Diospa munaynin juntʼakunanpaq, ¿imapí María yanaparqa?

JESÚS achkha runasman yachachichkaptin, jinallapi juk warmi payta nirqa: “Kusikuyniyojmin pi warmichus wijsampi apasorqa, pejpa ñuñuntachus ñuñorqanki, chay”, nispa. Jesús, discipulosnin mamanta yupaychanankuta munanman karqa chayqa, chay kutipichá mamanta yupaychanankuta ninman karqa. Chaywanpis pay nirqa: “Diospa Palabranta uyarispa kasojkunamari kusikuyniyojqa kanku”, nispa (Lucas 11:27, 28).

Arí, Jesusqa, ni jaykʼaq mamanta yupaychananpaqjinachu qhawarqa, nitaq discipulosnintapis mamanta yupaychanankutachu kamachirqa. Ajina kaptin, ¿imaraykutaq achkha runas Mariata yupaychanku? Kay tapuyman kutichinapaqqa, achkha runas imatachus Mariamanta creesqankuta, Bibliawan ukhuncharina.

Qampi Diospa khuyakuynin kachkan, warmis ukhupitaq bendecisqa kanki

Ángel Gabrielqa, Diospa munaynin juntʼakunanpaq imatachus María ruwanan kasqanta manaraq payman willachkaptin, kayjinamanta napaykurqa: “Qampi Diospa khuyakuynin kachun. Señorqa qanwan kashan”, nispa (Lucas 1:28). Wakin Bibliasqa kay pʼitita jinata tikrachinku: “Cusicuy, ancha favoreciska, Señorka kanwan cashan”, nispa. Chantá María wak kutipi Elizabetta waturikuq rirqa, Elizabettaq payta rikuytawan nirqa: “Bendecisqa kanki warmis ukhupi; wijsaykipi kaj wawapis bendecisqallataj”, nispa (Lucas 1:42). Ángel Gabriel nisqan, Elizabet nisqan ima, ¿Mariata yupaychana kasqantachu niyta munan?

Mana. Chaywanpis, católica religionta kamachiqkuna, ángel Gabrielpa, Elizabetpa ima nisqankuta católicos Mariamanta mañakunankupaq juk resoman tukuchirqanku, chaywanpis Bibliaqa, Mariamanta mañakuyta, mana yachachinchu. Imaraykuchus ángel Gabriel, Elizabet imaqa, nisqankuwan Diospa Churinta nacechikunan kasqanrayku, Mariata Dios jatunpaq qhawasqallanta rikuchichkarqanku, manataq Mariamanta mañakunatachu yachachichkarqanku. Chayrayku Mariamanta mañakuna kasqanta yachachiyqa, mana Bibliamantachu jamun. Jesusllataq discipulosninman mañakuyta yachachichkaptin, pimantachus mañakunankuta sutʼincharqa, nirqataq: “Janaj pachapi kashaj Tatayku”, nispa (Mateo 6:9).

Janaqpachapi kamachin

Chantá achkha runasqa, María “Janaqpachamanta Kamachiq” kasqanta yuyanku. Bibliataq, ni mayqin pʼitipi chayta ninchu. Chaywanpis, María janaqpachapi juk sumaq llamkʼayta ruwachkasqanta sutʼinchan. ¿Ima llamkʼaytataq ruwachkan?

Jesusqa, chiqa discipulosninmanta wakinkuna, paywan khuska janaqpachamanta kamachimunankuta sutʼincharqa (Lucas 22:28-30). Jesusqa, kay akllasqa discipulosta, sacerdotesjina ‘Diosta servinankupaq, janaqpachamanta kay pachata kamachinankupaq’ ima  yachachin (Apocalipsis 5:10, NM). Biblia sutʼinchasqanmanjina, Mariaqa kay sumaq ruwayta ruwananpaq akllasqa karqa. ¿Imarayku chayta nisunman?

Ñawpaq yachaqanapi yachakurqanchikjina, Jesús wañupusqanmanta qhipaman, maman, wawqisnin, discipulosnin ima, “uj sonqolla tantak[urqanku]”. Tukuyninku, “wakin warmiswan ima”, pachak iskay chunka runas karqanku, Diosmanta mañakunankupaqtaq tantakurqanku (Hechos 1:12-15). Biblia sutʼinchasqanmanjina, Pentecostés nisqa pʼunchaypaq, “tukuyninku uj cheqallapi tantasqa kasharqanku” jinallapi Diosqa paykunaman espíritu santonta tʼakaykamurqa (Hechos 2:1-4).

María, wak warmisjina, Diospa espíritu santonwan juntʼasqa kasqanqa, paypis janaqpachapi Jesuswan khuska kamachimunanpaq akllasqa kasqanta rikuchiwanchik. Chayrayku, María janaqpachapi Jesuswan khuska kachkasqanta nisunman (Romanos 8:14-17). Diospa munaynin juntʼakunanpaq, ¿imatá María, wak akllasqa cristianos ima ruwanqanku?

Mariaqa chiqa sunqu kaqkunata yanapanqa

Bibliaqa, sacerdotes, jueces, reyes ima kanankupaq 144.000 runas janaqpachapi kawsarimunankuta niwanchik (Apocalipsis 14:1, 4; 20:4, 6). Paykunaqa sacerdotesjina, Jesuspa yawarninniqta, pisimanta pisi mana ni ima juchayuq runaman tukunankupaq, chiqa sunqu kaqkunata yanapanqanku (Apocalipsis 21:1-4). Chayrayku Diosta chiqa sunqu yupaychaqkunaqa, chay juntʼakunallantaña, ¡mayta suyachkanku! *

Mariaqa, ñawpa tiempopi Diospa munaynin juntʼakunanpaq yanaparqa, kunanpis yanapachkallantaq. Payqa munakuyniyuq mama, kʼumuykukuq sunquyuq, chiqa sunqu, kasukuq warmi ima karqa, tukuypis paymanta yachakusunman; chantapis jatun llakiykunapi rikukuspa sinchita sayasqanmanta yachakullasunmantaq. Mana chayllachu; manaqa Mesiasta nacechikusqanrayku, janaqpachapi Jesuswan khuska kamachimunanpaq akllasqa kasqanrayku ima, Mariataqa, may jatunpaq qhawananchik tiyan.

Chantapis Mariamantaqa, Diospa chiqa sunqu kamachisninmantajina, Jehová Diosllata yupaychana kasqanta yachakunchik. Mariaqa, Jesuswan khuska janaqpachamanta kamachiqkunawan, kayjinamanta takispa Diosta yupaychanku: “Kamachina tiyanapi tiyasqa Kajman [Jehová Diosman], Corderomampis [Jesucristomanpis] yupaychay, allimpaj qhawasqa kay, jatunchasqa kay, atiytaj wiñay wiñaypaj kachun”, nispa (Apocalipsis 5:13; 19:10).

[Sutʼinchaynin]