Kawsaq yaku juturisman pusanapaqjina kaqkuna

“Corderoqa paykunata michenqa, kawsaj yaku juturisninmantaj pusanqa.” (APO. 7:17.)

1. ¿Imaynatataq Diospa Palabran janaqpachaman riqkunata sutʼinchan, ima ruwaytataq Jesús paykunaman saqirqa?

DIOSPA Palabranqa akllasqa kaqkunata “allin kamachi, yuyayniyojtaj” nispa sutichan, Cristop munayninta ruwasqankurayku. Cristo kay ‘kamachita’ 1918 watapi watukuq jamusqanpi, kay “kamachi” paypa kamachisqanta ruwachkaqta taripan, nisunman ‘horanpi mikhunata jaywachkasqanta’, chayrayku “tukuy kapuyninta qhawanampaj” chay kamachiman saqirqa (Mateo 24:45-47, ñawiriy). Chayrayku paykunaqa, manaraq janaqpachaman ripuchkaspa, Jallpʼapi cristiano hermanosninpaq llamkʼanku (Mal. 3:1-3).

2. ¿Imastaq kanku Jesucristop kapuynin?

² Juk patronqa kapuninwan imatapis ruwayta atin. Jehovaqa Jesucristota Rey kananpaq churan, paypa kapuynintaq kay Jallpʼapi Diospa Reinonpa tukuy kapusqan. Juknin Reinop kapuyninqa kay ‘may chhika runas’, paykunatataq apóstol Juan juk musquypijina rikurqa, jinatataq qillqarqa: “may chhika runasta rikorqani, mana yupay atinata tukuy nacionesmanta, ayllusmanta, runasmanta, tukuy parlaykunamantawan. Paykunaqa kamachina  tiyanaj ñawpaqempi, Corderoj ñawpaqempiwan kasharqanku, yuraj pʼachaswan pʼachallisqas, makisninkupi palma japʼirisqa” (Apo. 7:9).

3, 4. Kay ‘may chhika runas’, ¿ima tʼinkayuqtaq kanku?

³ May chhika runas, Jesús nisqanmanjina ‘wak ovejasmanta’ kaqkuna ima, Jallpʼapi wiñay kawsayta suyachkanku (Juan 10:16). Chaymantapis kay wak ovejasqa Jesuspi atienekunku, paytaq “kawsaj yaku juturisninmantaj pusanqa”, maypichus Dios “paykunaj ñawisninkumanta tukuy waqayta pichanqa”. Chayrayku, “paykunaqa pʼachasninkuta yurajyachirqanku, Corderoj yawarninpi tʼajsaspa” (Apo. 7:14, 17). Jesuspi iñiyta churasqankurayku, Diosqa paykunata yuraq pʼachasniyuptajina qhawan. Diosqa Abrahamta munasqa masintajina, paykunata chiqan runastajina qhawan.

⁴ May chhika runasqa chay wak ovejasmanta kaqkuna, chiqan runapaq qhawasqa kasqankurayku, “jatun ñakʼariy” chayamuptin mana wañunqankuchu (Sant. 2:23-25). Jehovamantaq, qayllaykuyta atinku, tanta jinataq Armagedonpi mana wañunqankuchu (Sant. 4:8; Apo. 7:15). Paykunaqa, mana wak tantachu kanku, nitaq munayninkutachu ruwanku. Mana chayqa, tukuy sunquwan Diosta yupaychanku, janaqpachamanta Rey Jesús nisqanta, jinallataq Reypa wawqisninmanta kay Jallpʼapi puchuqkuna nisqankuta may kusiywan kasukunku.

5. ¿Imaynatataq ‘may chhika runas’ Cristota, akllasqa hermanosnintawan yanapanku?

⁵ Akllasqa cristianosqa, sapa pʼunchay Supaypa pachanpi achkha chʼampaykunata muchunanku tiyan. Chaywanpis, wak ovejasmanta compañerosninkuwan yanapachikunku. Akllasqa kaqkunaqa kay pachapi pisi kanku, chaywanpis ‘may chhika runas’ kaqkunaman sapa wata waranqas yapakunku. Akllasqasqa, tukuy pachapi yaqha pachak waranqa qutukuna kasqanrayku, mana sapa juk qututa paykuna kikin qhawayta atinkuchu. Chayrayku, ‘may chhika runasmanta’ wakichisqa qharikunata qutusta qhawanankupaq churakun. Paykunaqa, ‘allin kamachi, yuyayniyuqwan’ khuska Jesuspa kapuyninta qhawanankupaq yanapachkanku.

6. ¿Imatataq ‘may chhika runas’ akllasqa cristianosta yanapanankumanta parlakurqa?

 ⁶ Wak ovejas akllasqasta sumaqta yanapanankumanta, profeta Isaiasniqta qillqakurqaña: “Chantá Israelitasman nillantaj Tata Diosqa: Egiptomanta campo runasqa, Etiopiamanta ranqherospis, Sabá llajtamanta kaj jatuchaj runas ima qanman kʼumuykukusonqanku, jinataj qanpa wata runasniyki kanqanku. Qhepaykita cadenaswan watasqa jamonqanku”, nispa (Isa. 45:14). Kay Jallpʼapi wiñaypaq kawsayta suyaqkunaqa, Diospa akllasqasninpa qhipanta richkanku, jinallataq Jallpʼapi Diospa llaqtanta Kamachiqkunap qhipanta. Wak ovejasmanta “campo runasqa”, tiemponkuta chanta kapuyninkutapis, tukuy sunquwan runaman willanapaq qunku, Cristo kay llamkʼayta hermanosninman kamachisqanmanjina (Hech. 1:8; Apo. 12:17).

7. ¿Imapaqtaq may chhika runaman wakichikuchkan?

⁷ Kay may chhika runasqa akllasqakunata mana yanapachkallankuchu, manaqa juk cimientojina kanankupaq sumaqta wakichikuchkanku, Armagedonmanta qhipanman Jallpʼapi kawsaqkunata yanapanankupaq. Paykunaqa juk cimientojina sumaq churasqa, allin sayasqa, kananku tiyan, paykunaqa mana patronpa nisqanta kasukullankuchu manaqa tukuy sunqu nisqanta ruwanku. Kunanqa, tukuypis Jesuspaq allinta llamkʼayta atisqanchikta rikuchiyta atisunman. Kunan kasukusunchik chayqa, iñiytataq rikuchisunchik chayqa, kikillantataq musuq pachapi Jesús kamachiwasqanchikta kasukusunchik.

May chhika runasqa iñiyninkuta rikuchichkanku

8, 9. ¿Imaynatataq ‘may chhika runas’ iñiyninkuta rikuchinku?

⁸ Kay akllasqa cristianospa hermanosninkuqa imaymanamanta iñiyninkuta rikuchinku. Ñawpaq kaq, Diospa Reinonmanta sumaq willaykunata willakunanpaq yanapachkanku (Mat. 24:14; 28:19, 20). Iskay kaq, Jallpʼapi Diospa llaqtanta kamachiqkunata sumaq sunquwan kasukuchkanku (Heb. 13:17; Zacarías 8:23, ñawiriy).

⁹ Kimsa kaq, Diospa kamachisqanmanjina kawsakunku, jinamanta akllasqa hermanosninkuta yanapachkasqankuta rikuchinku. Chantapis, kaykunata rikuchinku; “munakuyniyuq kay, kusikuyniyuq kay, sunqu tiyaykusqa kay, pacienciayuq kay, khuyakuyniyuq kay, kʼacha kay, iñiyniyuq kay, llampʼu sunquyuq kay, saqra munayninwan mana atipachikuq kay ima” (Gál. 5:22, 23, NM). Kunan tiempopiqa, kay allin ruwaykunaqa pisillata rikukun, chaywanpis “aychaj ruwasqasninqa” may chhika qhawakun. Chaywanpis, may chhika runasmanta kaqkunaqa kaykunata chiqninku, “khuchichakuy, chʼichi kawsay, millay puriy, lantita yupaychay, layqa kay, chejninakuy, maqanakuy, tumpanakuy, phinanakuy, churanakuy, phiñanakuspa tʼaqanakuy, waj yachachiykunata kasuy, envidianakuy, machakuykuna, millay fiestaspi puriykuna, chantá waj millay imaspiwan” (Gál. 5:19-21).

10. May chhika runamanta kaqkuna, ¿imatataq ruwayta munanku?

¹⁰ Juchasapa kasqanchikrayku, espiritup puquyninta puquchiyqa, aychap munayninta qhisachayqa, kay Supaypa pachanwan maqanakuyqa, mana atikullanchu. Chaywanpis, aychap munayninwan, pantaykunawan, machuyaywan chayri unquykunawan ima, mana atipachikunanchikchu tiyan, chayqa iñiyninchikta llawchhiyachinman, Jehovata munakusqanchiktataq chiriyachinman. Jehová jatun ñakʼariy jamuptin, may chhika runasta parlasqanmanjina jarkʼananta mana iskaychakuspa suyasunman.

11. ¿Imatataq Supay cristianosta llawchhiyachinanpaq apaykachan?

¹¹ Ñuqanchikqa Supay enemigonchik kasqanta yachanchik, payqa urmananchiktapuni munan, chayrayku allinta qhawakunanchik tiyan (1 Pedro 5:8, ñawiriy). Supayqa, sumaq kamachi yachachisqan, llulla kasqanta rikuchinanpaq llullata yachachiqkunata chayri apostatasta apaykachan. Chaywanpis payqa manaña chaykunawan atipayta atinchu. Chantapis hermanosta qhatiykachan, kay qhatiykachasqan wakin kutipi willayninchikta sayachinayan, chaywanpis kay khatiykachayqa  hermanosninchikpa iñiyninta astawan kallpachan. Chayrayku, Supayqa wak tuqllatañataq apaykachan chaytaq: qʼasa sunqu, llakisqa kay. Qhawasqanchikmanjina qʼasa sunqu, llakisqa kay iñiyninchikta llawchhiyachinman. Ñawpa cristianos yacharqankuña qʼasa sunqu, llakisqa kayqa mana allinchu kasqanta. Chayrayku, Biblia nin: “yuyarikuychej Jesusmanta, pichus sinchʼita sayarqa”, nispa. Payqa, “sinchʼita sayarqa juchasapa runas contranta imaymana sajra imasta ruwashajtinku” ima. ¿Imaptintaq chayta ruwasunman? ‘Mana llawchhiyanapaq nitaq sunqunchikpi qʼinaqanampaq ima’ (Heb. 12:3).

12. ¿Imataq yanapawasunman, mana qʼasa sunqu, llakisqa kananchikpaq?

¹² ¿Maykʼaqllapis manaña atisqaykita yuyarqankichu? ¿Mana imapaq valesqaykita yuyankichu? Jina kaptinqa, Supayqa, chaykunawan Jehovata saqinaykita munan. Chayrayku Bibliata yachakuy, Diosmanta kallpawan mañakuy, tantakuykunamantaq rillaypuni, hermanoswantaq masichakuy. Tukuy kaykunaqa, ‘ama sunqunchik qʼinaqananpaq’ yanapawasunchik. Jehovaqa sumaqta kamachisninta kallpachananta, nirqaña, parlasqantaq chiqamanta juntʼakun (Isaías 40:30, 31, ñawiriy). Chayrayku, Reinomanta mana saykʼuspa willallaypuni, ama tiempoykita imawanpis usuchiychu, astawanqa wakkunata yanapay. Ajinata kallpachakunki chayqa, mana qʼasa sunquman, llakisqaman tukunkichu (Gál. 6:1, 2).

Jatun ñakʼariymanta lluqsinqanku, musuq pachamantaq yaykunqanku

13. ¿Armagedonpi mana wañuqkuna ima llamkʼaytataq ruwanqanku?

¹³ Armagedón pasasqanmantaqa, achkha mana chiqan kaqkuna kawsarimunqanku, paykunamantaq Diospa ñanninta riqsichina kanqa (Hech. 24:15). Mana imaynatachus Jesús ñuqanchikrayku wañusqallantachu yachachina kanqa, manaqa Jesuspi iñiyta churanankuta yachachina kanqa, jinata ruwaspa wiñaypaq kawsayta atinqanku. Ima llulla yachaykunatapis, mana allin kawsayninkutapis saqipunanku tiyan. Chantapis, chiqa cristianos kasqankuta rikuchinankupaq musuq pʼachawanjina pʼachallikunanku tiyan (Efe. 4:22-24; Col. 3:9, 10). Armagedonpi mana wañuqkunapaqqa, may chhika llamkʼay kanqa. ¡Jehovapaq mana imamanta llakikuspa, tukuy sunquwantaq llamkʼayqa, maytapuni kusichiwasunchik!

14, 15. ¿Imatataq ñuqanchikmanta kawsarimuqkuna yachakunqanku, imatataq ñuqanchik paykunamanta yachakusunchik?

¹⁴ Jesús manaraq Jallpʼaman jamuchkaptin,  Diospa juntʼa sunqu kamachisnin wañuqkunaqa, achkhata yachananku kanqa. Pichus may suyasqa Mesías kasqanta yachanqanku. Ñawpa kawsayninpiqa, Jehovamanta yachakuyta munasqankuta rikuchirqankuña. ¿Tʼukurinkichu imaynatachus Danielta yachachisunchik, pay kikin parlasqan juntʼakusqanta, mana entiendespa qillqasqanmanta? (Dan. 12:8, 9.)

¹⁵ Chiqan runas kawsarimuqkunaqa ñuqanchikmanta mayta yachakunqanku, ñuqanchiktaq paykunamanta yachakullasuntaq. Bibliapi jukchhikalla qillqakusqanmanta tapuriptinchik, paykunaqa astawan imachus kasqanmanta kutichiyta atiwasunchik. ¡Tʼukuriy Juan Bautistapi, Jesuspa primonmanta uyariyqa may kusiychá kanqa! Kay chiqa sutʼinchaqkunamanta yachakuyqa, allinmin kanqa Diospa Palabranta astawan sutʼita yachakunapaq. Diospa kamachisnin unay tiempopi wañuqkunaqa —kay may chhika runasmanta wañuqkunapis— ‘sumaq kawsariyta tarinqanku’. Tukuy paykunaqa Diosta yupaycharqanku, kay pacha Supaypa makinpi kachkaptin. ¡Musuq pachapi Diosta yupaychayqa paykunapaqqa may sumaqchá kanqa, imaraykuchus kawsayqa aswan allinmin kanqa! (Heb. 11:35; 1 Juan 5:19.)

16. Bibliapi qillqakusqanmanjina, ¿imataq kanqa Diospa Juicio Pʼunchayninpi?

¹⁶ Diospa Juicio Pʼunchayninpi, Biblia, wak libros kicharikunqanku, chaykunamanjinataq, Jallpʼapi kawsaqkunata juzgakunanpaq servinqanku. Jinamanta rikukunqa, wiñay kawsaypaqchus manachus kasqankuta (Apocalipsis 20:12, 13, ñawiriy). Diospa Juicio Pʼunchayninpi, Jallpʼapi tiyakuqkunaqa sutʼimanta rikuchinqanku Diosta kamachiqninkutajinachus qhawasqankuta manachus. Sapa juk rikuchinqa, Diospa Reinonta kasukusqanta, corderowan “kawsaj yaku juturisninman” pusachikusqanta ima, mana jinata ruwaptinkutaq Diospa Reinonta wasanchasqankuta rikuchinqanku (Apo. 7:17; Isa. 65:20). Jucio Pʼunchay tukukuyninpi, tukuypis mana juchawan nitaq kay pachap munayninwan apachikuspa, ima ladomantachus kasqankuta rikuchinqankuña. Mana pipis Diospa juicion mana allinchu kasqanta niyta atinqachu. Mana chiqanyayta munaqkunalla, wiñaypaq wañuchisqas kanqanku (Apo. 20:14, 15).

17, 18. ¿Imaraykutaq akllasqa cristianos, may chhika runas ima, Diospa Juicio Pʼunchayninta may kusiywan suyachkanku?

¹⁷ Kunan pʼunchaymanta akllasqa cristianos kaqkuna, reinopaq akllasqa kasqankuta yachakunña, paykunaqa Diospa Juicio pʼunchayninpi Jallpʼata kamachiyta suyachkanku. ¡Paykunapaq chayqa may sumaqpuni kanqa! Kayta suyaspataq ñawpa siglopijina Pedrop nisqanmanjina kasukuyta munanku: “may kʼuchi kaychej wajyasqas, ajllasqastaj kasqaykichejpi sumajta sayanaykichejpaj. Sichus chay imasta ruwankichej chayqa mana jaykʼajpis urmankichejchu. Chay jinamanta, Señor Jesucristo Salvawajninchejpa wiñay reinoman may kusiypi pusaykusqa kankichej” (2 Ped. 1:10, 11).

¹⁸ May chhika runasmanta kaqkuna, akllasqa cristianos chayta suyasqankumanta mayta kusikunku, tukuy imapitaq yanapayta munanku. Diospa munasqa masisninjina, kunan Diospa llamkʼanankupaq tukuy atisqankuta ruwayta munanku. Diospa Juicio Pʼunchayninpi, paykunaqa kawsaq juturi yakusman pusachikunqanku, tukuy sunqutaq may kusiywan Diospa nisqanta kasukunqanku. ¡Jehová paykunata kay Jallpʼapi wiñaypaq kawsanankupaq akllakusqanmanta maytachá kusikunqanku! (Rom. 8:20, 21; Apo. 21:1-7.)

¿Yuyarinkichu?

• ¿Imastaq Jesuspa kapuynin kasqa?

• ¿Imaynatá may chhika runas akllasqa hermanosninkuta yanapachkanku?

• ¿Ima tʼinkataq may chhika runaspata kapun, imatataq suyachkanku?

• Diospa Juicio Pʼunchayninpi tʼukuspa, ¿manachu kusikunki?

[Tapuykuna]

[27 paginapi dibujo/foto]

May chhika runasqa pʼachasninkuta corderop yawarninpi yuraqyachinku

[29 paginapi dibujo/foto]

¿Imatataq chiqan runas kawsarimuptinku tapuriyta munawaq?