqa Diospa llajtanta yanaparqa sumaj willaykunata tukuy runasman imaymanamanta willananpaj. Chaytaj may sumaj karqa Jallpʼantinpi pisi willajkunalla kashajtinku (Mateo 9:37 leey). Sutʼincharinapaj, unayqa periodicosnejta willakoj. Sapa semanataj hermano Russellqa noticiasta rikuchej empresaman Bibliamanta uj umallirichiyta apachej. Chay noticiasta rikuchej empresataj chay umallirichiyta Canadapi, Europapi, Estados Unidospi kaj periodicosman apachej. Kay 1913 watapaj, hermano Russellpa umallirichiykunasnenqa 2.000 periodicospi llojserqa, 15 millones runas jinataj leej kanku.

¹¹ Chantapis radionejta willay may sumajllataj karqa. Kay 16 de abril de 1922 watapi hermano Rutherfordqa ñaupaj kutirayku radionejta umalliricherqa. Chaytataj 50.000 runas jina uyarerqanku. Pisi tiemponmantaj WBBR nisqa radionejta willakorqa, chay radiotaj noqanchejpata karqa. Kay 24 de febrero de 1924 watapitaj ñaupaj kutirayku chay radionejta willakorqa. Kay 1 de diciembre de 1924 watapitaj kay revista inglés qallupi ajinata sutʼincharqa: “Cheqa kajta radionejta willayqa may sumaj kasqanta reparayku, imajtinchus mana ashkha qolqepajchu”, nispa. Periódicos, radio ima mayta yanapawarqanchej Reinomanta pisi willajkunalla kanku chay lugarespi willanapaj.

12. 1) ¿Imaynasmanta willamuytaj qanta gustasunki? 2) Ashkha runas kanku chaypi willayta manchachikunki chay, ¿imatá ruwawaj?

¹² Maypichus ashkha runas kanku chaypi publicacionesniyoj mesaswan, carritoswan ima willaypis, ashkha runasman willayninchejwan chayanapaj yanapallawanchejtaj. Chantapis mayta kallpachakullanchejtaj autos, trenes sayanku chaypi, plazaspi, mercadospi ima willanapaj. Ashkha runas kanku chaypi willayta manchachikunki chay, ¿imatá ruwawaj? Jehovamanta yanapata mañakuy, qotuchakuykunata waturej  Angelo Manera sutiyoj hermanoj nisqanpi tʼukuriy. Chay hermano nerqa: “Jehová Diosta jatunchallanchejtaj waj jinasmanta willamuspa. Ajinata ruwaspataj payman cheqa sonqo kasqanchejta, creeyniyoj kasqanchejta ima rikuchillanchejtaj. Chantapis imatachus Dios ruwanaykuta munasqanta ruwaytapuni munasqaykuta rikuchiyta munarqayku”, nispa. Manchachikuyninchejta atipasunchej, waj jinasmantataj willamusunchej chayqa, Jehovapi astawan atienekusunchej, sumaj willajkunataj kasunchej (2 Corintios 12:9, 10 leey).

13. 1) ¿Imaraykutaj may sumaj Internetpi jw.org nisqamanta runasman parlarinanchej? 2) ¿Internetpi jw.org nisqamanta pillamanpis willarerqankichu, chantá imayná risorqa?

¹³ Ashkha hermanosninchej Internetpi jw.org nisqamanta willaypi parlaspa mayta kusikunku. Sapa pʼunchaytaj ashkha runas jw.org nisqaman yaykunku. Chaypitaj publicacionesninchejta 700 kuraj parlaykunapi leeriyta, uraqachiyta ima atinku. Ñaupajtaqa radionejta karu llajtaspi tiyakoj runasman sumaj willaykunata willaj kanchej. Kunantaj Internetnejta kikillantaj ruwashanchej.

14. 1) ¿Imatá hermanos necesitarqanku? 2) ¿Imataj hermanosta yanaparqa sumaj willajkuna kanankupaj?

¹⁴ Rikunchej jina Jehová Diosqa ashkha yanapasta qowarqanchej, imaymanamanta willamunapajpis yanapawarqanchej. Chaywanpis sumaj willajkuna kanapaj wakichinawanchejta necesitarqanchej. ¿Imaraykú? Sutʼincharinapaj, hermanos tocachinapaj aparatoswan willashajtinku, wakin runasqa mana uyariyta munajchu kanku. Waj runastajrí astawan Bibliamanta yachakuyta munaj kanku. Chay tiempomanta hermanosqa sumaj willajkuna kayta, runas willayninkuta qhesachajtinku imatachus ninankuta ima yachakunankuraj karqa. Hermano Knorrqa Jehová Diospa espíritu santonpa yanapayninwan repararqa hermanos Bibliamanta sumaj willajkuna kanankupaj wakichinata necesitasqankuta. Chayrayku 1943 watapi Diosmanta Parlayta Yachanapaj nisqa tantakuy qotuchakuykunapi ruwakuyta qallarerqa. Kayqa hermanos sumaj willajkuna kanankupaj yanaparqa.

15. 1) Diosmanta Parlayta Yachanapaj tantakuypi umallirichishaspa, ¿imapitaj ashkha hermanos rikukorqanku? 2) ¿Imaynatataj kay Salmo 32:8 versiculopi Jehovaj nisqan qanpi juntʼakun?

¹⁵ Ashkha hermanosqa mana yachasqachu karqanku tukuy runaspa ñaupaqenpi  parlariyman. Uj hermano yuyarikun, 1944 watapi ñaupaj kutirayku umallirichishajtin imaynachus risqanmanta. Payqa Bibliapi Doeg sutiyoj runamanta umallirichiyninpi parlanan karqa. Chay hermanoqa umallirichishajtin tukuy cuerpon kharkatisqanta, jinapis umallirichiyninta tukuchasqanta nin. Chantapis Diosmanta Parlayta Yachanapaj tantakuypeqa wawaspis umallirichillajtaj kanku. Chunka iskayniyoj parrafopi qotuchakuykunata waturej uj hermanomanta parlarerqanchej, chay hermano yuyarikun imaynachus uj yoqallituta umallirichiyninpi risqanmanta, nintaj: “Chay yoqallitoqa mancharisqa kasharqa, umalliriyta qallarisqantawantaj waqayta qallarerqa. Jinapis umallirichiyninta waqan waqan tukucharqa”, nispa. Ichá qanpis manchachikusqaykirayku chayri mana allintachu ruwanaykita yuyasqaykirayku tantakuykunapi tapuykunaman mana kutichiyta atillankichu. Ajina kajtenqa manchikuyniykita atipanaykipaj Jehovamanta yanapata mañakuy. Pay yanapasonqa Diosmanta Parlayta Yachanapaj tantakuy ñaupaj kutirayku qallarishajtin umallirichejkunata imaynatachus yanaparqa ajinata (Salmo 32:8 leey).

16. ¿Imapajtaj Galaad Escuela ruwakun?

¹⁶ Jehovaqa Galaad Escuelanejta kamachisninta wakichillantaj. Chay escuelaqa yachakojkunata willayta munanallankupajpuni yanapananpaj ruwakun. Chay escuelataj 1943 watapi qallarerqa, chaymantapachataj 8.500 hermanosña chay escuelaman rinku, 170 suyuspitaj misioneros jina llankʼashanku. Kay 2011 watamantapachataj chay escuelaman precursores especialesta, qotuchakuykunata waturejkunata, betelitasta, chay escuelaman manaraj rej misionerosta ima wajyarinku.

17. ¿Imaraykutaj Galaad Escuelapi willajkunata wakichiy may sumaj karqa?

¹⁷ Galaad Escuelapi hermanosta wakichikusqanqa may sumaj karqa. Imachus Japón suyupi kasqanmanta parlarina. Agosto de 1949 watapaj chay suyupi ni 10 willajkunapis karqankuchu. Chay wata tukukuypajtaj chay suyupi 13 misionerosña karqanku, paykunataj chay suyumanta willajkunawan khuska willasharqanku. Kunantaj chay suyupi 216.000 willajkunaña kanku, casi khuskantaj precursores kanku.

18. ¿Ima Escuelastaj kallantaj?

¹⁸ Chantapis Ñaupajman Apajkunapaj Escuela, Precursorespaj Escuela, Reinomanta Willajkunapaj Escuela, Waturejkunapaj Warmisninkupajwan Escuela, Sucursalespi Kamachejkunapaj Warmisninkupajwan Escuela ima kallantaj. Chay Escuelasqa hermanosta, hermanasta ima sumajta wakichin, creeyninkutapis kallpachan. Sutʼita rikunchej kay tiempopi Jesús wakichishallawasqanchejtapuni.

19. 1) ¿Imatataj hermano Russell nerqa? 2) ¿Imatachus hermano Russell nisqan juntʼakushanchu?

¹⁹ Diospa Reinonqa 100 watasmanta astawanña kamachishan. Chaymantapachataj Reyninchej Jesucristoqa willayta ñaupajman apashan. Kay 1916 watapi hermano Russell nerqa: “Kay llankʼayqa usqhayllata ñauparishan, ñauparillanqapunitaj, chayrayku ‘Reinomanta evangeliotaʼ Jallpʼantinpi willamunallapuni tiyan”, nispa (La fe en marcha, por A. H. Macmillan, página 69). Rikunchej jina hermano Russellqa Jallpʼantinpi willakunantapuni sutʼita yacharqa. Nisqantaj cheqapuni, imaraykuchus tukuynejpi willashanchej. Jehová Diosman mayta agradecekunchej kamachiwasqanchejta juntʼanapaj yanapashawasqanchejmanta.