‘Ñawpa kaq munakuyninchikta’ ama saqirpayanachu

“Chay kapususqanta allinta japʼi[llaypuni].” (APO. 3:11.)

1, 2. ¿Imayná karqanki Jehovamanta yachakusqayki chiqapuni kasqanta yachaspa?

¿YUYARIKUNKICHU ñawpaq kutita Jehovata kasuqkunapaq tʼukunapaqjina tʼinkasmanta uyarisqayki pʼunchaymanta? Juk religionpiña karqanki chayqa, ¿imayná karqanki Jallpʼapaq Diospa munayninmanta uyarispa chayri mana entiendenapaqjina yachachiykunata Bibliawan sutʼinchasuptinku? Ichapis chʼawkiyasqa kawsasqaykimanta reparakurqanki. Chayrayku, ¡may kusisqacharí karqanki Diosmanta chiqa kaqta yachaspa! Diosta yupaychaq tatas uywasurqanku chayqa, ¿yuyarikunkichu imaynachus karqanki Jehovamanta yachachisusqanku chiqa kasqanta yachaspa, paypa kamachiyninmanjina kawsayta munasqaykita, ima? (Rom. 12:2.)

² Achkha hermanos, chiqa kaqta yachaytawan, kusisqas kasqankuta, Jehovaman kʼaskasqas kasqankuta, llaqtanman paykunata pusasqanmanta,  payman agradecesqas kasqankuta ima, nillasunqankutaq (Juan 6:44). Chay kusiyqa, Diospa llaqtanpi llamkʼanankupaq, yachakusqankumanta tukuyman parlanankupaq ima, paykunata tanqarqa. ¿Kikinchu qamwanpis karqa?

3. ¿Imayná Éfeso llaqtapi qutuchakuy kachkarqa, paykunaman Jesús juk willayta quchkaptin?

³ Jesús, Éfeso llaqtamanta qutuchakuyman willasqanpi, kʼacha kaykunasninkumanta parlarqa, chaywanpis nillarqataq, Diosta munakuyninku pisiyachkasqanta. Pay nirqa: “Ruwayniykita, llankʼasqaykita, pacienciaykitawan rejsini. Yachanitaj sajra runastapis mana rikuyta atisqaykita; apóstoles kayku nejkunatapis pruebaman churasqaykita; llullas kasqankutataj rikurichimusqaykita. Pacienciawan ñakʼarerqanki sutiyrayku mana saykʼuspa. Chaywampis, noqajta uj ima tiyan contraykipi, ñawpaj kaj munakuyniykita saqerpayasqaykimanta” (Apo. 2:2-4, Qheshwa Biblia).

4. ¿Imaraykutaq Jesús Efesiosman willasqan, kay tiempopi yanapallawasunmantaq?

⁴ Kay qutuchakuyman, wak qutuchakuykunaman ima, Jesús yuyaychasqanqa, akllasqa cristianosta mayta 1914 watamantapacha ñakʼariykunata rikusqankupi, yanaparqa (Apo. 1:10). Chaywanpis, kay tiempomanta cristianosqa, ‘ñawpaqpi Jehovata, chiqa kaqta ima munakusqankuta saqirpayallankumantaq’. Chayrayku, ¿imaynatá ñawpa kaq munakuyninchikta kallpachasunman chayri watiqmanta munakuyta qallarisunman? Diospa llaqtanpi ruwasqasninchikta yuyarispa, chaypi tʼukurispa ima.

¿Imaraykutaq Diospa llaqtanpipuni kasqaykita yachanki?

5, 6. a) ¿Imatá sapa juk yachananchik tiyan Jehovaman qukunapaq? b) ¿Imaraykutaq Jehovamanta sutʼinchaqkuna chiqata yachachisqankuta yuyarqanki? c) ¿Imataq ñawpa kaq munakuyniykita kallpachanaykipaq yanapasunkiman?

⁵ Jehovaman qukunapaqqa, imachus ‘Diospa kʼacha munaynin, imachus Diosta kusichin, imatachus juntʼana’ kasqanta ima, allinta yachana tiyan (Rom. 12:1, 2). Chaypaqtaq, Bibliap yachachisqanta yachana. Ima yachachiychus juk runata, Jehovamanta sutʼinchaqkuna yachachisqanku chiqa kasqanta yuyachin, mana chayllataqchu kanman wak runapaqqa. Wakinkunaqa, Bibliapi Diospa sutinta ñawirisqankurayku chayri maypichus wañusqas kasqankuta yachasqankurayku, Jehovamanta sutʼinchaqkuna yachachisqanku, chiqa kasqanta yuyanku (Sal. 83:18, NM; Ecl. 9:5, 10). Wakintaq, Diospa llaqtanpa munakuyninta rikuspa, chayta yuyanku (Juan 13:34, 35). Wakkunarí, chiqa cristianos mana kay pachawan chhapukusqankuta,  nisunman mana politicaman, nitaq maqanakuykunaman chhapukusqankuta rikuspa, ajinata yuyanku (Isa. 2:4; Juan 6:15; 17:14-16).

⁶ Chay yachachiykunarayku, achkha cristianos Diosta munakuyta qallarirqanku. Tiempochakuy, imaraykuchus qam yuyarqanki Diosmanta yachakusqayki chiqapuni kasqanta, yuyarinaykipaq. Mana ni piwan kikin kasqanchikrayku, ichapis imaraykuchus Jehovata munakusqayki, mana wak hermanop yuyayninwan, kikinchu kanqa. Chaywanpis imaraykuchus Jehovata munakusqayki qampaq kunankama kikillanpuni, imaptinchus chiqa yachayqa, mana tikrakunchu. Chayrayku, yuyarikuy imaraykuchus creeyta qallarisqaykita, imaynatachus chaykunata yachaspa kusikusqaykita ima, chayta ruwaptiykiqa, ñawpa kaq munakuyniykita kallpachallankipuni (Salmo 119:151, 152; 92:4, ñawiriy).

Ñawpa kaq munakuyninchikta wiñachina

7. ¿Imaraykutaq ñawpaqpi Diosta munakusqaykita kallpachanayki tiyan, imaynatataq chayta ruwankiman?

⁷ Ichapis Jehovaman qukusqaykimantapacha, kawsayniyki manaña kikinchu. Chayrayku, ichapis chiqa kaqrayku munankuyniykita, iñiyniykirayku ñakʼariykunapi sinchita sayanaykipaq, kallpachanayki karqa. Chay kutispitaq, Jehovap yanapayninta, rikurqanki (1 Cor. 10:13). Chayrayku Diospa llaqtanpi ruwasqasniykita watamanta wata tantanki, chaytaq qampaq may sumaqpuni. ¿Imarayku? Imaraykuchus chaykunaqa, ñawpa kaq munakuyniykita wiñachin, chantapis imachus Diospa kʼacha, chiqa munaynin kasqanta rikuchisunki (Jos. 23:14; Sal. 34:8).

8. ¿Imatá Jehová Moisesman nirqa, imaynatá chayrayku israelitas astawan riqsirqanku?

⁸ Kikinchanapaq, yuyarina Jehová llaqtanta Egiptomanta urqhumunanta nisqanpi. Chay kutipiqa, Moisesman jinata nirqa: “Noqa kani pichus kani chay”, nispa (Éxo. 3:7, 8, 13, 14). Chaywanqa, Jehová israelitasta kacharichinanpaq tukuy imata ruwayta atisqanta, nichkarqa. Israelitas rikusqankutaq, Tukuy Atiyniyuq Jehová, Juez, Umanchaq, Kacharichiq, Maqanakuq, Tukuy Imata Quq ima, kasqanta rikuchirqa (Éxo. 12:12; 13:21; 14:24-31; 16:4; Neh. 9:9-15).

9, 10. ¿Maykʼaqtaq astawan Jehovata riqsinchik, imaraykutaq chay kutista yuyarina tiyan?

⁹ Qampa kawsayniykiqa, mana israelitaspata jinachu. Chaywanpis, ichá kawsayniykipi rikusqaykirayku, Dios qammanta llakikusqanta yachanki, chaytaq iñiyniykita kallpacharqa. Ichapis Jehová, qampaqpis Tukuy Imata Qusuqniyki, Sunquchasuqniyki, chayri Yachachiqniyki karqa (Isaías 30:20b, 21, ñawiriy). Chantapis, ichá Jehová mañakuyniykita uyarisqanta rikunki. Chayri ñakʼariypi kachkaptiyki juk hermano yanapasurqa, manachayri Bibliamanta sapallaykipi yachakuchkaptiyki yanapasunanpaqjina yachayta tarirqanki.

¹⁰ Ichapis Diospa llaqtanpi ruwasqasniykimanta parlaptiyki, uyarisuqkunaqa mana tʼukullachu qhipakunqanku. Imaptinchus chay ruwasqaykiqa, mana tʼukunapaqjinachu. Chaywanpis, qampaqqa, may valorniyuq, imaptinchus chay kutispi Jehovap jatun yanapayninta rikurqanki. Yuyarikuy, machkha watastañachus Diospa llaqtanpi kachkasqaykita. ¿Yuyarikunkichu imaynatachus Jehová jarkʼasurqa? Jina kaptinqa, chaykunamanta yuyarikuy, imaynachus chaykunata rikuspa kasqaykimanta ima. Ajinamanta ñawpaqpi Jehovata munakusqaykita watiqmanta, yuyarillankitaq. Diospa llaqtanpi ruwasqasniykimanta yuyarikuy, chaykunapitaq tʼukuriy, imaptinchus chaykunaqa, Jehová qammanta llakikusqanta yuyarichisunqa. Chay munakuytataq, ni pi qhichusunqachu.

¿Imarayku imaynachus kasqanchikta qhawarikuna tiyan?

11, 12. ¿Imarayku ichapis Diosta munakusqayki pisiyan, imatataq Jesús nirqa?

¹¹ Diosta, chiqa kaqta ima, munakusqayki pisiyasqanqa, mana Dios tikrakusqanraykuchu.  Imaptinchus Jehovaqa, mana tikrakunchu (Mal. 3:6; Sant. 1:17). Payqa, ñawpaqpijina qammanta llakikullanpuni. Chantá, ¿imaraykutaq manaña Jehovaman kʼaskasqachu kanki? Ichapis llakiykunapi rikukusqaykirayku, manaña paymanta mañakunkichu, chayri manaña tʼukurispa ñawpaqpijina paymanta yachakullankipunichu. Chantapis ichá tantakuykunaman manaña ñawpaqpijina richkankichu, chayri manaña kʼajaywanchu runaman willamuchkanki (2 Cor. 13:5).

¹² Kay patapi parlasqanchikpijina kachkanki chayqa, ¿imataq chayman apasunki? Ichapis unquykunamanta, chayri familiaykita uywanapaq llamkʼaymanta llakiykuna, chantapis ichá qhipa pʼunchaykunapi tiyakuchkasqanchikta qunqakuchkanki. Jesús, apostolesninman jinata nirqa: “Qhawarikuychej; pajtataj sonqoykichej atipachikunman mikhunawan, machaykuywan, kay pacha ruwanaswan ima. Jinallapitaj juicio pʼunchay ujllata taripasunkichejman. Chay pʼunchayqa uj tojlla jina jamonqa tukuy kay pachapi kawsajkunaman. Wakichisqapuni kaychej ari, Diosmanta mañarikuspa tukuy tiempopi, kay tukuy ima jamojmanta lluspʼinaykichejpaj, allimpi rikhurinaykichejpajtaj Runaj Churimpa ñawpaqempi, nispa” (Luc. 21:34-36).

13. ¿Imawan Santiago Diospa Palabranta kikincharqa?

¹³ Santiagoqa, Bibliap nisqanwan hermanosnin allinta qhawarikunankupaq, jinata qillqarqa: “Diospa nisqantaqa ama uyarillaychejchu, astawanqa kasuychej; manachayqa qankuna kikiykichej chʼawkiyakunkichej. Pichus Diospa nisqanta uyarispa mana kasojqa rijchʼakun espejopi uyanta qhawarikoj runaman. Chay runaqa uyanta qhawarikuytawankama ripullan, chantataj qonqapun imaynachus uyan kasqanta. Pichus allinta qhawan Diospa sumaj kacharichej leyninta, chayllapipuni sinchʼita sayaspa, manataj qonqapojllachu kaspa leypa kamachisqanta juntʼan, chay runaqa kusikuyniyojmin ruwasqampi” (Sant. 1:22-25).

14, 15. a) ¿Imaynatá Biblia Diospa llaqtanpi ñawpaqman rinapaq yanapawasunman? b) ¿Imaspí tʼukurisunman?

¹⁴ Juk runaqa, espejopi imaynachus kasqanta qhawarikunman, mana allin kaptintaq ichapis allincharikunman. Sutʼinchanapaq, juk qhari corbatan wistʼu kasqanta reparakuptinqa, chiqanyarichin, juk warmi, chʼaska uma kachkasqanta qhawakun chayqa, peynarikun. Kikillantaq Bibliaqa, imayna runachus kasqanchikta rikuchiwanchik. Nisqanmanjinachus kawsachkasqanchikta tapurikuptinchikqa, juk espejotajina apaykachachkanchik. Chaywanpis, mana allin kasqanchikta reparaspa, mana allinchakusunmanchu chayqa, ¿mana kaqcharí chay espejo kanman? Chayrayku “Diospa sumaj kacharichej leyninta” yachaspa, chaymanjina ruwananchik tiyan. Jehovata, chiqan kaqta ima, munakusqanchik pisiyasqanta reparaptinchikqa, tapurikuna: “¿Ima chʼampaykunapitaq tarikuchkani, imaynatataq chaykunata qhawachkani? ¿Imaynatá ñawpaqpi jina chʼampaykunata qhawaq kani? ¿Imataq manaña kikinchu?”. Kay tapuykunaman kutichisqanchik mana allin kaptinqa, allinchanapacha (Heb. 12:12, 13).

 ¹⁵ Tʼukurinapaq tapuykunaqa, Diospa llaqtanpi ñawpaqman rinallapaqpuni imatachus ruwananchikta tʼukurinapaq, yanapawasun. Pabloqa, Diospa yuyaychasqanmanjina Timoteo astawan sumaqta willananpaq jinata nirqa: “Chay imasta ruwaypuni; chay imaspi sonqoykita churay Señorpi wiñasqaykita tukuy rikunankupaj”. Ñuqanchikpis, Diospa Palabranwan yanapachikuspa, tʼukurina imaspichus allinchakunanchik tiyan, Diospa llaqtanpi sumaqta llamkʼanapaq (1 Tim. 4:15).

16. ¿Imatataq mana yuyanachu tiyan, imaynachus kasqanchikta qhawarikuchkaspa?

¹⁶ Ajinata watiqmanta qhawarikuptiykiqa, imaspichus mana allinta ruwachkasqaykita rikunki, chaywanpis ama anchata llakikuychu. Yuyariy, qhawarikuyqa, imaspichus pantachkasqaykita reparakunaykipaq kasqanta, ajinamanta allinchayta atinaykipaq. Satanasqa, mayta munan, pantasqanchikrayku mana imapaq allin kasqanchikta yuyananchikta. Unay tiempopiqa, Dios paypa llamkʼasqanchikta pisipaq qhawasqanta, nillarqankutaq (Job 15:15, 16; 22:3). Chaywanpis, chayqa mana chiqachu, Jesustaq chayta sutʼincharqa. Diosqa, tukuy kamachisninta allinpaq qhawan (Mateo 10:29-31, ñawiriy). Juchasapa kasqaykita yuyariyqa, llampʼu sunquwan Jehovap yanapayninwan allinta ruwanapaq kallpakunaykipaq tanqasunan tiyan (2 Cor. 12:7b-10). Machituña kaptiyki chayri unquyrayku manaña ñawpaqjinachu ruwayta atiptiykiqa, atinaykipaqjinalla imatapis Diospa llaqtanpi ruwayta yuyay, chantapis ama saykʼuychu nitaq Diosta munakuyniyki pisiyananta saqiychu.

Agradecesqapuni kana tiyan

17, 18. ¿Ima bendicionestataq, ñawpa munakuyninkuta kallpachaqkuna japʼinqanku?

¹⁷ Ñawpaqpi munakuyniykita kallpachallaptiykipuni, achkha bendicionesta japʼinki. Astawan Diosta riqsinki, chantapis kʼacha kamachiyninrayku agradecesqa kanki (Proverbios 2:1-9; 3:5, 6, ñawiriy). Salmos libro nisqanmanjina, Diospa kamachiyninta kasukuqqa, “jatun tʼinkayoj kanqa” chantapis “Tata Diospa kamachisqanqa cheqampuni; yachayniyojman tukuchin mana yachayniyojta”. Chay libro nillantaq: “Kusikuyniyojmin kanku mana kʼamina kawsakojkunaqa, pikunachus Tata Diospa kamachisqasninta kasojkunaqa”, nispa (Sal. 19:7, 11; 119:1).

¹⁸ Tukuy ima, Diosman agradecesqa kananchikpaq tanqawanchik, ¿icharí?. Tʼukurina, ñuqanchikqa, yachanchik imaraykuchus kay pachapi chʼampaykuna kasqanta, chantapis Jehová jatun munakuyninwan jarkʼawanchik. Payqa, llaqtanman pusamuwanchik, chayraykutaq Jehovamanta sutʼinchaq kanchik. Bendicionesta jaywasusqanpi, tʼukuriy. Ichapis mana yupay atinajina chay bendiciones kanku. Sapa kuti chayta ruwaypuni, ajinamanta kay yuyaychayta kasukunki: “Chay kapususqanta allinta japʼi[llaypuni]” (Apo. 3:11).

19. ¿Imatawan ruwanayki tiyan Diospa llaqtanpi sinchi sayasqa kanallaykipaqpuni?

¹⁹ Imaynachus iñiyniyki wataswan kallpachakusqanta, tʼukuriyqa, ‘kapususqanta allinta japʼinaykipaq’ yanapasunqa. Mana chayllachu. Kay revistaqa, sutʼinchan imastawanchus ruwanaykita, chaykunamanta kachkan, Diosmanta mañakuy, kusiywan allin willaykunata willamuy, tantakuykunaman riy, chaypi parlariy ima. Chaykunata ruwanki chayqa, ñawpaqpi Diosta munakusqayki, wiñallanqapuni (Efe. 5:10; 1 Ped. 3:15; Jud. 20, 21).

¿Imatá kutichiwaq?

• Imaraykuchus Jehovata munakusqanchikpi tʼukuriptinchik, ¿ima tʼinkastataq japʼisunchik?

• ¿Imatá sutʼita yachasun Diospa llaqtanpi ruwasqasninchikta yuyariptinchik?

• ¿Imatá rikuchiwasun sumaqta qhawarikuptinchik imaynatachus Jehovata munakusqanchikmanta?

[Tapuykuna]

[25 paginapi dibujo/foto]

¿Imarayku chiqa kaqta tarisqaykita yuyarqanki?

[27 paginapi dibujo/foto]

¿Imallapipis allinchakunayki kanchu?