¿Imataq Diospa Reinonrí?

JESÚS willayninpi, ¿imamantaq astawan parlarqari? Jesusqa Diospa Reinonmanta astawanpis yachachirqa (Lucas 4:43). Jesusta uyariqkunaqa kutin kutitachá Reinomanta parlaqta uyarirqanku. Chay uyarisqanku, ¿tʼukullatachu chayri iskaychasqatachu saqirqa? ¿Imachus chay Reino kasqanta tapurqankuchu? Mana. Bibliapiqa mana chay tapuykuna rikhurinchu. Chaywanpis paykunaqa, ¿Diospa Reinon imachus kasqanta yacharqankuchu?

Judiosqa Hebreo Qillqakunata, Diospa rimaynintajina qhawaq kanku, chay Qillqakunapitaq chay Reino imaynachus kananta willakurqaña. Chantapis allinta sutʼincharqa imachus kasqanta, imatachus ruwananta ima. Kunanpis Bibliata ñawirispaqa, astawanraq chay Reinomanta yachakusunman. Bibliapi qanchis chiqa yachachiykunata qhawarina. Kimsa ñawpa yachachiykunaqa, Jesuspa tiemponpi judiospaq, aswan ñawpa runaspaqpis, mana pakasqa yachaykunachu karqa. Wak kimsatataq, ñawpa kaq siglopi, Cristo, apostolesnin ima, sutʼincharqanku. Qanchis kaqtaq kay tiemponchikpi sutʼinchakun.

1. Diospa Reinoqa juk gobierno, manataq jaykʼaq chinkanqachu. Bibliapi ñawpa kaq profeciaqa, Dios juk Salvaqta tukuy chiqa runaspaq kachamunanta rikuchin. Chay Salvaqta sutichakun “miraynin” nisqa, paytaq wiñaypaq tukuy llakiyta chinkachinqa, mayqintachus Satanás, Adán, Eva ima rikhurichirqanku chayta (Génesis 3:15). Achkha watas pasasqanmanta, rey Davidman willakurqa, chay ‘miray’ chayri Mesiasqa: juk Reinota kamachinanta, chaytaq mana wak kamachiqkunawan kikinchakunanta, astawanqa wiñaypaq sayachisqa kananta (2 Samuel 7:12-14).

2. Diospa Reinonqa kay pachamanta kamachiqkunata chinkachinqa. Profeta Daniel musquypijina may jatuchaq kamachiqkunata rikurqa, chaytaq kunan pʼunchayninchikkama rikukuchkan. Chay musquypijina rikusqanta qhawarina: “Chay reykuna kamachishajtinku, janaj pachapi kaj Dios uj reinota sayarichenqa, chaytaj mana jaykʼajpis chinkachisqachu kanqa, manataj mayqen reinopis payta atipanqachu. Tukuynin waj reinosta tukuchenqa, chay atipaj reinotajrí wiñaypaj sayanqa”. Kay pachata tukuy kamachiqkuna, ruwayninku ima —maqanakuyta, mana kaqta ruwasqankuta ima— wiñaypaq chinkachisqa kanqanku. Biblia Danielpa profecianpi ninjina, Diospa Reinonqa, pisi tiempomantawan tukuy Jallpʼantinta kamachinqa (Daniel 2:44, 45). Diospa Reinonqa, mana juk chiqa kamachiyllachu, manaqa paylla kamachinqa.

3. Diospa Reinonqa maqanakuykunata, unquyta, yarqhayta, wañuyta ima chinkachinqa. Bibliapi, may sumaq profeciasqa sutʼita rikuchiwanchik, imatachus Diospa Reinon kay pachapi ruwananta. Kay Reinoqa, tukuy imata allinyachinqa, chaytaqa mana jaykʼaq runap kamachiyninqa ruwayta atinmanchu. Kaypi tʼukuriy: ¡Runata wañuchinanpaq tukuy imata apaykachakusqanqa manaña kanqachu! Biblia nin: “[Diosqa] tukuy kay pachapi chʼajwasta chʼinyachin”, nispa (Salmo 46:9). Manaña doctores, hospitales ima, kanqachu, imaraykuchus manaña pipis unqunqachu. “Mana pipis nenqachu: Onqosqa kani, nispaqa” (Isaías 33:24). Mana pipis yarqhayrayku tulluyanqachu nitaq wañunqachu. “Nacionnimpeqa ashkha trigo [chayri mikhuna] kachun” (Salmo 72:16.) Manaña wañuqkunapaq cajonesta rantina kanqachu, nitaq panteones kanqachu, manallataq wañusqasmanta llakikusunchu, imaraykuchus wañuyqa atipasqa kanqa. Pichus kawsayta quwarqanchik payqa “wañuyta wiñaypaj chinkachenqa, tukuypa waqaynintataj Tukuy Atiyniyoj Tata Diosqa pichanqa” (Isaías 25:8).

4. Diospa Reinonpaq Reytaqa Diosllataq akllan. Jesusqa mana payllachu Mesías kani nispa sutichakurqachu, nitaq runaschu paytaqa  akllarqanku. Manachayqa, Jehová Diosninchik payta akllarqa. Chayta yachanchik Jesusta Mesías chayri Cristo nispa sutichasqa kasqanrayku, chay rimaykunataq ‘Akllasqa’ niyta munan. Jehová Diosninchikpuni Jesusta akllarqa Rey kananpaq, nirqataq: “Kaymin noqaj kamachiy, pitachus sayachini, chay. Payqa noqaj ajllakusqay, pipichus kusikuni, chay. Payman Espirituyta churani, tukuy nacionespaj justiciata ruwanampaj”, nispa (Isaías 42:1; Mateo 12:17, 18). ¿Pitaq Diosninchikmanta astawan yachanman ima laya kamachiqchus allin ñuqanchikpaq kasqanta?

5. Diospa Reinonmanta Reyqa tukuy runasman rikuchinña kamachinanpaq allin wakichisqa kasqanta. Nazaret llaqtamanta Jesusqa, mana iskaychakuspa Mesías kasqanta nisunman. Imaptinchus Diosqa, Jesús ima miraymantachus jamunanta nirqa, Jesustaq chay miraymanta jamurqa (Génesis 22:18; 1 Crónicas 17:11; Mateo 1:1). Jesusqa Jallpʼapi kachkaptin, may unay achkha profecías qillqakusqanta juntʼarqa. Chantapis, janaqpachamanta pay Mesías kasqanta nikurqa. ¿Imaynatá chayta nikurqa? Dios janaqpachamantapacha parlamuspa, Jesús Churin kasqanta nirqa, angelespis Diospa Mesiasnin kasqanta sutʼincharqanku. Mana chayllachu, Jesús milagrosta ruwasqanpi sutʼita rikuchirqa Diospa atiyninwan ruwasqanta, chaytataq achkha runas rikuchkaptin ruwarqa. * Jesucristoqa imayna Reychus kananta kutin kutita rikuchirqa. Payqa runata yanapananpaq may atiyniyuq karqa, chaywanpis mana chayraykuchu runata yanaparqa, manaqa yanapayta munasqanrayku (Mateo 8:1-3). Payqa, kʼacha, khuyakuyniyuq, llampʼu sunqu, mana manchachikuq ima karqa. Jesuspa kawsayninmantaqa, Bibliata ñawirispa, tukuypis yachakuyta atisunman.

6. Diospa Reinonpiqa Cristowan, 144.000 akllasqas kamachinqanku. Jesús, apostolesnin, wak runas ima, janaqpachamanta paywan kamachimunankuta nirqa. Paykunatataq “juchʼuy tropa ovejasníy”, nispa suticharqa (Lucas 12:32). Aswan qhipaman, apóstol Juanman willakurqa, kay juchʼuy tropapi 144.000 kanankuta, paykunataq Diospa kamachisnin kanku. Paykunaqa reyesjina Cristowan khuska kamachimunqanku, sacerdotesjinataq yanapanqanku (Apocalipsis 5:9, 10; 14:1, 3).

7. Diospa Reinoqa janaqpachapi kamachichkanña, kay Jallpʼatawan kamachinanpaqtaq wakichisqa kachkan. Kay qanchis kaq yachayqa may sumaqpuni. Bibliaqa achkha kutita rikuchin, Jesús janaqpachapi kamachiq Reyjina atiyniyuq kasqanta. Kunanqa janaqpachapi kamachichkan, pisi tiempomantawantaq Jallpʼatawan kamachinqa, chaypitaq, chay tukuy profecías parlakusqanta juntʼanqa.

Diospa Reinonpa tʼinkayninta qampis japʼikuy

Jesús juk suyakuyta quwasqanchikqa, mana imawanpis kikinchakunchu. Adán juchallikusqantawan, may chhika unayña Jehová Dios nirqa juk Reinota sayachinanta, munaynin juntʼakunanpaq. ¿Mayqintaq Diospa munaynin karqari? Juntʼa sunqu runas tʼikapacha Jallpʼapi wiñay wiñaypaq kawsakunankuta munarqa. ¿Manachu kusikunki kay Reino janaqpachapi kamachichkasqantaña yachaspa? Jina kaptinqa, Diospa Reinon mana juk cuentollachu kasqanta rikunchik, manaqa chiqapuni kasqanta.

Dios Reyta churasqanqa enemigosnin chawpipi kamachichkanña (Salmo 110:2). Runa, Diosmanta karunchasqa kaptinpis, Mesiasqa Tatanpa munayninta juntʼachkan, runasta Diosta riqsiyta munaqkunata maskʼaspa, jinamanta “espírituwan, cheqa kajwan” ima yupaychanankupaq (Juan 4:24). Tukuy laya runata, machitusta, waynasta, waqchasta, qhapaqkunata ima, waqyakuchkan Diospa Reinonpi wiñay wiñaypaq kawsanankupaq (Hechos 10:34, 35). Qamtapis yuyaychayku, usqhayllata kay sumaq waqyayta kasukunaykita. Chayrayku, Diospa Reinonmanta astawan yachakuy, jinamanta Diospa chiqan kamachiyninpi wiñay wiñaypaq kawsayta atinki (1 Juan 2:17).

[Sutʼinchaynin]