Jesuspa yachachiykunasnin

¿Imaynatá kusiyta tarisunman?

¿Imatá kusisqa kanapaq necesitanchik?

▪ Jesusqa, urqupi yachachiyninta, kusiymanta parlaspa qallarirqa. Nirqataq: “May cusiskas cancu sonkoncupi Diosmanta pisiskas caskancuta khawacojcunaka”, nispa (Mateo 5:3, Dios Parlapawanchej). ¿Imatá Jesús niyta munarqa?

Runas, uywas ima, kawsanapaq mikhuyta, samayta, yakuta necesitanchik. Runasqa, mana chayllatachu kawsanapaq necesitanchik. Manaqa, Diosta. Ruwawaqninchik kasqanrayku, Paylla, imapaqchus kawsachkasqanchikta riqsichiyta atiwanchik. Jesustaq nirqa: “Mana tʼantallawanchu runaqa kawsanqa; astawanqa, Diospa siminmanta tukuy llojsimoj palabraswan kawsanqa”, nispa (Mateo 4:4). Arí, kusisqas kanapaqqa, Diosta necesitasqanchikta reparakunanchik tiyan. Payman, ‘kusikuq Diosninchikman’ qayllana tiyan (1 Timoteo 1:11, NM). Chantapis Payqa, aswan qhipaman kusiy kawsayta quwasun.

¿Imaynatá Jesús, juk suyayta quwanchik?

▪ Jesús nirqa: “Kusikuyniyojmin kanku llampʼu sonqoyojkunaqa, imaraykuchus paykuna kay pachata herenciankupaj japʼenqanku”, nispa (Mateo 5:5). Jesusqa, unqusqasta sanoyachispa, wañusqasta kawsarichispa ima, qhipapaq juk suyakuyta quwarqanchik. Nillarqataq: “Diosqa chay jinatapuni kay pachapi kaj chhikata munakusqanrayku, uj kʼata Churinta qorqa. Ajinamanta pillapis paypi creejqa mana chinkayman renqachu, astawanqa wiñay kawsayniyoj kanqa” (Juan 3:16). Arí, Jallpʼapi wiñaypaq kawsayta munanchik chayqa, Diosta kasukuspa, iñiyniyuq kana. ¿Manachu mana machuyaspa, kʼacha runaswan, kawsakuyta munawaq? Chayraykuchá Biblia, niwanchik: “Diospi suyakuspa, kusikuychej” (Romanos 12:12). Jesusqa, kay tiempopi kusisqa kawsakunapaq, yuyaychallarqataq.

 Kusiyta tarinapaq, ¿imatá Jesús ruwananchikta nirqa?

▪ Jesusqa, wakkunawan allinpi kawsakunamanta, qhariwarmi kawsaymanta, imaynatachus qhapaqyayta qhawanamanta, llampʼu sunqu kaymanta, wak kʼacha kaykunamanta ima, parlarqa (Mateo 5:21-32; 6:1-5, 19-34). Kay yuyaychaykunata kasukuy, kusisqa kawsanapaq yanapawasun.

Sutʼincharinapaq, wakkunaman qurinamanta parlasqanta yuyarina (Hechos 20:35). Juk kutipi nirqa: “Jatun mikhuyta waykʼuchispaqa, wajyakuy wajchasta, ñukʼusta, cojosta, ciegosta ima. Chaywanqa aswan kusikuyniyoj kanki, imaraykuchus paykunaqa mana kutichipusuyta atenqankuchu” (Lucas 14:13, 14). Arí, kusisqa kawsanapaqqa, wakkunap allinninkuta maskʼana, manataq allinnillanchiktachu.

¿Imataq aswan kusisqas kanapaq yanapawanchik?

▪ Wakkunata yanapayqa, kusisqa kawsanapaq yanapawanchik. Tukuy imamanta nisqaqa, Diosta sirviy, aswan kusiyta apamuwanchik. Chay kusiytaq, tatas wawasninkumanta kusiyninkuwanpis, mana kikinchakunmanchu. Juk kutipi, “uj warmeqa runas ukhumanta qhaparimorqa: Kusikuyniyojmin pi warmichus wijsampi apasorqa, pejpa ñuñuntachus ñuñorqanki, chay, nispa. Jesustajrí kuticherqa: Diospa Palabranta uyarispa kasojkunamari kusikuyniyojqa kanku”, nispa (Lucas 11:27, 28).

Jesusqa, Tatanpa munayninta juntʼaspa, may kusisqa kawsarqa. Wiñay kawsay kananmantataq parlarqa. Jinamanta, juk warmiman chay suyakuymanta sutʼinchaytawanqa, nirqa: “Mikhuyneyqa Kachamuwajniypa munayninta juntʼanay, ruwanantataj tukuychanay”, nispa (Juan 4:13, 14, 34). Ñuqanchikpis, Dios kamachiwasqanchikta, juntʼaptinchik kusiyta tarisunchik.

Astawan yachakuyta munaspaqa, kay librop 1 yachaqananta ñawiriy. Kaytaqa, Jehovamanta sutʼinchaqkuna urqhunku. ¿Imatapunitaq Biblia yachachin?

[16 paginapi dibujo/foto]

Kusisqa kawsanapaqqa, imapaqchus kawsachkasqanchikta yachananchik tiyan