Diospa Reinonmanta imastachus Jesús yachachisqan

“Chaymanta, Jesús rerqa tukuy llajtasman, ranchosman ima, willaraspa, [...] Diospa reinon evangeliomanta.”(LUCAS 8:1-3)

JESÚS nirqa: “Sonqopi imachus juntʼa kashan, chaymanta simeqa parlan”, nispa (Mateo 12:34). Arí, tukuypis imachus astawan gustawasqanchikmanta wakkunaman parlariyta munanchik. Chayrayku, Diospa Reinonmanta Jesús astawan parlasqanpiqa, Diospa Reinonmanta runasman willay, mayta gustasqanta reparanchik.

¿Imataq Diospa Reinonrí? Diospa Reinonqa, juk gobierno, kay gobiernotataq Diosllataq jatarichirqa, chay reinonpi kamachinanpaqtaq juk reyta churarqa. Chay reinomantataq Jesusqa, runasman astawan yachachirqa, chayrayku tawa Evangeliospiqa, 110 kutita chay reinomanta parlakun. Jesuspa yachachiykunasninta ukhunchaspaqa, Diospa Reinonmanta, imatachus tumpamantawan ruwananmanta ima, astawan yachakusunchik.

¿Pitaq Diospa Reinonmanta kamachiqninrí? Jehová Diosllataq reinonpi kamachinanpaq juk reyta akllarqa, manataq runaschu. Jesusllataq, reyjina kamachinanpaq, Diospa akllasqan kasqanta nirqa.

Bibliaqa, wiñaypaq sayachisqa reinopi Mesías kamachinanta nirqa, chaytataq Jesús allinta yacharqa (2 Samuel 7:12-14; Daniel 7:13, 14; Mateo 26:63, 64). Chayrayku, “Noqa chay Cristo kani” nispaqa, Diospa reinonpi Kamachinanpaq akllasqa kasqanta rikuchirqa (Juan 4:25, 26). Chayraykutaq achkha kutista, ‘reinoy’ nisqa rimayta uqharirqa (Juan 18:36).

Chantapis Jesusqa, wakkunawan khuska kamachinanta nirqa (Lucas 22:28-30). Paykunataqa pisilla kasqankurayku, “juchʼuy tropa ovejasniy” nispa suticharqa, nirqataq: “Tataykichejqa reinonta qankunaman qoyta munan”, nispa (Lucas 12:32). Bibliataq, 144.000 akllasqas kaqkuna Jesuswan khuska kamachimunankuta sutʼinchan (Apocalipsis 5:9, 10; 14:1).

¿Maymantataq Diospa Reinon kamachimunqa? Kamachiq Poncio Pilatoman Jesús nirqa: “Reinoyqa mana kay pachamantachu”, nispa (Juan 18:36). Arí, Diospa Reinonqa mana kay pachapi kaq runasniqtachu Jallpʼata kamachimunqa. Manaqa Diospa akllasqasninniqta janaqpachamantapacha kamachimunqa, chayrayku Jesusqa, chay reino, “janaj pacha reino” * kasqanta achkha kutita nirqa (Mateo 4:17; 5:3, 10, 19, 20).

 Jesusqa, imapaqchus Jallpʼaman jamusqanta juntʼaytawan, janaqpachaman kutipunanta yacharqa. Chaypitaq discipulosninpaq ‘juk chiqata wakichinan’ karqa, paywan khuska kanankupaq (Juan 14:2, 3).

¿Imatataq Diospa Reinon ruwanqa? Imaynatachus Diosmanta mañakunankuta discipulosninman yachachichkaspa, Jesús nirqa: “Reinoyki jamuchun, munayniykitaj ruwasqa kachun, imaynachus janaj pachapi, ajinallatataj kay pachapipis”, nispa (Mateo 6:9, 10). Diospa munayninqa, janaqpachapi juntʼakuchkanña, Jallpʼapipis Diospa Reinonniqta juntʼakullanqataq. Chaypaqtaq Jallpʼapi wak imastaraq ñawpaqta ruwanqa.

¿Imatataq Jallpʼapi ruwanqa? Jesús nisqanmanjina, Diospa Reinonqa tukuy saqra runasta chinkachinqa (Mateo 25:31-34, 46). Chaypacha manaña ima saqra ruwaykunapis kanqachu. Jesús nisqanmanjinataq Jallpʼantinpi ‘llampʼu sunquyuqkuna’, chiqan kaqmanjina ruwaqkuna, khuyakuyniyuq kaqkuna, ‘llimphu sunquyuqkuna’ imalla kawsanqanku (Mateo 5:5-9).

Paykunataq juk kʼachitu lugarpi tiyakunqanku, imaraykuchus Diospa Reinonqa Jallpʼata llimphuchanqa. Juk runa, Jesuswan khuska kurkupi warkhusqa kachkaspa, Jesusta nirqa: “Yuyarikuwanki ari nuqamanta, reinoykipi kaspa”, nispa. Jesustaq kutichirqa: “Chiqamanta niyki: Ñuqawan Paraisopi kanki”, nispa (Lucas 23:42, 43, NM). Arí, Diospa Reinonqa, Jallpʼata juk paraisonman tukuchinqa imaynachus qallariypi Edén huertapi karqa chayjinaman.

¿Imatawantaq runaspaq ruwanqa? Jesusqa, mana Diospa Reinon imatachus ruwanallanmantachu parlarqa, astawanqa, milagrosta ruwaspa, Diospa Reinonpi kamachichkaspa imaynatachus runasta yanapanantapis rikuchillarqataq. Mateoqa, Dios yuyaychasqanmanjina jinata qillqarqa: “[Jesusqa]  muyumorqa tukuynin Galileata, yachachispa sinagogasninkupi, willaraspataj reinoj evangelionmanta. Llajtapitaj runasta sanoyacherqa tukuy laya onqoykunamanta, nanaykunamantawan”, nispa (Mateo 4:23).

Jesusqa, tukuy laya unquykunamanta runasta sanoyachirqa. Sutʼincharinapaq; juk kuti juk ciego nacekuq runata qhawarichirqa (Juan 9:1-7, 32, 33). Wak kutipitaq makinwan llamkhaykuspalla juk runata lepra unquymanta sanoyachirqa (Marcos 1:40-42). Chantá wak kutipiqa, “uj joqʼara opa runata” sanoyachispa, “joqʼarasta uyarichi[yta], opastapis parlarichi[yta]” atisqanta rikuchirqa (Marcos 7:31-37).

Wañuymantapis runasta kawsarichirqa. Bibliaqa, juk viudap kʼata churinta, 12 watasniyuq juk imillitata, munasqa amigon Lazarota ima, wañuymanta Jesús kawsarichimusqanta nin (Lucas 7:11-15; 8:41-55; Juan 11:38-44).

Kawsarimuq Jesusqa, Jallpʼata kamachichkaptin imaynachus runas kawsakunankuta apóstol Juanman juk musquypijina rikuchirqa, nirqataq: “Kunanqa Diospa tiyakuynin runas ukhupi kashan, paytaj paykunawan khuska tiyakonqa. Runasqa paypa ayllun kanqanku, Diostaj paykunaj Diosninku kanqa. Payqa tukuy waqayta ñawisninkumanta pichanqa, manañataj wañuy kanqachu, nitaj waqaypis, nitaj qhapariypis, nitaj nanaypis, imaraykuchus ñawpaj kaj imasqa manaña kanqachu”, nispa (Apocalipsis 1:1; 21:3, 4). Chiqamanta nisunman tumpamantawan manaña ñakʼariy, wañuy ima kananqa, ¡may sumaq kasqanta! Imaraykuchus chaypachamin Diospa munaynin janaqpachapi, Jallpʼapipis juntʼakunqa.

¿Maykʼaqtaq kamachiyta qallarinqa? Jesusqa, kay pachap tukukuynin qallarisqanmantapacha kamachiyta qallarinanta nirqa. ¿Maykʼaqtaq kay pachap tukukuynin qallarirqa? Jesusqa, kay pachap tukukuyninpi imaschus rikukunanmanta parlaspa, Jallpʼantinpi juk nación wak nacionpa contranta uqharikunanta, yarqhaykuna kananta, sinchi jallpʼa ikhakuykuna kananta, wañuchiq unquykuna kananta, tukuyniqpi saqrata ruwaqkuna kananta ima nirqa (Mateo 24:3, 7-12; Lucas 21:10, 11). Jesuspa nisqanqa, 1914 watamantapacha rikukuchkan, I Guerra Mundial qallarisqanmantapacha. Chaytaq Jesús janaqpachapi kamachiyta qallarisqantaña rikuchiwanchik. Chayrayku chiqamanta nisunman, Diospa Reinon, Jallpʼapi Diospa munayninta juntʼananpaq, pisi tiempollaña kasqanta. *

Chaywanpis, Diospa Reinon kamachiyta qallarichkaptin, wiñay kawsayta japʼinanchikqa, kunan tiempopi Jesuspa yachachiykunasninmanjina kawsananchikmanta kachkan.

[Sutʼinchaykunasnin]