Cristianosta trigotajina thalakun

JESUSQA manaraq wañupuchkaspa, discipulosninman nirqa: “Satanasqa munan trigota jina qamkunata thalayta”, nispa (Luc. 22:31). ¿Imatataq Jesús niyta munarqa?

Jesuspa tiemponpiqa, trigota cosechayqa mana atikullaqchu, achkhata llamkʼana karqa. Qallarinapaqqa, trigota ruthuspa tantaq kanku. Chaymantaqa, erapi trigota waqtaq kanku, chayri ima uywawanpis trillota aysachispa, trigota trillaq kanku, jinamanta pajanta tʼaqaq kanku. Trillaytawantaq, trigota wayrachiq kanku, wayra pajanta apakapunanpaq. Tukuchanapaqtaq, trigota suysunapi thalaq kanku, mana trigo kaqta urqhunankupaq.

Jesús nisqanmanjina, Satanasqa ñawpa cristianosta mana khuyarikuspa qhatiykacharqa, kunanpis kikillantataq ruwachkan (Efe. 6:11). Chaywanpis, mana Satanasmantapunichu tukuy ñakʼariykuna jamusqanta nisunman (Ecl. 9:11). Supayqa, Diosta yupaychananchikta mana munanchu, tukuy imatataq urmananchikpaq ruwachkan. Chantapis, astawan qhapaqyayta maskʼanapaq, mana allin ruwaykunata ruwanapaq, khuchichakuyta munapayanapaq ima, tanqawasunman. Ajinamanta payqa llamkʼaypi, escuelapi ima, compañerosninchikwan, chayri mana creyente familianchikwan, kay pachap yachachiyninta, sumaq llamkʼayninta ima, maskʼananchikpaq tanqawanchik. Chantapis, urmananchikpaq qhatiykachachiwanchik. Chiqamanta nisunman Satanasqa, mana kaykunallawanchu trigotajina thalawanchik.

¿Imaynatá kay kallpayuq enemigomanta jarkʼakusunman? Satanastaqa mana kallpallanchikwan atipayta atisunmanchu, payqa ñuqanchikmanta astawan kallpayuq. Chaywanpis, Jehovaqa Satanasmanta aswan kallpayuq kasqanta yachanchik. Chayrayku, mana iskaychakuspa Diosninchikpi atienekunanchik tiyan. Mana llawchʼiyanapaqqa, Diosmanta yachayta, kallpata ima, mañakunanchik tiyan, jinamanta mana urmasunchu, nisqantataq ruwasun. Jehovaqa, Supayta atipananchikpaq, kallpachawasunchik (Sal. 25:4, 5).

Mana Supay urmachiwananchikpaq, “imachus allin, imatajchus mana allin kasqanta”, reparayta yachananchik tiyan, ajinamanta Satanaswan mana chʼawkiyachikusunchu (Heb. 5:13, 14). Jehovap yanapayninwan imachus allin, imachus mana allin kasqanta sutʼita rikusunchik, jinamanta imatachus ruwananchikta yachasunchik. Imachus allin kasqanta yachaspataq, imapis kachun allin kaqtapuni ruwasunchik. Jehovapi atienekusunchik chayqa, pay mana imata suyaspa, chiqan kaqta ruwananchikpaq yanapawasunchik (Efe. 6:10).

Satanasqa trigotajina thalayta munawanchik. Jehovataq Satanaswan mana atipachikunanchikpaq kallpata quwanchik, jinamanta sinchi iñiyniyuq kasunchik (1 Ped. 5:9). Jehovap Palabranqa kayta niwanchik: “Kuraq Supaypa contranta sinchʼita sayaychej, paytaj qankunamanta ayqenqa”, nispa (Sant. 4:7).