¿Mayman wañupuspa rinchik?

“Tukuy almasqa mana wañunkuchu, saqra runap almanpis [...]. Wiñay nina lawraypi ñakʼarichkan, mayjinata khuyakunankuta niptinkupis mana wañuyta atinkuchu.” (Kay II chantá III siglomanta teólogo Clemente de Alejandría)

CLEMENTE de Alejandriajina, infiernopi runa ñakʼarisqanta yuyasqankuwanqa, alma mana wañusqanta nichkanku. Chaywanpis, ¿Biblia ajina kasqantachu nin? Kay qhipan tapuykunaman imaynatachus Biblia kutichisqanta qhawarina.

¿Adanpata mana wañuq alman kapurqachu? Kay Mosoj Testamentoj nisqa Biblia, imaynachus Adán ruwasqa kasqanmanta sutʼinchachkan, nintaq: “Ajinallataj escribiska cashan: Ñaupaj caj runa Adamka causaj alma ruwaska carka”, nispa (1 Corintios 15:45). Kay Bibliaqa, mana nichkanchu Adán almayuq kasqanta.

¿Adán juchallikusqanrayku, ima karqa? Diosqa, Adanta mana infiernopichu ñakʼarichirqa. Manaqa kayta nirqa: “Jumpʼi suruyta llankʼanki mikhunaykipaj, ñutʼu jallpʼaman tukunaykikama, imaraykuchus jallpʼamanta ruwasqa kanki. Jallpʼa kanki, jallpʼallamantaj kutinki”, nispa (Génesis 3:19, Qheshwa Biblia). Kay Bibliaqa mana nichkanchu Adán wañupuptinkama, imanpis kawsachkaq qhipakusqanta. Adanqa kawsaq alma karqa, chayrayku pay wañupuptinqa mana imanpis kawsachkaq qhipakurqachu.

¿Mayqin runallapis mana wañuq almayuq kanchu? Diosqa, profeta Ezequielman nirqa: “Pichus juchallejqa [almaqa], chaymin wañonqa”, nispa (Ezequiel 18:4). Chaymanta apóstol Pablo jinata qillqarqa: “Uj runanejta [Adanniqta] jucha cay pachaman yaycumorka. Juchanejtataj tucuy wañuncu. Ajinamanta tucuy runaspaj wañuy jamun tucuy runas juchallicuskancuraycu” (Romanos 5:12, Dios Parlapawanchej). Tukuy runas juchasapas kasqankurayku, paykuna kikin almas kasqankuraykutaq wañunku.

¿Wañusqas imatapis yachankuchu? Biblia nin: “Kawsashajkunaqa wañunankuta yachakunku; wañusqasrí mana imatapis yachankuchu”, nispa (Eclesiastés 9:5). Chantá sutʼinchallantaq, juk runa wañupuspaqa, ‘jallpʼaman tukusqanta, chay pachataq tukuy yuyasqan chinkapusqanta’ (Salmo 146:4, Qheshwa Biblia). Wañupuqkunaqa ‘mana imatapis yachankuchu’ imaraykuchus ‘tukuy yuyasqankuqa chinkapun’, chayrayku, ¿imaynatá infiernopi ñakʼarinkuman?

Jesucristoqa, mana ni jaykʼaq nirqachu wañupuqkuna yuyallasqankutapuni, manaqa wañuyta puñuywan kikincharqa (Juan 11:11-14). * Chaywanpis wakin runasqa, Jesús, infiernopi nina lawray kasqanmanta parlasqanta, chantá juchallikuqkuna chayman wikchʼusqa kanankuta yachachisqanta ninku. Jesús, imatachus infierno nispa niyta munasqanmanta parlarina.

[Sutʼinchaynin]