Jesuspa yachachiykunasnin

Imaynatá wakkunata qhawananchik tiyan

¿Imaraykutaq kʼacha kananchik tiyan?

Pillapis qamwan saqra kaptin, ¿imatá ruwanki? Jesusjina ruwayta munaptinchikqa, tukuywan kʼacha kana tiyan, pikunachus saqrata ruwawanchik, chiqnikuwanchik ima, chaykunawanpis. Jesús nirqa: “Sichus munakunkichej qankunata munakojkunallata chayqa, ima allinta ruwankichejri? Chaytaqa juchasapaspis ruwallankutaj [...] Enemigosniykichejta munakuychej [...] qankunataj janaj pachapi kaj Diospa wawasnin kankichej. Payqa khuyan mana yuyarikojkunata, sajra sonqoyojkunata ima”, nispa (Lucas 6:32-36; 10:25-37).

¿Imaraykutaq perdonana tiyan?

Imallapipis pantaptinchikqa, Dios perdonanawanchikta munanchik. Jesuspis, Diosmanta chayta mañakunata yachachiwarqanchik (Mateo 6:12). Chaywanpis, wakkunata perdonallaptinchik Dios perdonawasqanchikta nirqa, nispa: “Sichus contraykichejta juchallikojkunata perdonankichej chayri, ajinallatataj janaj pachapi kashaj Tataykichejpis juchasniykichejta pampachanqa. Runas contraykichejta juchallisqankutachus mana perdonankichej chayqa, Dios Tataykichejpis manallataj juchasniykichejta pampachanqachu” (Mateo 6:14, 15).

 ¿Imaynatá familianchikwan kusisqa kawsasunman?

Jesús mana jaykʼaq casarakuspapis, tukuy familiamanta kaqkunata yachachiwanchik. Ruwasqanmanta, yachachisqanmanta ima, kimsa yachachiykunata qhawarina:

1. Qusaqa, tukuy sunqu warminta munakunan tiyan. Jesusqa, wakkunata munakurqa, mayta qusas paymanta yachakunkuman. Discipulosninman nirqa: “Uj mosoj kamachisqata qoykichej: Purajmanta munanakuychej”, nispa. Chaymantataq, imaynatachus munanakunankuta nirqa: “Imaynatachus noqa munakorqaykichej, ajinallatataj”, nispa (Juan 13:34). ¿Imaynatá qusas, kay kamachiyta juntʼankuman? Qhipan pʼiti chayta rikuchiwanchik: “Qosas, sapa ujpis warmiykichejta munakuychej imaynatachus Cristoqa Iglesiata munakorqa, ajinata, Iglesiaraykutaj kawsayninta churarqa [...]. Ajinata qosaspis sapa ujpis warminkuta munakuchunku cuerponkuta jina. Warminta munakojqa pay kikinta munakun. Mana pipis paypa cuerpollantatajqa chejninchu; astawanqa mikhunawan kallpachan, allimpi kanampajtaj qhawan. Cristopis kikillantataj Iglesianwan ruwan” (Efesios 5:25, 28, 29).

2. Qhariwarmiqa, mana jaykʼaqpis wasanchakunankuchu tiyan. Qusankuta chayri warminkuta wasanchaspa qhinchachakuspaqa, Diospa contranta juchallikunku, familiankutapis ñakʼarichinku. Jesús nirqa: “Manachu Diosmanta Qhelqasqapi leerqankichej [...]: Chayrayku qhareqa tatanta, mamanta saqespa, warminwan khuskachakaponqa. Iskayninkutaj ujllaña kanqanku. Ajinapeqa manaña iskaychu kanku, manachayqa ujllaña. Chayrayku, Diospa ujchasqanta ama runaqa tʼaqachunchu [...]. Chayrayku niykichej: Sichus pipis warminmanta tʼaqakun mana pay wajwan wasanchaspa khuchichakojtillan, waj warmiwantaj casarakun chayqa, khuchichakuspa qhenchachakun” (Mateo 19:4-9).

3. Wawasqa, tatamamankuta kasukunanku tiyan. Jesusqa, —juntʼa runa kaspapis— tatamamanta juchasapa kaptinkupis, kasukurqapuni. Bibliaqa, Jesús 12 watayuq kachkaptin, paymanta nin: “Jesús kutiporqa tatasninwan Nazaretman, chaypitaj paykunata kasuspa kakorqa”, nispa (Lucas 2:51; Efesios 6:1-3).

¿Imaraykú kay yuyaychaykunata kasukunanchik tiyan?

Jesusqa, discipulosninta yachachisqanta kasukunankuta nirqa: “Sichus chay imasta entiendespa ruwayta yachankichej chayqa, kusikuyniyojmin kankichej”, nispa (Juan 13:17). Runawan, Jesús yachachisqanmanjina kawsakuptinchikqa, paypa discipulosnin kasqanchikta rikuchisun: “Qankunachus munanakunkichej chayqa, tukuy runas yachanqanku yachachisqasniy kasqaykichejta” (Juan 13:35).

Astawan yachakuyta munaptiyki, ¿Imatapunitaq Biblia yachachin? *, libromanta 14 yachaqananta qhawariy.

[Sutʼinchaynin]

[14, 15 paginaspi dibujo/foto]

Jesús, mana kasukuq churimanta parlasqanqa, kʼacha kananchikta, perdonananchikta ima, yachachiwanchik (Lucas 15:11-32)

[15 paginapi dibujo/foto]

Qhariwarmiqa, mana wasanchakunankuchu tiyan