Diosman qayllaykuy

Reinoykiqa wiñaypaq qhipakunqa

2 Samuel 7:1-16

ACHKHA kamachiqkunaqa, tiempo pasasqanmanjina kamachiyninkuta saqirqanku. Wakinkunaqa, watiqmanta kamachinankupaq manaña akllasqachu karqanku, wakinkunataq kamachiyninkuta mana tukuchkaspa qharquchikurqanku. ¿Imatataq Jesucristomanta nisunman, pitachus Dios akllarqa Reinonpi kamachinanpaq paymanta? ¿Imapis payta jarkʼanmanchu mana kamachinanpaq? Kay tapuykunaman kutichinapaq 2 Samuel libropi 7 tʼaqanpi imatachus Jehová Davidman nisqanta qhawarina.

Kay tʼaqap qallariyninpi nisqanmanjina Davidqa, Diospa trato ruwasqan arca, juk toldopi waqaychasqa kasqanta, paytaq juk sumaq wasipi tiyakusqanta mana allinpaqchu qhawarqa. * Chayraykutaq profeta Natanman Jehová Diospaq juk templota ruwapuyta munasqanta nirqa (2 pʼiti). Chaywanpis pisi tiempoman Jehovaqa, profeta Natanniqta Davidman mana paychu juk yupaychana wasita ruwachipunanta, manaqa mirayninmanta juknin kaq wawan chay wasita ruwachipunanta nirqa (4, 5, 12, 13 pʼitikuna).

Jehovaqa, imatachus David ruwayta munasqanta may allinpaq qhawarqa, jinallatataq tukuy sunqu yupaychayta munasqantapis. Chayrayku juk profecianpi nisqanmanjina Jehovaqa, Davidwan juk tratota ruwarqa, miraynillanmantataq juk reyta akllanapaq, chaypa reinontataq sinchita sayachinanpaq. Diosqa, profeta Natanniqta Davidman nirqa: “Mirayniykita, reinoykitawanqa noqa waqaychasaj wiñaypaj, ajinallatataj reinoykipis wiñaypaj qhepakonqa”, nispa (16 pʼiti). ¿Pitaq Davidpa mirayninmanta jamurqa wiñaypaq kamachinanpaq? (Salmo 89:20, 29, 34-36.)

Jesusqa, Davidpa mirayninmanta jamurqa. Wawayuq kananta Mariaman willaq angelqa, chay wawanmanta jinata nirqa: “Señor Diosqa ñawpa tatan Davidpa reinonta payman qonqa. Chantá payqa wiñaypaj israelitasta kamachenqa mana jaykʼaj tukukuyniyoj reinompi”, nispa (Lucas 1:32, 33). Arí, Jehová, Davidwan tratota ruwasqanqa, Jesucristopi juntʼakurqa. Jesustaqa mana runaschu akllarqanku kamachinanpaq, manaqa Diosllataq Jesusta akllarqa, jinamanta Davidman nisqanta juntʼananpaq, imaraykuchus nisqanqa juntʼakunpuni (Isaías 55:10, 11).

¿Imatataq 2 Samuel 7 tʼaqa rikuchiwanchik? Jesustaqa kamachinanpaq ni imapis jarkʼayta atisqanta rikuchiwanchik. Jesusqa, Diospa munayninta janaqpachapi, kay pachapi ima juntʼanqapuni (Mateo 6:9, 10).

Chantapis Jehová Dios may kʼacha kasqanta rikuchillawanchiktaq. Rikunchikjina payqa imatachus David ruwayta munasqanta may allinpaq qhawarqa. Ichá wakin kuti unqusqa chayri machitusña kasqanchikrayku, manaña ñawpaqtajinachu Diospaq llamkʼayta atinchik, chaywanpis tukuy sunqu yupaychayta munasqanchikta, Jehová munakuywan qhawasqanta yachayqa, ¡mayta sunquchawanchik, kallpachawanchik ima! ¿Icharí?

[Sutʼinchaynin]