‘Imaynatachus yachachichkasqanchikta reparana’

“Diospa Palabranta willaraypuni [...]; jinataj juchata reparachiy, kʼamiy, runastataj sonqonkupi kallpachay, pacienciawan allinta yachachispa, [imaynatachus yachachichkasqaykitataq reparay]”. (2 TIM. 4:2.)

1. ¿Ima ruwaytataq Jesús discipulosninman kamachirqa, imaynatataq Jesús chayta ruwarqa?

JESÚS Jallpʼapi willachkaptin runata jampirqa chaywanpis, mana jampiqtajinachu chayri milagrosta ruwaqtajinachu riqsirqanku, manaqa yachachiqtajina riqsirqanku (Mar. 12:18, 19; 13:1). Paypaqqa, Diospa Reinonmanta allin willaykunata willay, imamantapis aswan sumaq karqa, chayllatataq kunan tiempopi discipulosninmanta nikunman. Cristianosmanqa, Jesuspaq discipulosta ruwananchikta kamachiwanchik, chayta ruwanapaqtaq Jesús yachachisqanta yachachinanchik tiyan (Mat. 28:19, 20, NM).

2. ¿Imatataq Jesús kamachiwasqanchikta juntʼanapaq ruwasunman?

² Jesús kamachiwasqanchikta juntʼananchikpaq, imaynatachus yachachichkasqanchikta  sapa pʼunchay reparananchik tiyan. Apóstol Pabloqa, tukuy cristianos sumaq yachachiq kanankumanta parlaspa Timoteoman jinata qillqarqa: “Kawsayniykita allinta qhawakuy, jinallataj imatachus yachachisqaykitapis. Chay imaspeqa sinchʼita sayay, imaraykuchus ajinata ruwaspa, qan kikiykita salvakunki, jinallataj uyarisojkunatapis”, nispa (1 Tim. 4:16). Pablo runaman yachachinamanta parlachkaspa, mana runap umanta yachaywan juntʼanallamantachu parlachkarqa. Sumaq yachachiq cristianoqa, runap sunquman chayan, runas mana allin ruwayninkuta saqinankupaq, chayta ruwanapaqtaq imaynatachus yachachichkasqanchikta reparananchik tiyan. Jina kaptinqa, ¿imaynatá Diospa Reinomanta allin willaykunata sumaqmanta yachachisunman? (2 Tim. 4:2.)

Sumaqta yachachinapaq wakichikuna

3, 4. a) ¿Imaynatataq astawan sumaqta yachachiyta atisunman? b) ¿Imaynatá Diosmanta Parlayta Yachanapaq tantakuy, sumaq yachachiq kananchikpaq yanapawanchik?

³ Imallatapis allinta ruwanapaqqa, yachay, qhaway, amañay ima, kanan tiyan. Jinallataq, sumaq yachachiq kananchikpaqqa, kay kimsa ruwaykunamanta mana qunqanachu tiyan. Diosmanta mañakuspa, yachaqananchik tiyan, jinamanta yachaqachkasqanchikta allinta entiendenanchikpaq (Salmo 119:27, 34, ñawiriy). Unaytaña yachachiqkuna imaynatachus yachachisqankuta qhawarina, paykunajina ñuqanchikpis yachachinanchikpaq. Chantapis, yachakusqanchikmanjina ruwananchik tiyan, jinamanta sumaq yachachiq kasunchik (Luc. 6:40; 1 Tim. 4:13-15).

⁴ Jehovaqa may Sumaq Yachachiqninchik, Jallpʼapi llaqtanniqtataq kamachisninman sumaqta wakichin, jinamanta imaynatachus willayninkuta juntʼanankuta yachanankupaq (Isa. 30:20, 21). Qutuchakuykunapi, sapa semana Diosmanta Parlayta Yachanapaq tantakuy ruwakun, chaypitaq hermanosta Diospa Reinonmanta willamunankupaq sumaqta yachachikun. Kay tantakuypiqa Bibliawan yachachikun. Diospa Palabranqa, mana imatachus yachachinallanchiktachu yachachiwanchik, manaqa imaynamantachus aswan sumaqmanta yachachiyta atisqanchikta, rikuchiwanchik. Diosmanta Parlayta Yachanapaq tantakuypi, sumaq yachachiq kananchikpaq, Biblia nisqanmanjina yachachinanchikta kutin kutita yuyarichiwanchik, chantapis tapuykunawan, entiendeyta atisqankumanjinalla yachachinanchikta niwanchik, runatataq tukuy sunquwan yanapayta munasqanchikta ima. Kay ruwaykunatataq, jukmanta juk sutʼinchasunchik. Chantapis, imaynatachus yachakuqpa sunqunman chayayta atisqanchikta qhawasunchik.

Diospa Palabranwan yachachina

5. ¿Imaraykutaq Bibliamantapuni runaman yachachinanchik tiyan?

⁵ Jesusqa, Jallpʼapi tukuy runamanta aswan sumaq yachachiq karqa, paytaq Bibliamantapuni runaman yachachiq (Mat. 21:13; Juan 6:45; 8:17). Yuyaynillanmanta parlananmantaqa, pichus kachamurqa, paypa sutinpipuni yachachiq (Juan 7:16-18). Ñuqanchikpis Jesusjina yachachinanchik tiyan. Wasimanta wasi willachkaptinchik chayri runaman yachachichkaptinchik, Diospa Palabranmantapuni yachachina tiyan (2 Tim. 3:16, 17).  Ñuqallanchikmanta ima yachaypis —sumaq kaptinpis— mana jaykʼaq Diospa Palabranjinaqa, runata yanapayta atinmanchu. Biblia Diospa yuyaychasqan kasqanrayku, may atiyniyuq kasqanta mana qunqanachu. Chayrayku, imamantapis yachachichkaspa, yachakuqkuna aswan sumaqta entiendenankupaq, Bibliankuta ñawirichinanchik tiyan (Hebreos 4:12, ñawiriy).

6. ¿Imaynatá yachachiq, yachakuq sumaqta entiendenanpaq yanapanman?

⁶ Jina kaptinqa, ¿manañachu runaman yachachiq rinapaq, wakichikunanchik tiyan? Mana, astawanpis yachakuqwan Bibliamanta ima pʼitikunatachus ñawirisunchik, chayta ñawpaqmanta wakichikunanchik tiyan. Ima pʼitikunamantachus creesqanchik urqhusqa kachkan, chay pʼitikunata astawan ñawirisunman. Chantapis, yachakuq sapa pʼitita ñawirisqanta, entiendechkasqanta reparananchik tiyan (1 Cor. 14:8, 9).

Tapuykunawan sumaqta yachachiy

7. ¿Imaraykutaq tapuykuna sumaqta yachachinapaq yanapawasunman?

⁷ Sumaq tapuykunaqa yachakuqta tʼukurichin, jinamanta yachachisqanchik yachakuqpa sunqunman chayanqa. Bibliap pʼitinkunata ñawiriptiyki, mana qampunichu sutʼinchanayki tiyan, yachakuqta tapuriwaq, jinamanta pay kikin sutʼinchananpaq. Wakin kutipiqa, ichapis juk tapuyllawan yachachichkasqanchikta sutʼinchasun, wakin kutipitaq ichapis kutin kutita tapuna kanqa. Yachakuqta, astawan parlarichispa, imaraykuchus Biblia jinata yachachisqanta entiendenanpaq yanapasunchik, pay kikinmantataq Biblia chiqa kasqanta rikunqa (Mat. 17:24-26; Luc. 10:36, 37).

8. ¿Imaynamanta imachus yachakuqpa sunqunpi kasqanta yachasunman?

⁸ Librosninchikqa tapuykunawan, kutichiykunawan ima, yachachiwanchik. Pikunachus ñuqanchikwan Bibliamanta yachakuqkunaqa, parrafospi tapuykunapaq kutichiykunata usqhayllata tarinku. Chaywanpis, sumaq yachachiqqa, mana chay kutichiyllatachu suyan. Ichapis yachakuqqa, Biblia imatachus khuchichakuymanta yachachisqanta sutʼinchayta atinman (1 Cor. 6:18). Chaywanpis, yachachiqqa tapuykunawan imachus yachakuqpa sunqunpi kasqanta yachanqa. Ichapis jinata tapunman: “¿Imaraykutaq Biblia khuchichakuy jucha kasqanta yachachiwanchik? ¿Imatataq qam Bibliap nisqanmanta niwaq? ¿Bibliapi Dios kamachisqan allinninchikpaqchu?”, nispa. Imaynatachus chay tapuykunaman kutichisqanqa, imachus yachakuqpa sunqunpi kasqanta rikuchiwasunchik (Mateo 16:13-17, ñawiriy).

Entiendenankupaqjina yachachina

9. ¿Imatataq Bibliamanta yachachichkaspa reparananchik tiyan?

⁹ Bibliap yachachisqanqa, entiendenapaqjina qillqakun. Chaywanpis, llulla religión mana allinta yachachisqanrayku, wakin yachakuqkunaqa mayqinchus chiqa yachachiykuna kasqankuta mana sutʼita yachankuchu. Ñuqanchikqa yachachiqkunajina, Biblia yachachisqanta entiendenankupaqjina  yachachinanchik tiyan. Sumaq yachachiqkunaqa, sutʼita, maychus kaqta, entiendenankupaqjina ima, yachachinku, jinamanta Biblia yachachisqanwan runap umanta mana muyuchinkuchu. Chayrayku, wak imasmanta parlaspa mana yachachinkuchu, nitaq pʼitikunata ñawirisqankuta tukuyninta sutʼinchankuchu. Astawanqa, ima pʼititachus yachachichkanku, chay pʼitillata allinta sutʼinchanku. Yachakuqqa astawan yachakusqanmanjina, Bibliapta aswan ukhu yachachiykunata entiendellanqa (Heb. 5:13, 14).

10. ¿Sapa yachachisqanchikpi machkhatataq yachachisunman?

¹⁰ ¿Machkha yachaytataq sapa yachachisqanchikpi yachachinanchik tiyan? Mana niyta atisunmanchu machkhatachus tukuypis yachachinankuta, imaraykuchus sapa yachachiqqa mana kikintachu yachachin, kikillantaq yachakuqkunapis mana kikintachu japʼiqanku. Imaynapis kachun, ñuqanchikqa yachakuq sinchi iñiyniyuq kananpaq yanapasunchik. Chayrayku, ñawirinankupaq, entiendenankupaq ima, suyarinanchik tiyan, jinamanta Diospa Palabran chiqapuni kasqanta yachanqanku. Yachakuq atisqanmanjinalla parrafosta ñawirisunchik, chaywanpis juk parrafollapi mana anchataqa qhipakunachu tiyan. Yachakuq juk yachachiyta allinta japʼiqasqantawan, wak yachachiytañataq yachachinanchik tiyan (Col. 2:6, 7).

11. ¿Imaynatá Pablo yachachirqa, imatá Pablo yachachisqanmanta yachakunchik?

¹¹ Apóstol Pabloqa sumaq willaykunata runa entiendenanpaqjina yachachirqa. Sumaq yachayniyuq kaspapis, mana may akllasqa rimaykunawanchu yachachirqa (1 Corintios 2:1, 2, ñawiriy). Bibliamanta chiqa yachachiykuna pillapis entiendenanpaqjina kasqanrayku, kʼacha runaqa kusikuntaq, astawantaq yachakuyta munan; Bibliamanta yachakunapaqqa, mana may sumaq yuyayniyuqchu kana tiyan (Mat. 11:25; Hech. 4:13; 1 Cor. 1:26, 27).

Yachakusqanku may allin kasqanta rikuchinachik

12, 13. ¿Imaraykutaq yachakuq yachakusqanta ruwanan tiyan? Juk kamachiyta sutʼinchay.

¹² Yachachisqanchik sumaq puquyniyuq kananpaq, runap sunquman chayananchik tiyan. Yachakuqqa, Biblia yachachisqan paypaq may allin kasqanta entiendenan tiyan. Bibliap nisqanta ruwaptinqa, kawsaynin allinchakusqanta rikunan tiyan (Isa. 48:17, 18).

¹³ Hebreos 10:24, 25, sutʼinchachkasqanchikta nisunman, chaypi cristianos kallpachakunakupaq, munakuyta rikuchikunankupaq ima, tantakunankuta kamachikun. Yachakuq manaraq tantakuyman riptin, imaynatachus tantakuy ruwakusqanta, imamantachus yachachikusqanta ima, willarisunman. Chantapis, Diosta yupaychanapaq tantakusqanchikta nisunman, tukuytataq yanapasqanta rikuchisunman. Chaymantataq yachakuqta ñuqanchikwan khuska tantakuyman rinanta mañarisunman. Yachakuqqa Biblia nisqanta kasukunan tiyan, Jehová Diosta kusichiyta munasqanrayku, mana ñuqanchikwan allinpaq qhawachikuyta munasqanraykuchu (Gál. 6:4, 5).

14, 15. a) ¿Imatataq yachakuq Jehovamanta yachakunman? b) Diospa kayninta riqsiy ¿imaynatá yachakuqta yanapanqa?

¹⁴ Yachakuqkunaqa Bibliamanta yachakuspa, yachakusqankuta ruwaspa ima, Jehovata sumaqta riqsinqanku, astawantaq payta munakunqanku (Isa. 42:8, NM). Jehovaqa munakuyniyuq Tata, tukuy imamanta Ruwaqnintaq, Dueñontaq. Mana chayllachu, pikunachus payta munakunku, Paytataq yupaychanku, paykunamanqa sumaqmanta imaynachus kasqanta, imatachus ruwayta atisqanta ima, riqsichin (Éxodo 34:6, 7, ñawiriy). Manaraq Moisés israelitasta Egiptomanta urqhumuchkaptin, Jehovaqa kay jinata riqsichikurqa: “NOQA KANI PICHUS KANI CHAY”, nispa (Éxo. 3:13-15). Kay rimaykunawan Jehovaqa, akllasqa llaqtanpaq munayninta juntʼakunanpaq tukuy imata ruwakuyta atisqanta, rikuchichkarqa. Jinamanta israelitasqa, Jehová  Salvaq, tukuy imata Jaywaq, nisqanta Juntʼaq, wak imaspis kasqanta riqsirqanku (Éxo. 15:2, 3, NM; 16:2-5; Jos. 23:14).

¹⁵ Ichapis yachakuqpa kawsayninpiqa, Dios Moisestajina mana yanapanqachu. Chaywanpis, yachakuqqa astawan iñiyniyuq kaptin, Bibliap kamachisqanta astawan munakuptin, yachakusqantataq ruwaptin, Jehovamanta kallpanta, yachayninta, yanapayninta ima, mañakunqa. Dios kutichisqanta qhawaspataq, yachakuqqa Jehová kamachisninta Jarkʼaq, mana michʼakuspa Quq, may yachayniyuq Yuyaychaq, atienekunapaqjina kasqantataq rikunqa (Sal. 55:22; 63:7; Pro. 3:5, 6).

Chiqamanta runata yanapayta munasqanchikta rikuchina

16. ¿Imaraykutaq ñuqanchikpa atiynillanchik sumaq yachachiq kananpaq mana yanapawanchikchu?

¹⁶ Mana sumaq yachachiq kaptiykiqa ama llakikuychu. Jehovawan Jesuswan tukuy pachantinpi Bibliamanta imaynatachus yachachikuchkasqanta allinta qhawachkanku (Hech. 1:7, 8; Apo. 14:6). Paykuna, ñuqanchik kallpachakuspa parlasqanchikta tʼinkanqanku, jinamanta yachachisqanchik kʼacha sunquyuq runata yanapananpaq (Juan 6:44). Yachachiqpa munakuynin, chiqanmanta yachakuqta yanapayta munasqan ima, mana allinta yachachiyta atiptinpis, sumaqta yachachiqta yanapanqa. Apóstol Pabloqa yachakuqkunata munakunanta yacharqa, chaytataq ruwasqanwan rikuchirqa (1 Tesalonicenses 2:7, 8, ñawiriy).

17. ¿Imaynamanta sapa juk yachakuqta chiqamanta yanapayta munasqanchikta rikuchisunman?

¹⁷ Ñuqanchikpis sapa juk yachakuqkunata munakusqanchikta rikuchisunman. ¿Imaynamanta? Sumaqta yachakuqkunata riqsinanchikpaq tiempochakusqa. Bibliamanta paykunawan parlaspa, imaynatachus kawsakuchkasqankuta yachasunchik. Ichapis, kawsayninkupi yachakusqanta juntʼachkasqankutaña rikusunchik, wakinkunataq ichapis manaraq juntʼachkasqankuta rikusunchik. Yachakuqkuna yachakusqankuta imaynatachus juntʼayta atisqankuta sutʼincharispa, munayninchikta rikuchichkanchik, jinamanta Cristopta chiqa discipulosnin kanankupaq yanapasunchik.

18. ¿Imaraykutaq may sumaqpuni yachakuqpaq Diosmanta mañapuy, paywan khuskataq Diosmanta mañakuy?

¹⁸ Yachakuqwan Diosmanta mañakuyqa may sumaq, jinallataq paypaq mañapuypis.  Yachakuqqa, kay kimsa ruwaykunata yachachiyta munasqanchikta rikunan tiyan: Ruwaqninchikta allinta riqsinanta, payman astawan qayllaykunanta, paypa yuyaychasqanmanjina purinanta ima (Salmo 25:4, 5, ñawiriy). Yachakuq yachakusqanta ruwananpaq, Jehovamanta yanapata mañapunanchik tiyan, jinamanta yachakuqqa mana yachachisqanchikta ‘uyarillanqachu, astawanqa kawsayninpi’ yachakusqanta ruwanqa (Sant. 1:22). Chantapis, sunqumanta mañakusqanchikta uyarispa, paypis Diosmanta mañakuyta yachanqa. ¡Bibliamanta yachakuqkunata Dioswan allinta apanakunankupaq yanapasqa, mayta kusikunchik!

19. ¿Ima tapuymantaq qhipan yachaqanapi kutichikunqa?

¹⁹ Jehovamanta sutʼinchaqkunaqa kunankama suqta junu khuskanniyuqmanta astawanña kanku, paykunataq runaman allinta yachachinankupaq mayta wakichikunku, tukuypis Jesuspa kamachisqanta chiqa sunquyuq runaman riqsichiyta munanku. Jinata ruwaspa, ¿machkha runatataq yanapachkanku? Kay tapuyman qhipan yachaqanapi kutichikunqa.

¿Yuyarinkichu?

• ¿Imaptintaq cristianos imaynatachus yachachichkasqanchikta reparananchik tiyan?

• ¿Imataq aswan sumaq yachachiqkuna kananchikpaq yanapawasun?

• ¿Imataq yachakuqta astawan yanapanqa mana sumaq yachachiq kaptinpis?

[Tapuykuna]

[13 paginapi dibujo/foto]

¿Ñachu Diosmanta Parlayta Yachanapaq tantakuypi parlachkankiña?

[14 paginapi dibujo/foto]

¿Imaraykutaq yachakuqta yachachichkaspa Bibliata ñawirichinanchik tiyan?

[16 paginapi dibujo/foto]

Yachakuqwan khuska Diosmanta mañakuspa, payta Dios yanapananpaq mañapuy