Diospa Reinonman yaykunapaqjina qhawasqa kankichik

“Chay imasqa sutʼita rikuchishan Diospa juicion cheqan kasqanta, qankunataq chaynejta Diospa reinonman yaykunapaq jina qhawasqa kankichej” (2 TES. 1:5).

1, 2. ¿Ima juiciotataq Dios ruwanqa, pitataq chay juiciota ruwananpaq kamachin?

APÓSTOL Pablo, 50 watap qayllanpi Atenasman rirqa. Llaqtapi purichkaspataq may achkha lantista qhawarqa, chaytaq mayta phiñachirqa, chayrayku Atenasmanta runasman Diosmanta willarqa. Sumaqta parlarisqanqa uyariqkunata maytachá tʼukuchirqa. Pablo nirqa: “kunantajrí Diosqa tukuynejpi runasta kamachin payman kutirikunankuta. Diosqa uj pʼunchayta wakichinña, mayqenpichus cheqa kayninman jina tukuy kay pachapi runasta juzganqa chay kachamusqan runanejta. Diostaj chayta tukuyman rikuchinña, chay runata wañusqamanta kawsarichimuspa”, nispa (Hech. 17:30, 31).

² Dios juk pʼunchayta juzgananpaq wakichisqanqa, mana asikunapaqchu. Jehovaqa wak runata juzgananpaq kamachin. ¿Pitataq juzgananpaq kamachin? Pabloqa mana pichus kasqanta willawanchikchu, chaywanpis, kawsariq Jesucristo kasqanta yachanchik. Pay juzgasqanqa, runapaq kawsay chayri wañuy kanqa.

3. ¿Imapaqtaq Jehová Abrahamwan juk tratota ruwarqa, pitaq kay tratota juntʼachiman karqa?

³ Chay Juicio Pʼunchayqa waranqa wataspi ruwakunqa, Jesustaq Diospa Reinonmanta Reyninjina, Tatanpa sutinpi juzganqa. Jesusqa mana sapallanchu juzganqa. Jehovaqa Jallpʼamanta runata akllan, Jesuswan kamachinankupaq, juzganankupaq ima, chay waranqa wataspi (Lucas 22:29, 30, kikinchay). Ichapis, tawa waranqa watas ñawpaqta Jehovaqa kay Juicio Pʼunchaypaq llamkʼayta qallarirqa, kamachin Abrahamwan juk tratota ruwaspa, kay tratoqa 1943 qayna pacha watapi qallarikurqa (Génesis 22:17, 18, ñawiriy). Chiqamanta nisunman, Abrahamqa kay trato runapaq imachus ninayasqanta mana tukuyninta entienderqachu. Kunanqa, imatachus Abrahampa miraynin ruwasqanta entiendenchik, Diospa munayninmanjina runa juzgasqa kananpaq.

4, 5. a) ¿Pitaq Abrahampa sumaq kaq miraynin, imatataq pay Reinomanta nirqa? b) ¿Maykʼaqmantataq Diospa Reinonman riyta qallarinku?

⁴ Abrahampa juknin sumaq kaq mirayninqa  Jesús karqa, payqa 29 watapi santo espirituwan jawisqa chayri akllasqa karqa, jinamanta Mesiasman chayri Cristoman tukurqa (Gál. 3:16). Chaymanta Jesusqa kimsa wata khuskanniyuqta Reinomanta willaykunata judío suyuman willarqa. Juan Bautista wisqʼachikusqanmanta, Jesusqa wak runas janaqpacha reinoman rinankumanta parlayta qallarirqa, jinata nispa: “Juan Bautistaj jamusqanmantapacha, Diospa janaj pachaj reinonqa atiyniyujkunaj kallpampa mithasqan, runastaj chay reinotaqa kallpawan japʼinku.” (Mat. 11:12.)

⁵ Manaraq Diospa Reinomanta kallpawan japʼikuqkunamanta parlachkaptin, Jesusqa kayta nirqa: “Cheqatapuni niykichej: Tukuy nacekojkunamanta mana ujpis Juan Bautistamanta nisqaqa aswan kuraj rikhurimorqachu. Chaywanpis Diospa janaj pacha reinonpi aswan juchʼuy kajpis, kurajraj paymantaqa”, nispa (Mat. 11:11). ¿Imaraykutaq chayta nirqa? Imaraykuchus akllasqa kaqkuna janaqpacha reinoman rinankupaq, santo espíritu 33 watapi tʼakakusqanmantapacha, waqyasqas karqanku, chay watapaqtaq Juan Bautistaqa wañupurqaña (Hech. 2:1-4).

Abrahampa miraynin chiqan runas kasqankuta nikun

6, 7. a) ¿Imaraykutaq Abrahampa miraynin ‘cielopi chʼaskasjina’ kanankuta nikurqa? b) ¿Ima tʼinkatataq Abraham japʼirqa, ima tʼinkatataq miraynin japʼinqa?

⁶ Abrahammanqa miraynin mayta mirananta nikurqa, ‘cielopi chʼaskas chhikatajina, mama qucha kantupi tʼiyu chhikatajina’ ima (Gén. 13:16; 22:17). Jukjinamanta nispaqa, Abrahampa tiemponpiqa mana pipis, machkha runamantachus Abrahampa miraynin kananta yachanmanchu karqa. Chaywanpis, tiempomanqa machkhachus kasqankuta sutʼinchakurqa: 144.000 runas, Jesús ima, kasqankuta nikurqa (Apo. 7:4; 14:1).

⁷ Diospa Palabranqa nin: “Abramqa creerqa Tata Diospa nisqanta; chayrayku cheqan runapaj qhawasqa karqa”, nispa (Gén. 15:5, 6). Arí, mana pipis chiqan runaqa kayta atinmanchu (Sant. 3:2). Abraham jatun iñiyniyuq kasqanrayku, Jehovaqa chiqan runapaq Abrahamta qhawarqa, chantapis munasqa masin kasqanta nirqa (Isa. 41:8). Pikunachus Jesuswan khuska, Abrahampa espiritual miraynin kaqkunaqa, chiqan runapaq qhawasqas kanku, chayrayku paykunapaqqa Abrahammantapis aswan sumaq tʼinkaykuna kanqa.

8. ¿Ima tʼinkatataq Abrahampa miraynin japʼinqa?

⁸ Akllasqa cristianosqa, Jesús runarayku wañusqanpi iñisqankurayku, chiqan runapaq qhawasqa kanku (Rom. 3:24, 28). Jehovap ñawpaqinpiqa manaña juchayuqchu kanku, chayrayku espíritu santowan Diospa espiritual churisninjina, Jesuspa hermanosninjina ima, akllasqas kanku (Juan 1:12, 13). Chantapis musuq trato ukhupi kanku, jinamanta musuq llaqtaman tukunku, “Diospa nacionnin Israel kanku” (Gál. 6:16; Luc. 22:20). ¡Kay tʼinkaswan mayta kusikunku! Dios akllasqakunapaq tukuy imata ruwasqanrayku, manaña kay Jallpʼapi wiñaypaq kawsayta suyankuñachu. Jallpʼapi kawsayninkuta saqinku, imaraykuchus Jesuswan janaqpachamantapacha Juicio Pʼunchaypi, kusisqas juzganqanku, kamachinqanku ima (Romanos 8:17, ñawiriy).

9, 10. a) ¿Maykʼaqtaq espíritu santowan cristianosta akllayta qallarikurqa, imawantaq kaykuna churanakunkuman karqa? b) ¿Imaynatá akllasqa cristianosta yanapakurqa?

⁹ Kay Pentecostés 33 watapi, 120 kasukuq  qharis warmis ima, janaqpachaman Jesuswan Juicio Pʼunchaypi kamachinankupaq akllasqas karqanku. Chay kutipi tukuy tantasqa kaqkuna, espíritu santowan bautizasqas karqanku, jinamanta ñawpa kaq akllasqa cristianosman tukurqanku. Kayqa Janaqpachaman rinankupaq juk qallariylla karqa. Chaymantapacha Supayqa mayta paykunata qhatiykacharqa, paykunataq sinchita sayananku karqa. Kawsaymanta pilluta japʼinankupaqqa, wañuykama sinchita sayananku karqa (Apo. 2:10).

¹⁰ Jehovaqa akllasqa cristianos tukukuy pʼunchaykama chiqan runa kanankupaq, llaqtanwan Palabranwan ima, yachachirqataq, sunqucharqataq. Apóstol Pablo Tesalonicamanta akllasqa hermanosninman jinata qillqarqa: “Imaynatachus uj tata wawasninta yanapan, ajinallatataj qankunata yanaparqayku. Mayta qankunata nerqayku Diospa kawsaynin jina kawsanaykichejtaj, pichus wajyasurqachej reinompi, jatun kaynimpa kʼanchaynimpi kawsanaykichejpaj”, nispa (1 Tes. 2:11, 12).

11. ¿Ima qillqakunatataq Jehová espiritual ‘nacionnin Israelman’ qurqa?

¹¹ Akllasqasta tantayta qallarikuptin, Jehovaqa Jesús kay Jallpʼapi willasqanmanta wakin cristianoswan qillqachirqa. Chantapis, allinta akllasqaswan apanakusqanmanta, yachachisqanmanta ima, tukuypis sutʼita yachanakupaq qillqachirqa. Chayrayku Payqa Griego Qillqakuna qillqakunanpaq yuyaycharqa, Hebreo Qillqakunawan khuska kananpaqtaq churarqa. Hebreo Qillqakunaqa, kay Jallpʼapi Israel llaqtapaq ñawpaqta qillqakurqa, paykuna Dioswan sumaqta apanakuchkaptinku. Griego Qillqakunataq “Diospa nacionnin Israel” espiritualpaq astawanqa qillqakurqa, paykunataqa Cristop hermanosnin kanankupaq, Diospa espiritual churisnin kanankupaq akllakurqa. Chaywanpis, imaynatachus mana israelitas kaqkuna Hebreo Qillqakunawan yanapachikurqanku, kikillantataq mana akllasqa cristianosqa Griego Qillqakunata ñawirispa, kasukuspa ima, mayta yanapachikunkuman (2 Timoteo 3:15-17, ñawiriy).

12. ¿Imatataq Pablo akllasqa cristianosman yuyarichinman karqa?

¹² Ñawpa siglopi cristianosta espíritu santowan akllakurqa, chiqan runasjina qhawasqa kasqankutataq nikurqa, jinamanta janaqpachapi herenciankuta Japʼinankupaq; akllasqas kasqankuqa mana kay jallpʼapi reyes kanankupaqchu karqa. Chaywanpis, wakinkunaqa mana chayta entienderqankuchu, chayrayku hermanosninpa chawpipi uqharikuyta qallarirqanku, reyesñapis kankumanjina. Chayrayku Pabloqa nirqa: “Qankunaqa sajsasqaña kankichej, qhapajñataj kankichej, reyes jina mana noqallaykuwan kamachishankichej. Walej kanman cheqamanta reyes jina kamachinaykichej, noqaykupis qankunawan khuska chay reinopi kanaykupaj”, nispa (1 Cor. 4:8). Apóstol Pabloqa chay tiempomanta hermanosman jinata yuyarichirqa: “Mana noqaykoqa creesqaykichejmanta pratrones jinachu kayta munayku; astawanqa qankunata yanapayta munayku kusisqa kanaykichejpaj”, nispa (2 Cor. 1:24).

Imaynatataq machkhachus kanankuta juntʼakun

13. ¿Imaynatá 33 watamantapacha janaqpachaman riqkunata akllakuchkan?

¹³ Akllasqa cristianosqa 144.000 kanku, manataq tukuyninta ñawpa kaq siglopi tantakurqachu. Apostolespa tiemponpiqa, kay tantamanta kanankupaq wak hermanosta akllakullarqapuni, chaywanpis kunan qhipa pʼunchaykunapiqa juk chhikallaña akllasqakunaqa kanku. Chaywanpis, janaqpachaman riqkunata kunan pʼunchaykunapipis akllakuchkallanpuni (Mat. 28:20, NM). Jesús 1914 watapi kamachiyta qallarisqanmantapacha, usqhayllata wakin ruwaykunata ruwakun.

14, 15. ¿Imaynamanta kunanpis janaqpachaman riqkunata akllakuchkan?

¹⁴ Qallarinapaqqa, Jesús janaqpachapi Diospa Reinonwan, ima churanakuytapis picharqa (Apocalipsis 12:10, 12, ñawiriy). Chaymanta paywan khusqa kamachiqkunata, 144.000 kanankukama akllayta qallarirqa. Qhawasqanchiqmanjina, 1930 watapaq kay yupayqa ñapis  juntʼakuchkarqaña, imaraykuchus Bibliamanta uyariqkunaqa, manaña janaqpachaman riyta suyarqankuchu. Espirituqa manaña paykunaman rikuchichkarqachu Diospa churisnin kasqankuta (Romanos 8:16, kikinchay). Astawanpis paykunaqa, “waj ovejas” kasqankuta nirqanku, paykunaqa kay paraíso Jallpʼapi wiñaypaq kawsayta suyachkanku (Juan 10:16). Chayrayku, 1935 watamantapacha “may chhika runasta” tantakunanpaq astawan willakurqa, paykunaqa ‘jatun ñakʼariypi’, Apóstol Juan juk musquypijina rikusqanmanjina mana wañunqankuchu (Apo. 7:9, 10, 14).

¹⁵ Chaywanpis, 1930 watamantapacha wakinkunata janaqpachaman rinankupaq akllakurqa. ¿Imaraykutaq? Wakin kutiqa, akllasqa kaqkunamanta saqra ruwayman tikrakuqkunata reemplazakunanpaq wakkunata akllakun (Apocalipsis 3:16, kikinchay). Pabloqa, wakin saqraman tikrakuqkunata pay kikin riqsirqa (Fili. 3:17-19, NM). Kunanqa, ¿pikunatataq chaykunata reemplazananpaq Jehová akllanman karqa? Chaytaqa paylla yachan. Chaywanpis, mana musuq cristianosmantachu akllanman karqa, manaqa unaytaña cristianos kaqkunamanta chayri juntʼa sunqu kasqankuta rikuchiqkunamanta akllanman karqa. Jinata Jesús paywan kaqkunata akllarqa, Señorpa cenanta ruwachkaptin (Luc. 22:28). *

16. ¿Imaraykutaq Jehovaman akllasqa cristianosmanta agradecekusunman, imatataq paykuna ruwanankuta suyasunman?

¹⁶ Chaywanpis, 1930 watamantapacha akllasqa kaqkunaqa, mana saqraman tikrakuqkunata reemplazanallankupaqchu akllakun. Qhawasqanchikmanjina, Jehovaqa kay tukukuy pʼunchaykunapi akllasqa cristianos kanankuta munarqa, kay “Jatun Babilonia” thuñisqa kanankama (Apo. 17:5). * Chiqamanta nisunman maykʼaqchus Jehová nisqanpi, 144.000 akllasqas juntʼakunqa, chantapis janaqpachapi kamachinankupaq maychus kanankupi churakunqa. Chantapis, Diospa Palabran nisqanmanjina kay ‘may chhika runas’, tukuyninku Diosta tukuy sunquwan kasukunqanku. Juk chhikamantawan “jatun ñakʼariy tiempomanta llojsimojkuna” mana Supaypa pachanwan khuska wañunqankuchu, manaqa kusisqas Diospa musuq pachanman yaykunqanku.

¡Janaqpacha reinoqa juntʼakuchkanña!

17. Kay 1 Tesalonicenses 4:15-17, chantapis Apocalipsis 6:9-11, nisqanmanjina ¿imatá akllasqa cristianos wañunankukama sinchita sayaqkunawan ruwakun?

¹⁷ May achkha akllasqa cristianos, 33 watamantapacha sinchi iñiyta rikuchinku, wañunankukamataq sinchita sayanku. Paykunata Diospa Reinonman yaykunankupaqjina qhawakun. Chantapis, Jesuspa kutimuynin qallarikusqanmantapacha, janaqpachapi  herenciankuta japʼinkuña (1 Tesalonicenses 4:15-17; Apocalipsis 6:9-11, ñawiriy).

18. a) ¿Akllasqakunamanta Jallpʼapiraq qhipakuqkuna imatataq suyachkanku? b) ¿Imatataq wak ovejasmanta kaqkuna akllasqakunamanta ninku?

¹⁸ Akllasqakunamanta Jallpʼapiraq kaqkunaqa, Diosta mana wasanchaspa yupaychallaptinkupuni, janaqpachapi herenciankuta japʼinankuta yachanku. May achkha wak ovejasmanta kaqkuna, akllasqaspa iñiyninkuta qhawaspa, Apóstol Pablo akllasqa Tesalonicamanta hermanosman nisqantajina nillankutaq: “Chayrayku noqaykuqa Diospa igleciasnimpi may kusiywan parlayku qankunamanta, imaraykuchus tukuy creeywan pacienciakorqaykichej chejniywan qhatiykachasqa, ñakʼarichisqa kashaspapis. Chay imasqa sutʼita rikuchishan Diospa juicion cheqan kasqanta, qankunataj chaynejta Diospa reinonman yaykunapaj jina qhawasqa kankichej. Chayrayku chay jinata ñakʼarishankichej”, nispa (2 Tes. 1:3-5). Janaqpachaman riqkunamanta tukuyninku kay Jallpʼapi wañupusqankutawan —maykʼaqllapis kachun—, Diospa janaqpacha reinon juntʼakunqa. ¡Kayqa may kusiychá kanqa janaqpachapi kay pachapipis!

[Sutʼinchaykunasnin]

¿Kay tapuykunaman kutichiwaqchu?

• Juicio Pʼunchaymanta parlachkaspa, ¿imatataq Dios Abrahamman nirqa?

• ¿Imaraykutaq Abraham chiqan runapaq qhawasqa karqa?

• ¿Ima tʼinkatataq japʼinqanku Abrahampa miraynin, chiqan runapaq qhawasqas kasqankurayku?

• ¿Imatataq tukuy cristianos mana iskaychakuspa suyachkanchik?

[Tapuykuna]

[22 paginapi dibujo/foto]

Jesuspa discipulosninqa Diospa Reinonmanta kʼajaywan japʼikunku

[23 paginapi dibujo/foto]

Jehovaqa Pentecostés 33 watapi Abrahampa puchuq mirayninta akllayta qallarirqa

[25 paginapi dibujos/fotos]

Wak ovejas, kay tukukuy pʼunchaykunapi, paykunap chawpinpi akllasqa cristianos kasqankumanta mayta kusikunku.