¿Tukuy runas jukchasqa tiyakuyta atinkumanchu?

¿IMAPITAQ kay pacha tukukunanta niwaq? ¿Allin kawsaypichu chayri mana allin kawsaypichu? Runaqa, imapichus kay pacha tukunanta mana yachanchu, imaptinchus kay pachaqa imallapipis tukunanpaq kachkan.

Wakin umachaq politicosqa, tukuy runas jukchasqa tiyakunqanku, nispa ninku, ichapis chayta yuyanku, mana ima jatun llakiypis chayamunanta munasqankurayku. Chaymantapis, may achkha runasqa, mayqin llaqtapis kay armas nucleares nisqata tʼuqyachinankuta manchachikunku. Jinata tʼuqyachiptinku, ¿imapitaq ñuqanchik tukusunman?

Unaymantapacha, chiqninakuy, chuqunakuy ima, mana allin kawsay kananta saqinchu. Aswan llakiy, religionqa kay chiqninakuyta chinkachinanmantaqa, astawanraq runata chiqninachin. Chayrayku, James Haught periodicota qillqaqqa jinata nirqa: “Imallapis runata tʼaqachiqqa, chiqninakuyta qallarichinman, religiontaq runata mayta tʼaqan”. Chantapis nillarqataq: “Tukuypis religión runata ‘allin runaman’ tukuchisqanta ninku, chaywanpis rikukusqanmanjina religionqa wakin runasta may saqra ruwaykunaman tanqan”, nispa. May allinpaq riqsisqa físico Steven Weinberg kikillantataq nin: “Allin runas saqra kaqta ruwanankupaqqa, religionniyuq kananku tiyan”, nispa.

¿Maykʼaqllapis tukuy runas jukchasqas tiyakuyta suyasunmanchu? Kusiywan kutichisunman, arí nispa. Chaywanpis, rikusunchikjina, chayqa mana runap atiyninwanchu, nitaq yachayninkuwanchu ruwakunqa, nillataq runaspa religionninpis chayta ruwanqachu.

[3 paginapi sutʼinchaynin]

Kay pacha, ¿juk granadajinachu tʼuqyananpaq kachkan?