Imaynatá sumaq Bibliata akllasunman

BIBLIAQA hebreopi, arameopi, griegopi ima, qillqakurqa, chayrayku may chhika runas Bibliata ñawirinankupaq qallunkupi tikrachisqa kananta necesitanku.

Bibliaqa, ima libromantapis astawan achkha qalluspi tikrachisqa kachkan, chayrayku kunan tiemponchikpiqa, iskay waranqa tawa pachak qallusman tikrachisqata tarisunman. Wakin qalluspiqa, mana juk laya Bibliallatachu urqhukun, manaqa astawanraq. Qampa qalluykipi achkha Bibliasta tarinki chayqa, munawaqchá astawan allin kaq tikrachisqata apaykachayta, ¿icharí?

Astawan allin kaqta akllanaykipaqqa, ñawpaqtaqa kay tapuykunamanraq kutichinayki kanman: ¿Imayna Bibliastaq kan? ¿Ima allinkunataq chayri ima mana allinkunataq rikukun? ¿Imaptintaq ima laya Bibliatachus ñawirichkasqanchikta allinta qhawananchik tiyan?

¿Imaynatá Bibliata juk qallumanta wak qalluman tikrachinku?

Bibliasqa, tukuy imaymanamanta tikrachisqa kachkan. Wakin Bibliasqa kayjinapi tikrachisqa kachkan: sapa paginasninpiqa, rikukun ima qallumantachus tikrachisqanku chay, chantapis rikukullantaq imaynatachus tikrachisqanku juk rimaymanta kikin rimayman, chayjina laya Bibliasqa castellanopi versión interlineal nisqa, sutichakun.

Wakin runasqa, Bibliata wak qalluman tikrachinku entiendesqankumanjinalla. Chaytataq, Bibliata ñawiriqkuna entiendenankuta yuyasqankurayku ruwanku. Kayjina tikrachisqataqa, castellano qallupi paráfrasis nikun.

Chantapis wakin runasqa, Bibliata wak qalluman maychus kaqllata tikrachinku. Paykunaqa, ima qallumantachus tikrachichkanku, chaymanjinalla, miskʼirichikunapaqjina, ñawiriyta  atinapaqjinataq, wak qalluman tikrachinku, mana sapa rimaypaq wak rimayta maskʼankuchu, nitaq entiendesqankumanjinallachu tikrachinku.

¿Aswan allinchu juk rimaymanta kikin rimayman tikrachiyqa?

Bibliap nisqanmanta sapa rimayta wak rimayman tikrachiyqa, mana entiendenapaqjinachu. ¿Imarayku? Qhawarina imaraykuchus:

1. Mana tukuy qalluspichu kikinta parlakun. Hebreo parlayta yachachiq S. R. Driver sutiyuq, “imaynatachus qillqakusqanpi, ima rimaykunawanchus qillqakusqanpi, [...] imaynatachus parlakusqanpi ima” mana tukuy qalluspichu kikin kasqanta, sutʼinchan. Juk laya qalluta parlaqqa, jukjinata yuyan wak laya qalluta parlaqmantaqa. Chayrayku Driver nillantaq: “Imaynatachus juk laya qallu parlakusqanqa, mana kikinchu wak laya qallupi parlakusqanwanqa”, nispa.

Kunan tiempopiqa, ni maypi Bibliamanta hebreo, griego simipijinaqa parlakunñachu, chayrayku mana allinchu sapa rimayta wak rimayman tikrachiyqa, imaptinchus jinata tikrachisqaqa, mana sutʼita entiendekunchu, astawanpis pantasqata tikrachikuchkanman. Astawan sutʼita kayta reparanapaq, wakin pʼitikunata qhawarisunchik.

Apóstol Pabloqa, Efesiosman cartanpi juk parlayta uqharirqa, chay nisqanmanta sapa rimaypaq kikin rimayta maskʼaspa tikrachiyqa, niyta munanman “runas dadoswan pukllasqankuta” (Efesios 4:14, Jünemann, nota). * Kay rimayqa, dadoswan pukllaspa chʼawkiyanamanta parlanapaq uqharikun. Chaywanpis achkha parlaykunapi sapa rimaypaq juk rimayta maskʼaspa tikrachiptinkuqa, mana entiendekunmanchu. Chayrayku imatachus apóstol Pablo niyta munasqanta astawan sutʼita entiendenapaqqa, ichá jinata nisqanta tikrachikunman: “Miskʼi parlaywan chʼawkiyaspa”(NM), nispa.

Apóstol Pabloqa, Romamanta cristianosman qillqaspa, griego simipi juk rimayta uqharirqa, mayqintachus sapa rimayta tikrachispaqa kayjinata tikrachikunman karqa: “Espiritupi larwashaj caychej”, nispa (Romanos 12:11, MOSOJ TESTAMENTO). ¿Sutʼitachu kayta entiendenki? Mana, ¿icharí? Kay rimayta Pablo qillqasqanqa, may kusisqas, sunqu qhallallarisqa ima, niyta munan.

Wak pʼitimantañataq parlarina. Jesús yachachichkaspaqa, juk rimayta uqharirqa, mayqintachus achkha Bibliaspi ajinata tikrachinku:  “Cusicuyniyojmin, espiritupi wajchacunaqa”, nispa (Mateo 5:3, MOSOJ TESTAMENTO). Achkha qalluspi ajinata tikrachikusqanqa, mana allintachu sutʼinchan imatachus Jesús niyta munasqanta. Astawanpis ‘espiritupi waqchakuna’ nispa tikrachisqankuqa, ichá umankumanta tʼuqpi runaspi, chayri mana allin yuyayniyuq runaspi, pantasqata yuyachinman. Chaywanpis, Jesús kay rimayta uqharispaqa, runasman yachachiyta munachkarqa, kusisqas kawsanankupaq, Diospa yuyaychayninta maskʼanankuta, manataq qhapaqyaytachu (Lucas 6:20). Chayrayku wakin Bibliaspi kay pʼitita jinata tikrachinku: “May cusiskas cancu sonkoncupi Diosmanta pisiskas caskankuta khawacojcunaqa”, nispa. Jinamanta astawan sutʼita rikuchinku imatachus Jesús yachachiyta munasqanta (Mateo 5:3, MOSOJ TESTAMENTO).

2. Imasmantachus parlachkasqanchikmanjina, juk rimayqa jukjinatataq entiendekunman. Hebreo qallupi maki rimaymanta parlarina. Kay rimayqa, wak qallusman mana kikillantataqchu tikrachikunman, mana chayqa ichá kayjinamanta tikrachikunman: “Watejmanta japʼikapoj”, “tukuy mañasqanta qorqa”, “runaj simimpi kashan” nispa ima. Maychus  kaqmanjina tikrachinapaqqa, imamantachus parlakusqanta qhawarina kanman (2 Samuel 8:3; 1 Reyes 10:13; Proverbios 18:21). Chayrayku kay rimayqa, inglés simipi Traducción del Nuevo Mundo de las Santas Escrituras nisqa Bibliapi, tawa chunka jukjinasmanta tikrakun.

Imamantachus parlakusqanmanjina, juk rimayqa jukjinasmanta tikrachikunman, chayrayku inglés simipi Traducción del Nuevo Mundo nisqa Bibliapi, griego simipi 5.500 rimaykunamanta, yaqha 16.000 rimaykunaman tikrachinku, chantapis hebreo simipi 8.500 rimaykunamanta 27.000 rimaykunaman tikrachinku. * ¿Imaraykutaq pisi rimaykunamanta achkha rimaykunaman tikrachinku? Tikrachiqkumanta Comisionqa (Comité de traducción), Bibliamanta sapa pʼiti imatachus niyta munasqanmanjina tikrachiyta maskʼarqanku, manataq sapa rimaypaq wak qallupi kikin rimayta maskʼaspachu tikrachirqanku. Chaywanpis inglés simipi Traducción del Nuevo Mundo nisqa Bibliata tikrachinankupaqqa, entiendekusqanrayku hebreo chayri griego simimanta inglés simipi kikin rimayta churapurqanku.

Sutʼita kaykama rikunchik imaraykuchus Bibliata wak qalluman tikrachichkaspa, mana allinchu sapa rimaypaq wak qalluman tikrachinapaq kikin rimayllatataq maskʼayqa. Chayrayku tikrachiqkunaqa, allin yuyaywan sumaq rimaykunata akllananku tiyan, maychus kaqmanjina, sutʼita entiendekunanpaqjina tikrachinankupaq. Astawanpis, ima rimaymanchus tikrachichkanku, chay rimaypi parlakusqanmanjina tikrachinanku kanqa.

Wakinkunaqa, entiendesqankumanjinalla Bibliata tikrachinku

Kay tikrachiqkunaqa, mana Bibliap nisqantapunichu tikrachinku, mana chayqa, entiendesqankumanjinalla. Wakin kutiqa, wak yuyaykunata yapaykunku, wakin kutitaq juk pʼitimanta imatachus mana entiendesqankuta urqhunku. Ajinata tikrachisqankurayku ñawiriyta atikuptillanpis, manaña imatapunichus Biblia yachachin chayta sutʼinchanchu.

Astawan sutʼita reparanapaq juk pʼitimanta parlarina. Wakin Bibliaspiqa, Mateo 6:9 pʼitita ajinata tikrachinku: “Janaq pachapi kachkaq Tatayku. Tukuypis, riqsichunku qam chiqa Dios kasqaykita”, nispa (Mateo 6:9, Traducción en lenguaje actual [TLA], chantapis kay sutiwan riqsikun Biblia en Lenguaje Sencillo nisqa). Chaywanpis, maychus kaqmanjina tikrachispaqa, ajinata tikrachikunman: “Janaqpachapi kachkaq Tatayku sutiyki jatunchasqa kachun”, nispa. Kunan qhawarina imaynatachus wakin Bibliaspi Juan 17:26 pʼitita tikrachisqankuta. Jesusqa, maypachachus japʼichisqa kanan kachkarqa chay chʼisi, Tatanman jinata nirqa: “Imaynachus caskayquita paycunaman sutʼincharqani”, nispa (MOSOJ TESTAMENTO). Chaywanpis, maychus kaqmanjina tikrachispaqa, ajina kanman: “Paykunaman sutiykita riqsichirqani”, nispa. ¿Reparankichu imaynatachus wakin tikrachiqkuna Dios sutiyuq kasqanta, paypa sutinta uqharina, jatunchana ima kasqanta, pakayta munasqankuta?

¿Imaraykutaq sumaq Bibliata ñawirinanchik tiyan?

Runa entiendesqanmanjina kawsayninchik llimphu kananpaq Bibliap yuyaychasqasninta wak qalluman tikrachisqankuqa, imatapunichus Biblia yachachiyta munasqanta mana sutʼitachu rikuchin. Juk Bibliapiqa, 1 Corintios 6:9, 10 pʼitikunata ajinata tikrachisqanku: “¿Manachu entiendenkichik mana ajinata kawsanataqa? Diosmanta mana yuyarikuspa saqrata ruwaqkunaqa Diospa Reinonta herenciatajina mana japʼinqankuchu. Runa masinkuta abusaqkuna, khuchichakuqkuna, Jallpʼata, tukuy ima chaypi kaqta chʼichichaqkuna ima, mana Diospa reinonpi  kayta atinkumanchu” (The Message: The Bible in Contemporary Language).

Kunan kay pʼitita tikrachisqankuta Traducción del Nuevo Mundo nisqa Bibliapi tikrachisqankuwan kikinchariy, chaypi nin: “¿Manachu yachankichik mana chiqa kaqta ruwaqkuna, Diospa Reinonta herenciatajina mana japʼinankuta? Ama pantaychikchu: Soltero kachkaspa khuchichakuqkuna, lantista yupaychaqkuna, casarasqa kachkaspa wakwan khuchichakuqkuna, qhari kachkaspa warmiman tukuqkuna, qharipura jinanakuqkuna, jinallataq suwaspis, michʼaspis, machaqkunapis, maldeciqkunapis, chʼawkiyaqkunapis manapuni Diospa Reinontaqa herenciatajina japʼinqankuchu”, nispa. Rikukunjina runa entiendesqanmanjina tikrachisqa Bibliaqa, mana sutʼitachu nin ima saqra ruwaykunatachus qhisachanata.

Chantapis Bibliap nisqanta tikrachiq runa imaspichus creesqanqa, payta tanqanman creesqanmanjina wakin pʼitikunata tikrachinanpaq. Chayrayku MOSOJ TESTAMENTO nisqa Bibliapiqa, Mateo 5:30 pʼitita ajinata tikrachisqanku: “Mejor casunqui uj partellayki chincapunan, amataj tucuynin cuerpoyqui infiernoman wijchʼuska cananka”, nispa. Kay Bibliap nisqanta wak qalluman tikrachiqkunaqa, “infierno” rimayta churaykusqanku, Mateo libropi sutʼita “chinkachisqa” rimaymanta parlachkaptin. ¿Imaraykutaq jinata tikrachinku? Ichá saqra runas nina lawraypi wiñaypaq ñakʼarinankuta yachachiyta munasqankurayku, chinkachisqa kanankuta yachachinankumantaqa. *

Imaynatá sumaq Bibliata tarisunman

Bibliaqa, sapa pʼunchay runas parlasqankumanjina qillqakurqa, tarpuq runa, michiq runa, challwata japʼiq runa ima, parlasqankumanjina (Nehemías 8:8, 12; Hechos 4:13). Chayrayku sumaq tikrachisqa Bibliaqa, tukuy laya runas entiendenankupaqjina kanan tiyan. Mana chayllachu astawanpis, kaykunata rikuchinan tiyan:

▪ Diospa yuyaychasqantapuni sutʼita rikuchinan tiyan (2 Timoteo 3:16).

▪ Entiendekuptillan sapa rimaymanta wak qalluman tikrachispa kikin rimayllatataq tikrachinku.

▪ Sapa rimaymanta wak qalluman kikin rimayta tikrachisqa, mana sutʼita entiendekuptinqa, imatachus ninayasqallanta tikrachisqa kanan tiyan.

▪ Runap parlasqanmanjina tikrachisqa kanan tiyan, runas ñawiriyta munanankupaqjinataq.

¿Kanchu juk Biblia ajina sumaq tikrachisqa? Kay revistata may chhika runas ñawiriqkunamanta Traducción del Nuevo Mundo nisqa Bibliata ñawiriyta akllanku. ¿Imarayku? Imaraykuchus tikrachiqkunamanta comisionpi kaqkunajina yuyanku, tikrachiqkunap yuyasqankutaq inglés simipi prólogo nisqapi qillqasqa kachkan, maypichus nin: “Mana entiendesqaykumanjinachu Bibliata tikrachiyku. Bibliata tikrachiyta qallarisqaykumantapacha, tukunaykukama, mayta kallpachakuyku sapa rimaypaq wak kikin rimayta inglés simipi tarinaykupaq, Bibliap yachachisqantapuni sutʼita rikuchinaykupaq, entiendekunanpaqjinataq”, nispa.

Traducción del Nuevo Mundo Bibliaqa, 60 qalluspiña ruwakuchkan, kunankamataq Bibliastaqa 145 junusmanta astawanña urqhunku. Kay Biblia parlayniykipi tikrachisqa kanña chayqa, juk Jehovamanta sutʼinchaqta niwaq juk Bibliata apanpusunanta, jinamanta qam kikin rikunaykipaq sumay Biblia kasqanta.

Bibliamanta tukuy sunquwan yachakuqkunaqa, Diospa yuyaychasqasninmanta astawan ukhunchayta munanku, chaymanjina kawsakunankupaq. Paykunajina qampis ruwayta munanki chayqa, juk sumaq tikrachisqa Biblia kapunasunta necesitanki. Chayrayku sumaq Bibliata maskʼanayki kanman.

[Sutʼinchaykunasnin]

[23 paginapi sutʼinchaynin]

Entiendesqankumanjina Bibliata tikrachisqankuqa, ñawiriyta munanapaqjina kaptinpis, mana allinta sutʼinchanchu imatapunichus Biblia yachachiyta munasqanta

[24 paginapi sutʼinchaynin]

Traducción del Nuevo Mundo de las Santas Escrituras Bibliaqa 60 qalluspiña ruwakuchkan, kunankamataq 145 junosmanta astawanña urqhukun

[22 paginapi recuadro, dibujo/foto]

ÑAWPA TIEMPOPI QILLQASQASMANTA SUTʼINCHAYKUNA

Bibliata entiendesqankumanjina tikrachisqankuqa, unay tiemposmantapachaña jamun. Unay tiempopi judiosqa, Bibliap nisqanta paykuna entiendesqankumanjinalla qillqarqanku, kunan tiempopitaq chay qillqasqankutaqa tárgumes arameos nisqa sutiwan riqsikun. Mana Bibliap nisqanta jinapunichu tikrachispapis, judiospa qillqasqankuqa, imatachus Bibliap wakin pʼitikunamanta entiendesqankuta rikuchin, chaytaq Bibliata wak qalluman tikrachiqkunata yanapan imatachus juk pʼiti ninayasqanta yachanankupaq. Judiospa qillqasqankupi Job 38:7 pʼitimanta parlaspa, sutʼinchan “Diospa wawasnin” rimayqa, ninayan “juk qutu ángeles” kasqanta. Chantapis kay tárgumes nisqaqa, Génesis 10:9 pʼitimanta parlaspa sutʼinchan, Nemrod Diospa contranpi “churanakuq” kasqanta, manataq “Diospa ñawpaqinpi kachkasqantachu”. Kay sutʼinchaykunaqa, Bibliap pʼitisninwan khuska rikhurin, manataq Bibliap cuentanmanta kananpaqchu qillqakun.

[Dibujo/foto]

POLÍGLOTA DE LONDRES NISQAMANTA URQHUSQA (1657 WATAPI TUKUCHASQA), JOB 38:1-15

Hebreo simipi qillqasqa (latín qalluman sapa rimaymanta wak rimayman tikrachisqa)

Tárgum arameo nisqamanta urqhusqa

[21 paginapi dibujo/foto]

EFESIOS 4:14 THE KINGDOM INTERLINEAR TRANSLATION OF THE GREEK SCRIPTURES, NISQANMANJINA URQHUSQA

Lluqʼi ladopi: sapa rimaymanta wak qalluman kikin rimayman tikrachisqa rikhurin; paña ladopitaq: imatachus niyta munasqanmanjina tikrachisqa rikhurin

[20 paginapi maymantachus foto urqhukusqan]

Ukhun: Shrine of the Book, Museo de Israel (Jerusalén)