Noé Jatun Para ima mana juk cuentollachu

¿JUK musuq pachapi kawsakuyta munawaqchu tukuy runaswan sunqu tiyasqa, mana maqanakuspa, mana wañuchinakuspa, ni imamanta ñakʼarispa ima? Chayta munanki chayqa, juk runamanta yachakusqayki mayta sunquchasunkiman, kallpachasunkiman ima, payqa Noé sutikun. Noeqa, kʼacha runa karqa, juk jatun arcatataq ruwarqa, pay, familian ima, salvakunankupaq, Diosninchik Jatun Parata saqra runasta wañuchinanpaq apamuchkaptin.

May chhika runasqa, Jatun Para kasqanmanta uyarinku. Bibliapitaq Noep kawsayninmanta Génesis 6-9 tʼaqakama qillqasqa kachkan, Corán nisqapipis, chantá may chhika llaqtaspitaq chaymanta runas parlanku. ¿Chiqamanta juk Jatun Para karqa punichu, chayri, kʼacha runas kanapaq cuentollachu? Universidadespi Bibliamanta yachakuqkuna, científicos imaqa, may chhika unaytaña parlanku Jatun Para karqapunichus manachus chaymanta. Chaywanpis Bibliaqa sutʼita niwanchik Jatun Para kasqantapuni manataq juk cuentollachu kasqanta. Jatun Paramanta imatachus Biblia nisqanta qhawarina.

Qallarinapaq Génesis libroqa willawanchik ima watachus, ima killachus, ima pʼunchaychus chay Jatun Para qallarisqanta, chantá maykʼaqchus, maypichus arca sayasqanta, astawanpis maykʼaqchus Jallpʼapi yaku chʼakisqanta ima. Chantapis Bibliaqa, sutʼita willallawanchiktaq, arca imayna ruwasqachus, imamanta ruwasqachus ima chhikan ruwasqachus kasqanmanta ima. Juk cuentolla kanman chayqa, mana ajinataqa sutʼinchakunmanchu, imaraykuchus llulla cuentosmanta librosqa, mana ajinata sutʼinchankuchu.

Bibliapiqa, Noep mirayninmanta qillqasqa kachkan, jinamanta yachanchik Noé ñawpa tiempopi kawsasqantapuni (1 Crónicas 1:4; Lucas 3:36). ¿Pikunataq Bibliapi Noep mirayninmanta qillqarqanku? Esdras, Lucas ima. Qillqanankupaqtaq mayta ukhuncharirqanku, Lucasqa qillqarqa Noep mirayninmanta Jesuskama.

Chantapis profeta Isaías, Ezequiel, apóstol Pablo, Pedro imaqa, Noemanta, Jatun Paramanta ima qillqallarqankutaq (Isaías 54:9; Ezequiel 14:14, 20; Hebreos 11:7; 1 Pedro 3:19, 20; 2 Pedro 2:5).

Jesús kikin Jatun Paramanta parlaspa nirqa: “Imaynatachus Noejpa tiempompi karqa, ajinallataj Runaj Churimpa jamuynimpipis kanqa: Mikhusharqanku, ujyasharqanku, casarakusharqanku, ususisninkutapis casarachisharqanku, Noeqa arcaman yaykunankama. Jatun parataj chayamuspa, tukuyninkuta chinkacherqa”, nispa (Lucas 17:26, 27). Jatun Para juk cuentolla kanman chayqa, Jesús, “Runaj Churimpa” jamuyninmanta parlasqanqa, qhasilla kanman.

Apóstol Pedro, qhipa pʼunchaykunapi Bibliap nisqanmanta ‘asikuqkuna’ kanankumanta parlarqa. Chantá nirqa: ‘Paykunaqa yachachkaspa, mana yachaqman tukunku, qunqapunkutaq Dios yakuwan Noep tiemponpi runasta chinkachisqanta’, nispa. ¿Ñuqanchikrí, paykunajinachu qunqapunanchik tiyan Jatun Para kasqanmanta? Mana, imaraykuchus Pedro nirqa: “Cielopis, kay pachapis ninapi qʼolachisqa kanankupaj waqaychasqa kanku juicio pʼunchaykama. Chaypachaqa Diosqa mana cheqan kajman jina kawsaj runasta juzgaspa, chinkarparichenqa”, nispa (2 Pedro 3:3-7).

Kunanpis Diosqa, juktawan saqra runasta chinkachillanqataq. Chantapis kallanqankutaq Noep tiemponpijina wakin runas salvakuqkuna. Noejina, ñuqanchikpis ruwasunchik chayqa, chiqa runaswan khuska juk musuq pachaman yaykullasuntaq.