Diosman qayllaykuy

Jehovaqa chiqan kaqta munakun

Hebreos 10:26-31

MAYKʼAQLLAPIS, ¿pipis chʼawkiyasurqachu chayri qhasillamanta pipis tumpasurqachu? Jina kaptinqa, mayta llakikunchik, astawanraq juchayuq kaq mana juchanmanta pesachikuptin, nitaq pay juchayuq kasqanta nisqankurayku. Pipichus atienekurqanchik chay runa, pichus munakuwasqanchikta yuyarqanchik chay runa, chʼawkiyawaptinchikqa aswan llakiy. Jinapi rikukuspa ichá tapukunchik: “¿Imaraykutaq Dios kaykuna pasananta saqin?”, nispa. * Diosqa, mana chiqan kaqta ruwaqkunata chiqnikun. Chaywanpis, Bibliap nisqanmanjina, Diosqa juchallikuqkunata, nitaq juchankumanta pesachikuqkunata juzganqa. Apóstol Pablo kay Hebreos 10:26-31 pʼitikunapi qillqasqanta sutʼincharina.

Pablo nin: “Sichus cheqa kajta yachaspaña, juchalliyllatapuni munasunman chayqa, manaña juchasrayku waj jaywanaqa kanchu”, nispa (26 pʼiti). ¿Imaraykutaq juchallikuqkuna mana perdonanapaqjina kanku? Ñawpaqta, chiqa kaqta yachachkaspa ‘juchallikusqankurayku’, Qheshwa Biblia nisqanmanjina nisunman ‘munayninkumanjina juktawan juchapi purisqankurayku’. Chantá, chay juchata ruwayman yachaykakapusqankurayku, manataq juchasapa runa kasqankuraykuchu juk kutillata pantanku manaqa sapa kuti juchallikunku. Imaraykuchus saqra ruwayqa sunqunpi saphichaykukun. Kay runasqa yachachkaspa juchallikunku. Apóstol Pabloqa, kay runas ‘chiqa kaqta yachasqankuta’, Dios, imatachus kamachisninmanta suyasqanta yachasqankuta ima, chayta yachachkaspataq mana ruwayta munasqankuta niwanchik.

Dios, ¿imatá kay juchallikuq runasmanta nin? Pabloqa, “manaña juchasrayku waj jaywanaqa kanchu”, nispa nin. Jesucristoqa, juchasapas runas imapipis pantasqankurayku, perdonta tarinankupaq wañurqa (1 Juan 2:1, 2). Pichus juchallikuq, juchanmanta mana pesachikun chayqa, Jesucristo, payrayku wañusqanta mana jatunpaqchu qhawasqanta rikuchin. Jehovapaq, chay juchallikuqqa, ‘Cristota qhisachaq runa, astawan juchachanapaqjinataq. Tratomanta yawarta chʼichipaq qhawan’, nisunman Jesuspa yawarninta chʼichipaq qhawan (29 pʼiti). Ruwayninwanqa Jesusta qhisachasqanta, juchasapa runap yawarninmanta nisqa, Jesuspa yawarninta “mana valorniyuqtajina” qhawasqanta rikuchin (Comentario al Nuevo Testamento, de William Barclay). Ajina runasqa Jesucristo wañusqanrayku, mana perdonta tariyta atinkumanchu.

Chaywanpis, ¿imataq kanqa kay runasmanta? Jehovaqa chiqan kaqmanjina imatachus ruwananta nin: “Vengakunaqa noqaypata; noqamin pagachikusaj”, nispa (30 pʼiti). Mana wakkunap allinninta maskʼaspa juchallikuqkunallapuniqa kayta yuyarinanku tiyan: pichus Diospa nisqanmanta chanzakuqqa, chiqan kaqmanjina juzqasqa kanqa. Juchallikuqkunaqa pantasqankurayku paykunallataq ñakʼarinku (Gálatas 6:7). Chaywanpis, chay rato mana juchankumanta juzasqa kaspapis, Dios, kay Jallpʼamanta mana chiqan kaqta chinkachichkaptin juzqasqa kanqanku (Proverbios 2:21, 22). Pablop nisqanta, mana qunqanachu tiyan, pay nin: “Kawsaj Diospa makisninman urmayqa manchariywan kharkatitinapaj”, nispa (31 pʼiti).

Rikusqanchikmanjina, chiqa kaqta yachachkaspa juchallikuqkunaqa chinkachisqa kanqanku. Maykʼaqllapis wakpa juchanrayku ñakʼarirqanchik chayqa, ¡paykuna juzgasqa kanankuta yachayqa, mayta sunquchawanchik! Chayrayku chiqan kaqta munakuq Diospi atienekunchik, payqa, tiempomanjina saqra runasmanta vengakunqa.

[Sutʼinchaynin]