Infiernopi creeyqa may riqsisqa

“Infiernomanta parlayqa manchachiwaq. Nina lawraymanpis wikchʼuykuchkawankumanjina musqukusqayrayku, qhaparispa rikchʼariq kani. Chayrayku mana juchallikunaypaq mayta kallpachakuq kani.” (Arline)

INFIERNOPI, ¿juchallikuqkuna ñakʼarichkasqankutachu yuyanki? Achkha runas ajinata yuyanku. Escocia suyupi, 2005 watapi, Universidad de Saint Andrews nisqamanta juk runa, religionta kamachiqkunata tapurisqanmanjina, kimsamanta juk, Diosmanta karunchakuq runaqa “wiñaypaq infiernopi ñakʼarichkasqanta” nisqa. Sapa phichqamanta juk infiernopi maqachikuspa ñakʼarichkasqanta creesqanta nillasqataq.

Achkha suyusmanta runasqa, infiernopi creenku. Sutʼincharinapaq, Estados Unidos suyupi, 2007 watapi, kay Gallup nisqa empresamanta, 10 runasta tapurisqankumanjina, 7 infiernopi creesqankuta nisqanku. Kay 2000 watapi, 10 mexicanosta tapurisqankumanjinataq, 7 infiernopi creesqankuta nillasqankutaq. Wak suyuspi mana religionniyuq kaqkunapis, infiernopi creellankutaq. Gallup nisqa empresapi llamkʼaqkuna, 10 argentinosta chantá 10 españolesta tapurisqankumanjina 4 argentinos, 3 españoles, infierno kasqantapuni nillasqankutaq. Kay 2004 watapi, 10 canadiensesta chantá 10 britanicosta tapurisqankumanjina 4 canadienses, 3 británicos kikillantataq nisqanku.

¿Imatá iglesiaspi yachachinku?

Cristiano nichikuqkunaqa, juchallikuqkuna manaña infiernopi ñakʼarichkasqankutachu yachachinku. Kunanqa kay 1993 watamanta, Catecismo de la Iglesia Católica nisqanmanjina yuyanku, chaypi nin: “Juk runa infiernoman rinanta nispaqa, Diosmanta wiñaypaq karunchakunanta ninayan”, nispa.

Chaywanpis, achkha runasqa, infiernopi saqra runas lawrachkasqankuta yuyallankupuni. Ajinata yuyaqkunataq, Bibliap yachachisqan kasqanta ninku. Centro teológico Southern Baptist Theological Seminary nisqata kamachiq Albert Mohler sutiyuq, “chayqa chiqapuni kasqanta”, nillantaq.

¿Imatachus qam creesqayki valenchu?

Infiernopi, runa ñakʼarin chayqa, manchachikunapaqjina. Chaywanpis kay nisqanku llulla yachachiy chayqa, cristiano nichikuqkunap religionninkuta apaykachaqkuna, infiernopi runa ñakʼarisqanta nispaqa, runata iskaychachichkanku, llakichichkanku, Diostapis mana allinpaqchu qhawachichkanku.

Chaywanpis, ¿imatá Biblia infiernomanta nin? Qhipan yachaqanaspi, Biblia, juk qallumanta wak qallusman tikrachikusqanmanjina kay tapuykunaman kutichisunchik: 1) ¿Mayman wañupuspa rinchik?, 2) ¿imatá Jesús infiernomanta yachachirqa?, 3) infiernomanta chiqa kaqta yachay, ¿imaynatá Diosman qayllaykuchiwanchik?