Jesuspa yachachiykunasnin

Chiqa religión

¿Tukuynin religionestachu Dios allinpaq qhawan?

▪ Jesusqa, leymanta yachachiqkuna runasta chʼawkiyasqankumanta mayta llakikuq. Chayrayku discipulosninman nirqa: “Llulla profetasmanta allinta qhawakuychej; paykunaqa jamusunkichej ovejas jina pʼachallisqa, ukhunkupitajrí suwa atojkuna kanku”, nispa (Mateo 7:15). Arí, saqra runasqa, Diospa sutinpi imaymana saqra ruwaykunata ruwanku.

Juk kuti Jesús Tatanman jinata nirqa: “Nisqasniykeqa cheqapuni kanku”, nispa (Juan 17:17). Diosqa, ima religionchus Bibliap nisqanta mana ruwaqtaqa mana allinpaqchu qhawan. Chayrayku Jesusqa, leymanta yachachiqkunaman nirqa Jehová paykunapaqjina kayta nisqanta: “Qhasillata yupaychawanku. Paykunaqa Diospa yachachiyninta jina runaspa kamachisqallanta yachachinku” (Mateo 15:9).

¿Chiqa religión kanchu?

▪ Jesús juk samaritanaman nirqa: “Samaritanosqa mana yachasqaykichejta yupaychankichej”, nispa. Jesusqa, samaritanospa religionninku mana chiqatachu yachachisqanta yacharqa, nirqataq: “[Diosta] cheqatapuni yupaychajkunaqa tukuy sonqowan, cheqa kajman jinataj yupaychanqanku. Dios Tataqa ajina yupaychajkunata maskʼan”, nispa (Juan 4:22, 23). Chiqa yupaychaqkuna kasqanqa, juk chiqa religión kasqanta rikuchin.

Chay religionmantataq Jesús yachachirqa, nirqataq: ‘Mana imatapis sapallaymanta ruwanichu. Tatay yachachiwasqallanta parlani’, nispa (Juan 8:28). Chantá nillarqataq: “Ñoqa ñan kani, cheqa kajtaj, kawsaytaj; mana pipis Dios Tataman chayayta atinchu, mana noqanejta rispaqa”, nispa (Juan 14:6). Diosman qayllanapaq juk ñanlla, nisunman juk religionlla tiyan.

 ¿Imaynatá chiqa religionta tariwaq?

▪ Chiqa cristianosqa, tawaniqmanta Jesusjina ruwanku.

1. Jesús juk mañakuypi Tatanman nirqa: “Sutiykita rejsicherqani”, nispa (Juan 17:26). Chiqa cristianospis Diospa sutinta runasman riqsichillankutaq.

2. Jesusqa, Diospa Reinonmanta willarqa, discipulosninmanpis kikinta ruwanankupaq jinata kamachirqa: “May llajtallamampis, chayrí ranchomampis chayaspaqa, maskʼaychej pichus kʼacha runata”, nispa. Chantá nirqa: “Rispa, tukuy laya runasta yachachisqasniyman tukuchimuychej”, nispa (Mateo 10:7, 11; 28:19, 20). Kunanpis chiqa cristianosqa, Diospa Reinonmanta willachkasqankurayku riqsisqas kanku.

3. Jesusqa, ni jaykʼaq politicapi chhapukurqachu, nillataq discipulosninpis. Chayrayku nirqa: “Paykuna mana kay pachajpatachu kanku; noqapis manallataj kay pachajtachu kani”, nispa (Juan 17:14). Arí, chiqa cristianosqa, mana politicaman chhapukunkuchu.

4. Jesusqa, runata munakusqanrayku kawsayninta qurqa. Discipulosninmantaq nirqa: “Qankunachus munanakunkichej chayqa, tukuy runas yachanqanku yachachisqasniy kasqaykichejta”, nispa (Juan 13:35). Arí, chiqa cristianosqa, puraqmanta munanakunku manataq jatuchaq maqanakuykunasman rinkuchu.

¿Imaynatá chiqa religión runasta yanapan?

▪ Pillapis Biblia nisqanmanjina Diosta yupaychayta munan chayqa, allintaraq Diosta riqsinan tiyan. Diosta astawan riqsisqantaq kawsayninta allinchananpaq, Diosta astawan munakunanpaq ima yanapanqa. Jehová Diostaq pikunachus payta munakuqkunaman, wiñay kawsayta qunqa. Chayraykutaq Jesús nirqa: “Kaymin chay wiñay kawsayqa: Qan kʼata cheqa Diosta rejsisunanku”, nispa (Juan 17:3).

Astawan yachakuyta munaspaqa, kay librop 15 yachananta ñawiriy, ¿Imatapunitaq Biblia yachachin? Kaytaqa Jehovamanta sutʼinchaqkuna urqhunku.

[30 paginapi dibujo/foto]

“Llulla profetasmanta allinta qhawakuychej; paykunaqa jamusunkichej ovejas jina pʼachallisqa, ukhunkupitajrí suwa atojkuna kanku.” (Mateo 7:15)