Jesuspa yachachiykunasnin

Wañupuqkunapaq juk chiqa suyakuy

Jesusqa, kimsa runasta wañuymanta kawsarichirqa, chaywantaq wañupuqkuna juk suyakuyniyuq kasqankuta rikuchirqa (Lucas 7:11-17; 8:49-56; Juan 11:1-45). Imaynachus kasqanta yachanapaqtaq, imaraykuchus wañusqanchikta sutʼincharina.

¿Imarayku unqunchik, wañunchik ima?

Jesús, runaspa juchasninta perdonaptinqa, sanoyapuq kanku. Juk kuti payman, juk suchu runata apaptinkupis nirqa: “Imataj aswan atikojlla kanman suchu runaman ninaypaj: Juchasniyki pampachasqaña, nispa ninaychu, chayri: Sayarikuspa, ripuy, nispa ninaychu? Kunan rikuchisqaykichej Runaj Churenqa atiyniyoj kasqanta kay pachapi juchasta pampachanampaj. Chantá suchu runata nerqa: Sayariy, phulluykita oqharikapuspa, wasiykiman ripuy”, nispa (Mateo 9:2-6). Rikusqanchikmanjina, unqunchik, wañunchik ima, juchasapa runas kasqanchikrayku. Tukuytaq juchasapa runas kanchik, Adán juchallikusqanrayku (Lucas 3:38; Romanos 5:12).

¿Imaraykutaq Jesús wañurqa?

Jesusqa ni jaykʼaq juchallikurqachu, chayraykutaq mana wañunanchu karqa. Chaywanpis, payqa juchasninchik pampachasqa kananpaq wañurqa. Payllataq nirqa: yawarniy “jichʼasqa kanqa ashkha runaspa juchasninku pampachasqa kanampaj”, nispa (Mateo 26:28).

Nillarqataq: “Runaj Churimpis mana sirvichikojchu jamorqa. Astawanqa payqa jamorqa runasta sirvej, kawsaynintataj qoj, ashkha runas salvasqa kanankupaj” (Mateo 20:28). Jesusqa achkha runas wañuymanta “salvasqas” kanankupaq, kawsayninta qunanmanta parlarqa. Nirqataq: “Noqarí jamuni kawsayniyoj kanankupaj, aswan juntʼasqa kawsayniyoj kanankupajtaj”, nispa (Juan 10:10). Wañupuqkunapaq juk suyakuy kasqanmanta allinta entiendenapaq, ñawpaqta maypichus wañupuqkuna kachkasqankuta sutʼincharina.

 Wañupuqkuna, ¿imallatapis yachankuchu?

Jesusqa, amigon Lázaro wañupusqanmanta, imaynapichus wañupuqkuna kachkasqankumanta discipulosninman nirqa: “‘Lázaro kawsaqenchejqa puñushan. Kunan risaj [Betaniaman] payta rijchʼarichimoj’, nispa. [...] Jesús chayta nisqa Lázaro wañusqanmanta, yachachisqasnintajri yuyarqanku puñurparisqallanmanta parlasqanta. Chaymanta Jesús sutʼincharqa: ‘Lazaroqa wañupumpuni’”, nispa. Jesús, wañuyta puñuywan kikinchasqanqa, wañupuqkuna puñuchkankumanpisjina ni imata yachasqankuta sutʼincharqa (Juan 11:1-14).

Lazarotataq, tawa pʼunchay pasasqanmantaña kawsarichirqa. Bibliaqa, Lázaro wañusqa kachkaspa, imatachus ruwasqanmanta, mana imatapis ninchu. ¿Imarayku? Imaraykuchus Lazaroqa, mana imatapis yacharqachu nitaq yuyarqachu (Eclesiastés 9:5, 10; Juan 11:17-44).

Wañupuqkunapaq, ¿ima suyakuytaq tiyan?

Wañupuqkunaqa kawsarimunqanku, wiñaypaqtaq kawsakunqanku. Jesús nirqa: ‘Hora chayamunqa, chaypachataq tukuy pʼampasqa kaqkunaqa parlasqayta uyarispa kawsarimunqanku’, nispa (Juan 5:28, 29).

Dios, kay suyakuyta quwasqanchikwanqa, mayta munakuwasqanchikta rikuchiwanchik. Jesús sutʼincharqa: “Diosqa chay jinatapuni kay pachapi kaj chhikata munakusqanrayku, uj kʼata Churinta qorqa. Ajinamanta pillapis paypi creejqa mana chinkayman renqachu, astawanqa wiñay kawsayniyoj kanqa”, nispa (Juan 3:16; Apocalipsis 21:4, 5).

Kaymanta astawan yachakuyta munanki chayqa, ¿Imatapunitaq Biblia yachachin?, nisqa libromanta 6 yachaqananta ñawiriy *

[Sutʼinchaynin]